1 Кидиняс екхетханэ э дэшудон апостолен, о Исус диняс лэн зор тай барипэ, тэ кувдиен алаи э шэйтанен тай тэ аиндэрдиен о дукха. 2 Пал отхэ Ов бичялдяс лэн, тэ пхукавэн катар Дэвлэско Патишайлыки тай тэ аиндэрдиен э насвалэн, 3 пхэнляс лэнги:

— Ништо ма лэн тумэнца ко дром: нэ ровли, нэ гоно, нэ манро, нэ ловэ, нэ дуйто савути. 4 Кана тумэ дэн андэ екх кхер, ачён отхэ, бискай на авэл вахыти тэ джян англэ. 5 Ай катэ о мануша тумэн на кан мукен, дэчи джян андар одолэ дизатэ, кактиен о прахос опрал тумарэ пинрэндэ, тай он адава мэ дикхен.

6 О апостоля гелэ ко дром, накхенас андар гава ко гава, пхукавэнас Лошано Габэри тай, кай сас, аиндэрдиенас э насвалэн.

7 Кана о сагбус-тетрархи Ирод шунляс адалэстар алаестар, ов на джянэлас, со тэ тюшундиел. Вай сарсавэ пхэнэнас, кай адава о Иоанн дживиндило андар мулэ, 8 авэра — кай ало о Илия, май авэра — кай дживиндило екх андар пуранэ прарокя. 9 О Ирод пхэнляс:

— Э Иоаннески о шэро мэ чиндём, кон эси адава мануш, кастар манги пхукавэн?

Тай родэлас тэ дикхел э Исусес.

10 О апостоля алэ тай пхукавдэ э Исусески алаестар, со он кердэ. Дэчи Ов лиляс лэн Пэса, тай он гелэ коркорэ ки диз, кай бучёлас Вифсаида. 11 О бут дюняс галилэ адалэстар тай гелэ пал Исус. Ов лошаса лэн лиляс тай пхэнэлас лэнги катар Дэвлэско Патишайлыки, тай генэ аиндэрдиелас одолэн, каски камэлас. 12 О дес пашолас ки бэлвэль, тай о дэшудуй апостоля пашылэ ко Исус тай пхэнлэ:

— Мук э дюняс, тэ джян он агорял ко диза тай андэ гава, тай тэ аракхен пэски, кай тэ совэн тай тэ хан, вай амэ атхэ сам ки ливадяко тхан.

13 О Исус пхэнляс:

— Тумэ дэн лэн тэ хан.

Он пхэнлэ:

— Ва вай амэндэ самой пандж манрэ тай дуй маче. Та со, амэнги тэ джяс, тэ кинас хапэ алаи адалэ манушэнги?

14 Отхэ сас паш ко пандж биня мурша. Ай о Исус пхэнляс э сиклярдэнги:

— Бэшавэн э манушэн по пэинда.

15 О сиклярдэ аякха да кердэ. Кана алаи бэшлэ, 16 о Исус лиляс пандж манрэ тай дуй маче, ваздиняс Пэ якха опрэ тай алгышты о хапэ. Дэчи Ов лиляс тэ пхагерэл о манро тай о мачё, тай диняс лэн ко сиклярдэ, одола тэ дагытиен ко дюняс. 17 Алаи ханас тай чялилэ, тай ли кидинэ котора дэшудуй сэпэтя.

18 Екхвар, кана о Исус зборизэлас коркоро э Дэвлэса, тай надур Лэстар сас о сиклярдэ, Ов пхучляс лэн:

— Сар кас гинэл Ман о дюняс?

19 Он пхэнлэ:

— О Иоанн о Болдимари; авэра — о Илия; ай сарсавэ пхэнэн, кай о екх андар авэра пуранэ прарокя дживиндило.

20 — Ами тумэ кас гинэн Ман? — пхучляс лэндар о Исус.

— О Христос э Дэвлэско, — пхэнляс о Пётар.

21 Ай о Исус пхэнляс лэнги, никхаски тэ на пхэнэн адалэстар, 22 дэчи пхэнляс:

— Э Чявэски э Манушыканэски камэл бут тэ сидэл касэвэти, тай тэ болдэнпэс Лэстар о барэ мануша, о барэ попазя тай о сикляримаря э Тхэдимаски. Ов кан овэл мудардо, ко трито дес кан дживиндёл.

23 Дэчи о Исус пхэнляс алаенги:

— Кон мангел тэ джял пал Мандэ, мэ болдэлпэс пэстар, тай кажын дес лэл по хачи. Дэчи мэ джял пал Мандэ. 24 Вай одова, кон мангел тэ гаравэл по бэшыпэ, кан нашавэл лэс, ай кон кан нашавэл по бэшыпэ булуб Манги, одова кан кутардиел лэс. 25 Вай со файдас э манушэски, ов тэ лэла алаи о дюняс, ай ов кан нашавэл по бэшыпэ я кан керэл пэски джюнгалипэ? 26 Кон кан ладжял Мандар тай Мэ зборэндар, одолэстар кан ладжял ли о Чяво о Манушыкано, кана кан авэл андэ Пэ наместэ тай андэ нами ки Дадэско тай э шужэ миляикенго. 27 Пхэнав тумэнги чячес: сарсавэ андар тумэндэ, кай тэрдэ атхэ, на кан мэрэн, бискай на дикхен э Дэвлэско Патишайлыки.

28 Накхло паш ко охто дес пал адалэ зборэндэ. О Исус лиляс Пэса э Пётарэс, э Иоаннес тай э Яковес, ваздиняспэс опрэ горас, тэ зборизэл э Дэвлэса. 29 О вахыти, кана зборизэлас э Дэвлэса, Лэско муй паровдило, ай о савутя улэ бут парнэ, сар страпи. 30 Тай аки, улэ дуй мануша тай лилэ тэ зборизэн э Исусеса, — адала сас о Маисей тай о Илия. 31 Алэ андэ нами, он пхэнэнас Лэски одолэстар, кай Ов камэл тэ джял андэ Иерусалими тай отхар тэ ачявэл адава дюняс. 32 Ай э Пётарэс тай околэн, кон сас екхетханэ лэса, лиляс соипэ. Ай кана он джянгавдилэ, дикхлэ о нами э Исусеско тай э до муршэнго, кай тэрдэ сас пашэ Лэстэ. 33 Кана о мурша лилэ тэ джян, о Пётар пхэнляс э Исусески:

— Сикляримарина, амэнги атхэ аякха лачё! Эла, амэ керас трин шалаша, екх Туки, екх э Маисеески тай екх э Илияски.

Ов сам на джянэлас, со пхэнэл. 34 Кана ов дага пхэнэлас, сикавдило булути тай пханляс лэн. Кай улэ андэ булути, он бут трашанилэ. 35 Ай андар булути шунлило сэси:

— Адава Мо Чяво, Савэс Мэ тхэдём. Лэс шунэн!

36 Кана о сэси тэныкисаило, он дикхлэ э Исусес коркорэс. Он на зборизэнас адалэстар тай одова вахыти никхаски на пхукавэнас одолэстар, со дикхлэ.

37 Авэр дес, кана он фулистинэ опрал горас, э Исусес ишандиелас бут дюняс. 38 Тай екх мануш андар дюняс диняс бэбэря:

— Сикляримарина, мангав Тут, дикх мэ чявэс! Ов мандэ екх. 39 Овэл, лэс лэл о духос, тай дэчи о чяворо бирдэн лэл тэ дэл бэбэря, лэс лэл изравни, аякха, кай лэстэ андар муй джял кубукя. О духос кхинярэл лэс тай пхарэс мукел лэс. 40 Мэ манглём Тэ сиклярдэн тэ кувдиен лэс, ай он нащи.

41 — Бипакяки тай аравдо о дюняс адалэ вахытеско, — пхэнляс о Исус. — Сокабор Манги генэ тэ овав тумэнца тай тэ даяндияв тумэн? Ан тэ чявэс атхэ.

42 Кана о чяворо дага джялас, о шэйтани читяс лэс ки пху андэ израипэ. Ай о Исус пхэнляс зораса э бишужэ духоски тэ никлёл, аиндэрды э чяворэс, тай пал отхэ диняс лэс ко дад. 43 Алаи сас шаштимэна э баримаса э Дэвлэскерэса.

Алаи шаштиенас адалэ дилэнги. О Исус пхэнляс Пэ сиклярдэнги:

44 — Шунэн лачес, со Мэ кан пхэнав тумэнги анкха: генэ залаг, тай э Чявэс э Манушыканэс кан дэн андэ васта ки манушэнги.

45 Ай он на галилэ, со Ов пхэнляс, лэндар адава сас гаравдо, ай тэ пхучен, со си Лэски збора, трашанас.

46 Машкарэ ко сиклярдэ уло ирищима одолэстар, кон андар лэндэ си баро. 47 О Исус джянэлас, состар тюшундиен он андэ пумарэ илэндэ, лиляс тикнорэ пуёс тай тхэдяс лэс паш Пэстэ.

48 — Кон булуб Манги гинэл акасавке пуёс, — пхэнляс о Исус, — одова гинэл ли Ман, ай кон гинэл Ман, одова гинэл ли одолэс, кон бичялдяс Ман. Кон машкарэ тумэндэ тикно алаендар, одова даси баро.

49 О Иоанн пхэнляс Лэски:

— Сикляримарина! Амэ дикхлям манушэс, саво Тэ навэса кувдиелас э шэйтанен, тай амэ тэрдярдям лэс, вай ов на джял пал Тутэ екхетханэ амэнца.

50 — Ма тэрдярэн, — пхэнляс о Исус. — Кон нанай мамуй тумэндэ, одова си андар тумэндэ.

51 Кана э Исусески ало вахыти тэ овэл линдо опрэ, Ов гело ко Иерусалими. 52 Ангал Пэстэ Ов бичялдяс манушэн, тай одола гелэ андэ екх самарянски диз, тэ гортярэн алаи, бискай Ов авэл. 53 Ай о мануша одолэ гавэски на муклэ э Исусес, кай Ов джялас ко Иерусалими. 54 Дикхлэ адава, Лэскерэ сиклярдэ о Яков тай Иоанн пхэнлэ:

— Сагбуса, мангес, амэ кан пхэнас э ягаки, тэ авэл опрал тай алаен лэн тэ тхарэл?

55-56 Ай о Исус болдиняспэс, тэрдярдяс лэн.[a] Тай он гелэ андэ аврэ дизатэ.

57 Кана он джянас опрэ дром, екх мануш пхэнляс э Исусески:

— Мэ кан джяв пал Тутэ, кай би Ту тэ на джяс.

58 О Исус пхэнляс:

— Ко лисицэс си холя, ли ко чирикля опрунэндэ си гнездадэс, ай э Чявэски э Манушыканэски нанай кай По шэро тэ бангярэл.

59 Аврэ манушэски о Исус пхэнляс:

— Эла пал Мандэ.

Ай одова пхэнляс:

— Сагбуса, мук ман ханик тэ джяв тэ пароскерав мэ дадэс.

60 — Мук о мулэ он сам пароскерэн пумарэ мулэн, ай ту джя, пхукав э Дэвлэско Патишайлыки, — пхэнляс лэски о Исус.

61 Генэ екх мануш пхэнляс Лэски:

— Мэ кан джяв пал Тутэ, Сагбуса, ай мук ман ханик тэ джяв тай тэ дикхав генэ екхвар мэ хорандас.

62 О Исус пхэнляс:

— Били екх мануш, саво тхэдяс вас опэр плуги тай дикхел палэ, на камэл э Дэвлэски Патишайлыкески.

<- Лука 8Лука 10 ->