1 Андэ одолэ пхуятэ аякхажэ сас зорали, бари бокх. 2 Кана он халэ алаи о гив, кай андэ андар Египти, о дад пхэнляс лэнги:

— Джян палэ тай кинэн генэ набут хапэ.

3 Ай о Иуда пхэнляс лэски:

— Одова мануш зораса пхэнляс амэнги: «Ма сикавэн тумэн мэ якхендэ, тумэнца тэ на овэла тумаро пхрал». 4 Ту тэ мукеса амэнца амарэ пхралэс, амэ кан джяс тай кан кинас туки хапэ. 5 Ай тэ на мукеса лэс, амэ на кан джяс, вай одова мануш пхэнляс амэнги: «Ма сикавэн тумэн мэ якхендэ, тумэнца тэ на овэла тумаро пхрал».

6 — Соски тумэ кердянус манги адава касывэти, соски пхэнлянус одолэ манушэски, кай тумэндэ си генэ пхрал? — пхучляс о Израиль.

7 Он пхэнлэ:

— Одова мануш алаи пхучелас амэн амэндар тай амарэ хорандастар: «Дживиндо дага тумаро дад? Нанай тумэн генэ пхрал?» Амэ пхэнасас лэски, со пхучелас. Катар амэ джянасас, кай ов кан пхэнэл: «Анэн атхэ тумарэ пхралэс»?

8 О Иуда пхэнляс э Израилески, пэ дадэски:

— Мук э чяворэс манца, тай амэ чяльти кан джяс, алаи амэ тэ овас дживиндэ тай тэ на мэрас: ли амэ, ли ту, тай амарэ пуя. 9 Мэ кан дикхав пал лэстэ; мандар ту кан пхучес лэс. Тэ на анава мэ лэс тутэ тай на кан тхав акатэ ангал тутэ, мэ кан овав дошало ангал тутэ, бискай на мэрав. 10 Тэ на овас тэмэля, кан джясас тай кан авасас дувар.

11 Дэчи лэнго дад о Израиль пхэнляс лэнги:

— Тэ камэл адава тэ керэн, дэчи керэн аки со: тхэн андэ дорбадэс о лаче имиша адалэ пхуяки та гелэн, башладиен одолэ манушэс: бальзами тай бали, чяря тай мирра, фисташкес тай миндали. 12 Лэн дувар бут руп, тумэ тэ анэн тумэнца ли одова, со сас тхэдо палэ андэ тумарэ гонэ. Файма, он на галилэ. 13 Лэн ли тумарэ пхралэс тай джян генэ одолэ манушэстэ. 14 Мэ дэл о Дэл о Баро-Зорало тумэн мила ангал лэстэ, ов тэ мукел авэрэ тумарэ пхралэс, тай э Вениаминес тэ авэн палэ тумэнца. Ай мэ тэ камэл тэ ачяв би пуенго, мэ овэл аякха.

15 Он лилэ одова, со пхэнляс лэнги о дад, тай дувар бут руп, дэчи лилэ э Вениаминес тай гелэ ко Египти. Он тэрдилэ ангал Иосиф. 16 Кана о Иосиф дикхляс, кай о Вениамин лэнца, ов пхэнляс пэ ярдымарески:

— Гел адалэ манушэн мандэ андэ кхер, чинэн савэ-то гайванес тай тавэн хапэ. Десе он кан хан манца.

17 О мануш кердяс, сар сас лэски пхэнло, андяс лэн андэ кхер ко Иосиф. 18 Он трашанилэ, кана лэн андэ лэстэ андэ кхер, вай тюшундылар: «Амэн андэ атхэ андар руп, саво сас андэ амарэ гонэ баштутно рази. Ов мангел тэ пэрэл опэр амэндэ, тай тэ лэл амэн андэ иргатлыки, тай тэ лэл амарэ джёрэн».

19 Он пашылэ ко ярдымари ки Иосифеско тай зборисаилэ лэса паш ко удар, кай дэс андэ кхер:

20 — Шун, сагбуса, — пхэнлэ он, — амэ екхвар алямас атхэ тэ кинас хапэ, 21 ай кана амэ тэрдилям ратяки тай пхутэрдям о гонэ, кажын андар амэндэ аракхляс андэ по руп, сокабор сас. Оничин амэ андям лэс палэ. 22 Амэ андям амэнца генэ руп, тэ кинас хапэ. Амэ на джянас, кон баштутно рази тхэдяс амаро руп амэнги андэ гонэ.

23 Ов пхэнляс:

— Алаи лачё, ма трашан. Тумаро Дэл, о Дэл тумарэ дадэско, тхэдяс адава мангин андэ тумарэ гонэ. Ай ман динэ тумаро руп.

Дэчи ов андяс лэндэ э Симеонес. 24 О ярдымари андяс э пхралэн андэ кхер ко Иосиф, диняс лэн пани тэ халярэн пумарэ пинрэ тай диняс пхус лэнги джёрэн. 25 Он гортярдэ, со андэ, тэ дэн ко Иосиф, сар авэл десе, вай лэнги пхэнлэ, кай он отхэ кан хан.

26 Кана о Иосиф ало кхерэ, он динэ лэс, со андэ, тай бангилэ ангал лэстэ джи ки пху. 27 Ов пхучляс лэнго такати, дэчи пхэнляс:

— Ами сар си тумаро пхуро дад, савэстар тумэ пхэнэнас манги? Дживиндо ов дага?

28 Он пхэнлэ:

— То иргати, амаро дад, дага дживиндо тай такатлыс.

Тай бангилэ тэлэ, кай гинэн лэс. 29 О Иосиф болдиняспэс тай дикхляс пэ пхралэс э Вениаминес, пэ дэяки чявэс. Ов пхучляс:

— Адава — тумаро тикно пхрал? Одова, савэстар тумэ пхэнэнас манги? О Дэл мэ овэл миласа туки, мо чяво!

30 О ило э Иосифеско пхэрдило дэхымаса тай ов кан ровэлас; Иосиф чяльти гело тай родэлас пханло тхан. Ов ало пэстэ тай отхэ лачес руно. 31 Дэчи ов халярдяс по муй, генэ никлисто тай астарэласпэс тэ на ровэл. Ов пхэнляс:

— Анэн хапэ.

32 Лэски тхэдэ авэртэ тханэстэ, э пхралэнги тхэдэ авэртэ, тай э египтяненги, савэ ханас лэса, авэртэ, вай о египтяня нащи ханас э евреенца, адава сас гарами э египтяненги. 33 Э пхралэн бэшавдэ ангал лэстэ пал екхаврэстэ, катар баштутно джи ко тикно, тай он дикхенас карин екхаврэстэ шаштимэна. 34 Лэнги тхэнас хапэ опрал конас ки Иосифеско, ай э Вениаминески тхэнас панджвар бут, ниш аврэнги. Он ханас тай пиенас лэса.

<- Кердипэ 42Кердипэ 44 ->