1 ⵇⵇⴰⵔⴻⵖ ⵜⵉⴷⴻⵜⵜ ⴷⵉ ⵍⵎⴰⵙⵉⵃ, ⵡⴰⵔ ⵙⵙⵅⴰⵔⵔⵉⵇⴻⵖ ⵛⴰ, ⵓⵛⴰ ⵜⴰⵏⴻⴼⵙⴻⵛⵜ ⵉⵏⵓ ⵜⵛⴻⵀⵀⴻⴷ ⴷⴰⵢⵉ ⵙ ⴰⵔⵔⵓⵃ ⵉⵇⴻⴷⴷⵙⴻⵏ, [a] 2 ⴱⴻⵍⵍⵉ ⵖⴰⵔⵉ ⴰⵛⴹⴰⵏ ⵉⵎⵖⴰⵔ ⴷ ⵍⴻⵃⵔⵉⵇ ⵡⴰⵔ ⵉⵜⵜⴱⴻⴷⴷⵉ ⴷⴻⴳ ⵡⵓⵍ ⵉⵏⵓ. 3 ⵜⵓⵖⴰ ⵜⵜⵥⴰⴵⵉⵖ ⵎⴻⵄⵍⵉⴽ ⵓⴼⵉⵖ ⵜⵜⵡⴰⵃⴰⵔⵔⵎⴻⵖ ⴷⵉ ⵎⵓⵎⵎⵓ ⵉⵏⵓ ⵅ ⵍⵎⴰⵙⵉⵃ ⵙ ⵉⵛⵜ ⵏⵏⴻⵄⵍⴻⵜ ⴷⵉ ⵟⵟⵡⴻⵄ ⵏ ⵡⴰⵡⵎⴰⵜⴻⵏ ⵉⵏⵓ, ⵍⴰⴵ ⵉⵏⵓ ⵣⵉ ⵊⵊⵉⵀⴻⵜ ⵏ ⵡⴻⵢⵙⵓⵎ ⵏ ⴰⵔⵔⵉⵎⴻⵜ. [b] 4 ⴰⵔⵔⴰⵡⴻⵏ ⵏ ⵉⵙⵔⴰⵉⵍ, ⵉⵏⵏⵉ ⵉⵜⵜⵡⴰⵇⴻⴱⵍⴻⵏ ⴷ ⵎⵎⵉⵙ. ⵖⴰⵔⵙⴻⵏ ⵉ ⵢⴻⴵⴰ ⵓⵄⵓⴵⵉ, ⵍⵄⵓⵀⵓⴷ, ⵛⵛⴰⵔⵉⵄⴰ, ⵜⴰⵙⴻⵅⵅⴰⵔⵜ ⵉ ⵉⴵⴰⵏ ⴷⵉ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ ⵉ ⵖⴰⵔⴻⵙ ⴷⴷ-ⵉⵇⵇⵏⴻⵏ, ⵍⵡⵓⵄⵓⴷ ⴷ ⵍⴻⵊⴷⵓⴷ. [c] 5 ⵣⵣⴰⵢⵙⴻⵏ ⵉ ⴷⴷ-ⵉⴱⴰⵏ ⵍⵎⴰⵙⵉⵃ ⵅ ⵡⴻⴱⵔⵉⴷ ⵏ ⵡⴻⵢⵙⵓⵎ ⵏ ⴰⵔⵔⵉⵎⴻⵜ ⵡⴻⵏⵏⵉ ⴷ ⴰⵔⴻⴱⴱⵉ ⵅ ⵎⴰⵔⵔⴰ. ⵉ ⵏⴻⵜⵜⴰ ⵉ ⵖⴰ ⵢⵉⵍⵉ ⵎⴰⵔⵔⴰ ⴰⵙⴻⵎⵖⴰⵔ ⴷ ⵎⴰⵔⵔⴰ ⵍⴱⴰⵔⴰⴽⴰ ⵉ ⵍⴻⴱⴷⴰ ⵇⴰⵄ. ⴰⵎⵉⵏ! [d]

6 ⵎⴰⵛⴰ ⵡⴰⵔ ⵉⴵⵉ ⴰⵍⴰⵎⵉ ⴰⵡⴰⵍ ⵏ ⴰⵔⴻⴱⴱⵉ ⵡⴰⵔ ⵢⵉⵡⵉⴹ, ⵎⵉⵏⵣⵉ ⵎⴰⵔⵔⴰ ⵉⵏⵏⵉ ⵣⵉ ⵉⵙⵔⴰⵉⵍ ⵡⴰⵔ ⴵⵉⵏ ⵛⴰ ⴷ ⵉⵙⵔⴰⵉⵍ. [e] 7 ⵓⵛⴰ ⵓⵍⴰ ⴷ ⵎⴰⵔⵔⴰ ⵏⵉⵜⵏⵉ ⵡⴰⵔ ⴵⵉⵏ ⵛⴰ ⴷ ⵜⴰⵔⵡⴰ ⵏ ⵉⴱⵔⴰⵀⵉⵎ, ⵎⵉⵏⵣⵉ ⵏⵉⵜⵏⵉ ⵣⵉ ⵣⵣⴰⵔⵉⵄⴻⵜ ⵏ ⵉⴱⵔⴰⵀⵉⵎ, ⵎⵉⵏⵣⵉ ⵉⵜⵜⵡⴰⵏⵏⴰ: “ⴷⵉ ⵉⵙⵃⴰⵇ ⴰⴷ ⴰⵛ ⵍⴰⵖⴰⵏ ⵣⵣⴰⵔⵉⵄⴻⵜ.” [f] 8 ⵎⴰⵏ ⴰⵢⴰ ⵡⴰⵔ ⵉⵅⵙ ⴰⴷ ⵢⵉⵏⵉ ⴰⵇⴰ ⵜⴰⵔⵡⴰ ⵄⵍⴰⵃⵚⴰⴱ ⵊⵊⴰⴷⵉⵔⴰ ⵏ ⴰⵔⵔⵉⵎⴻⵜ ⴰⵇⴰ-ⵜⴻⵏ ⴷ ⵜⴰⵔⵡⴰ ⵏ ⴰⵔⴻⴱⴱⵉ, ⵎⴰⵛⴰ ⵜⴰⵔⵡⴰ ⵏ ⵍⵡⴰⵄⴷ ⴰⴷ ⵜⵜⵡⴰⵃⴻⵙⴱⴻⵏ ⴷ ⵣⵣⴰⵔⵉⵄⴻⵜ. [g] 9 ⵎⵉⵏⵣⵉ ⴰⵡⴰⵍ ⵏ ⵍⵡⴰⵄⴷ ⴷ ⵡⴰ:

“ⵖⴰⵔ ⵍⵡⴻⵇⵜ-ⴰ ⴰⴷ ⴷⴷ-ⴰⵙⴻⵖ

ⵓⵛⴰ ⴰⴷ ⵖⴰⵔⴻⵙ ⵢⵉⵍⵉ ⵖⴰⵔ ⵙⴰⵔⴰ ⵎⵎⵉⵙ!” [h]

10 ⵎⴰⵏ ⴰⵢⴰ ⵡⴰⵔ ⵉⴵⵉ ⵡⴰⵀⴰ ⴷⵉ ⵜⵎⴻⵙⵍⴰⵛⵜ ⵏ ⵙⴰⵔⴰ, ⵎⴰⵛⴰ ⵓⵍⴰ ⴷⵉ ⵜⵎⴻⵙⵍⴰⵛⵜ ⵏ ⵔⵉⴼⵇⴰ, ⵓⵎⵉ ⵜⵎⵓⵏ ⴰⴽ-ⴷ ⵓⵢⴻⵏⵏⵉ ⵏ ⴱⵏⴰⴷⴻⵎ ⵏⵏⵉ, ⵊⴻⴷⴷⵉⵜⴻⵖ ⵉⵙⵃⴰⵇ, [i] 11 ⵜⵓⵖⴰ ⵜⵉⵣⵣⴰⵔ ⵜⴻⵜⵜⵡⴰⵙⵙⴻⵏ ⵍⵉⵅⴹⴰⵔⴻⵜ ⵏ ⴰⵔⴻⴱⴱⵉ ⵓⵎⵉ ⵜⵓⵖⴰ ⵄⴰⴷ ⵡⴰⵔ ⴷⴷ-ⵅⵍⵉⵇⴻⵏ ⵉⵃⴻⵏⵊⵉⵔⴻⵏ ⵏⵏⴻⵙ, ⵡⴰⵔ ⵣⴻⵎⵎⴰⵔⴻⵏ ⴰⴷ ⴳⴳⴻⵏ ⵄⴰⴷ ⵍⵅⴰⵔ ⵏⵉⵖ ⵍⵖⴰⵔ, ⵃⵉⵎⴰ ⵡⴰⵔ ⵜᵉⵜⵜⵉⵍⵉ ⵜⵎⴻⵙⵍⴰⵛⵜ ⴷⴻⴳ ⵡⴻⴱⵔⵉⴷ ⵏ ⵍⴻⵅⴷⴰⵢⴻⵎ, ⵎⴰⵛⴰ ⴷⴻⴳ ⵡⴻⴱⵔⵉⴷ ⵏ ⵡⴻⵏⵏⵉ ⵉⵜⵜⵍⴰⵖⴰⵏ. 12 ⵎⴰⵖⴰⵔ ⵉⵜⵜⵡⴰⵏⵏⴰ ⵉ ⵔⵉⴼⵇⴰ:

“ⴰⵇⴰ ⴰⵎⴻⵇⵇⵔⴰⵏ ⴰⴷ ⵉⵙⴻⵅⵅⴰⵔ ⵉ ⵓⵎⴻⵥⵢⴰⵏ!”, [j]

13 ⴰⵎ ⵎⴰⵎⵎⴻⵛ ⵜⵓⵔⴰ:

“ⵢⴰⵄⵇⵓⴱ ⵉ ⵅⵙⴻⵖ, ⵎⴰⵛⴰ ⵛⴰⵔⵀⴻⵖ ⵉⵙⵓ.” [k]

14 ⵎⵉⵏ ⵖⴰ ⵏⵉⵏⵉ ⵅⴻⵏⵏⵉ? ⵎⴰ ⵉⵇⴻⴷⴷ ⴰⴷ ⵢⵉⵍⵉ ⵖⴰⵔ ⴰⵔⴻⴱⴱⵉ ⵎⵉⵏ ⵡⴰⵔ ⵉⵙⴻⴳⴳⴷⴻⵏ? ⵄⴻⵎⵎⴰⵔⵚ! [l] 15 ⵅⵣⴰⵔ, ⵏⴻⵜⵜⴰ ⵉⵏⵏⴰ ⵄⴰⵡⴻⴷ ⵉ ⵎⵓⵙⴰ:

“ⴰⴷ ⴰⵔⴻⵃⵎⴻⵖ ⵡⵉ ⵅⵙⴻⵖ ⴰⴷ ⴰⵔⴻⵃⵎⴻⵖ,

ⵓⵛⴰ ⴰⴷ ⵃⵉⵏⵏⴻⵖ ⵅ ⵡⵉ ⵅⵙⴻⵖ ⴰⴷ ⵃⵉⵏⵏⴻⵖ.” [m]

16 ⵅⴻⵏⵏⵉ ⵜⴰⵎⴻⵙⵍⴰⵛⵜ ⵡⴰⵔ ⵜⴻⵇⵇⵉⵎ ⵛⴰ ⵖⴰⵔ ⵡⵉ ⵉⵜⵜⴻⵅⵙⴻⵏ ⵓⵍⴰ ⵖⴰⵔ ⵡⵉ ⵉⵜⵜⴰⵣⵣⵍⴻⵏ, ⵎⴰⵛⴰ ⵖⴰⵔ ⴰⵔⴻⴱⴱⵉ ⵡⴻⵏⵏⵉ ⵢⴰⵔⴻⵃⵃⵎⴻⵏ. 17 ⵎⵉⵏⵣⵉ ⵄⵍⴰⵃⵙⴰⴱ ⵜⵉⵔⴰ ⵉⵇⴻⴷⴷⵙⴻⵏ ⵉⵏⵏⴰ ⵏⴻⵜⵜⴰ ⵉ ⴼⵉⵔⵄⵓⵏ:

“ⴰⵇⴰ ⵉ ⵎⴰⵏ ⴰⵢⴰ ⵙⵙⵏⴻⴽⴽⴰⵔⴻⵖ-ⴷⴷ ⵛⴻⴽ,

ⵃⵉⵎⴰ ⴰⴷ ⵣⵣⴰⵢⴻⴽ ⵙⵙⴻⵛⵏⴻⵖ ⵊⵊⴻⵀⴷ ⵉⵏⵓ,

ⵓⵛⴰ ⴰⴷ ⵉⵜⵜⵡⴰⴱⴰⵔⵔⴻⵃ ⵉⵙⴻⵎ ⵉⵏⵓ

ⴷⵉ ⵎⴰⵔⵔⴰ ⴷⴷⵓⵏⴻⵛⵜ.” [n]

18 ⵅⴻⵏⵏⵉ ⵏⴻⵜⵜⴰ ⴰⴷ ⵢⴰⵔⵃⴻⵎ ⵡⵉ ⵉⵅⵙ, ⵓⵛⴰ ⴰⴷ ⵉⵙⵙⴻⵇⵙⴻⵃ ⵡⵉ ⵉⵅⵙ.

19 ⵉⵡⴰ, ⴰⴷ ⵜⴰⵖ ⴰⴷ ⵜⵉⵏⵉⴷ: ⵎⴰⵢⴻⵎⵎⵉ ⵉⵜⵜⵛⴻⵜⵛⴰ ⵄⴰⴷ, ⵎⵉⵏⵣⵉ ⵡⵉ ⵖⴰ ⵉⵎⵎⵄⴰⵍⴰⵏ ⴰⴽ-ⴷ ⵎⵉⵏ ⵉⵅⵙ ⵏⴻⵜⵜⴰ? 20 ⵎⴰⵛⴰ ⵎⵉⵏ ⵜⴻⵄⵏⵉⴷ ⵛⴻⴽ, ⴰ ⴱⵏⴰⴷⴻⵎ, ⵡⴻⵏⵏⵉ ⵉⵜⵜⵇⴰⵛⴰⵃⴻⵏ ⴰⵔⴻⴱⴱⵉ? ⵎⴰ ⵎⵉⵏ ⵉⵜⵜⵡⴰⴳⴳⴻⵏ ⵉⵣⴻⵎⵎⴰⵔ ⴰⴷ ⵉⵏⵉ ⵉ ⵡⴻⵏⵏⵉ ⵜ ⵉⴳⴳⵉⵏ: “ⵎⴰⵢⴻⵎⵎⵉ ⴷ ⴰⵢⵉ ⵜⴻⴳⴳⵉⴷ ⴰⵎⵎⵓ?” [o] 21 ⵎⴰ ⵡⴰⵔ ⵉⴵⵉ ⵖⴰⵔ ⴱⵓ-ⵜⵍⴰⵅⵜ ⵚⵚⵓⵍⵟⴰ ⵅ ⵜⵍⴰⵅⵜ ⵃⵉⵎⴰ ⴰⴷ ⵉⴳⴳ ⵣⴻⴳ ⵉⵛⵜ ⵏ ⵍⵄⴻⵊⵏⴻⵜ ⵉⵛⵜ ⵏ ⵍⵇⴻⵛⵄⴻⵜ ⵉ ⵍⴽⴰⵔⴰⵎⴰ ⵓ ⵡⴻⵏⵏⴻⵖⵏⵉ ⵉ ⵓⴱⴻⵀⴷⴻⵍ? [p] 22 ⵎⴰⵖⴰⵔ ⴰⵔⴻⴱⴱⵉ, ⵡⴻⵏⵏⵉ ⵜⵓⵖⴰ ⵉⵅⵙ ⴰⴷ ⵉⵙⵙⵛⴻⵏ ⴰⵖⴹⴰⴱ ⵏⵏⴻⵙ ⴷ ⵊⵊⴻⵀⴷ ⵏⵏⴻⵙ, ⵉⵙⵙⵉⵡⴻⴹ ⵍⵖⴰⴹⴰⴱ ⵏⵏⴻⵙ ⵙ ⵡⴰⵟⵟⴰⵙ ⵏ ⵜⵜⴰⵙⵉⵄ ⵏ ⵍⵅⴰⴹⴰⵔ ⵅ ⵍⴻⵇⵛⵓⵄ ⵏ ⵡⴻⵖⴹⴰⴱ ⵉⵏⵏⵉ ⵉⵜⵜⵡⴰⵙⵙⵡⴻⵊⴷⴻⵏ ⵎⴰⵔⵔⴰ ⵉ ⵓⵀⴻⵍⵍⴻⴽ, 23 ⵓⵛⴰ ⵉⴼⴰⵔⵖ ⵜⴰⵢⵔⵉ ⵏⵏⴻⵙ ⵅ ⵍⴻⵇⵛⵓⵄ ⵏ ⴰⵔⵔⴻⵃⵎⴻⵜ ⵉⵏⵏⵉ ⵉⵣⵡⴰⵔ ⵉⵙⵙⴻⵡⵊⴻⴷ ⵉ-ⵜⴻⵏ ⵉ ⵓⵄⵓⴵⵉ ⵉ ⴰⵔⴻⴱⴱⵉ! 24 ⵎⴰⵖⴰⵔ ⵏⴻⵛⵛⵉⵏ ⴷ ⵉⵏⵏⵉ ⵉⵜⵜⵡⴰⵍⴰⵖⴰⵏ, ⵡⴰⵔ ⵉⴵⵉ ⵣⴻⴳ ⵡⵓⴷⴰⵢⴻⵏ ⵡⴰⵀⴰ, ⵎⴰⵛⴰ ⵄⴰⵡⴻⴷ ⵣⵉ ⵍⴻⴳⵏⵓⵙ. 25 ⴰⵎ ⵎⴰⵎⵎⴻⵛ ⵉⵜⵜⵡⴰⵏⵏⴰ ⵄⴰⵡⴻⴷ ⴷⵉ ⵃⵓⵛⵉⵄⴰ:

“ⴰⴷ ⵙⴻⵎⵎⵉⵖ ⵉ ⵢⵉⵏⵏⵉ ⵡⴰⵔ ⵉⴵⵉⵏ ⴷ ⵍⴳⴻⵏⵙ ⵉⵏⵓ

‘ⵍⴳⴻⵏⵙ ⵉⵏⵓ!’,

ⵓⵛⴰ ⵉ ⵢⵉⵏⵏⵉ ⵡⴰⵔ ⵉⴵⵉⵏ ⴷ ⴰⵎⵄⵉⵣⵣ ⴷ ‘ⴰⵎⵄⵉⵣⵣ!’ ” [q]

26 ⴰⴷ ⵢⵉⵍⵉ ⴷⴻⴳ ⵡⴻⵎⵛⴰⵏ ⵎⴰⵏⵉ ⴷ ⴰⵙⴻⵏ ⵉⵜⵜⵡⴰⵍⴰⵖⴰ:

‘ⵡⴰⵔ ⵉⴵⵉ ⴷ ⵍⴳⴻⵏⵙ ⵉⵏⵓ!’,

ⴱⴻⵍⵍⵉ ⴷⵉⵏⵏⵉ ⴰⴷ ⴰⵙⴻⵏ ⵍⴰⵖⴰⵏ:

‘ⴰⵔⵔⴰⵡⴻⵏ ⵏ ⴰⵔⴻⴱⴱⵉ ⵉⴷⴷⴰⵔⴻⵏ!’ [r]

27 ⵎⴰⵛⴰ ⵉⵛⴰⵄⵢⴰ ⵉⴱⴰⵔⵔⴻⵃ ⵣⵉ ⵊⵊⵉⵀⴻⵜ ⵏ ⴰⵢⵜ ⵏ ⵉⵙⵔⴰⵉⵍ:

“ⵎⴰⵍⴰ ⵜⵓⵖⴰ ⵍⵇⴻⴷⴷ ⵏ ⴰⵢⵜ ⵏ ⵉⵙⵔⴰⵉⵍ

ⴰⵏⴻⵛⵜ ⵏ ⵉⵊⴷⵉ ⵏ ⵍⴻⴱⵃⴰⵔ,

ⵎⵖⵉⵔ ⵎⵉⵏ ⵉ ⵖⴰ ⵉⵇⵇⵉⵎⴻⵏ ⴰⴷ ⵉⵏⵊⴻⵎ.” [s]

28 “ⵜⴰⵎⴻⵙⵍⴰⵛⵜ ⵜⴱⴻⴷⴷ ⵏⵉⵛⴰⵏ ⵓ ⴰⴷ ⵜᵉⵜⵜⵡⴰⵇⴼⴻⵍ,

ⵙⵉⴷⵉ ⴰⴷ ⵜⵜ ⵉⴳⴳ ⵅ ⵜⴻⵎⵎⵓⵔⵜ.” [t]

29 ⴰⵎ ⵎⴰⵎⵎⴻⵛ ⵉⵣⵡⴰⵔ ⵉⵛⴰⵄⵢⴰ ⵉⵏⵏⴰ:

“ⵎⴰⵄⵍⵉⴽ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵡⴰⵔ ⴷ ⴰⵏⴻⵖ ⵉⵊⵊⵉ

ⵉⵏⵏⵉ ⵉⵇⵇⵉⵎⴻⵏ ⴷⴷⴰⵔⴻⵏ,

ⵉⵍⵉ ⵏⴻⴷⵡⴻⵍ ⴰⵎ ⵙⴰⴷⵓⵎ ⵓ ⵏⴰⵔⵡⴻⵙ ⴷⵉ ⵄⴰⵎⵓⵔⵔⴰ.” [u]

30 ⵎⵉⵏ ⵖⴰ ⵏⵉⵏⵉ ⵅⴻⵏⵏⵉ? ⵎⴰ ⵅⴻⵏⵏⵉ ⵍⴻⴳⵏⵓⵙ ⵉⵏⵏⵉ ⵡⴰⵔ ⵢⴰⵔⴻⵣⵣⵓⵏ ⵜⴰⵙⴻⴳⴷⴰ, ⴰⵇⴰ ⴽⵙⵉⵏ ⵜⴰⵙⴻⴳⴷⴰ? ⵉⵡⴰ, ⵎⴰⵛⴰ ⵜⴰⵙⴻⴳⴷⴰ ⵜⴻⵏⵏⵉ ⵙ ⵍ’ⵉⵎⴰⵏ. 31 ⵎⴰⵛⴰ ⵉⵙⵔⴰⵉⵍ ⵏⵏⵉ ⵉⴹⴻⴼⴼⴰⵔⴻⵏ ⵛⵛⴰⵔⵉⵄⴰ ⵏ ⵜⵙⴻⴳⴷⴰ, ⵡⴰⵔ ⵢⵉⵡⵉⴹ ⵛⴰ ⵖⴰⵔ ⵛⵛⴰⵔⵉⵄⴰ ⵏ ⵜⵙⴻⴳⴷⴰ. [v] 32 ⵎⴰⵢⴻⵎⵎⵉ? ⵎⵉⵏⵣⵉ ⵜⴰⵙⴻⴳⴷⴰ ⵏⵏⵉ ⵡⴰⵔ ⵜⴻⴵⵉ ⵛⴰ ⵣⵉ ⵍ’ⵉⵎⴰⵏ ⵎⴰⵛⴰ ⵣⵉ ⵍⴻⵅⴷⴰⵢⴻⵎ ⵏ ⵛⵛⴰⵔⵉⵄⴰ, ⵎⵉⵏⵣⵉ ⵏⵉⵜⵏⵉ ⵏⴷⴻⵔⴼⴻⵏ ⴷⴻⴳ ⵡⴻⵥⵔⵓ ⵏ ⵓⵏⴻⴷⵔⴻⴼ, [w] 33 ⴰⵎ ⵎⴰⵎⵎⴻⵛ ⵜⵓⵔⴰ:

“ⴰⵇⴰ ⴰⴷ ⴳⴳⴻⵖ ⴷⵉ ⵚⵉⵀⵢⵓⵏ ⴰⵥⵔⵓ ⵉ ⵓⵏⴻⴷⵔⴻⴼ

ⴷ ⵡⴻⵥⵔⵓ ⵉ ⵓⵏⴻⵇⵔⴰⴷ.

ⵎⴰⵔⵔⴰ ⵡⵉ ⵣⵣⴰⵢⴻⵙ ⵉ ⵖⴰ ⵢⴰⵎⵏⴻⵏ,

ⵡⴰⵔ ⵉⵜⵜⵙⴻⴹⵃⴰ.” [x]