Suão Sesus tuktsa bo ziwatahaka

Tubabatu kytsa watahaha — Suão ziwatahaka — mynakaranaha. Suão Sesus tuk zinymyrykyta. — Tynaharape pokzitsikinaha — ana hi ziwatahaka. Aba katsa kino niwatihi tanymyryky.

1 Abaka katsaktsa ikiahatsa bo tahawatahakanaha. Sesus Kiristu ahabo tawatawy tsihikik iwatsahi tawatahaka. Deus isuknihi byituze Sesus Kiristu koikny baktatu my. Atakta Deus harere babata tu hỹ. Iharere humo tsikspirikpokonaha zeka meky watu tsimoziknaha. Tsimyhyrikosokdanahaze ituk mywahi tsimynapykyryknaha Sesus Kiristu inasikze iharere tsiwabynaha hỹ. Tsinynaha. Ituk zikzurukunaha. Abaka ibo mytsatyziu tsimykaranaha.

2 Atakta mybarawy bo inasikze mywata niyzik. Iwatsahi katsaktsa tsinynaha. Ata soho hi tsimytsasokonaha. Asahi ihumo mospirikponahaze meky watu moziknaha. Tsimyhyrikosokdanahaze Deus tuk mywahi tsimynapykyryknaha. Atakta Deus tuk tawahi mynapykyryk. Tubabatu Deus tuk koikny baktatu mybo tawatawy.

3 Nawa ha ty botu tsinynaha ahabo tsimytsasokonaha. Botu tsiwabynaha hi ahabo tsimytsasokonaha. Tsimytsasokonahaze isoho humo ahahyrinymyrẽtsa. Ikiahatsa mywatsa Deus myzo hyrytsa tsimoziknaha. Katsaktsa Sesus Kiristu tukytsa tsimaha ikiahatsa kino niwatihi mytuk itukytsa tsimoziknaha. Iwatsahi ahabo tsimytsasokonaha ikiahatsa kino niwatihi mytukytsa tsimoziknaha. Katsaktsa myzubarẽtsa astsatu tsimoziknaha hỹ.

4 Anahi tawatahaka iwatsahi ahakurẽtsa tsimoziknaha. Ikiahatsa Sesus humo ahaspirikporẽtsa. Katsaktsa mykurẽtsa tsimykaranaha

5 Wabyziutaha! Deus wasania ty ahabo tsimytsasokonaha. Deus haramwe eksok hyrity wa. Atazuba imysapyrẽnikita. Ihumo mypubara zuba. Katsa mysopyksapybyitsa tu tsimykaranaha zeka batu ituk zikapykyknaha. Amy ty batu mysapy kytsa papatu tsimykaranahaze mysikpybyrẽtsa tsimoziknaha. Katsa wasani tsimaha zeka haramwe eksok hyrity wa iwaze Deus tuk tsimypykyryknaha. Anahi Sesus mybo nitsaso katsa iharere tsiwabynaha. 6 Katsaktsa:

— O Deus atukytsa tsimaha — mytsaty ahabyitsa tsimykaranaha. Hawaha tsimytsasokonaha zeka mysapybyitsa tu tsimykaranaha mybarapetu tsimykaranaha. Katsa wasanibara ty tsimyzurukunaha. Iwaze batu Deus tuktsa tsimoziknaha. 7 Deus ta batu zimyi batu ziky. Atazuba haramwe eksok hyrity wa. Wasanikita. Katsa iwata tsimyzurukunaha zeka tyharape hapokzitsikinaha, Deus mysopyksapybyitsa tu tsikykaranaha mymyokzohik. Sesus Deus tse iharapatawyhyta humo taspu ziwebaik nihyrikosokda ana humo hi mysapybyitsa tsikykaranaze Deus mymyokzohik. Abaka Sesus humo meky watu tsimoziknaha. Ihumo mysapyrẽtsa tsimoziknaha hỹ.

8 Katsa tihi zeka:

— Katsaktsa isapyrẽnikia ty zuba tsimykaranaha zeka. Deus harere bo zuba hyỹ tsimynakaranaha — mybarapetu tsimykaranaha. Batu ma zikaha. Iwa tsimykaranaha zeka mybarapetu tsimykaranaha. Anaharere humo hi baija tsimykaranaha. 9 Mysopyksapybyitsa tsimykaranaha zeka Deus bo tytsasonaha. Iwa mysapybyitsa ty ibo tsimytsasokonaha zeka iwahatu mymyokzohik. Iwa botu nitsaso iwatahi mysapybyitsa tsimykaranaha iharere humo mymyokzohik. Iharere wasani my. Ihumo meky watu tsimoziknaha. Ihumo mysapyrẽtsa tsimoziknaha hỹ. 10 Deus hi:

— Mybarawy ezektsa simysapybyitsa mykaranaha — niy. Tsimytsasokonaha zeka:

— O katsaktsa batu. Wasani tsimaha — mybarapetu tsimykaranaha. Iwa mybarapetu tsimykaranaha zeka Deus harere humo batu ahahyrinymyry tsipiwatawykynaha. Deus botu nitsaso mybarawy ezektsa sisapybyitsa mykaranaha, katsaktsa ipe tsimaha zeka:

— O batu wasani tsimy — iwatahi Deus mospihikbatakata wata mybarapetu tsimykaranaha.

1 Suão 2 ->