1 Пэ пхув сас бокх, — най кодыя бокх сави сас, сар сас жундо о Авраамо, — тай жал о Исаако каринг о Авимелехо, о филистимско тхагар андо Гераро. 2 О РАЙ сыкадиляпэ лэ Исаакости тай пхэндя:

— На жа андо Египто. Жув пэ кадыя пхув, кай Мэ пхэнава тути тэ жувэс. 3 Жув ту пэ кадыя пхув пэ времятэ, ай Мэ авава туса тай бахталисарава тут. Мэ стерава кода, андэ со солахаем терэ дадэсти лэ Авраамости, тай дава саворэ кадыла пхуя тути тай терэ бэятонэнди. 4 Мэ стерава, со тутэ авэна бут бэяцэ, сар э чергая по нэбо, тай дава лэнди саворэ кадыла пхуя, тай па терэ бэяцэ авэна бахталисардэ э народуря па ся пхув, 5 пала кода со о Авраамо кандэлас Ман тай фирияс алава, савэнца Мэ сыкадэм, савэ Мэ устходэм тай припхэндэм.

6 О Исаако ашыля тэ жувэл андо Гераро. 7 Кала э мануша, савэ жувэнас андэ кодыва тхан, пушлэ лэстар пала лэстери ромни, вов пхэндя: «Када мэрни пхэй». Вов дарайля тэ пхэнэл: «Када мэрни ромни». Вов гындосарэлас: «Э мануша кадылэ тханэсти умарэна ман важ э Ревэка, пала кода со вой шукарни».

8 Екхвар, кала о Исаако прожудя котэ бут время, о Авимелехо, о филистимско тхагар, дикхэлас тэлэ андай фэлястра тай додикхэл, сар о Исаако малий пэстеря ромня ла Ревэка. 9 Тунче о Авимелехо акхардя лэс пэстэ и пхэндя:

— Акэ, пэ чячимастэ, вой сыни тери ромни! Пала со ж ту пхэндян: «Вой мэрни пхэй»?

О Исаако пхэндя лэсти:

— Мэ гындосарэлас, со пала латэ ман умарэна.

10 Тунче о Авимелехо пхэндя:

— Со ж ту тердян амэнца? Екх лэ муршэндар камэлас тэ пашлилол теря ромняса, тай ту андя бы пар амэндэ дош.

11 О Авимелехо пхэндя саворэ манушэнди:

— Ко тумэндар терэла вырыто кадылэ манушэсти тай лэстеря ромняти, кодыва авэла умардо.

12 О Исаако шутя о ворзо пэ маля андэ кодыя пхув тай андэ кодыва жэ бэрш стидя шэлвар майбут. О РАЙ бахталисардя лэс. 13 О Исаако ашыля барвало, лэско барвалимос ашэлас майбут, тай вов ашыля фартэ барвало. 14 Лэстэ сас кацавэ барэ гуртуря цыкно тай баро ското тай скати бутярнэ, со э филистимлянуря ритярэнас холи пэр лэстэ. 15 Вонэ зашутэ саворэ хаинга ла пхуяса, савэ виганадэ лэсти дадэстерэ бутярнэ, кала инке лэско дад о Авраамо сас жундо.

16 Тунче о Авимелехо пхэндя лэ Исаакости:

— Жатар амэндар, ту ашылян майзор амэндар.

17 О Исаако жылятар котар, тай стходя э катунэ по машкарплаенго тхан Гераро и жувэлас котэ. 18 О Исаако вужардя э хаинга, савэ сас виганадэ инке лэстерэ дадэса лэ Авраамоса, ай сар о Авраамо муля, лэн зашутэ пхуяса э филистимлянуря. О Исаако дэл лэнди кацавэ ж алава, савэ данглал дясас лэско дад.

19 Э бутярнэ лэ Исаакости линэ тэ ганавэн пэ кодыва тхан тай пхэрнавэн котэ хаинг паеса, саво марэлас андай пхув, 20 ай э герароски пастухоря тердэ чингар лэ Исаакостерэ пастухонэнца. Вонэ пхэндэ: «Када амаро паи!» Вов дя ла хаингати алав Эсэко[a], пала кода со важ латэ сас чингар. 21 Тунче вонэ виганадэ авэр хаинг, и важ латэ тердэ чингар. Вов дя лати алав Ситна[b]. 22 Вов жылятар котар тай виганавдя инке екх хаинг, пала сави на сас чингар. Вов дя лати алав Рэховото[c] тай пхэндя: «Акана о РАЙ дя амэнди бугло тхан. Амэ жуваса катэ, тай пэ кадыя пхув амэн авэла майбут».

23 Тунче о Исаако жылятар андэ Вирсавия. 24 Андэ кодыя ж рят о РАЙ сыкадиля лэсти тай пхэндя:

— Мэ сым о Дэл лэ Авраамоско, терэ дадэско. На дара, Мэ сым туса. Мэ бахталисарава тут тай терава, со терэ бэятонэн авэла майбут важ Мэрно копэли о Авраамо.

25 О Исаако стердя котэ жэртвенико тай тэлиля лэ РАЕСТИ. Вов стходя пэсти катуна, ай лэстерэ бутярнэ линэ тэ ганабэн э хаинг.

26 Тунче авиля каринг лэстэ анда Гераро о Авимелехо екхтанэ лэ Ахузатоса, лэско подпхэндимарэса, тай лэ Фихолоса, о барэдэрэса пэ лэстерэ халавдэ. 27 О Исаако пушля лэндар:

— Ай со тумэ авилэ мандэ, ке тумэ сас холяти пэр мандэ тай витрадэ ман?

28 Вонэ пхэндэ:

— Амэ мишто дикхлям, со туса о РАЙ, тай амэ камас, соп ту и амэ трэбуй тэ солахас тай тэ допхэнаспэ. Терам союзо, 29 со ту нисо на терэса амэнди вырыто, сар и амэ на мардям тути, ай ся время обжасаспэ туса мишто тай отмэклям тут тэ жастар лашымаса. Ай акана ту сан бахталисардо лэ РАЕСА.

30 О Исаако стходя лэнди лащи мисяля, и вонэ халэ тай пилэ. 31 Пэ авэр дес кати кай э тэсара вонэ солахае екх екхэсти, о Исаако отмукля лэн, тай вонэ жылэтар лашымаса.

32 Андэ кодыва ж дес авилэ э бутярнэ лэ Исаакости тай роспхэнэн лэсти пала э хаинг, сави вонэ виганадэ. Вонэ пхэндэ:

— Амэ аракхлям о паи!

33 Вов дя алав ла хаингати Шыва[d], тай жы адесутнэ десэстэ о алав кадылэ фороско исы Вирсавия[e].

34 Кала лэ Исавости ашыля саранда бэрша, вов ля пала пэстэ ла Ехудита, лэ хетеёстеря лэ Бээриёстеря щя, тай лэ Басемата, лэ хетеёстеря лэ Элоностеря щя, 35 тай лэндар сас бут вырытимос лэ Исаакости тай ла Ревэкати.

<- Англунимос 25Англунимос 27 ->