1 Kyze Sudeutsa pehatsa Erodes niy. Wastuhu Sesus tuktsa nisisukyryky. 2 Iwatahi ziakbata sodadu zipehahik:

— Tsiaku tsibezehikta! — niy. Tsiaku Suão ziky ata hi zibezehik. Sokorotsapuzeze ty zibezehik. Iwatahi Tsiaku nihyrikosokda. 3 Sudeutsa, asahi Sesus humo batu sispirikpo, Tsiaku zibezenahaze sakurẽtsa niyziknaha. Iwaze Erodes Peduru sakyriukrẽnikitsa hurukwy bo zioktyhyryk.

4 Sudeutsa myikaha eze Peduru sakyriukrẽnikitsa hurukwy bo nitsahurukik. Sudeutsa myikaha eze atsikara ipytowy bara ty ziokoknaha pororo ziknakaranaha. Peduru sakyriukrẽnikitsa hurukwy bo zioktyhyryknaha. Erodes tapetu ziknakara.

— Sudeutsa myikaha napykze Peduru kytsa sizubarẽtsa bo pioktyhyryk. Iwaze iharere tawaby ibo iktsa mykaranaha — niy. Sodadutsa Peduru nizukparakanaha. Diseseis sodadutsa nisipeha. Anaeze petoktsa naeze petoktsa Peduru nizukparakanaha. Bykyze sapetoktsa sapetoktsa. 5 Iwatsa sodadutsa Peduru nizukparakanaha. Sesus tuktsa Peduru tsyhyryze Deus bo nipamykysoikiknaha.

6 Mynakoksohoze Erodes Peduru myzioktyhyryk bijoikpe iknykta unata eze ibo izumu. Peduru zurubaka. Sodadutsa tazaha eze zurubaka. Karikutsitsitsa ty ipawaraharẽta sodadutsa nataba nataba ziperykynaha. Ustsa sodadutsa hokbowy baze ziperykynaha. 7 Atsoko bijoikpe iknykta inasik. Ibo inatsuk sakyriukanikitsa hurukwy eze tu okoro eze ky waha niyzik. Atahi Peduru isukara bete tuzu tuzu nikara. Popotykta iwaze ipe niy:

— Aidy kyitykta! Iparawarawytsa niaksatsuknaha.

8 Asuk ty zikpiziwy ty pypyrykty. Apyry suktsa ty korokbykty — niy.

Hyỹ niy. Peduru tasuk zikorobyk. Bijoikpe iknykta ipe niy:

— Akpyzazawy ty korobyktykta. Kapikta! — niy.

9 Niahatsahi ziponaha. Peduru bijoikpe iknykta hapik sakyriukanikitsa hurukwy ekze ape bo ziponaha. Peduru batu ihyrinymyry. Bijoikpe iknykta babata humo batu ihyrinymyry.

— O piktsotyspykyk ja — mytsaty nikara. 10 Sodadutsa nisiharamunaha. Ustsa sodadutsa nisiharamunaha. Hokbowy ziharawy zumunaha. Hokbowy sihezõnita. Pehoro hi niy. Ata hokbowy hudikhudikwy bo niy. Zumunahaze hokbowy atatu zoksapare niy. Ziponaha. Ape bo niriktotohokonaha. Iwaze hudikhudikwy ske buruk niukurunaha. Atsoko bijoikpe iknykta Peduru iske eze zerekek. 11 Iwatahi Peduru mytsatyziu nikara.

Abaka kahyrinymyrẽta. Deus bijoikpe iknykta izipeha. Iwatahi uta sakyriukanikitsa hurukwy ezekta tu ziksukehyrykzo. Ikzoitahi iwaze Erodes ba zikbeze. Sudeutsa sizubarẽtsa pikbeze tsihikiknaha. Deus zikoktyhyryk. Nawatyhi mytsaty nikara.

12 Iwaze atahi Maria wahoro bo, Suão Marakosje bo niy. Sesus tuktsa sizubarẽtsa anaeze izumubanaha. Peduru tsyhyryze Deus bo nipamykysokonaha. 13 Peduru wahoro hokbowy bo zumu. Tototo nikara huahua niy. Itsumuẽhĩtsata hokbowy bo iktsa niy.

— Aty sa hua mykara — niy. Atatsa Hoda inarokotatsa. 14 Atatsa Peduru yksoho ziwabyze. O Peduru sakyriukanikitsa hurukwy eze izoihik mytsaty nikara. Tsakurẽtatsa nikara. Hawa sa my batu ihyrinymyry iwatatsahi Sesus tuktsa bo atsoko niyzo. Ispe niy:

— Peduru hokbowy eze moriktohoko — niy.

15 Asahi:

— Batu ba. Ikia akedepyktatsa Peduru byitatu nikaranaha. Ikia tsimymyspihikbataka — Peduru tihi ba nikara.

— Batu ba. Ihyrikoso zuba — nikaranaha.

16 Peduru hokbowy baze hua nikara. Iwatsahi Sesus tuktsa hokbowy ty zoksapare niaha. Peduru zinynaha. Nipybynaha. 17 Peduru tatsyhyrype ty wyk niy.

— Akso byitaha — niy. Niytahi Peduru bijoikpe iknykta soho nitsasoko. Hawa Deus sakyriukanikitsa hurukwy eze zioktyhyryk naha nitsasoko.

— Tsiaku bo tytsasonahaktsa. Ustsa Sesus tuktsa bo niwatihi — niy.

Kyze mekybotu niparak.

18 Iwaze inakyokze sodadutsa Peduru ty batu ity kaha. Paikpa mytsaty nikaranaha. Peduru sa hana bo nikaranaha. Batu aty tohi ityny. Sakubyitsa niapykyryknaha. 19 Kyze Erodes tihi:

— Peduru tyzioktyhyk! — niy. Sodadutsa Peduru ziberikinaha. Batu ity kaha. Niytahi Erodes kytsa Peduru nizukparakanahatsa pe niy.

— Hawa ta sa Peduru sakyriukanikitsa hurukwy eze inawakik — niy.

— Yhỹ ja — nikaranaha. Iwatahi Erodes sodadutsa Peduru nizukparakanahatsitsa nisibabaiknaha.

Kyze Erodes Serusarẽhe ekze niparak. Sesareja bo niukuru. Anaeze niapykyryk.

20 Erodes takyriki. Tiro ezektsa Sidõ ezektsa humo kino niwatihi takyriki. Tubabatu sidisahawy Erodes sapy ikny izumu niy. Abaka batu. Iwaze Erodes sihumo takyriki niy. Wastuhu Tiro ezektsa ustsa Sidõ ezektsa inauzuzuknaha. Barasto Erodes tsumuẽhĩtsa bo izumunaha. Atahi situkta iwatsahi Barasto bo nikaranaha. Erodes bo sitsyhyryze nipamykyso tsihikiknaha iwatahi niakyribyriki. 21 Kyze:

— Erodes estuba zuruze ahabo motsaso — nikara. Nawa zuruze kytsa sizubarẽtsa inauzuzuknaha. Erodes harere wabytsitsa inauzuzuknaha. Iharere wabytsitsa inauzuzukbanahaze Erodes suk tsiziurẽna ty korobyk niy. Mypehatsa dyhywy bete nidyhyky. Kytsa bo nipamykysobaik. 22 Nitsasokoze kytsa kazi nikaranaha:

— O atakta mybo nitsasoko batu maku zuba, atahi deus my — mytsaty ahabyitsa zikaha.

23 Erodes siharere iakparawy. Inaro myhyrizikwani niyzik. Kytsa bo — Uta deus byitatu — batu tyso. Iwatahi atsoko bijoikpe iknyktsa Erodes zihyrikosokdawyhik. Itsitsihikyritsa ziborobanaha. Iwa nihyrikosokda.

24 Iwaze kytsa sizubarẽtsa Deus harere ziwabynaha. Nanabyitaba Deus harere sizubarẽtsa ziwabykynaha iwaze kytsa Sesus humo sispirikporẽtsa.

25 Iwaze Baranabe, Sauro ahatsa okyrysaro ty Sesus tuktsa bo nyny niaha. Serusarẽhe ezektsa bo okyrysaro ty nyny niaha. Bykyze Ãtiokia bo ziksizonaha. Suão Marakos situk Ãtiokia bo niukuru. Iwaze sizubarẽtsa Deus harere ziwabynaha.

<- Atos 11Atos 13 ->