1 Adalese, te injen vazdime taro mule e Hristeja, roden okova soi upre, adari kaj o Hrist bešela e Devlese oti desno strana. 2 Mislinen ko okova soi upre, a na ko okova soi ki phuv. 3 Adalese so, tumen muljen hem tumaroi dživdipe garavdo e Hristeja ano Devel. 4 A kad ka mothoj pe o Hrist, tumaro dživdipe, tegani hem tumen oleja ka mothoven tumen ani slava.

5 Adalese, mudaren okova soi akala phuvjakoro ana tumende: o blud, i nečistota, i požuda, i bišukar želja, i pohlepa – soi idolopoklonstvo. 6 Zbog esavke stvarija avela e Devlesiri holi [upro okola kolai lese neposlušna]. 7 Hem tumen nekad dželjen adale dromeja kad živinđen ano adala grehija. 8 A akana frden tumendar sa akava: o gnev, i holi, o bišukaripe, o vređiba, o lađutne lafija tumare mujestar. 9 Ma hovaven jekh avere, adalese so huljavđen tumendar e purane manuše sa olesere delja, 10 a urđen e neve manuše, kova ovela obnovime premali slika ple Stvoriteljesiri sar te šaj šukar džanen le. 11 Adathe nane više razlika maškaro Grco hem Jevrejco, obrezime hem biobrezime, stranco hem necivilizovano, robo hem slobodnjako, negoi o Hrist sa hem ovi ano sarijende.

12 Adalese so injen e Devlesere izabirime manuša, sveta hem volime, urjen tumen ano milosrđe, ani ljubaznost, ani poniznost, ani krotkost hem ani strpljivost. 13 Podnosinen jekh avere hem oprostinen jekh averese kad neko ćerela tumenđe nesavo bišukaripe. Sar so o Gospod oprostinđa tumenđe, ađahar hem tumen oprostinen averenđe. 14 Upro sa adava urjen o mangipe, savo sa adava ićeri ano savršeno jedinstvo.

15 Nek e Hristesoro mir, ko savo injen vičime ano jekh telo, vladini ano tumare vile. Hem oven zahvalna. 16 Nek e Hristesoro lafi ana tumende barvale živini. Sikaven hem opomeninen jekh avere ani sa i mudrost. Ani zahvalnost ano vile đilaben psalmija, zahvalna hem duhovna đilja e Devlese. 17 Sa so ćerena ili so vaćerena, sa ćeren ano anav e Gospodesoro e Isusesoro, zahvalindoj e Devlese e Dadese prekalo leste.

18 Romnjalen, pokorinen tumen tumare romenđe, sar so dolikujini okolenđe kolai ano Gospod.

19 Romalen, volinen tumare romnjen hem ma oven gruba premalo lende.

20 Čhavalen, ano sa šunen tumare dade hem e daja, adalese soi adava šukar e Gospodese.

21 Dadalen, ma ogorčinen tumare čhaven, te na oven obeshrabrime.

22 Robonalen, ano sa šunen tumare phuvjakere gospodaren, na samo kad on dikhena tumen, sar okola kola mangena te ulizinen pe lenđe, nego čačikane vileja, ani dar e Gospodestar. 23 Sa so ćerena, ćeren taro vilo, sar dai zako Gospod, a na zako manuša, 24 adalese so džanen da e Gospodestar ka priminen sar nagrada o nasledstvo. Služinen e Hristese kovai čačikano Gospodari! 25 Adalese so, okova kova ćerela bišukaripe, ka ovel kaznime zako bišukaripe savo ćerđa. O Devel na dikhela koi kova.

<- Kološanenđe 2Kološanenđe 4 ->