1 Э Дина, э чяй э Лияки катар Яков, гели тэ дикхел аканутнэ чяян. 2 Кана о Шэхем, о чяво э хивееско э Хамореско, о сагбус одолэ областяко, дикхляс ла, астардяс, пашлило ласа тай лиляс ла. 3 О ило лэско колисаило ки Дина, ки чяй ки Яковески, ов дэхляс ла тай зборизэлас ласа дэхымаса. 4 Ов пхэнляс пэ дадэски э Хаморески:

— Лэ манги адалэ чяя ромня.

5 Кана о Яков шунляс, кай лэски чяятар катар Дина кердэ маскаралыки, лэски чявэ сас ки ливади э атарэнца. Ов на пхэнэлас адалэстар, бискай он на алэ кхерэ.

6 О Хамор, о дад э Шэхемеско, ало тэ зборизэл э Яковеса. 7 Кана о чявэ э Яковески шунлэ, со уло, он алэ катар ливадя. Он сас пхэрдэ касывэти тай холи, вай о Шэхем кердяс ладжяваски дила андэ Израиль, кана пашлило э Яковески чяяса. Асавко нащи овэл.

8 О Хамор пхэнляс лэнги:

— Мо чяво о Шэхем илэса пханлило тумарэ чяятэ. Мангав тумэн, дэн ла лэстэ ромня. 9 Элан овас тухумя: дэн амэндэ тумарэ чяян тай лэн амарэн. 10 Манген, бэшэн машкарэ амэндэ, — э пху ангал тумэндэ: бэшэн тай пхерэн опэр латэ, тай кинэн ла тумэнги.

11 О Шэхем пхэнляс э Динаки дадэски тай э пхралэнги:

— Мэ кан дав тумэн алаи, со тумэ кан пхэнэн, тэ аракхав мэ мила андэ тумарэ якхендэ! 12 Пхэнэн андар бори, саво манген калыни тай багалыдэс шэя, тай мэ кан покинав, екх дэн ман ла ромня.

13 Дэчи о чявэ э Яковески пхэнлэ э Шэхемески тай лэски дадэски э Хаморески хохаимаса, вай ов кердяс маскаралыки лэнги пхэнятар катар Дина. 14 Он пхэнлэ лэски:

— Амэ нащи керас асавко: тэ дас амарэ пхэня не абрезани муршэстэ кан овэлас би амэнги ладжяво. 15 Амэ кан пхэнас лачё, тумэ тэ овэна, сар амэ, тай тэ керэна алаи тумарэ муршэнги абрезания. 16 Дэчи амэ кан дас тумэн амарэ чяян тай кан лас амэнги тумарэн. Амэ кан бэшас машкарэ тумэндэ тай кан овас тумэнца екх дюняс. 17 Ай тумэ тэ на керэна абрезания, амэ кан лас амарэ пхэня тай кан джяс.

18 О Хамор тай лэско чяво о Шэхем дэхляс лэнги зборэс. 19 О тэрно мануш чяльти кердяс одова, со он пхэнлэ, вай ов бут лачес дэхэлас э Яковески чяя. Ай андэ кхер пэ дадэстэ о Шэхем сас алаендар намлыс. 20 Дэчи о Хамор тай лэско чяво о Шэхем алэ ки бар ки дизаки тай пхэнлэ э дюняски.

21 — Адала мануша лаче амэнца, — пхэнлэ он. — Мэ бэшэн опэр амарэ пхуятэ тай мэ пхерэн опэр латэ. Опэр адалэ пхуятэ лэнги рэсэл тхан. Амэ кан прандозас опэр лэнги чяяндэ, тай он мэ прандозэн опэр амаряндэ. 22 Ай амарэ мурша, сар он, камэл тэ овэн абрезаня. Екх озаман кан бэшэн адала мануша амэнца, сар екх дюняс. 23 Озаман лэнги атарэс, о мангин тай алаи лэнги гайваня кан овэн амарэ. Эла керас, со он пхэнлэ, тай он кан бэшэн машкарэ амэндэ.

24 Алаи, кон кидэласпэс ки дизаки бар, пхэнлэ лачё э Хаморески тай лэски чявэски э Шэхемески, тай алаи о мурша андэ диз сас абрезаня.

25 Тринэ десендар, кана лэндэ дага дукхалас, о дуй чявэ э Яковески — о Симеон тай о Левий, о пхрала э Динаки — лилэ о камадэс, бирдэн пэлэ опэр диз тай мудардэ алаи э муршэн. 26 Он мудардэ камаса э Хаморес тай лэски чявэс э Шэхемес, лилэ э Дина андар Шэхемеско кхер тай гелэ. 27 Дэчи о чявэ э Яковески алэ ко мудардэ тай чёрдэ э диз, катэ кердэ маскаралыки катар пхэн. 28 Он лилэ о атарэс э барэ тай э тикнэ гайваненца, джёрэн — алаи, со сас андэ диз тай ко ливадя. 29 Алаи лэнго барвалипэ, тай э пуен, тай э джювлен, тай алаи, со сас андэ кхера, он лилэ пэски.

30 Дэчи о Яков пхэнляс э Симеонески тай э Левиески:

— Тумэ кердянус манги хурлуки, кердянус тэ на дэхэн ман о мануша адалэ пхуяки, о ханаанея тай о периззея. Амэндэ залак мануша, ай он кан овэн екхетханэ тай кан мударэн ман, тай алаи амаро дюняс кан мэрэл.

31 Ай он пхэнлэ:

— Та со, камэл тэ керэн амарэ пхэняса, сар кахпэисаса?

<- Кердипэ 33Кердипэ 35 ->