1 Počinaja li palem te hvalina korkore amen? Ili, amenđe li valjani, sar averenđe, pisime preporuke zako tumenđe ili tumendar? 2 Tumen injen amaro lil, zapisime ano amare vile, save džanen hem čitinena sa o manuša. 3 Tumen mothovena da injen e Hristesoro lil, sastavime amara službaja, lil savo nane pisime mastiloja, nego e dživde Devlesere Duhoja, na ko ploče oto bar, nego ko ploče oto manušikane vile.

4 Esavko pouzdanje isi amen anglo Devel prekalo Hrist. 5 Adava na značini da amen tvrdinaja da injam sposobna te ćera bilo so korkore amendar – amari sposobnost avela taro Devel. 6 Ov amen osposobinđa te ova službenici zako Nevo savez, na zako pisime zakoni, nego zako Duho. Adalese so o pisime zakoni anela meriba, a o Duho dela dživdipe.

7 I te i služba e meribnasiri, savi slovonencar inele urezime ano bar, sijajinđa esavka slavaja, da o Izraelci našti ine te dikhen o muj e Mojsijasoro zbog i prolazno slava lesere mujesiri, 8 kobor li tek po slavno i služba e Duhosiri? 9 Adalese so, te inele slavno i služba savi anela osuda, kobor li tek po slavno i služba savi anela pravednost? 10 Čače, okova so inele slavno nane slavno kad uporedini pe e slavaja savi po uzvisime. 11 Adalese so, te okova soi prolazno inele slavno, kobor li tek po slavno okova so trajini zauvek?

12 I adalese so isi amen esavki nada, vaćeraja ani sa i sloboda. 13 Amen na injam sar o Mojsije kova učharđa plo muj veoja sar te na dikhen o Izraelci o završetak e slavakoro savi prolazno. 14 Ali, lengere gođa inele phandle, adalese so sa đi ko akava dive kad god čitini pe o Purano zavet, isto veo učhari lengere gođa te našti haljoven o čačipe. A adava veo šaj te cidel pe samo ano Hrist. 15 Ađahar hem avdive kad čitinena pe e Mojsijasere lila, o veo učhari lengere vile. 16 Ali kad god neko poverujini ano Gospod, o veo ovela cidime. 17 O Gospodi Duho, a kaj o Duho e Gospodesoro, adari i sloboda. 18 A sare amen mujeja savo nane učhardo reflektujinaja e Gospodesiri slava hem ovaja preobrazime ani lesiri slika – oti slava ani slava savi avela e Gospodestar, kovai Duho.

<- 2. Korinćanenđe 22. Korinćanenđe 4 ->