1 Вахытестар о Дэл зумавдяс э Авраамес. Ов пхэнляс лэски:

— Авраам!

— Мэ атхэ, — пхэнляс о Авраам.

2 О Дэл пхэнляс:

— Лэ тэ екхе чявэс, э Исаакес, савэс ту дэхэс, джя ки пху Мориа тай ан лэс отхэ курбани, тхар опэр горас, опэр савэстэ Мэ кан сикава туки.

3 Авэр дес эртэс сабахтан о Авраам ущино, гортярдяс э джёрэс, лиляс пэса до иргатен тай пэ чявэс э Исаакес, пхагердяс кашта ягаки тай гело ко дром одолэ тханэстэ, савэстар пхэнляс лэски о Дэл. 4 Ко трито дес о Авраам ваздиняс пэ якха тай дикхляс дурал одова тхан. 5 Ов пхэнляс э иргатенги:

— Ачён атхэ э джёрэса, ай амэ э чяворэса кан джяс отхэ тай кан мангас э Дэвлэс, тай дэчи кан авас тумэндэ.

6 О Авраам лиляс о кашта э ягаки тай тхэдяс лэн опэр думо ки Исаакеско, ай ов гелдяс э яг тай э чюри, тай он о дуй гелэ ко дром. 7 О Исаак пхэнляс пэ дадэски э Авраамески:

— Дадэ!

— Ва, мо чяво? — пхэнляс о Авраам.

— Амэндэ си яг тай кашта, — пхэнляс о Исаак, — ай кай о бакроро э курбанески?

8 О Авраам пхэнляс:

— О Дэл Ов сам кан гортярэл бакрорэс курбанески, мо чяво.

Тай он о дуй гелэ англэ. 9 Кана он алэ ко тхан, савэстар пхэнляс лэски о Дэл, о Авраам кердяс отхэ алтари тай кидиняс опрал о кашта, пханляс пэ чявэс э Исаакес тай тхэдяс лэс опэр алтари опэр кашта. 10 Ов сидиняс пэ васта тай лиляс чюри, тэ чинэл пэ чявэс. 11 Ай о Миляики э Сагбуски Яхвэско пхэнляс лэски опрал булутя:

— Авраам! Авраам!

— Мэ атхэ, — пхэнляс ов.

12 — Ма ваздэ то васт опэр чяворо, — пхэнляс Ов, — ма кер лэса ништо. Акана мэ джянав, кай ту трашас катар Дэл, вай ту на аядын Манги тэ екхе чявэс.

13 О Авраам ваздиняс пэ якха тай дикхляс бакрэс, саво пакярдило шынгенца андэ чяря. Ов гело, лиляс э бакрэс тай андяс лэс курбани, тхардяс ко тхан ки чявэско. 14 О Авраам тхэдяс одова тхан Яхвэ-Ирэ[a], тай отхар джи анкха пхэнлёлпэс: «Опэр горас ки Сагбуски Яхвэско кан аракхлёл».

15 О Миляики э Сагбуски Яхвэско пхэнляс э Авраамески опрал булутя дуйто рази:

16 — Дав совля опэр Мандэ, пхэнэл о Сагбус о Яхвэ: кай ту кердян адава тай на аядын Манги тэ екхе чявэс, 17 Мэ анкха кан алгыштияв тут тай кан керав тэ пуен бут, сар чергэня опэр булутя, сар кишай паш ки моря. Тай тэ пуя кан лэн о диза пумарэ душманенги. 18 Кай ту тхэдян кан Ман, андар тэ пуендэ кан диндён алгышы алаи о дюнядэс опэр пху.

19 О Авраам ало ко иргатя, тай он екхетханэ гелэ андэ Бээр-Шэва. О Авраам ачило андэ Бээр-Шэва.

20 Накхло вахыти, тай э Авраамески пхэнлэ:

— Ли э Милка ули дай, аракхлилэ латэ чявэ тэ пхралэски э Нахорески: 21 о Уц, о баштутно, о Буз, лэско пхрал, о Кемуил (о дад э Арамеско), 22 о Кесед, о Хазо, о Пилдаш, о Идлаф тай о Бетуил.

23 О Бетуил уло о дад э Рэвэкако. Адала охто чявэ ки Милка аракхлилэ э Авраамески пхралэски э Нахорески. 24 Лэски иргатинкатэ, сави бучёлас Реума, аракхлилэ чявэ: о Тевах, о Гахам, о Тахаш тай о Мааха.

<- Кердипэ 21Кердипэ 23 ->