1 Андэ алаи ко дюняс сас екх чиб тай екх зборэс. 2 О мануша джянас ко вастоки тай никлистэ опэр шужы ливади андэ Шынари тай ачилэ тэ бэшэн отхэ. 3 Он пхэнлэ екхаврэски:

— Элан керас кирпичя катар глина тай тэ тхарас лэн лачес.

Аякха о мануша ки барэнго тхан тхэнас кирпичя, савэ он колискерэнас смоласа. 4 Дэчи он пхэнлэ:

— Элан тхас амэнги диз башняса джи ко булутя. Аякха амэ кан махтадияс амаро нав, тай на кан дуряс опэр алаи ки пху.

5 О Сагбус о Яхвэ фулистино тэ дикхел карин диз тай башня, савэ тхэнас о чявэ э манушэнги, 6 тай пхэнляс:

— Алаи о мануша — екх дюняс, лэндэ екх чиб. Тай он токо лилэ тэ керэн алаи. Акана со тэ на манген, алаи кан керэн. 7 Элан фуляс тэ намискерас лэнги зборэс, тэ на галён екхаврэс.

8 Тай о Сагбус о Яхвэ дурярдяс лэн отхар опэр алаи ко муй ки пхуяко, тай он тэрдилэ тэ тхэн одоя диз. 9 Аки соски ов сас тхэдо Вавилон[a] — вай о Сагбус о Яхвэ намискердяс отхэ о зборэс алаи э дюняски. Отхар о Сагбус о Яхвэ дурярдяс лэн опэр муй алаи ки пхуяко.

10 Аки о пхукаипэ катар Сим тай лэски пуендар.

Э Симески сас шэл брэш, кана лэстэ аракхлило о Арпахшад. Адава уло до брэшэндар пал ко бугулдима. 11 Пал ко аракхлима ки Арпахшадеско о Сим бэшло 500 брэш, тай лэстэ сас генэ чявэ тай чяя.

12 Кана о Арпахшад бэшло 35 брэш, лэстэ аракхлило о Шэлах. 13 Пал ко аракхлима ки Шэлахеско о Арпахшад бэшло 403 брэш, тай лэстэ сас генэ чявэ тай чяя.

14 Кана о Шэлах бэшло 30 брэш, лэстэ аракхлило о Эвер. 15 Пал ко аракхлима ки Эвереско, о Шэлах бэшло 403 брэш, тай лэстэ сас генэ чявэ тай чяя.

16 Кана о Эвер бэшло 34 брэш, лэстэ аракхлило о Пелег. 17 Пал ко аракхлима ки Пелегеско о Эвер бэшло 430 брэш, тай лэстэ сас генэ чявэ тай чяя.

18 Кана о Пелег бэшло 30 брэш, лэстэ аракхлило о Реу. 19 Пал ко аракхлима ки Реуско о Пелег бэшло 209 брэш, тай лэстэ сас генэ чявэ тай чяя.

20 Кана о Реу бэшло 32 брэш, лэстэ аракхлило о Серуг. 21 Пал ко аракхлима ки Серугеско о Реу бэшло 207 брэш, тай лэстэ сас генэ чявэ тай чяя.

22 Кана о Серуг бэшло 30 брэш, лэстэ аракхлило о Нахор. 23 Пал ко аракхлима ки Нахореско о Серуг бэшло 200 брэш, тай лэстэ сас генэ чявэ тай чяя.

24 Кана о Нахор бэшло 29 брэш, лэстэ аракхлило о Терах. 25 Пал ко аракхлима ки Терахеско о Нахор бэшло 119 брэш, тай лэстэ сас генэ чявэ тай чяя.

26 Пал отхэ сар о Терах бэшло 70 брэш, лэстэ аракхлилэ о Аврам, о Нахор тай о Аран.

27 Аки о пхукаипэ катар Терах тай лэски пуендар.

Ко Терах аракхлилэ о Аврам, о Нахор тай о Аран. Ко Аран аракхлило о Лот. 28 Кана лэско дад о Терах сас дага дживиндо, о Аран муло андэ диз Ур, катэ бэшэнас о халдея, андэ пху, кай ов аракхлило. 29 О Аврам тай о Нахор лилэ пэски ромнян. Э ромни э Аврамески бучёлас Сара, ай э ромни э Нахорески — Милка. О Аран — о дад э Милкако тай э Искако. 30 Ки Сара на сас пуя, вай латэ нащи аракхлёнас пуя.

31 О Терах лиляс пэ чявэс э Аврамес, пэ турунес э Лотес, э чявэс э Аранескерэс, тай пэ боря э Сара, э ромня э Аврамески, тай екхетханэ он гелэ андар Ур, катэ бэшэнас о халдея, андэ Ханаан. Тай алэ джи ко Харан, катэ ачилэ тэ бэшэн. 32 О Терах бэшэлас 205 брэш тай муло андэ Харан.

<- Кердипэ 10Кердипэ 12 ->