1 Андро першо куркєскєро дівес, сіктосара, ромня іле преготовіме сагошне олєї і авле кє гробніца. 2 Одя оне аракгле, со о бар отчідо ле гробніцатар. 3 Сар заавле андре, оне на аракгле о тєлос ле Раєскєро Ісусоскєро. 4 Ачіля, кана оне на ахальонас, со пес одя обачіля, дуй мурша терділе паж ленде андро бліскаце голмі. 5 Бара даратар ромня мукле пескєре муя кє пгув, та одала ленґє пгенде:

— Со тумен роден джівдес машкар о мувле? 6 Лес аде нане — Ов джівдісаліля мерібнастар! Леперен чак, сар Ов вакєрелас туменґє, кана есас минґ андре Галілєя, 7 кана пгендя, со о Ча ле Манушенґєро маїнел тейн предино андро васта ле бійношне манушенґє і маїнел тейн премардо про кєрестос, а про тріто дівес те джівдісальон мерібнастар.

8 Акор оне леперде Лескєре лава. 9 Кана вісаліле ле гробніцатар, оне розвакєрде саворо дешуєкг апостоленґє і саворе авренґє. 10 Ода есас Марія Магдаліна, Іоанна, Марія Яковскєрі дай і авер ромня. Оне розвакєрде ода ле апостоленґє, 11 та оне на патянділе ле ромнєнґє, ленґє дичолас, со ода чак чувче лава. 12 Та о Петро ушіля і єкгваресте денашля кє гробніца. Ов банділя і дикгля одя чак о похтан. Акор ов вісаліля кє песте і чудаліндяпес одалестар, со пес одя обачіля.

13 Андре ода же дівес дувджяне лендар джянас андро фоврос Еммаус, саво есас вай дешудуй кіломейтрі ле Єрусалімостар. 14 Оне вакєренас пал саворо, со пес обачіля. 15 Кана оне вакєренас і думіненас, коркоро Ісус подавля кє ленде і ґейля ленца андре єкг. 16 Та оне на прінджярде Лес, бо ленґєре якгендар ода есас запганло. 17 Ісус лендар пгучля:

— Пал состе тумен вакєрен машкар туменде пало дром?

Оне терділе смутне муєнца. 18 Єкг лендар, савес вічіненас Клеопа, отпгендя:

— Одалендар, ко авля андро Єрусалім, Ту єкг на джянес ода, со обачіляпес андре адала дівеса?

19 Ов пгендя ленґє:

— Пал состе Ме на джянав?

І оне розвакєрде Лескє:

— Пало ода, со пес обачіля ле Ісусога андал Назарет. Ов есас пророкос, зорало андро ода, со кєрелас, те андро лав анґлал о Дейл те анґлал саворе мануша. 20 Лес дине аврі єкг баредер рашая а те амаре пгуредера, гой те засудзінен Лес про мерібе, а паліш премарде Лес про кєрестос. 21 А амен самас бійзошне, гой Ов гіно Ода, Саво маїнел те ратинен ле Ізраєль. Та канакє тріто дівес, сар када саворо ачіля. 22 Але варесаве амаре ромнєндар зачудалінде амен. Оне ґейле дадіве тосара кє гробніца 23 і, сар на аракгле Лескєро тєлос, оне вісаліле і розвакєрде аменґє, со ленґє сікадепес анґєла, саве пгенде, со Ов гіно джівдо. 24 Паліш вареко амаре баратендар ґейле ко гробніца і аракгле одя саворо авка, сар вакєренас о ромня, а Лес одя оне на дикгле.

25 Паліш Ов ленґє пгендя:

— Саве тумен наґодявер, сар половкєс тумен патян саворескє, со вакєренас пророка! 26 Чі на маїндя Хрістос те преджян саворо када семведипе, а паліш те заджян андре Пескєрі слава?

27 Паліш кєздиндя ле Моїсєйостар і саворе пророкендар, і пгутердя ленґє саворо, со есас пісіме пал Лесте андро Пісаніє. 28 Кана оне пашес авле ко ода ґав, кай оне джянас, Ісус диня ленґє те джянен, гой Ов камел те джян дуредер. 29 Та оне іґєн манґєнас Лес і вакєренас:

— Ач аменца. Аврі іма ратісальол і ачел цма!

І Ов заавля андро кгєр і ачіля ленца. 30 Кана Ісус бешелас ленца пажо скамін, Ов іля маро, палікєрдя, препгаґля і диня ленґє. 31 Акор пгутердепес ленґєре якга, і оне прінджярде Лес. Та Ов ачіля пріґ ленде надикгадо. 32 Оне кєздинде те вакєрен єкг аврескє:

— Чі на лаболас андре аменде о їло, кана Ов вакєрелас аменца пало дром і кана пгутерелас аменґє Пісаніє?

33 Оне єкгваресте ушіле і ґейле минґ єкгвар андро Єрусалім. Одя оне аракгле андро єкг тган дешуєкг апостолен і саворен, ко есас ленца. 34 Одала ленґє пгенде, со о Рай те чачес джівдісаліля мерібнастар і сікадяпес ле Сімоноскє. 35 Паліш одала дувджяне розвакєрде саворо, со ленца есас про дром, і сар оне прінджярде ле Ісус, кана Ов препгаґля о маро.

36 Оне минґ вакєренас, кана Коркоро Ісус сікадяпес машкар ленде і пгендя ленґє:

— Мірос туменґє!

37 А оне ле даратар аж замувле, бо думіненас, со дикгєн ле духос. 38 Та Ов ленґє пгендя:

— Состар сан айсе предараде, і соске тумен на патян? 39 Дикгєн, акєс Мійре васта те Мійре піндре. Ода Ме сом! Худенпес Мандар і дикгєн, бо ко духос тєлос і кокала нане, а, сар дикгєн, кє Манде гін.

40 І сар ода пгендя, сікадя ленґє о васта те о піндре. 41 Та оне радисальонас і чудаліненаспес, та нісар на патянас. Акор Ов лендар пгучля:

— Чі гін тумен аде варесо те захан?

42 Оне подине Лескє котор пейка мачатар. 43 Ов іля і халас анґлал ленде. 44 Паліш Ов пгендя ленґє:

— Пало ода Ме вакєравас туменґє, кана минґ сомас туменца: саворо, со гін пісіме пал Манде андро Моїсєйоскєро Законос, ко пророка і андро псалмі, маїнелпес те обачен.

45 Акор Ов пгутердя ленґє е ґовді, гой те ахальон Пісаніє, 46 і пгендя ленґє:

— Пісіме, со Хрістос маїнел те семвединен, а про тріто дівес те джівдісальон ле мерібнастар. 47 Анґлал андро Єрусалім, а паліш машкар саворе нийпі андро Лескєро нав вічінена ле манушен те покаїненпес, гой те одмукєнпес ленгє о бійне. 48 Тумен вакєрена пало ода саворе манушенґє. 49 А канакє Ме бічавав туменґє ода, со обіціндя Мійро Дад. Та тумен ачен андро фоврос, адик на авела пре туменде е зор опрунестар.

50 Паліш Ісус ліґєндя лен андал о фоврос кє Віфанія. Одя Ов ваздня Пескєре васта і благословіндя лен. 51 І обачіляпес авка, кана Ов благословінелас лен, Ов ачіля те дурісальон лендар і кєздиндя те вазденпес про нєбос. 52 Акор оне банділе анґлал Лесте і баре радишаґога вісаліле андро Єрусалім. 53 Оне міндик аченас андро храмос і ашаренас ле Девлес.

<- Лукастар 23