1 О Авраамо сас андэ пхуранэ бэрша, и о РАЙ бахталисардя лэс саворэса. 2 О Авраамо пхэндя лэ барэдэрэ бутярнэсти андэ пэско чер, саво хулаияс пэ ся, со сас лэстэ:

— Стхов о васт теро мандэ пэ пулпа 3 тай солаха манди лэ РАЕСА, Саво сыно Дэл лэ нэбоско тай Дэл ла пхуяко, со ту на лэса мэрнэ шавэсти ромня кай э ханаанея, машкара савэ мэ жував, 4 ай жаса каринг о тхан, кай мэ аракхадилэм, каринг мэрнэ родуря, тай котэ лэса ромня мэрнэ шавэсти лэ Исаакости.

5 О бутярно пушля лэстар:

— Ай со, сар кодыя жувли на закамэла тэ жал манца кардэ, андэ кадыя пхув? Со манди тунче тэ терав, тэ рисарав терэ шавэс андэ кодыва тхан, катар ту авилян?

6 О Авраамо пхэндя:

— Соп тэ на терэлпэ, на рисар инчя мэрнэ шавэс. 7 О РАЙ, Дэл лэ нэбоско, Саво виндярдя ман анда чер лэ дадэско тай па тхан, кай аракхадилем, Саво дэлас дума манца тай солахаясас манди, пхэндя: «Мэ отдава кадыя пхув терэ бэяцэнди», Вов бишалэла Пэстерэ янголос англа тутэ, соп ту тэ лэс котар ромня важ мэрно шаво. 8 Сар кай э жувли на закамэла тэ жал туса, тунче ту авэса фирисардо кадыла солахатар. Дикх, на рисар инчя мэрнэ шавэс.

9 О бутярно стходя о васт пэ пулпа лэ Авраамости, пэстерэ раести, и солахая лэсти. 10 Тунче о бутярно ля дэш вэрблюдонэн пэстерэ раестар, стходя пэр лэндэ майлашэ подаркуря и жылятар андо дром. Вов жылятар андо Арам-Нахараимо, па дром каринг форо, кай жувэлас о Нахоро. 11 Сар ля тэ рятёл, вов тэлярдя лэ вэрблюдонэн пэ чянга катар э хаинг палай бэли лэ форости, кала э жувля авэн пала паи. 12 Вов пхэндя:

— О, РАЙ, Дэл мэрнэ хулаеско лэ Авраамоско! Дэ манди адес тэ полав тай сыкав о тынгимос мэрнэ хулаести лэ Авраамости. 13 Акэ, мэ тэрдював катар э хаинг, тай э щея лэ форостар авэн пала паи. 14 Мэк авэла кадя. Сар мэ пхэнава ла щяти: «Мангав тут, змэк о кхоро па пхико, соп мэ тэ пав паи», ай вой тэ пхэнэн: «Пи, ай мэ дава паи и терэ вэрблюдонэнди», кода вой авэла, савя Ту витидян важ о Исаако, Теро копэли. Кадя мэ уганава, со Ту сыкадян о тынгимос мэрнэ хулаести.

15 Вов инке мангэласпэ, сар каринг э хаинг авиля э Ревэка лэ кхорэса по пхико, вой сас щей лэ Бетуилости, саво сас шаво ла Милкако, э ромни лэ Нахорости, саво сас пхрал лэ Авраамости. 16 Вой сас фартэ шукарни щей, бахтали щеёры, сави инке на сас муршэса. Вой змэкляпэ тэлэ каринг э хаинг, пхэрдя о кхоро лэ паеса и жыля палпалэ. 17 О бутярно подпрастая каринг латэ и пхэндя:

— Мангав тут, дэ манди найбут паи тэ пав анда теро кхоро.

18 — Пи, мэрно рай, — пхэндя вой, йито змэкля о кхоро пэ васта тай дя лэсти тэ пэл. 19 Кала вов пиля, чялиля, вой пхэндя:

— Мэ пхэрава паеса э балая и важ терэ вэрблюдуря, жы кай вонэ на чялёна.

20 Вой йито вишутя о паи анда кхоро андэ балаи, прастая упалэ каринг э хаинг тэ лэл инке паи тай пхэрэл э балая важ саворэ лэстерэ вэрблюдуря. 21 Вов мулкумиш лэлас сама пала латэ, камэлас тэ полэл, дя ли о РАЙ бахт лэсти пала со вов авиля.

22 Кала э вэрблюдуря парашылэ тэ пэн о паи, кодыва мануш виля сомнакуни чен важ о нак, пхаримаса андэ екх бэка[a], тай дуй сомнакунэ базаликэ, пхаримаса андэ дэш шэкеля[b], 23 и пушля:

— Пхэн манди, касти щей ту сан? Исин ли кай теро дад андэ лэско чер тхан, соп амэнди тэ рятярас?

24 Вой пхэндя лэсти:

— Мэ сым лэ Бетуилости щей, вов сыно шаво ла Милкако, савэс вой андя лэ Нахорости. — 25 И инке пхэндя:

— Амэндэ исы бут сулума тай ворзо, тай исы тхан кай тэ рятярэн.

26 Тунче вов пэля пэ чянга, ля тэ ашарэл лэ РАЕС 27 тай пхэндя:

— Бахталисарав лэ РАЕС, лэ Дэвлэс мэрнэ раеско лэ Авраамоско, Саво на ашадя би Пэстерэ тынгимаса тай чячимаса мэрнэ раес, пала кода со о РАЙ андя ман ворта каринг о чер каринг родо мэрнэ раеско.

28 Э щей прастая черэ и роспхэндя ся пэстеря дати. 29 Кай э Ревэка сас пхрал, лэс акхарэнас Лавано, тай вов грабимаса жыля каринг кодыва мануш катар э хаинг. 30 Кати вов дикхля э чэн важ о накх тай э базаликэ пэ васта кай пэсти пхэй и ашундя э дума ла Ревэкати пала кода, со пхэндя лати кодыва мануш, вов жыля каринг о копэли лэ Авраамоско, ай кодыва кадя и тэрдёлас лэ вэрблюдонэнца катар э хаинг.

31 — Авэн амэндэ, бахталисардо лэ РАЕСТАР, — пхэндя о Лавано. — Состар ту тердёс аврял? Мэ гэтосардэм о чер тай о тхан важ э вэрблюдуря.

32 Кодыва мануш зажыля андо чер, тай пай вэрблюдуря излинэ о паримос. Лэ вэрблюдонэнди андэ сулум тай ворзо, ай лэсти тай лэстерэ манушэнди андэ паи тэ халавэн э пэрнэ. 33 Лэнди стходэ тэ хан, ай вов пхэндя:

— Мэ на лава тэ хав, покэ на роспхэнава пала мэрнэ делуря.

— Роспхэн амэди, — пхэндя о Лавано.

34 — Мэ сым бутярно лэ Авраамоско. 35 О РАЙ бут бахталисардя мэрнэ хулаес, тай вов ашыля барвало. Вов дя лэсти бакрэн, бузнэн тай гурувэн, руп тай сомнак, бутярнэн тай бутярнян, вэрблюдонэн тай ослонэн. 36 Мэрнэ хулаести ромни э Сарра андя шавэс, кала сас пхури, и вов отдя лэ шавэсти ся, со исы лэстэ. 37 Мэ солахаем мэрнэ раести, кала вов пхэндя манди: «На лэ ромня мэрнэ шавэсти, лэ щеян кай э ханаанея, пэ кастери пхув мэ жував. 38 Ай жа каринг мэрнэ дадэско ери, каринг мэрнэ родуря, и лэ котар ромня мэрнэ шавэсти». 39 Тунче мэ пушлэм мэрнэ раестар: «Ай со, сар кай кодыя жувли на закамэла тэ жал манца?» 40 Вов пхэндя: «О РАЙ, англа Кастэ мэ пхирав, бишалэла туса Пэстерэ янголос тай дэла тути бахт, пала со ту жас, соп ту тэ лэс ромня мэрнэ шавэсти мэрнэ родостар тай анда мэрнэ дадэско ери. 41 А кала ту жаса каринг мэрно родо, и сар кай вонэ на отдэна ла тути, тунче авэса фирисардо кадыла солахатар». 42 Кала мэ адес авилэм каринг э хаинг, мэ пхэндэм: «О РАЙ, Дэл мэрнэ раеско лэ Авраамоско, мангав Тут, дэ бахт колэсти, пала со сым бишалдо! 43 Акэ мэ тердював катар э хаинг: сави щей авэла пала паи ай мэ пхэнава лати: «Мангав тут, дэ манди паи тэ пав анда теро кхоро», 44 ай вой тэ пхэнэл манди: «Пи, ай мэ пхэрава э балая и терэ вэрблюдонэнди», кода кадыя, савя о РАЙ витидя важ о шаво мэрнэ раеско».

45 Инке мэ мангаваспэ андэ мэрно ди, кала вижыля э Ревэка лэ кхорэса по пхико. Вой змэкляпэ каринг э хаинг и ля о паи. Мэ пхэндэм лати: «Мангав тут, дэ манди паи тэ пав». 46 Вой йито змэкля о кхоро па пхико и пхэндя: «Пи, ай мэ дава паи терэ вэрблюдонэнди». Мэ пилэм паи, ай вой дэлас паи лэ вэрблюдонэнди. 47 Мэ пушлэм латар: «Касти ту сан щей?» Вой пхэндя: «Мэ сым лэ Бетуилости щей, вов сыно лэ Нахороско шаво, савэс андя лэсти э Милка». Тунче мэ дэм лати э чен важ о нак тай э базаликэ пэ латерэ васта. 48 Мэ пэлэм пэ чянга тай лэм тэ бахталисарав лэ РАЕС мэрнэ раестерэ лэ Авраамостерэ Дэвлэс, Саво андя ман чячюнэ дромэса тэ лав мэрнэ раестерэ пхралэстеря внучка пала лэско шаво. 49 Акана, сар тумэ терэна чячимос тай тынгимос мэрнэ раести, кадя и пхэнэн манди, ай сар на камэн, пхэнэн манди, кай мэ тэ ганав, со манди тэ терав.

50 О Лавано тай о Бетуило пхэндэ лэсти:

— Кадыя дила жал лэ РАЕСТАР, най амэнди тэ пхэнас тути, тэ отдас чи тэ на отдас. 51 Акэ э Ревэка англа тутэ, залэ ла и жа, тай мэк вой авэла ромни терэ раестерэ шавэсти, сар пхэндя о РАЙ.

52 Кала о бутярно лэ Авраамоско ашундя кадыя дума, вов тэлиля лэ РАЕСТИ жы каринг э пхув. 53 Тунче вов виля лащи йида тай сомнакунэ тай рупунэ шукарима и дя лэн ла Ревэкати. И лати пхралэсти тай латеря дати дя кучютнэ подаркуря. 54 Вов тай лэстерэ мануша, ко сас лэса, халэ, пилэ тай ашэнпэ тэ рятярэн. Кала пэ авэр дес тэсара вонэ ущилэ, вов пхэндя:

— Отмэкэн ман, мэ камав тэ жавтар каринг мэрно рай.

55 Ай лако пхрал тай э дэй пхэндэ:

— Мэк э щей ашэлпэ амэнца инке деса пэ дэш, тунче жанатар.

56 Ай вов пхэндя:

— На заритерэн ман, о РАЙ дя манди бахт тэ стерав кадыя дила. Отмэкэн ман андо дром, соп мэ рисайвав каринг мэрно рай.

57 Вонэ пхэндэ:

— Акхарам ла щея тай пушаса латар.

58 Вонэ акхардэ ла Ревэка тай пушэн латар:

— Ту жаса кадылэ манушэса?

— Жава, — пхэндя вой.

59 Ай вонэ бишалдэ пэстеря пхэя ла Ревэка андо дром екхтанэ ла бутярняса, сави барярдя ла, лэ Авраамостерэ бутярнэса тай лэстерэ манушэнца, савэ сас лэса. 60 Вонэ бахталисардэ ла Ревэка тай пхэндэ лати:

— Пхэй амари, тэ авэн терэ бэяцэ адиномэ панглянца тай инке панглянца, тай тэ залэн терэ бэяцэ пэстерэ ворогонэдерэ форуря.

61 Э Ревэка тай лати бутярни стидэпэ, бэшлэ пэ вэрблюдуря тай жылэ пала копэли лэ Авраамоско.

62 О Исаако рисайля анда Бээр-Лахай-Рои — вов жувэлас андо Негево, — 63 и акэ, вэчероса вов вижыля андэ мал, тай додикхля, со жан э вэрблюдуря. 64 И э Ревэка додикхля лэ Исаакос, змэкляпэ па вэрблюдо тэлэ 65 тай пушля кай о бутярно:

— Ко кода мануш, саво жал пай мал каринг амэндэ?

— Кода мэрно хулай, — пхэндя о бутярно. Тунче вой ушардя о шэро лэ кхоснэса.

66 О бутярно роспхэндя лэ Исаакости пала ся, со вов стердя. 67 О Исаако зандярдя ла Ревэка андэ катуна пэстеря датэ ла Саратэ тай ля ла ромняса. Вой ашыля лэсти ромни, тай вов покамля ла. Кадя о Исаако уляпэ пэстеря грижатар тунче, сар муля лэстери дай.

<- Англунимос 23Англунимос 25 ->