— Пхралалэн, джи авдесутнэ десестэ мэ бэшавас шужэ илэса ангал Дэл.

2 Тай о баро попази о Анания баримаса пхэнляс одолэнги, савэ си тэрдэ паш Павел, тэ чялавэн лэски ушта. 3 О Павел дэчи пхэнляс:

— О Дэл кан марэл тут, домонго мануш! Ту сан бэшло атхэ тэ керэс цындос манги, сар пхэнэл о Тхэдипэ, ай ту сам пхагерэс о Тхэдипэ, кана пхэнэс, тэ марэн ман!

4 Одола, кон сас тэрдо паш Павел, пхэнлэ лэски:

— Сар ту кушэс э Дэвлэски барэ попазес?

5 О Павел пхэнляс:

— Пхралалэ, мэ на джянавас, кай ов баро попази, вай о Яздипэ пхэнэл: «Ма пхэн налачё опэр баро тэ дюняскерэстэ».

6 О Павел джянэлас, кай андэ Синедриони сарсавэ сас саддукея, авэра — фарисея, оничин ов лачес пхэнляс:

— Пхралалэн, мэ фарисеи, о чяво э фарисееско, тай манги керэн цындос андар ишандипэ, кай о мулэ кан дживиндён.

7 Кана ов адава пхэнляс, машкарэ ко фарисея тай ко саддукея ваздиндили чингар, тай о дюняс паляштыпэс, 8 вай со о саддукея пхэнэн, кай нанай нэ дживиндипэ, нэ миляикенго тай духенго. О фарисея вай андэ алаи адалэстэ пакян. 9 Ваздиндили бари бэбэря, сарсавэ сикляримаря э Тхэдимаски андар фарисея ущинэ тай зораса пхэнлэ:

— Амэ на аракхас андэ адалэ манушэстэ ништо налачё. Ай со, лэса тэ пхэнэлас о духи я о миляики?

10 Э чингар ваздиндили аборкха, кай э бинеско баро трашалас, э Павлэс тэ на пхаравэн котора, пхэнляс э салдатенги тэ лэн лэс лэндар зораса тай тэ гелэн андэ салдатенго кхер.

11 Авэр рат ангал Павел тэрдило о Сагбус тай пхэнляс:

— Ма траша! Сар ту пхукавэсас Мандар андэ Иерусалими, аякха ту камэл тэ пхукавэс ли андэ Рим.

12 Сабахтан сарсавэ иудея кидинэпэс тай динэ совля ништо тэ на хан тай тэ на пиен, бискай на мударэн э Павлэс. 13 Андэ адалэ зборимастэ сас бут катар саранда мануша. 14 Он гелэ ко барэ попазя тай ко барэ мануша тай пхэнлэ:

— Амэ диням совля ништо тэ на лас андэ амарэ мостэ, бискай на мударас э Павлэс. 15 Акана тумэ тай о Синедриони манген э бинески барэс тэ анэн лэс тумэндэ хай одолэски, тэ галён зиядэ лэски дила. Ай амэ кан овас гортярдэ тай кан мударас лэс дага ангал отхэ, кай ов кан авэл джи адалэ тханэстэ.

16 Адалэстар галило о тухуми э Павлэско, о чяво лэски пхэняко. Ов гело андэ салдатенго кхер тай пхукавдяс адалэстар э Павлэски. 17 Дэчи о Павел диняс икос екхес андар шэлэнги барэс тай пхэнляс лэски:

— Гелэн адалэ тэрнэс ки бинеско баро, лэстэ си со-то багалыс тэ пхэнэл лэски.

18 Э шэлэнго баро гелдяс э тэрнэс ки бинеско баро тай пхэнляс:

— О пханло Павел диняс икос ман тай мангляс тэ анав акалэ тэрнэс тутэ. Лэстэ си со-то багалыс тэ пхэнэл туки.

19 Э бинеско баро лиляс э тэрнэс вастэстар, гелдяс лэс ригатэ тай пхучляс:

— Со ту мангес манги тэ пхэнэс?

20 О тэрно пхэнляс:

— О иудея гиндэ тэ манген тут тэ анэс рано э Павлэс андэ Синедриони хай одолэски, тэ галён зиядэ лэстар. 21 Ай ту адалэски ма пакя, вай лэс ишандиен гаравдэ бут катар саранда мануша. Он динэ совля тэ на хан тай тэ на пиен, бискай на мударэн лэс. Он тэрдэ гортярдэ тай екх ишандиен ти збора.

22 — Никхаски ма пхэн одолэстар, со ту манги анкха пхукавдян, — пхэнляс э бинеско баро э тэрнэски тай мукляс лэс.

23 Дэчи э бинеско баро диняс икос до шэлэнги барэн тай пхэнляс лэнги:

— Гортярэн душэл салдатен, эфтадэша опэр грастэндэ тай душэл э пикенца одолэски, тэ никлён андэ Кесария ко эня сагатя бэлвэле. 24 Гортярэн э Павлэски грастэс тай анэн лэс андэ кутардимастэ ко сагбус-пракуратори Феликс.

25 Тай ов язды акасавко письмас:

26 «Катар Клавдий Лисий

э намлыс пракураторески Феликсески:

Сэлями туки!

27 Адалэ манушэс астардэ о иудея тай манглэ тэ мударэн лэс, ай мэ алём э салдатенца тай кутардым лэс, кай галилём, кай ов си римски мануш. 28 Мэ мангавас тэ галяв, соски он керэн лэс дошалэс, тай андём лэс андэ лэнги Синедриони. 29 Мэ галилём, кай э дош си андар ирищима лэнги Тхэдимастэ тай ов нанай дошало нэ андэ состэ, кай камэл тэ мэрэл я тэ пхандэн андэ пханли. 30 Манги пхэнлэ, кай лэс гортярэнпэс тэ мударэн, мэ чяльти бичялдём лэс тутэ, ай одолэнги, савэ керэн лэс дошалэс, мэ пхэнлём, он тэ джян тэ керэн лэс дошалэс ангал тутэ».

31 О салдатя кердэ, со пхэнлэ лэнги, лилэ э Павлэс тай гелдэ лэс рати андэ Антипатрис. 32 Авэр дес он бичялдэ лэс э салдатенца опэр граста англэ, ай он сам алэ палэ андэ салдатенго кхер. 33 Кана о салдатя опэр граста алэ андэ Кесария, он динэ ко пракуратори о письмас тай ачявдэ лэстэ э Павлэс. 34 О пракуратори драпкердяс о письмас тай пхучляс ко Павел, андар сави правинцыя ов си. Галило, кай о Павел андар Киликия, 35 тай пхэнляс:

— Мэ кан шунав тут, кана атхэ кан авэн одола, савэ керэн тут дошалэс, — тай пхэнляс э барэнги тэ дикхен пал Павел андэ патишайлытико кхер ки Иродеско.

<- Дилэс 22Дилэс 24 ->