26
Eňato vakeriben le Joboskro
1 Akor o Job odphenďa kada:
2 „Joj, sar pomožinďal oleske, kas nane zor!
Sar zachraňinďal oles, ko na birinel!
3 Joj, savi lačhi rada diňal le nagoďaveres!
Savi bari goďi sikaďal!
4 Khatar iľal kala goďaver lava?
Savo duchos prekal tute vakerel?
5 O duchi le mulengre izdran telal tel o paňi
a the savore, so ode bešen.
6 O Del džanel savoro pal ola, ko hine andro than le mulengro[a],
a o than le meribnaskro[b] nane ňisoha zaučhardo le Devleske.
7 Ov nacirdel o severno ňebos ode, kaj nane ňič,
e phuv figinďa upral ňisoste.
8 Ov phandel o paňi andre peskre chmari
a o chmari na prečhinďon.
9 Garuvel peskro tronos[c] avke, hoj les te na dičhol,
a nacirdel upral leste peskri chmara.
10 Odďelinďa o švetlos le kaľipnastar avke,
hoj merinďa avri e hraňica maškar o moros the ňebos.
11 O slupi le ňeboskre izdran
a predaran, sar len karhinel.
12 Peskra zoraha kerďa, hoj o moros te čhitel,
a peskra goďaha zňičinďa la obluda Rahab.
13 Leskro dichos žužarďa o ňebos,
leskro vast predemaďa le bare sapes, so denašelas.
14 Dikh, kada hin ča sikrica olestar, so ov kerel,
ča kajci frima pes amenge dochudňa andro kana.