2 Molinava e Evodija hem e Sintiha te oven složna ano Gospod. 3 Oja, hem tut molinava, mle čačikane amale, pomožin adale đuvljenđe te oven složna, adalese so phari buti ćerde zajedno mancar ko vaćeriba o evanđelje, zajedno e Klementeja hem mle avere saradnikonencar, kaserei anava zapisime ani Knjiga e dživdipnasiri.

4 Radujinen tumen ano Gospod uvek! Palem phenava: radujinen tumen! 5 Nek tumari nežnost ovel pendžarutni sa e manušenđe. O Gospodi paše! 6 Ma brininen tumen zako ništa, nego ano sa molibnaja hem rodibnaja ano zahvaliba anen tumare molbe anglo Devel, 7 hem e Devlesoro mir savoi upreder svako manušikano haljojba ka arakhi tumare vile hem tumare mislija ano Hrist Isus.

8 Ko kraj, phraljalen, mislinen oto sa soi čačikano, soi plemenito, soi pravedno, soi čisto, soi ljubazno, soi ko šukar glaso, soi časno, soi vredno te hvalini pe. 9 Ćeren okova so mandar sikliljen, priminđen, šunđen ili dikhljen, hem o Devel, kova dela mir, ka ovel tumencar.

10 But radujinav man ano Gospod so palem mothovđen da brininena tumen maje. Tumen hem angleder brininđen maje, ali na ine tumen prilika adava te mothoven. 11 Na phenava akava adalese so injum ani potreba, adalese so, sikliljum te ovav zadovoljno ano sa o situacije. 12 Džanav sari kadi manuš ani potreba, hem džanav sari kad isi le but. Sikliljum ko sa: hem te ovav čalo hem te ovav bokhalo, hem te ovel man but hem te na ovel man dovoljno. 13 Sa adava šaj ano Hrist kova dela man zoralipe.

14 A palem, šukari adava tumendar so pomožinđen maje ani mli nevolja. 15 A hem tumen, o Filipljanja, džanen: pana ko početak kad priminđen o evanđelje, kad dželjum tari Makedonija, nijekh khanđiri na dinđa man pomoć, sem tumende. 16 Čak hem ko Solun više puti bičhalđen maje pomoć kad injumle ani potreba. 17 Nane da rodava daro tumendar, nego rodava tumen te priminen nagrada zako tumaro dejba. 18 Akana isi man sa so valjani maje hem buderi sar e Epafroditestar priminđum okova so bičhalđen maje. Tumaroi daro sar prijatno miris, prihvatljivo hem šukar žrtva e Devlese. 19 A mlo Devel, palo barvalipe oti pli slava ano Hrist Isus, ka pherel svako tumari potreba.

20 E Devlese, amare Dadese, nek ovel slava zauvek. Amen.

21 Pozdravinen sa e Devlesere manušen ano Hrist Isus. Pozdravinena tumen o phralja kolai mancar. 22 Pozdravinena tumen sa e Devlesere manuša, a posebno okola tari palata e carosiri.

23 I milost e Gospodesiri e Isuse Hristesiri tumare duhoja.

<- Filipljanenđe 3