1 О Исус диняс андэ Иерихони тай накхелас андар диз. 2 Отхэ сас мануш, саво бучёлас Закхей. Ов эсас барвало мануш тай баро опэр кидимаря ки налогенги. 3 Ов мангелас тэ дикхел, кон эси адава Исус, тай нащи андар бут дюняс, вай сас тикнорэ боеско. 4 Озаман, тэ дикхел Лэс, о Закхей прастанило ангал тай никлисто опэр дюдяко тэрэки, катэ о Исус камэлас тэ накхел. 5 Кана о Исус пашыло одолэ тханэстэ, Ов дикхляс опрэ тай пхэнляс:

— Закхей, фули чяльти! Авдес Мэ камэл тэ овав тутэ андэ кхер.

6 О Закхей чяльти фулистино тай лошаса мангляс Лэс пэстэ кхерэ. 7 Алаи, кон дикхелас адава, лилэ тэ холязэн:

— Ов гело кхерэ ко бэзяло!

8 О Закхей ущино тай пхэнляс э Сагбуски:

— Сагбуса! Екхпаш мэ мангинэстар мэ кан дав ко чёрэ, ай мэ кастар-то тэ лилём бут, ниш камэл, мэ кан дав лэс штарвар бут!

9 Дэчи о Исус пхэнляс лэски:

— Авдес андэ адава кхер ало кутардипэ, вай ли адава мануш си о чяво э Авраамеско! 10 О Чяво о Манушыкано ало тэ аракхел тай тэ кутардиел о нашавдо.

11 Одолэнги, кон адава шунэлас, о Исус пхукавдяс пхукаипэ. Он сас надур катар Иерусалими, тай о мануша тюшундиенас, кай э Дэвлэско Патишайлыки камэл аки-аки тэ авэл.

12 О Исус пхэнляс:

— Екх намлыс мануш джялас дур пхуятэ, тэ диндёл патишайлытико зор тай тэ авэл. 13 Ов диняс икос пэ дэшэ иргатен тай диняс лэн по шэл драхмэс. «Мукен адала ловэ андэ бути, бискай мэ на авав», — пхэнляс ов. 14 Ай о мануша лэски пхуяки на дэхэнас лэс тай бичялдэ пал лэстэ манушэн тэ пхэнэн: «Амэ на мангас, адава мануш тэ овэл амаро патишаи».

15 Кана ов диндило патишайлытико зор тай ало, пхэнляс тэ авэн лэстэ о иргатя, савэн диняс руп, тэ пхучел лэн, со он казандылар. 16 О екхто ало тай пхэнляс: «Сагбуса, тэ шэл драхмэс андэ бини драхмэс казандима!» 17 «Муршари! — пхэнляс о сагбус. — Ту лачё иргати. Ту санас чячё андэ залаг, оничин тутэ кан овэл барипэ опэр дэшэ дизэндэ». 18 Ало о дуйто иргати тай пхэнляс: «Сагбуса, тэ шэл драхмэс андэ панджшэл драхмэс казандима!» 19 О сагбус пхэнляс: «Лэ, дикх пал пандж диза». 20 Дэчи ало о трито иргати тай пхэнляс: «Сагбуса, аки тэ шэл драхмэс, мэ гарававас лэн пакярдэ андэ кхосно. 21 Мэ трашавас тутар, кай ту сан мануш канлыс. Ту лэс отхэ, катэ на тхэдян, тай кидэс, со на барярдян». 22 О сагбус дэчи пхэнляс: «Ту налачё иргати! Мэ кан керав цындос туки тэ зборэнца! Ту джянэсас, кай мэ мануш канлыс, тай кай мэ лав отхэ, катэ на тхэдём, тай кидав, со на барярдём? 23 Соски ту на муклян мо руп андэ бути, тай, кана мэ кан авав, тэ дэс лэн мандэ кяреса?» 24 Тай ов пхэнляс э тэрдэнги отхэ: «Лэн лэстар лэски шэл драхмя тай дэн одолэстэ, кастэ си бини драхмэс». 25 «Сагбуса, — пхэнлэ лэски, — ва вай лэстэ ли аякха си бини драхмэс!» 26 О сагбус пхэнляс: «Пхэнав тумэнги, кастэ си, кан диндёл генэ, ай кастэ нанай, кан линдёл ли одова, со си лэстэ. 27 Ай мэ душманен, савэ на мангенас, мэ тэ овав лэнго патишаи, анэн лэн атхэ тай мударэн лэн ангал мандэ».

28 О Исус пхэнляс адава тай гело англэ ко Иерусалими. 29 Пашолас ки Виффагия тай ки Вифания, кай сас ки Маслинэнго горас, Ов бичялдяс ангал дон сиклярдэн, 30 пхэнляс:

— Джян андэ гав, саво си ангал тумэндэ. Кана тумэ кан дэн андэ лэстэ, тумэ кан аракхен пханлэ джёрэс, опэр савэстэ дага никхон на бэшло. Пхутрэн лэс тай анэн атхэ. 31 Ай кон-то тумэн тэ пхучела: «Соски тумэ лэс пхутрэн?» — пхэнэн: «Ов камэл э Сагбуски».

32 О сиклярдэ, савэн Ов бичялдяс, гелэ тай аракхлэ алаи аякха, сар лэнги пхэнляс о Исус. 33 Кана он пхутрэнас э джёрэс, о сагбудэс пхучлэ лэн:

— Тумэ соски пхутрэн э джёрэс?

34 Он пхэнлэ:

— Ов камэл э Сагбуски.

35 Он андэ э джёрэс ко Исус, читэ опэр лэстэ пумарэ савутя тай бэшавдэ опэр лэстэ э Исусес. 36 Кана Ов джялас, о мануша лилэ тэ джяйдиен опэр дром пумарэ савутя. 37 Тай кана Ов пашыло ко тхан, катэ о дром фулел опрал Маслинэнго горас, алаи о сиклярдэ лошаса тай лачес лилэ тэ махтадиен э Дэвлэс андар алаи ко чюдэс, савэ он дикхлэ:

38 — Махтадимэ Патишаи, Саво авэл андэ нав ки Сагбуско! Рагати тай нами андэ учипэ опрэ!

39 Сарсавэ, кай сас андэ дюняс ки фарисеенго, пхэнэнас э Исусески:

— Сикляримарина, тэрдяр Тэ сиклярдэн!

40 Ов пхэнляс:

— Пхэнав тумэнги: он тэ тэныкизэна, о бара кан дэн бэбэря.

41 Кана он пашонас ко Иерусалими тай дикхиндёлас э диз, о Исус руно лэски:

42 — Тэ галёсас би ту авдес, со анэлас би туки рагати! Ай анкха адава гаравдо тэ якхендар. 43 Кан авэн деса, кана тэ душманя кан агорадиен тай кан тасавэн тут алаи катар рига. 44 Он кан хурдярэн тут тай тэ манушэн тай на кан ачявэн андэ тутэ бар опэр бар, кай ту на галилян о вахыти, кана о Дэл ало тутэ.

45 Дэчи о Исус диняс андэ храми тай лиляс тэ кувдиел отхар э бикинимарен.

46 — Яздимэ си, — пхэнэл Ов лэнги: — «О кхер Минро кан овэл кхер, катэ зборизэн э Дэвлэса», ай тумэ кердянус лэс пэскерэнго кхер.

47 О Исус кажын дес сиклярэлас андэ храми, ай о барэ попазя, о сикляримаря э Тхэдимаски тай о намлыдэс мануша родэнас, сар тэ мударэн Лэс. 48 Ай он на джянэнас, сар адава тэ керэн, вай алаи о дюняс екхараи пхирэнас пал Исус тай шунэнас Лэс.

<- Лука 18Лука 20 ->