1 Podsetin e manušen te pokorinen pe e vladarenđe hem zako vlastija, te oven poslušna, hem spremna zako svako šukar delo. 2 Podsetin len nikastar te na vaćeren bišukar, te na oven kavgađije, hem te oven krotka hem ljubazna premalo sa o manuša.

3 Adalese so hem amen nekad injamle nerazumna, neposlušna, hovavde, robujinđam zako požude hem zako zadovoljstvija oti svako vrsta, nakhavindoj amaro dživdipe ano bišukaripe hem ani zavist. Mrzinde amen hem amen mrzinđam jekh avere.

4 A kad amaro Spasitelji, o Devel, mothovđa plo šukaripe hem plo mangipe e manušenđe, 5 ov spasinđa amen, ali na zbog amare pravedna delja save ćerđam, nego zbog plo milosrđe. Ov spasinđa amen prekalo thojba e neve bijandipnastar hem obnovinđa amen e Svetone Duhoja. 6 O Devel upra amende barvale čhorđa e Svetone Duho prekalo Isus Hrist, amaro Spasitelji, 7 te šaj, opravdime pali lesiri milost, te ova naslednici e večnone dživdipnastar savese nadinaja amen. 8 Akavai čačikano lafi, hem adalese mangava zorale te tvrdine, ađahar te šaj hem okola so verujinena ano Devel te posvetinen pe te ćeren šukar delja. Akavai šukar hem korisno e manušenđe.

9 Cide tut taro hulava debate hem taro rodoslovija, taro kavge hem taro rasprave zbog o Zakoni, adalese soi sa adava beskorisno hem nane vredno. 10 E manuše kova anela podela opomenin jekhvar, hem o dujto puti, a palo adaleste, ma više ništa te ovel tut oleja, 11 adalese so džane dai esavko manuš rumime hem da grešini. Ov korkoro pes osudinđa.

12 Kad ka bičhalav tute e Arteme ili e Tihike, de sa tutar te ave đi mande ko Nikopolj, adalese so adari mangava te nakhavav o jevend. 13 E Zino e advokate hem e Apolose šukar pomožin ko sa so valjani lenđe zako drom, te na falini lenđe ništa. 14 A hem amare manuša nek sikljoven te posvetinen pe te ćeren šukar delja kaj zako adava čače isi potreba, te na živinen beskorisno dživdipe.

15 Pozdravinena tut sare kolai mancar akate. Pozdravin sarijen kola volinena amen ani vera.

I milost tumencar sarijencar.

<- Tit 2