1 ⴰⵅⴻⵎⵎⵉ ⵏ ⴰⵙⴰⴼ.

ⴰ ⵍⴳⴻⵏⵙ ⵉⵏⵓ, ⴻⵡⵛ ⴰⵎⴻⵣⵣⵓⵖ

ⵉ ⵛⵛⴰⵔⵉⵄⴰ ⵉⵏⵓ!

ⵎⴻⵢⵢⵍⴻⵎ ⴰⵎⴻⵣⵣⵓⵖ ⵏⵡⴻⵎ

ⵖⴰⵔ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ.

2 ⵏⴻⵛⵛ ⴰⴷ ⴰⵔⵣⵎⴻⵖ ⴰⵇⴻⵎⵎⵓⵏ ⵉⵏⵓ

ⵙ ⵡⴰⵡⴰⵍ ⵉⵡⴻⵣⵏⴻⵏ,

ⴰⴷ ⴱⴰⵔⵔⵃⴻⵖ ⵍⴻⵎⵄⴰⵏⵉ ⵉⵏⵏⵓⴼⴼⴰⵔⴻⵏ

ⵣⴻⴳ ⵡⴻⵛⵃⴰⵍ ⵓⵢⴰ, [a]

3 ⵜⵉⵎⴻⵙⵍⴰⵢⵉⵏ ⵏⵏⵉ ⵏⴻⵙⵍⴰ ⵓ ⵏⴻⵙⵙⴻⵏ,

ⵏⵏⵉ ⴷ ⴰⵏⴻⵖ ⵃⴰⵊⴰⵏ ⵍⴻⵊⴷⵓⴷ ⵏⵏⴻⵖ.

4 ⵡⴰⵔ ⵜⴻⵏ ⵏᵉⵜⵜⴻⴼⴼⴰⵔ ⵣⴻⴳ ⵉⵃⴻⵏⵊⵉⵔⴻⵏ ⵏⵙⴻⵏ,

ⵣⵉ ⵊⵊⵉⵍ ⵉ ⴷⴷ ⵖⴰ ⵢⴰⵙⴻⵏ.

ⴰⴷ ⵏⴱⴰⵔⵔⴻⵃ ⵙ ⵜⵎⴻⴳⴳⴰ ⵉⵚⴻⴱⴱⵃⴻⵏ ⵏ ⵙⵉⴷⵉ,

ⵙ ⵜⵎⴻⴳⴳⴰ ⵏⵏⴻⵙ ⵉⵊⴻⵀⴷⴻⵏ

ⴷ ⵍⵎⵓⵄⵊⵉⵣⴰⵜ ⵏⵏⴻⵙ ⵏⵏⵉ ⵜⵓⵖⴰ ⵉⴳⴳⴰ.

5 ⵎⴰⵖⴰⵔ ⵏⴻⵜⵜⴰ ⵉⴳⴳⴰ ⵉⵛⵜ ⵏ ⵛⵛⵀⴰⴷⴻⵜ

ⴷⵉ ⵢⴰⵄⵇⵓⴱ,

ⵉⵙⵙⴰⵔⵙ ⵉⵛⵜ ⵏ ⵛⵛⴰⵔⵉⵄⴰ ⴷⵉ ⵉⵙⵔⴰⵉⵍ,

ⵏⵏⵉ ⵜⵓⵖⴰ ⵢⵓⵎⵓⵔ ⵉ ⵍⴻⵊⴷⵓⴷ ⵏⵏⴻⵖ,

ⵎⴰⵃⴻⵏⴷ ⴰⴷ ⵜⵜ ⵙⵙⵖⴰⵔⴻⵏ ⵉ ⵉⵃⴻⵏⵊⵉⵔⴻⵏ ⵏⵙⴻⵏ, [b]

6 ⵎⴰⵃⴻⵏⴷ ⵊⵊⵉⵍ ⵉ ⴷⴷ ⵖⴰ ⵢⴰⵙⴻⵏ ⴰⴷ ⵉⵙⵙⴻⵏ,

ⵉⵃⴻⵏⵊⵉⵔⴻⵏ ⵏⵏⵉ ⴷⴷ ⵖⴰ ⵉⵜⵜⵡⴰⵅⴻⵍⵇⴻⵏ

ⴰⵡⴰⵔⵏⵉ ⴰⵙⴻⵏ,

ⵓ ⵅⴻⵏⵏⵉ ⵓⵍⴰ ⴷ ⵏⵉⵜⵏⵉ ⴰⴷ ⴽⴽⴰⵔⴻⵏ

ⴰⴷ ⵜⵜ ⵙⵙⴻⵄⴷⵓⵏ ⵉ ⵉⵃⴻⵏⵊⵉⵔⴻⵏ ⵏⵙⴻⵏ,

7 ⵎⴰⵃⴻⵏⴷ ⵏⵉⵜⵏⵉ ⴰⴷ ⵙⵙⴰⵔⵙⴻⵏ

ⵍⴰⵎⴰⵏ ⵏⵙⴻⵏ ⵅ ⴰⵔⴻⴱⴱⵉ,

ⵡⴰⵔ ⵜⵜᵉⵜⵜⵓⵏ ⵛⴰ ⵜⵉⵎⴻⴳⴳⴰ ⵏ ⴰⵔⴻⴱⴱⵉ,

ⵎⴰⵛⴰ ⴰⴷ ⵃⴹⴰⵏ ⵜⵉⵡⴻⵚⵚⴰ ⵏⵏⴻⵙ,

8 ⵡⴰⵔ ⵜⵜⵉⵍⵉⵏ ⴰⵎ ⵍⴻⵊⴷⵓⴷ ⵏⵙⴻⵏ,

ⵉⵊⵊ ⵏ ⵊⵊⵉⵍ ⴰⵖⴻⵏⵏⴰⵏ ⴷ ⵉⵖⴻⵡⵡⵖⴻⵏ,

ⵉⵊⵊ ⵏ ⵊⵊⵉⵍ ⵙ ⵡⵓⵍ ⵡⴰⵔ ⵉⵎⵜⴻⵏ

ⵓ ⵙ ⴰⵔⵔⵓⵃ ⵉⵖⴷⴰⵔⴻⵏ ⴰⵔⴻⴱⴱⵉ. [c]

9 ⴰⵢⵜ ⵏ ⵉⴼⵔⴰⵢⵉⵎ, ⵉⵎⵊⴻⴱⴱⴰⴷⴻⵏ ⵏ ⵍⵇⴻⵡⵙ,

ⵄⴻⵇⴱⴻⵏ ⴷⴻⴳ ⵡⴰⵙⵙ ⵏ ⵓⵎⴻⵏⵖⵉ.

10 ⵡⴰⵔ ⵃⴹⴰⵏ ⵍⵄⴰⵀⴷ ⴰⴽ-ⴷ ⴰⵔⴻⴱⴱⵉ,

ⵓⴳⵉⵏ ⴰⴷ ⵓⵢⵓⵔⴻⵏ ⴷⵉ ⵛⵛⴰⵔⵉⵄⴰ ⵏⵏⴻⵙ.

11 ⵜⵜⵓⵏ ⵜⵉⵎⴻⴳⴳⴰ ⵏⵏⴻⵙ ⴷ ⵍⵎⵓⵄⵊⵉⵣⴰⵜ,

ⵜⵉⵏⵏⵉ ⵉ ⴷ ⴰⵙⴻⵏ ⵉⵙⵙⵛⴻⵏ.

12 ⵣⵣⴰⵜ ⵉ ⵜⵉⵟⵟⴰⵡⵉⵏ ⵏ ⵍⴻⵊⴷⵓⴷ ⵏⵙⴻⵏ

ⵉⴳⴳⴰ ⵏⴻⵜⵜⴰ ⵉⵛⵜ ⵏ ⵍⵎⵓⵄⵊⵉⵣⴰ,

ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ,

ⴷⴻⴳ ⵉⵢⵢⴰⵔ ⵏ ⵚⵓⵄⴰⵏ.

13 ⵏⴻⵜⵜⴰ ⵉⴱⴹⴰ ⵍⴻⴱⵃⴰⵔ

ⵓⵛⴰ ⵉⵙⵙⴻⵥⵡⴰ ⵜⴻⵏ ⵣⵣⴰⵢⴻⵙ,

ⵉⵊⵊⴰ ⴰⵎⴰⵏ ⴰⴷ ⴱⴻⴷⴷⴻⵏ ⴰⵎ ⵡⴻⵖⴱⴰⵔ. [d]

14 ⵏⴻⵜⵜⴰ ⵉⵙⵙⵇⴻⴱⴱⴻⴹ ⵉ-ⵜⴻⵏ ⵙ ⵡⴰⵙⵙ

ⵙ ⵓⵙⴻⵢⵏⵓ,

ⵙ ⴵⵉⵍⴻⵜ ⵎⴰⵔⵔⴰ ⵙ ⵜⴼⴰⵡⵜ ⵏ ⵜⵎⴻⵙⵙⵉ. [e]

15 ⵏⴻⵜⵜⴰ ⵉⴱⴹⴰ ⵍⴻⵊⵔⵓⴼ ⴷⵉ ⵍⴻⵅⵍⴰ,

ⵉⵡⵛⴰ ⵉ ⵍⴳⴻⵏⵙ ⴰⴷ ⵉⵙⵓ ⵙ ⵓⴼⴻⵢⵢⴻⴹ

ⴰⵎⴻⵛⵏⴰⵡ ⵣⴻⴳ ⵡⴰⵎⴰⵏ ⵉⵀⴻⵡⵍⴻⵏ. [f]

16 ⵏⴻⵜⵜⴰ ⵉⵊⵊⴰ ⵍⵄⵓⵏⵚⴰⵔⴰⵜ

ⴰⴷ ⴼⴻⵢⵢⴹⴻⵏⵜ ⵣⵉ ⵙⵙⴻⴵⴰⵃ,

ⵏⴻⵜⵜⴰ ⵉⵊⵊⴰ ⴰⵎⴰⵏ

ⴰⴷ ⵀⵡⴰⵏ ⴰⵎ ⵢⵉⵖⴻⵣⵔⴰⵏ.

17 ⵎⴰⵛⴰ ⵏⵉⵜⵏⵉ ⴰⵔⵏⵉⵏ

ⴷⵉ ⴷⴷⵏⵓⴱ ⵏⵙⴻⵏ ⵅⴰⵙ,

ⵖⴻⵡⵡⵖⴻⵏ ⵅ ⵓⵎⵄⵓⴵⵉ ⵅ ⴽⵓⵍⵛⵉ

ⵓⵎⵉ ⵜⵓⵖⴰ ⴰⵜⴻⵏ ⴷⵉ ⵜⵏⴻⵣⵔⵓⴼⵜ ⵢⵓⵥⵖⴻⵏ.

18 ⵏⵉⵜⵏⵉ ⵊⴰⵔⵔⴱⴻⵏ ⴰⵔⴻⴱⴱⵉ

ⴷⴻⴳ ⵡⵓⵍ ⵏⵙⴻⵏ

ⵓⵎⵉ ⵜⵜⴰⵔⴻⵏ ⵎⴰⵛⵛⴰ

ⵖⴰⵔ ⵎⴻⵥⵔⵉ ⵏ ⵍⴻⵄⵎⴰⵔ ⵏⵙⴻⵏ.

19 ⵙⵙⵉⵡⵍⴻⵏ ⴹⵉⴷⴷ ⵉ ⴰⵔⴻⴱⴱⵉ, ⵏⵏⴰⵏ:

“ⵎⴰ ⵉⵣⴻⵎⵎⴰⵔ ⴰⵔⴻⴱⴱⵉ

ⴰⴷ ⵉⵙⵙⴻⵡⵊⴻⴷ ⵟⵟⴰⴱⵍⴰ ⴷⵉ ⵍⴻⵅⵍⴰ? [g]

20 ⵅⵣⴰⵔ, ⵏⴻⵜⵜⴰ ⵉⵡⵜⴰ ⴷⵉ ⵜⴻⵚⴹⴰⵔⵜ,

ⴰⵍⴰⵎⵉ ⴷⴷ-ⵓⵣⵣⵍⴻⵏ ⵣⵣⴰⵢⴻⵙ

ⵡⴰⵎⴰⵏ ⴷ ⵉⵖⴻⵣⵔⴰⵏ.

ⵎⴰ ⵉⵣⴻⵎⵎⴰⵔ ⵏⴻⵜⵜⴰ ⴰⴷ ⵉⵡⵛ ⴰⵖⵔⵓⵎ

ⵏⵉⵖ ⵉⵙⵙⴻⵡⵊⴻⴷ ⴰⵢⵙⵓⵎ ⵉ ⵍⴳⴻⵏⵙ ⵏⵏⴻⵙ?” [h]

21 ⵙ ⵓⵢⴰ ⵉⵙⵍⴰ ⵙⵉⴷⵉ ⵓⵛⴰ ⵉⴼⴼⵓⴳⴻⵎ.

ⵜⵉⵎⴻⵙⵙⵉ ⵜⴰⵔⵖⴰ ⴹⵉⴷⴷ ⵉ ⵢⴰⵄⵇⵓⴱ,

ⵉⴽⴽⴰⵔ-ⴷⴷ ⵡⴻⵖⴹⴰⴱ ⵏⵏⴻⵙ ⴹⵉⴷⴷ ⵉ ⵉⵙⵔⴰⵉⵍ, [i]

22 ⵎⴰⵖⴰⵔ ⵡⴰⵔ ⵓⵎⵉⵏⴻⵎ ⵛⴰ ⴷⵉ ⴰⵔⴻⴱⴱⵉ,

ⵡⴰⵔ ⵜⵜⵛⵉⵍⵉⵏ ⴷⴻⴳ ⵓⵙⴻⵏⵊⴻⵎ ⵏⵏⴻⵙ.

23 ⵏⴻⵜⵜⴰ ⵢⵓⵎⵓⵔ ⵉⵙⴻⵢⵏⵓⵜⴻⵏ ⵙⴻⵏⵏⴻⵊ

ⵓ ⵢⴰⵔⵣⴻⵎ ⵜⵉⵡⵡⵓⵔⴰ ⵏ ⵓⵊⴻⵏⵏⴰ.

24 ⵉⴼⴰⵔⵔⴻⵖ-ⴷⴷ ⵅⴰⵙⴻⵏ ‘ⵎⴰⵏⵏⴰ’

ⵎⴰⵃⴻⵏⴷ ⴰⴷ ⵛⵛⴻⵏ,

ⵉⵡⵛⴰ ⴰⵙⴻⵏ ⵉⵎⴻⵏⴷⵉ ⵣⴻⴳ ⵓⵊⴻⵏⵏⴰ. [j]

25 ⵎⴰⵔⵔⴰ ⵛⵛⵉⵏ ⴰⵖⵔⵓⵎ

ⵏ ⵢⵉⵏⵏⵉ ⴷⴰⵢⵙⴻⵏ ⵍⵄⴻⵣⵣ.

ⵉⵙⵙⴻⴽⴽ ⴰⵙⴻⵏ ⵎⴰⵛⵛⴰ ⵏⵙⴻⵏ ⵖⴰⵔ ⵡⴻⴱⵔⵉⴷ

ⴰⵍⴰⵎⵉ ⵊⵊⵉⵡⵏⴻⵏ. [k]  [l]

26 ⵏⴻⵜⵜⴰ ⵉⴳⴳⴰ ⴰⵙⴻⵎⵎⵉⴹ

ⵏ ⵎⴰⵏⵉⵙ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ

ⴰⴷ ⵉⴽⴽⴰⵔ ⴷⴻⴳ ⵓⵊⴻⵏⵏⴰ,

ⵙ ⵜⵣⴻⵎⵎⴰⵔ ⵏⵏⴻⵙ ⵉⵙⵙⴻⴽⴽ-ⴷⴷ

ⴰⵙⴻⵎⵎⵉⴹ ⵏ ⵍⵊⴰⵏⵓⴱ. [m]

27 ⵉⵊⵊⴰ ⴰⵢⵙⵓⵎ ⴰⴷ ⵅⴰⵙⴻⵏ ⴷⴷ-ⵉⵡⴹⴰ

ⴰⵎ ⵡⴻⵏⵥⴰⵔ ⵏ ⵜⵄⴻⵊⵊⴰⵊⵜ,

ⵉⵊⴹⴰⴹ ⵙ ⵡⴰⴼⵔⵉⵡⴻⵏ ⴰⵎ ⵢⵉⵊⴷⵉ ⵏ ⵍⴻⴱⵃⵓⵔ.

28 ⵏⴻⵜⵜⴰ ⵉⵊⵊⴰ ⵉ-ⵜⴻⵏ ⴰⴷ ⵡⴹⴰⵏ

ⴷⵉ ⵍⵡⴻⵙⵜ ⵏ ⵍⵎⴰⵔⴳⴻⵃ ⵏ ⵍⵄⴻⵙⴽⴰⵔ,

ⵖⴰⵔ ⵎⴰⵔⵔⴰ ⵉⵖⴻⵣⴷⵉⵙⴻⵏ ⵏ ⵜⵣⴻⴷⴷⵉⵖⵉⵏ ⵏⵙⴻⵏ.

29 ⵏⵉⵜⵏⵉ ⵛⵛⵉⵏ ⵓ ⵊⵊⵉⵡⵏⴻⵏ ⵇⴰⵄ,

ⴽⵙⵉⵏ ⵎⵉⵏ ⴷⵉ ⵜⵓⵖⴰ ⴹⴻⵎⵄⴻⵏ.

30 ⵏⵉⵜⵏⵉ ⵜⵓⵖⴰ ⵄⴰⴷ ⵡⴰⵔ ⵜⵜⵡⴰⴼⴻⴽⴽⴻⵏ

ⵣⴻⴳ ⵡⴻⴹⵎⴰⵄ ⵏⵙⴻⵏ,

ⵎⴰⵛⵛⴰ ⵜⵓⵖⴰ ⵄⴰⴷ ⴷⴻⴳ ⵓⵇⴻⵎⵎⵓⵎ ⵏⵙⴻⵏ,

31 ⵓⵎⵉ ⵅⴰⵙⴻⵏ ⵉⴽⴽⴰⵔ ⵡⴻⵖⴹⴰⴱ ⵏ ⴰⵔⴻⴱⴱⵉ.

ⵏⴻⵜⵜⴰ ⵉⵏⵖⴰ ⵉⵏⵏⵉ ⵉⴵⴰⵏ

ⴷ ⵉⵇⴻⴱⴱⵓⵣⴻⵏ ⵇⴰⵄ ⵊⴰⵔ ⴰⵙⴻⵏ,

ⵢⴰⵔⵔⴰ-ⴷⴷ ⵉⵃⵓⴷⵔⵉⵢⵢⴻⵏ ⵏ ⵉⵙⵔⴰⵉⵍ

ⴰⴷ ⴰⴹⴰⵔⴻⵏ ⵖⴰⵔ ⵜⵄⴻⵊⵊⴰⵊⵜ ⵏ ⵜⴻⵎⵎⵓⵔⵜ. [n]

32 ⵎⴰⵛⴰ ⵇⴰⵄ ⴰⵎⴻⵏⵏⵉ ⴰⵔⵏⵉⵏ ⴳⴳⵉⵏ ⴷⴷⵏⵓⴱ,

ⵡⴰⵔ ⵓⵎⵉⵏⴻⵏ ⴷⵉ ⵍⵎⵓⵄⵊⵉⵣⴰⵜ ⵏⵏⴻⵙ.

33 ⵏⴻⵜⵜⴰ ⵉⵊⵊⴰ ⵓⵙⵙⴰⵏ ⵏⵙⴻⵏ

ⴰⴷ ⵄⴷⵓⵏ ⴰⵎ ⵢⵉⵊⵊ ⵏ ⵍⴻⴼⵡⴰⵔ,

ⵉⵙⴻⴳⴳⵯⵓⵙⴰ ⵏⵙⴻⵏ ⴰⵎ ⵢⵉⵛⵜ ⵏ ⵍⵄⵓⵔⵔⴻⵜ.

34 ⵅⵎⵉ ⵜⴻⵏ ⵉ ⵖⴰ ⵉⵏⴻⵖ, ⴰⵔⵣⵓⵏ ⵅ ⴰⵔⴻⴱⴱⵉ,

ⴷⴻⵡⵍⴻⵏ-ⴷⴷ ⵖⴰⵔⴻⵙ, ⴰⵔⵣⵓⵏ ⵅⴰⵙ ⵙ ⵛⴹⴰⵔⴻⵜ.

35 ⵏⵉⵜⵏⵉ ⵄⴻⵇⵍⴻⵏ

ⴰⵇⴰ ⴰⵔⴻⴱⴱⵉ ⴷ ⵜⴰⵚⴹⴰⵔⵜ ⵏⵙⴻⵏ,

ⴰⵔⴻⴱⴱⵉ, ⴰⵎⵄⵓⴵⵉ ⵅ ⴽⵓⵍⵛⵉ,

ⴷ ⴰⵎⴻⴼⴷⵉ ⵏⵙⴻⵏ. ◼78:35 ’ⴰⵎⴻⴼⴷⵉ‘ - ⵉⵊⵊ ⵏ ⴱⵏⴰⴷⴻⵎ ⵏⵏⵉ ⵉⴼⴷⵉⵏ ⵏⵉⵖ ⵉⴼⴻⴽⴽⴻⵏ ⵉⵊⵊ ⵏ ⵉⵙⵎⴻⵖ ⵏⵉⵖ ⵉⵛⵜ ⵏ ⵜⴻⵙⵎⴻⵖⵜ, ⵏⵉⵖ ⵉⵊⵊ ⵏ ⴱⵏⴰⴷⴻⵎ ⴷⴰⵢⴻⵙ ⴰⵎⴰⵔⵡⴰⵙ, ⵏⵉⵖ ⵉⵛⵜ ⵏ ⵜⴻⵎⵎⵓⵔⵜ ⵄⵍⴰⵃⵙⴰⴱ ⵍⵇⴰⵏⵓⵏ, ⴰⵇⴰ ⵏⴻⵜⵜⴰ ⴰⴷ ⵉⵅⴻⴵⴻⵙ ⵜⵜⴰⵎⴰⵏ ⵉ ⵖⴰ ⵉⵍⵉⵇⵇⴻⵏ ⵉⵙⵎⴻⵖ ⵏⵏⵉ, ⵏⵉⵖ ⴰⴷ ⵉⵅⴻⴵⴻⵚ ⴰⵎⴰⵔⵡⴰⵙ ⵉ ⵉⵜⵜⵅⴻⵚⵚⴰ ⵏⵉⵖ ⵜⵜⴰⵎⴰⵏ ⵏ ⵜⴻⵎⵎⵓⵔⵜ ⵏⵏⵉ ⵏⵉⵖ ⵚⵚⴰⴷⴰⵇ ⵉ ⵜⴻⵎⵖⴰⵔⵜ ⴰⵎ ⵎⴰⵎⵎⴻⵛ ⵉ ⴷ ⴰⵙ ⵉⵛⵓⵡⵡⴰⵔ. ⵙ ⵓⵢⴻⵏⵏⵉ ⴰⵎⴻⴼⴷⵉ ⵡⴰⵔ ⵉⵜⵜⴼⴻⴽⴽⵉ ⴰⵎⴻⵏⵏⵉ ⵡⴰⵀⴰ ⵎⴰⵛⴰ ⵏⴻⵜⵜⴰ ⴷ ⵉⵊⵊ ⵡⴻⵏⵏⵉ ⵉⴼⴻⴽⴽⴻⵏ ⵅ ⵍⴻⵃⵙⴰⴱ ⵍⵇⴰⵏⵓⵏ, ⵡⴰⵔ ⵉⴼⴻⴽⴽ ⴱⵍⴰ ⵎⴰ ⴰⴷ ⵉⵅⴻⴵⴻⵚ ⵜⵜⴰⵎⴰⵏ ⵏⵉⵖ ⵜⴰⵎⴻⵙⵍⴰⵛⵜ ⵉ ⴷ ⴰⵙ ⵉⵜⵜⵅⴻⵚⵚⴰ ⴰⴷ ⵜⵜ ⵉⵡⵛ. ⴷ ⵎⴰⵏ ⴰⵢⴰ ⵉ ⵉⵛⵓⵡⵡⴰⵔ ⴰⴷ ⵜ ⵏⴻⵙⵙⴻⵏ ⵅ ⵡⴰⵡⴰⵍ ‘ⴰⵎⴻⴼⴷⵉ’ ⵓ ⵅ ⵡⴰⵡⴰⵍⴻⵏ ⵉ ⵖⴰⵔⴻⵙ ⴷⴷ-ⵉⵇⵇⵏⴻⵏ ⴰⵎ: ‘ⵉⴼⴷⵉ’, ‘ⴰⴷ ⵉⴼⴷⵉ’, ⵏⵉⵖ ‘ⴰⴷ ⵉⴼⴷⵉ ⴽⵓⵔ ⴰⵙⴻⴳⴳⵯⴰⵙ ⵉⵊⵊ ⵏ ⵡⴻⵣⵢⴻⵏ ⵏ ⵢⴻⵢⵢⴰⵔ ⵏⵏⴻⵙ’, ⵓ ⵎⴰⵎⵎⴻⵛ ⵏⵏⴻⵖⵏⵉ. ⵙ ⵓⵢⴻⵏⵏⵉ ⵢⴰⵙⵓⵄ ⵍⵎⴰⵙⵉⵃ ⴷ ⴰⵎⴻⴼⴷⵉ ⵉ ⵉⴵⴰ ⵉ ⵎⴰⵔⵔⴰ ⵉⵡⴷⴰⵏ ⵎⵉⵏⵣⵉ ⵏⴻⵜⵜⴰ ⵉⵡⵛⴰ ⵜⵓⴷⴰⵔⵜ ⵏⵏⴻⵙ ⴷⵉ ⵟⵟⵡⴻⵄ ⵏⵏⴻⵖ ⴰⵎⵎⵓ ⵉ ⵅⴰⵏⴻⵖ ⵉⴼⴷⵉ ⵙ ⵉⴷⴰⵎⵎⴻⵏ ⵏⵏⴻⵙ ⵉⵣⴷⵉⴳⴻⵏ ⵉⵇⴻⴷⴷⵙⴻⵏ, ⵓ ⴰⵎⵎⵓ ⵉ ⵖⴰ ⵉⴼⴷⵉ ⵉⵙⵔⴰⵉⵍ (‘ⵎⴰⵔⵔⴰ ⵓⴷⴰⵢⴻⵏ ⵉⵏⵏⵉ ⵉ ⵖⴰ ⵢⴰⵎⵏⴻⵏ ⴷⴻⴳ ⵢⵉⵙⴻⵎ ⵏⵏⴻⵙ’) ⴷ ⵜⴻⵎⵎⵓⵔⵜ ⴰⴽⵉⴷⴻⵙ ⵅⵎⵉ ⴷⴷ ⵖⴰ ⵢⴰⵙ ⵉ ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ ⴷⴻⴳ ⵓⵏⴻⴳⴳⴰⵔ ⵏ ⵡⵓⵙⵙⴰⵏ. ⵎⴰⵛⴰ ⵛⵛⵉⵟⴰⵏ ⵡⴰⵔ ⵉⴵⵉ ⴰⵎⴻⵏⵏⵉ. ⵏⴻⵜⵜⴰ ⵉⵜⵜⴻⴳⴳ ⴰⵎ ⵓⵛⴻⴼⴼⴰⵔ ⴰⵎ ⵓⵅⵛⵉⵏ ⵓ ⴰⵎ ⵓⵖⴻⵚⵚⴰⴱ. ⵡⴰⵔ ⴷ ⴰⵙ ⵉⵜⵜⵀⵉⵎⵎⵉ ⵍⵅⴰⵔ ⵏ ⴱⵏⴰⴷⴻⵎ ⵎⴰⵛⴰ ⵎⵖⵉⵔ ⵛⵛⴰⵏ ⵏ ⵢⵉⵅⴻⴼ ⵏⵏⴻⵙ, ⵃⵉⵎⴰ ⵎⴰⵔⵔⴰ ⵉⵡⴷⴰⵏ ⴰⴷ ⵜ ⵄⴻⴱⴷⴻⵏ ⵓⵎⵉ ⵜⴻⵏ ⵉⵙⵙⵉⴳⴳⵯⴻⵊ ⵅ ⴰⵔⴻⴱⴱⵉ ⵉⴷⴷⴰⵔⴻⵏ ⵙ ⵉⵅⴰⵔⵔⵉⵇⴻⵏ ⵏⵏⴻⵙ ⴷ ⵜⵙⴻⵃⵃⴰⵔⵜ ⵏⵏⴻⵙ (ⵅⵥⴰⵔ ⵢⵃ. 10).

36 ⵎⴰⵛⴰ ⵏⵉⵜⵏⵉ ⵙⵙⵏⵉⵄⵎⵉⵍⴻⵏ ⵣⵣⴰⵜⴻⵙ

ⵙ ⵓⵇⴻⵎⵎⵓⵎ ⵏⵙⴻⵏ,

ⵙ ⵢⵉⵍⴻⵙ ⵏⵙⴻⵏ ⵙⵙⵅⴰⵔⵔⵉⵇⴻⵏ ⵅⴰⵙ.

37 ⵡⴰⵔ ⵜⵓⵖⵉ ⵓⵍ ⵏⵙⴻⵏ ⵉⵎⵜⴻⵏ ⴰⴽⵉⴷⴻⵙ,

ⵡⴰⵔ ⵓⵢⵓⵔⴻⵏ ⵙ ⵍⵎⴰⵏⴻⵜ

ⴰⴽ-ⴷ ⵍⵄⴰⵀⴷ ⵏⵏⴻⵙ.

38 ⵏⴻⵜⵜⴰ ⵎⴰⵛⴰ ⵜⵓⵖⴰ ⵢⴰⵔⴻⵃⵃⴻⵎ ⴷⴰⵢⵙⴻⵏ

ⵓ ⵉⵙⵙⴻⵚⵍⴻⵃ ⵅ ⵍⵎⵓⵄⵚⵉⵢⵢⴻⵜ ⵏⵏⴻⵖ,

ⵡⴰⵔ ⵢⴰⵔⴻⴷⴷⴻⴵ, ⵎⴰⵛⴰ ⴰⵟⵟⴰⵙ ⵏ ⵜⵡⴰⵍⴰⵡⵉⵏ

ⵉⵊⵊⴰ ⵣⴻⴳ ⵡⴻⵖⴹⴰⴱ ⵏⵏⴻⵙ

ⵓ ⵡⴰⵔ ⵉⴳⴳⵉ ⵎⴰⵔⵔⴰ ⴰⵙⵄⴰⵔ ⵏⵏⴻⵙ ⴰⴷ ⵉⴽⴽⴰⵔ.

39 ⵏⴻⵜⵜⴰ ⵉⵄⵇⴻⵍ ⴰⵇⴰ ⵏⵉⵜⵏⵉ

ⵎⵖⵉⵔ ⴷ ⴰⵢⵙⵓⵎ ⵡⴰⵀⴰ,

ⴷ ⵉⵊⵊ ⵏ ⵓⵙⴻⵎⵎⵉⴹ ⵉⵄⴻⴷⴷⵓ

ⵡⴰⵔ ⴷⴷ-ⵉⵜⵜⵄⵉⵇⵇⵉⴱ.

40 ⵎⴻⵛⵃⴰⵍ ⵏ ⵜⵡⴰⵍⴰⵡⵉⵏ

ⵙⵄⴰⵔⴻⵏ ⵜ ⴷⵉ ⵍⴻⵅⵍⴰ,

ⴳⴳⵉⵏ ⴰⵙ ⵍⴻⵃⵔⵉⵇ ⴷⵉ ⵜⵏⴻⵣⵔⵓⴼⵜ!

41 ⵜⵡⴰⵍⴰ ⴰⵡⴰⵔⵏⵉ ⵜⴻⵏⵏⴻⵖⵏⵉⵜ

ⵇⴻⴵⴱⴻⵏ ⴰⵔⴻⴱⴱⵉ,

ⴳⴳⵉⵏ ⵍⴻⵃⵔⵉⵇ ⵉ ⵓⵎⵇⴻⴷⴷⴰⵙ ⵏ ⵉⵙⵔⴰⵉⵍ.

42 ⵡⴰⵔ ⵅⴰⵔⵔⵚⴻⵏ ⵛⴰ ⵄⴰⴷ ⴷⴻⴳ ⵓⴼⵓⵙ ⵏⵏⴻⵙ,

ⴷⴻⴳ ⵡⴰⵙⵙ ⵏⵏⵉ ⵍⴰⵎⵉ ⵜⴻⵏ ⵉⴼⴷⴰ

ⵣⴻⴳ ⵓⴼⵓⵙ ⵏ ⵡⴻⵏⵏⵉ ⵉ-ⵜⴻⵏ ⵉⵃⵚⴰⵔⴻⵏ, [p]

43 ⴰⵍⴰⵎⵉ ⵉⴳⴳⴰ ⵍⴻⵄⵍⴰⵎⴰⵜ ⴷⵉ ⵎⵉⵚⵔⴰ,

ⵓⵍⴰ ⴷ ⵍⵎⵓⵄⵊⵉⵣⴰⵜ ⵏⵏⴻⵙ ⴷⴻⴳ ⵉⵢⵢⴰⵔ ⵏ ⵚⵓⵄⴰⵏ,

44 ⴰⵍⴰⵎⵉ ⵉⴳⴳⴰ ⵉⵖⴻⵣⵔⴰⵏ ⵏⵙⴻⵏ

ⴰⴷ ⴷⴻⵡⵍⴻⵏ ⴷ ⵉⴷⴰⵎⵎⴻⵏ,

ⵓⵍⴰ ⴷ ⵎⴰⵔⵔⴰ ⵍⵄⵓⵏⵚⴰⵔⴰⵜ ⵏⵙⴻⵏ,

ⵃⵉⵎⴰ ⵏⵉⵜⵏⵉ ⵡⴰⵔ ⵣⴻⵎⵎⴰⵔⴻⵏ

ⴰⴷ ⵣⵣⴰⵢⵙⴻⵏ ⵙⵡⴻⵏ ⵄⴰⴷ. [q]

45 ⵉⵙⵙⴻⴽⴽ ⵊⴰⵔ ⴰⵙⴻⵏ

ⵉⵊⵊ ⵏ ⵡⴻⵢⵍⴰⴼ ⵏ ⵉⴱⴻⵄⵄⴰⵛ ⵉ ⵜⴻⵏ ⵉⵛⵛⴻⵏ,

ⵓⵍⴰ ⴷ ⵉⵇⴰⵔⵇⵔⵉⵡⴻⵏ ⵏⵏⵉ ⵜⴻⵏ ⵉⵜⴻⵃⵃⴰⵏ. [r]

46 ⵏⴻⵜⵜⴰ ⵉⵡⵛⴰ ⵍⵖⵉⴵⴻⵜ ⵏⵙⴻⵏ

ⵉ ⵜⵎⵓⵖⵔⵉ ⵉⵚⴰⵔⵔⴹⴻⵏ,

ⵓⵍⴰ ⴷ ⵚⵚⴰⴱⴻⵜ ⵏⵙⴻⵏ ⵉ ⵜⵎⵓⵖⵔⵉ. [s]

47 ⵉⵏⵖⴰ ⵜⴰⵣⴰⵢⴰⵔⵜ ⵏⵙⴻⵏ ⵙ ⵜⴻⴱⵔⵓⵔⵔⵉ,

ⵓⵍⴰ ⴷ ⵉⵣⴻⵎⵎⵓⵔⴻⵏ ⵏⵙⴻⵏ ⵙ ⵜⴽⴻⴹⴼⵉⵏ. [t]

48 ⵏⴻⵜⵜⴰ ⵉⵊⵊⴰ ⵍⵎⴰⵍ ⵏⵙⴻⵏ ⵉ ⵓⴱⵔⵓⵔⵉ,

ⵜⵉⵃⵉⵎⵔⵉⵡⵉⵏ ⵏⵙⴻⵏ ⵉ ⵡⴰⵙⵙⴰⵎⴻⵏ.

49 ⵏⴻⵜⵜⴰ ⵉⵙⵙⴻⴽⴽ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ

ⵊⴰⵔ ⴰⵙⴻⵏ,

ⴰⵎⵓⵣⵣⴰⵔ ⴷ ⵜⴻⴼⵇⴻⵃⵜ ⴷ ⵍⵃⴻⵚⵔⴰⵏ,

ⵓⵎⵉ ⴷⴷ-ⵉⵙⵙⴻⴽⴽ ⵍⵎⴰⵍⴰⴽⴰⵜ ⵙ ⵊⵊⵔⴰⵢⴻⵃ.

50 ⵏⴻⵜⵜⴰ ⵉⵙⴻⴳⴳⴻⵎ ⵉⵊⵊ ⵏ ⵓⵎⴻⵙⵔⴰⵇ

ⵉ ⵡⴻⵖⴹⴰⴱ ⵏⵏⴻⵙ,

ⵡⴰⵔ ⵉⵙⵙⵄⵉⵣⵣ ⵅ ⵍⴻⵄⵎⴰⵔ ⵏⵙⴻⵏ ⵣⵉ ⵍⵎⴻⵡⵜ,

ⵉⵙⵙⴻⵄⴷⵓ ⵍⵎⴰⵍ ⵏⵙⴻⵏ ⵉ ⵟⵟⴰⵄⵓⵏ. [u]

51 ⵏⴻⵜⵜⴰ ⵉⵏⵖⴰ ⵎⴰⵔⵔⴰ ⵉⵎⴻⵏⵣⴰ ⴷⵉ ⵎⵉⵚⵔⴰ,

ⵉⵎⴻⵏⵣⴰ ⵏ ⵢⴻⵔⵢⴰⵣⴻⵏ ⴷⴰⵢⵙⴻⵏ ⵜⴻⵔⵢⴰⵙⵜ

ⴷⴻⴳ ⵉⵇⵉⴹⴰⵏ ⵏ ⵃⴰⵎ. [v]

52 ⵉⴳⴳⴰ ⵍⴳⴻⵏⵙ ⵏⵏⴻⵙ ⴰⴷ ⵉⵙⵙⴳⴻⵄⵄⴻⴷ ⴰⵎ ⵡⵓⴵⵉ,

ⵉⵙⵙⵇⴻⴱⴱⴻⴹ ⵉ-ⵜⴻⵏ

ⴰⵎ ⵢⵉⵛⵜ ⵏ ⵜⵃⵉⵎⴰⵔⵜ ⴷⵉ ⵍⴻⵅⵍⴰ.

53 ⵉⵏⴷⴻⵀ ⵉ-ⵜⴻⵏ ⴷⵉ ⵍⴰⵎⴰⵏ,

ⵡⴰⵔ ⴳⴳⵯⵉⴷⴻⵏ ⵡⴰⵍⵓ,

ⵎⴰⵖⴰⵔ ⵍⴻⴱⵃⴰⵔ ⵉⴷⵍⴰ ⵍⵄⴻⴷⵢⴰⵏ ⵏⵙⴻⵏ. [w]

54 ⵉⵡⵢⵉ ⵜⴻⵏ ⵖⴰⵔ ⵜⴻⵎⵎⵓⵔⵜ ⵏⵏⴻⵙ ⵉⵇⴻⴷⴷⵙⴻⵏ,

ⵖⴰⵔ ⵡⴻⴷⵔⴰⵔ-ⴰ ⵏⵏⵉ ⴷ ⵉⴽⵙⴻⴱ ⵓⴼⵓⵙ ⴰⴼⵓⵙⵉ ⵏⵏⴻⵙ.

55 ⵉⵙⵙⵓⴼⴼⴻⵖ ⵍⴻⴳⵏⵓⵙ ⵣⵣⴰⵜ ⵉ ⵡⵓⴷⴻⵎ ⵏⵙⴻⵏ,

ⵉⴳⴳⴰ ⴰⴷ ⴰⵙⴻⵏ ⴷⴷ-ⵜⴻⴽⴽⴰⵔ ⵜⴻⵙⵖⴰⵔⵜ ⵏⵙⴻⵏ

ⵙ ⵓⴼⵉⵍⵓ ⵏ ⵍⴻⵄⴱⴰⵔ,

ⵓⵛⴰ ⵉⵙⵙⴻⵣⴷⴻⵖ ⵜⵉⵇⴻⴱⴱⴰⵍ ⵏ ⵉⵙⵔⴰⵉⵍ

ⴷⴻⴳ ⵉⵇⵉⴹⴰⵏ ⵏⵙⴻⵏ. [x]

56 ⵎⴰⵛⴰ ⵏⵉⵜⵏⵉ ⵇⴻⴵⴱⴻⵏ ⵜ, ⵙⵄⴰⵔⴻⵏ ⴰⵔⴻⴱⴱⵉ,

ⴰⵎⵄⵓⴵⵉ ⵅ ⴽⵓⵍⵛⵉ,

ⵡⴰⵔ ⵀⴹⵉⵏ ⵛⵛⵀⴰⴷⴰⵜ ⵏⵏⴻⵙ.

57 ⵏⵉⵜⵏⵉ ⴷⴻⵡⵍⴻⵏ ⵖⴰⵔ ⴹⴻⴼⴼⴰⵔ,

ⴳⴳⵉⵏ ⵙ ⵍⴻⵖⴷⴰⵔ ⴰⵎ ⵍⴻⵊⴷⵓⴷ ⵏⵙⴻⵏ.

ⵏⵉⵜⵏⵉ ⵡⴻⴷⴷⴰⵔⴻⵏ

ⴰⵎ ⵢⵉⵛⵜ ⵏ ⴼⵍⵉⵜⵛⴰ ⵏ ⵍⵇⴻⵡⵙ

ⵉ ⵉⵜⴻⴼⴼⵖⴻⵏ ⵙ ⵍⴻⵅⴷⴻⵄ.

58 ⵙⵄⴰⵔⴻⵏ ⵜ ⵙ ⵍⴻⴳⵄⵓⴷⵉ ⵏⵙⴻⵏ

ⵉ ⵅ ⵡⴻⵀⵀⴱⴻⵏ ⵜⵉⵖⴰⵔⵚⴰ,

ⴰⵔⵔⵉⵏ ⵜ ⴰⴷ ⵢⴰⵙⴻⵎ

ⵙ ⵍⴻⵅⵢⴰⵍⴰⵜ ⵏⵙⴻⵏ ⵉⵏⴻⵇⵛⴻⵏ [y]

59 ⴰⵔⴻⴱⴱⵉ ⵉⵙⵍⴰ ⵎⴰⵏ ⴰⵢⴰ

ⵓⵛⴰ ⵉⵜⵜⵡⴰⵙⵙⴰⵔⵖ ⵡⴻⵖⴹⴰⴱ ⵏⵏⴻⵙ,

ⵉⴷⵡⴻⵍ ⵉⵄⵉⴼⴼ ⴰⵟⵟⴰⵙ ⵣⵉ ⵉⵙⵔⴰⵉⵍ.

60 ⵏⴻⵜⵜⴰ ⵉⵊⵊⴰ ⵜⴰⵣⴻⴷⴷⵉⵖⵜ ⵏⵏⴻⵙ ⴷⵉ ⵛⵉⵍⵓ,

ⴰⵇⵉⴹⵓⵏ ⵎⴰⵏⵉ ⵜⵓⵖⴰ ⵉⵣⴻⴷⴷⴻⵖ ⵊⴰⵔ ⵉⵡⴷⴰⵏ. [z]

61 ⵏⴻⵜⵜⴰ ⵢⴰⵔⵔⴰ ⵊⵊⴻⵀⴷ ⵏⵏⴻⵙ

ⵖⴰⵔ ⵜⵎⴻⵃⴱⴰⵙⵜ,

ⵓⵍⴰ ⴷ ⵜⴰⵍⵡⵉⵣⵜ ⵏⵏⴻⵙ

ⵖⴰⵔ ⵓⴼⵓⵙ ⵏ ⵡⴻⵏⵏⵉ ⵜ ⵉⵃⴻⵚⵚⴰⵔⴻⵏ. [aa]

62 ⵏⴻⵜⵜⴰ ⵉⵙⴻⵍⵍⴻⵎ ⵍⴳⴻⵏⵙ ⵏⵏⴻⵙ ⵉ ⵙⵙⵉⴼ,

ⵢⴰⵔⵖⴰ ⵡⴻⵖⴹⴰⴱ ⵏⵏⴻⵙ ⵅ ⵜⴻⵙⵖⴰⵔⵜ ⵏⵏⴻⵙ.

63 ⵜⵉⵎⴻⵙⵙⵉ ⵜⴻⵛⵛⴰ ⵉⵃⵓⴷⵔⵉⵢⵢⴻⵏ ⵏⵙⴻⵏ,

ⵜⵉⵄⵣⴰⵔⵉⵢⵢⵉⵏ ⵏⵙⴻⵏ

ⵡⴰⵔ ⵅⴰⵙⴻⵏⵜ ⴷⴷ-ⵉⵡⵢⴻⵏ ⵉⵖⴻⵏⵏⵉⵊⴻⵏ.

64 ⵉⴽⴻⵀⵀⴰⵏⴻⵏ ⵏⵙⴻⵏ ⵡⴹⴰⵏ ⵙ ⵙⵙⵉⴼ

ⵓ ⵜⵉⵊⵊⴰⵍ ⵏⵙⴻⵏ ⵡⴰⵔ ⵔⵓⵏⵜ ⵛⴰ. [bb]

65 ⵅⴻⵏⵏⵉ ⵉⴼⴰⵇ-ⴷⴷ ⵙⵉⴷⵉ ⵉⵏⵓ

ⴰⵎ ⵛⴰ ⵏ ⵉⵊⵊ ⵉ ⵜⵓⵖⴰ ⵉⵟⵟⵚⴻⵏ,

ⴰⵎ ⵢⵉⵊⵊ ⵏ ⴱⵓ-ⵜⴻⵖⵔⵓⴹⵜ

ⵏⵏⵉ ⵉⵙⵖⵓⵢⵢⵓ ⵣⵉ ⴱⵉⵏⵓ.

66 ⵏⴻⵜⵜⴰ ⵉⵡⵜⴰ ⵉⵏⵏⵉ ⵜ ⵉⵃⴻⵚⵚⴰⵔⴻⵏ

ⵖⴰⵔ ⴹⴻⴼⴼⴰⵔ,

ⵉⴳⴳⴰ ⴷⴰⵢⵙⴻⵏ ⵍⴻⴼⴹⵉⵃⴻⵜ ⵉ ⵍⴻⴱⴷⴰ. [cc]

67 ⴰⵇⵉⴹⵓⵏ ⵏ ⵢⵓⵙⵓⴼ ⵉⵏⴹⴰⵔ ⵉ-ⵜ,

ⵜⴰⵇⴱⵉⵍⵜ ⵏ ⵉⴼⵔⴰⵢⵉⵎ ⵡⴰⵔ ⵜⵜ ⵉⴼⴰⵔⵣ.

68 ⵉⴼⴰⵔⵣ ⵜⴰⵇⴱⵉⵍⵜ ⵏ ⵢⴰⵀⵓⴷⴰ,

ⴰⴷⵔⴰⵔ ⵏ ⵚⵉⵀⵢⵓⵏ ⵡⴻⵏⵏⵉ ⵜⵓⵖⴰ ⵉⵜⵜⴻⵅⵙ.

69 ⵉⴱⵏⴰ ⵣⵣⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ

ⴰⵎ ⵉⵊⴻⵏⵡⴰⵏ ⵢⵓⵄⵍⴰⵏ,

ⴰⵎ ⵜⴻⵎⵎⵓⵔⵜ ⵏⵏⵉ ⵉⵙⵙⴻⵎⵜⴻⵏ ⵉ ⵍⴻⴱⴷⴰ.

70 ⵉⴼⴰⵔⵣ ⴰⵎⵙⴻⵅⵅⴰⵔ ⵏⵏⴻⵙ ⴷⴰⵡⵓⴷ,

ⵉⴽⵙⵉ ⵜ ⵣⵉ ⵍⴽⵓⵔⵉⵜ ⵏ ⵡⵓⴵⵉ. [dd]

71 ⵉⵊⵊⴰ ⵉ-ⵜ ⴰⴷ ⴷⴷ-ⵢⴰⵙ

ⵣⵉ ⵖⴰⵔ ⴹⴻⴼⴼⴰⵔ ⵏ ⵡⵓⴵⵉ,

ⵎⴰⵃⴻⵏⴷ ⴰⴷ ⵢⴰⵔⵡⴻⵙ ⵢⴰⵄⵇⵓⴱ,

ⵍⴳⴻⵏⵙ ⵏⵏⴻⵙ,

ⵓⵍⴰ ⴷ ⵉⵙⵔⴰⵉⵍ, ⵍⵡⴰⵔⵜ ⵏⵏⴻⵙ. [ee]

72 ⵏⴻⵜⵜⴰ ⵢⴰⵔⵡⴻⵙ ⵉ-ⵜⴻⵏ

ⵄⵍⴰⵃⵙⴰⴱ ⵍⴻⵚⴼⴰⵢⴻⵜ ⵏ ⵡⵓⵍ ⵏⵏⴻⵙ,

ⵉⴳⴻⵡⵡⴻⴷ ⵉ-ⵜⴻⵏ ⵙ ⵓⴼⵓⵙ ⵉⵣⴻⵎⵎⴰⵔⴻⵏ.