1 Me o Pavol, o bertenarošis vaš o Ježiš Kristus, the o phral o Timoteus pisinas le Filemonoske, saves igen kamas a savo amenca jekhetane kerel e buči, 2 pisinas the la pheňake la Apfijake the le Archipaske, savo amenca jekhetane kerel e buči, a the la khangerake, so pes zdžal andre tiro kher.
3 Mi del tumen o Del amaro Dad the o Raj o Ježiš Kristus e milosť the o smirom!
Le Filemonoskro kamiben the pačaben
4 Me paľikerav mire Devleske furt, sar tut leperav andre mire modľitbi, 5 bo šunav pal o pačaben, so tut hin ko Ježiš ke amaro Raj the pal tiro kamiben ke savore manuša le Devleskre. 6 Modľinav man, hoj oda pačaben, so amen hin jekhetane, te zoraľol andre tu, a avke te prindžares savoro lačhipen, so amen hin andro Kristus. 7 Hin man igen baro radišagos tire kamibnastar, phrala miro, bo le Devleskre manuša chudle tutar e nevi zor andro jile.
O Pavol mangel vaš o Onezimus
8 Me tuke andro Kristus the šmelones šaj rozkazinďomas, so kampel te kerel, 9 ale vašoda, hoj tut kamav, mangav man tuke, me, o Pavol, phureder manuš a akana the bertenarošis vaš o Ježiš Kristus. 10 Mangav tut vaš o Onezimus, savo ačhiľa miro duchovno čhavo, sar somas andre bertena. 11 Ov tuke varekana na sas pre chasna, ale akana hino pre chasna the tuke the mange.
12 Bičhaďom les pale ke tute a leha džal the miro jilo. 13 Kamľom mange les te mukel paš mande, hoj ov mange vaš tuke te služinel, medik som andro lanci vaš o evaňjelium. 14 Ale na kamľom te kerel ňič bijal oda, hoj te džanav, so pre oda tu phenes, bo na kamav pre tu te ispidel, ale kamav, hoj oda lačhipen te avel korkoro tire jilestar. 15 Talam tutar sikra odgeľa vašoda, hoj paľis tuha te avel pro furt, 16 imar na sar otrokos, ale imar buter sar otrokos: sar lačho phral. Hino igen lačho mange a tuke meksa buter, the sar manuš the sar phral andro Raj.
17 Te man ľikeres sar oles, ko tuha jekhetane kerel e buči, prile les avke sar man. 18 Te tuke kerďa vareso nalačho, abo te tuke kamel vareso, rachin oda mange. 19 Me, o Pavol, kada pisinav mire vasteha: Me počinava. Na kamav tuke te leperel, hoj mange kames mek the tut korkores. 20 He, kamav, phrala, hoj man tutar te avel varesavi chasna andro Raj. Ker mange radišagos andro jilo andro Kristus! 21 Pisinďom oda avke, bo pačav, hoj sal šundo a kereha meksa buter, sar tuke phenďom.
22 A mek tut mangav: Pripravin mange o than pro soviben, bo pačav, hoj o Del šunela avri tumare modľitbi a dela man tumenge pale.
O posledna lava
23 Pozdravinel tut o Epafras, savo hino manca andre bertena vaš o Ježiš Kristus. 24 Pozdravinen tut the ola, ko jekhetane manca keren e buči – o Marek, o Aristarchos, o Demas the o Lukaš.
25 E milosť amare Rajeskri le Ježišoskri Kristoskri mi el tumare duchoha!
