1. Jovan 2

1 Mle čhavoralen, akava pisinava tumenđe te na grešinen. Ali, hem te neko ćerela greh, isi amen Zastupniko koro Dad, e Isuse Hriste, e pravedniko. 2 Ovi žrtva dindi zako oprostiba amare grehengoro, hem na samo amare nego hem sa e manušengere grehengoro.

O vernici valjani te ićeren pe ko naredbe e Devlesere

3 A palo akava džanaja da pendžaraja le: te ićeraja amen ko lesere naredbe. 4 Okova kova vaćeri da pendžari le, a na ićeri pe ko lesere naredbe, ovi hovavno hem ano leste nane čačipe. 5 A ko ićeri pe ko lesere lafija, ano leste o mangipe e Devlesoro čače alo đi ko savršenstvo. Palo adava džanaja da injam ano leste. 6 Ko vaćeri da ačhola ano leste, ov mora te živini ađahar sar so o Hrist živinđa.

Nevi naredba

7 Mle manglalen, na pisinava tumenđe nesavi nevi naredba, nego i purani naredba savi ine tumen taro anglunipe. Adaja purani naredbai o lafi savo šunđen. 8 A palem, pisinava tumenđe nevi naredba, savakoro čačipe dičhola ano leste hem ana tumende. Adalese so, i tomina nakhela, a o čačikano svetlost već sijajini.

9 Ko vaćeri dai ano svetlost, a mrzini ple phrale, panai ani tomina. 10 Ko volini ple phrale, živini ano svetlost hem nane so te peraj le ano greh. 11 A ko mrzini ple phrale, ovi ani tomina – phirela ani tomina hem na džanel kaj džala, adalese so i tomina korjarđa lesere jaćha.

12 Pisinava tumenđe, čhavoralen,

adalese soi tumare grehija oprostime zbog olesoro anav.

13 Pisinava tumenđe, dadalen,

adalese so pendžarđen okole kovai taro anglunipe.

Pisinava tumenđe, terne muršalen,

adalese so pobedinđen e Bišukare.

14 Pisinđum tumenđe, čhavoralen,

adalese so pendžarđen e Dade.

Pisinđum tumenđe, dadalen,

adalese so pendžarđen okole kovai taro anglunipe.

Pisinđum tumenđe, terne muršalen,

adalese so injen zorale

hem so e Devlesoro lafi živini ana tumende

hem so pobedinđen e Bišukare.

15 Ma volinen akava sveto ni okova soi ano sveto. Te neko volini e sveto, ano leste nane e Dadesoro mangipe. 16 Adalese so, sa soi ano sveto – i požuda e telosiri, i požuda e jaćhengiri hem o barikanipe zbog o barvalipe – na avela e Dadestar, nego e svetostar. 17 O sveto hem lesere požude nakhena, a ko ćerela e Devlesiri volja živini zauvek.

18 Mle čhavoralen, poslednjoi vreme, hem sar so šunđen, avela o antihrist. Već akana iklile but antihristija, hem palo adava džanaja dai poslednjo vreme. 19 Cidinde pe amendar, ali na inele čače amare. Adalese so, te čače inele amare, ka ačhoven ine amencar. Ali adaleja mothovđa pe da on nane amare. 20 Ali tumen isi pomazanje e Svetonestar, i sare džanen soi čačipe. 21 Na pisinava tumenđe adalese so na džanen o čačipe, nego adalese so džanen le hem adalese so nijekh hovajba na avela e čačipnastar. 22 Koi hovavno te nane okova kova na priznajini dai o Isus o Hrist. Ko na priznajini e Dade hem e Čhave – ovi o antihrist. 23 Ko na priznajini e Čhave, nane le ni e Dade. Ko priznajini e Čhave, isi le hem e Dade.

24 Okova so šunđen taro anglunipe, nek ačhol ana tumende. Te adava so šunđen taro anglunipe ačhola ana tumende, onda hem tumen ka ačhoven ano Čhavo hem ano Dad. 25 A akavai o obećanje savo dinđa amen: o večno dživdipe.

26 Akava pisinava tumenđe okolendar kola legarena tumen ko hovajba. 27 Ali tumen priminđen o pomazanje olestar, savo ačhola ana tumende, i na valjani neko te sikaj tumen. A lesoro pomazanje sikaj tumen oto sa, hem adavai čačipe, a na hovajba. Adalese, sar so sikavđa tumen, ađahar ačhoven ano Hrist.

28 I akana, mle čhavoralen, ačhoven ano leste, te šaj ovel amen pouzdanje anglo leste kad ov ka mothoj pe, te na lađa kad ka avel. 29 Sar so džanena dai o Hrist pravedno, džanena hem dai olestar bijando svako kova ćerela okova soi pravedno.

<- 1. Jovan 1 1. Jovan 3 ->