1 О Аврамо ла ромняса и саворэ барвалимаса жылятар анда Египто андо Негево, и о Лото жыля лэса. 2 Кай о Аврамо сас бут ското, руп и сомнак. 3 Анда Негево вов жалас англэ, покэ на авиля андо Вефилё, каринг кода тхан, кай варикала тэрдёлас лэсти катуна, машкара Вефилё и Гаё, 4 каринг кода тхан, кай вов данглал стердя о жэртвенико. Котэ о Аврамо тэлиля лэ РАЕСТИ.

5 Кай о Лото, саво пхирэлас лэ Аврамоса, кадя ж сас гурто бузнэн, бакрэн и гурувэн и катунэ, 6 и э пхув нащи пропараварэлас лэн дуен: лэндэ сас кадя бут ското, со лэндэ на вижалас тэ жувэн екхэтанэ. 7 Машкара пастухуря лэ Аврамостерэ и лэ Лотостерэ тердяпэ чингар. Тунче котэ, пэ кодыя пхув, жувэнас э ханаанея и э перизея.

8 О Аврамо пхэндя лэ Лотости:

— На трэбуй амэнди тай амарэ пастухонэнди тэ терэл чингар, амэ ж туса сам родуря. 9 Дикх, ся пхув англа тутэ! Дэ розжампэ: сар ту жаса андэ екх риг, то мэ жава андэ авэр риг.

10 О Лото подикхля и додикхля, со ся пхув паша Иордано жы каринг о Цоаро драго протиндёлас лэ брышындэндар, сар о садо лэ РАЕСКО, сар э пхув андо Египто. Када сас жы колэстэ, сар о РАЙ спхабардя о Содомо тай э Гомора. 11 О Лото витидя пэсти ся пхув паша Иордано и жылятар по востоко. Вонэ розжылэпэ: 12 о Аврамо жувэлас пэ пхув Ханаано, ай о Лото жувэлас машкара форуря пэ мал, стходя э катунэ найдур лэ Содомостар. 13 Э мануша андо Содомо саслэ вырытэ и бут терэнас бэзэха англа РАЙ.

14 Кала о Лото отжыля, о РАЙ пхэндя лэ Аврамости:

— Обдикхпэ ригатар колэ тханэстар, кай ту екхатар. Подик по северо и по юго, по востоко и по западо. 15 Ся пхув, сави ту дикхэс, Мэ дава тути и терэ потомконэнди пэ ся время. 16 Мэ стерава, со тутэ авэна бут бэяцэ, сар о чишай. Сар нащи тэ пэрэадиной о чишай, кадя и нащи авэла тэ пэрэадиной и терэ потомкуря. 17 Жа, прожа пай кадыя пхув дэлунга и дэбугла. Мэ дава ла тути.

18 О Аврамо стидя э катунэ и жыля тэ жувэл найдур ла тэрэбинторо вэшоро Мамрэ андо Хевроно. Вов стердя котэ жэртвенико лэ РАЕСТИ.

<- Англунимос 12Англунимос 14 ->