1 Одова вахыти, кана о Аполлос сас андэ Каринфи, о Павел накхло андар горадэнги тхана тай ало андэ Эфес. Отхэ ов дикхляс набут сиклярдэн.

2 — Лилянус тумэ о Шужо Духос, кана пакянилянус? — пхучляс ов лэн.

— Амэ джи на шунлям одолэстар, кай си Шужо Духос, — пхэнлэ одола.

3 Дэчи о Павел пхучляс:

— Сар тумэ санусас болдэ?

— Сар болэлас о Иоанн, — пхэнлэ он.

4 О Павел пхэнляс:

— О болдипэ э Иоаннеско сас болдипэ тэ муклён о бэзя. Ов пхэнэлас э дюняски тэ пакян Одолэски, Кон камэлас тэ авэл пал лэстэ, самким э Исусески.

5 Кана он шунлэ адалэстар, он болдэпэс андэ нав ки Сагбуско Исусеско. 6 Тай кана о Павел тхэдяс опэр лэндэ пэ васта, опэр лэндэ фулистино о Шужо Духос. Он дэчи лилэ тэ зборизэн аврэ чибэнца тай пхэнэн сар прарокя. 7 Алаи лэн сас паш ко дэшудуй мануша.

8 О Павел трин чён битрашако пхэнэлас андэ синагога, зборизэлас э манушэнца катар Дэвлэско Патишайлыки тай галярэлас лэнги. 9 Савэ андар лэндэ холязэнас тай на мангенас тэ пакян, ангал алаендэ кушэнас о Дром э Исусеско. Дэчи о Павел ачявдяс лэн. Ов лиляс э сиклярдэн тай кажын дес зборизэлас лэнца андэ школа ки Тираннески. 10 Аякха сас дуй брэш, тай алаи о иудея тай о грекя, кай бэшэнас андэ правинцыя Азия, шунлэ э збора э Сагбуски.

11 О Дэл керэлас андар Павел барэ чюдэс. 12 Э насвалэн дэнас тэ колизэн ко кхоснэ тай ко фотэс, савэндэ буруни колизэлас о Павел, тай лэндэ накхенас о дукха, тай о джюнгалэ духя никлёнас андар лэндэ. 13 Сарсавэ иудейскя магиенги, кай пхирэнас опэр дром, лилэ тэ дэн икос о нав э Сагбуско э Исусеско опэр одолэндэ, андэ савэндэ сас бишужэ. Он пхэнэнас:

— Мэ пхэнав тумэнги совленца андэ нав ки Исусеско, Савэс пхукавэл о Павел.

14 Адава керэнас ли о эфта чявэ э Скеваски, э иудейски барэ попазески. 15 Ай о джюнгало духи пхэнляс лэнги:

— Э Исусес мэ джянав, ли о Павел си манги джянло, ами тумэ кон эсанус асавке?

16 Тай о мануш, андэ савэстэ сас о джюнгало духи, читяспэс опэр лэндэ асавке зораса, кай мардяс лэн алаен, тай он нашлэ андар кхер нанге тай дукхавдэ. 17 Кана одолэстар галилэ о иудея тай о грекя, кай бэшэнас андэ Эфес, лэн лиляс траш, тай он лилэ тэ гинэн лачес о нав э Сагбуско э Исусеско. 18 О бут, савэ пакянилэ, авэнас тай ангал алаендэ пхукавэнас пумарэ дилэс. 19 Ай о бут, кай керэнас магия, анэнас пумарэ магиенги книжкес тай ангал алаендэ тхарэнас лэн. Кана гиндэ, сокабор керэнас о тхардэ лила, уло пэинда биня драхмя. 20 Аякха э збора э Сагбуски барёлас тай пхэрдёлас зор.

21 Пал алаестэ адалэстэ о Павел тюшунды тэ джял ко Иерусалими андар Македония тай Ахаия.

— Пал отхэ, сар мэ кан овав андэ Иерусалими, манги камэл тэ джяв ли ко Рим, — пхэнэлас ов.

22 Ов бичялдяс ки Македония до ярдымарен э Тимафеес тай э Эрастэс, ай ов сам генэ савэ-то вахытески ачило андэ правинцыя Азия.

23 Андэ адава вахыти ули бари чингар андар Дром ки Сагбуско. 24 О мануш, кай бучёлас Димитрий, рупунэ бутяко бутярно, керэлас катар руп храми э дэвлинкако э Артэмидако тай одолэса дэлас аканутнэ бутярнэн бут тэ казандиен. 25 Ов кидиняс лэн ли аврэн асавке бутярнэн тай пхэнляс:

— Тумэ джянэн, кай адая бути дэл амэн лачё казандима. 26 Ай тумэ дикхен тай шунэн, кай адава Павел галярдяс тай гелдяс андэ хохаипэ бутэ дюняс на екх атхэ андэ Эфес, ами ли алаи ки правинцыя Азия. Ов пхэнэл, кай о дэла, кай си кердэ вастэнца, — адава нанай дэла. 27 На екх амари бути андар адалэстэ кан нашавэл по лачё нав, ами ли о храми э барэ дэвлинкако э Артэмидако ништо на кан гиндёлпэс. Тай ой сам э дэвлинка, савя гинэл алаи э правинцыя Азия тай алаи э пху, кан овэл би дэвлэски баримаско!

28 Он шунлэ адава тай холяса дэнас бэбэря:

— Бари Артэмида Эфесески!

29 Чяльти алаи э диз ваздиндили. О мануша астардэ э амалэн э Павлэскерэн, э македонянен э Гаес тай э Аристархес, тай алаи екхетханэ прастанилэ андэ театра. 30 О Павел мангляс тэ никлёл ко дюняс, ай о сиклярдэ лэс на муклэ. 31 Джи сарсавэ барэ мануша э правинцыяки, о амала э Павлэски, пхэнлэ лэски тэ на авэл андэ театра.

32 Авэра дэнас бэбэря екх, авэра авэр. Уло баро прастаима. О бут на джянэнас, соски алэ. 33 О иудея динэ бутуря ангал э Александрэс. Кон-то андар дюняс пхучляс лэс, тай о Александр кердяс вастэса э дюняски тэ тэныкизэл, ов тэ пхэнэл кутардимаски збора. 34 Ай кана алаи галилэ, кай ов иудеи, тай лилэ екхе сэсеса тэ дэн бэбэря:

— Бари Артэмида Эфесески!

Тай дэнас бэбэря паш ко дуй сагатя. 35 Озаман ко дюняс никлисто э дизако яздимари. Ов тэрдярдяс лэн тай пхэнляс:

— Эфесяня, си хоч екх мануш, саво на джянэл, кай э диз Эфес си дикхимари э храмеско э барэ Артэмидако тай лаки шавлиняко, кай пэли опрал? 36 Никхон на пхэнэл мамуй адалэстэ. Оничин тумэ камэл тэ тэрдярэн тай тэ на керэн ништо би тюшундимаско. 37 Тумэ андянус атхэ адалэ манушэн, гэм он на чёрдэ андар храми тай на кушлэ амарэ дэвлинка. 38 Тэ си ко Димитрий тай аврэ бутярнэндэ опэр кастэ-то холи, амэндэ адалэски си цындос тай о праконсуля. Отхэ мэ гелэн пумарэ доша. 39 Тэ си тумэндэ генэ саво-то пхучипэ, пхукав лэн тэ дикхен ки тхэдимаско кидипэ. 40 Я си траш, кай пал авдесутнэ дилэндэ амэн кан керэн дошалэн андэ чингара, вай амэ нащи кан галярас, соски атхэ кидинямамэн.

Адалэ зборэнца ов мукляс о кидипэ.

<- Дилэс 18Дилэс 20 ->