146
1 ⵀⴰⵍⵍⵉⵍⵓ-ⵢⴰⵀ.
ⴰ ⵍⴻⵄⵎⴰⵔ ⵉⵏⵓ, ⵚⴻⴱⴱⴻⵃ ⵉ ⵙⵉⴷⵉ.
2 ⵏⴻⵛⵛ ⴰⴷ ⵚⴻⴱⴱⵃⴻⵖ ⵉ ⵙⵉⴷⵉ
ⵎⵉⵏ ⵖⴰ ⴽⴽⴻⵖ ⴷⴷⴰⵔⴻⵖ,
ⴰⴷ ⵣⴻⵀⵀⴷⴻⵖ ⵉ ⴰⵔⴻⴱⴱⵉ ⵉⵏⵓ
ⵎⵉⵏ ⴷⴰ ⵖⴰ ⴽⴽⴻⵖ ⵄⴰⴷ. [a]
3 ⵡⴰⵔ ⵜⵛⴻⵍ ⵅ ⵜⴰⵔⵡⴰ ⵏ ⵜⴰⵚⵉⵍⴻⵜ,
ⵅ ⵎⵎⵉⵙ ⵏ ⴱⵏⴰⴷⴻⵎ,
ⵡⴻⵏⵏⵉ ⵓⵎⵉ ⵡⴰⵔ ⵖⴰⵔ ⵉⴵⵉ ⴱⵓ ⵓⵙⴻⵏⵊⴻⵎ. [b]
4 ⵉⴼⴼⴻⵖ ⴱⵓⵃⴱⴻⵍ ⵏⵏⴻⵙ,
ⵉⴷⵡⴻⵍ ⵖⴰⵔ ⵜⴻⵎⵎⵓⵔⵜ.
ⴷⴻⴳ ⵡⴰⵙⵙ ⵏⵏⵉ ⵙⵉⵎⴰⵏⵜ ⵏⵏⴻⵙ
ⴰⴷ ⵇⴹⴰⵏ ⵉⵏⵡⴰⵢⴻⵏ ⵏⵏⴻⵙ.
5 ⵙⵙⴻⵄⴷ ⵏ ⵡⴻⵏⵏⵉ ⵖⴰⵔ ⵉⴵⴰ
ⴰⵔⴻⴱⴱⵉ ⵏ ⵢⴰⵄⵇⵓⴱ ⴷ ⴰⵎⵄⴰⵡⴻⵏ,
ⵡⴻⵏⵏⵉ ⵉⵜⵜⵔⴰⵊⴰⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵙ,
6 ⵡⴻⵏⵏⵉ ⵉⴳⴳⵉⵏ ⵉⵊⴻⵏⵡⴰⵏ ⴷ ⵜⴻⵎⵎⵓⵔⵜ,
ⵍⴻⴱⵃⴰⵔ ⴷ ⵎⴰⵔⵔⴰ ⵎⵉⵏ ⴷⴰⵢⴻⵙ,
ⵡⴻⵏⵏⵉ ⴷⴰⵢⴻⵙ ⵍⴰⵎⴰⵏ ⵉ ⵍⴻⴱⴷⴰ, [c]
7 ⵡⴻⵏⵏⵉ ⵉⵜⵜⴰⵖⴻⵏ ⵜⴰⵙⵖⴰⵔⵜ
ⵉ ⵢⵉⵏⵏⵉ ⵉⵜⵜⵡⴰⵃⴻⵚⵚⴰⵔⴻⵏ,
ⵡⴻⵏⵏⵉ ⵉⵜⵜⵉⵛⴻⵏ ⴰⵖⵔⵓⵎ ⵉ ⵢⵉⵏⵏⵉ ⵉⴵⵓⵥⴻⵏ.
ⵙⵉⴷⵉ ⵢⴰⵔⴻⵅⵅⵓ ⵉ ⵉⵎⴻⵃⴱⴰⵙ.
8 ⵙⵉⴷⵉ ⵢⴰⵔⴻⵣⵣⴻⵎ ⵉ ⵉⴷⴰⵔⵖⴰⵍⴻⵏ ⵜⵉⵟⵟⴰⵡⵉⵏ,
ⵉⵙⵙⴱⴻⴷⴷⴰ ⵉⵏⵏⵉ ⵉⴳⴳⵓⵔⴻⵏ ⵉⵜⵜⴻⵇⵡⵉⵙⴻⵏ,
ⵙⵉⴷⵉ ⵉⵜⵜⴻⵅⵙ ⵉⵎⵙⴻⴳⴳⴰⴷⴻⵏ. [d]
9 ⵙⵉⴷⵉ ⵉⵃⴻⵟⵟⴰ ⵉⴱⴰⵔⵔⴰⵏⵉⵢⵢⴻⵏ,
ⵉⵜⵜⵉⵛ ⴰⴼⵓⵙ ⵉ ⵓⵢⵓⵊⵉⵍ ⴷ ⵜⵉⵊⵊⴰⵍ,
ⵎⴰⵛⴰ ⴰⴱⵔⵉⴷ ⵏ ⵉⵄⴻⴼⴼⴰⵏⴻⵏ ⴰⴷ ⵜ ⵉⵙⵙⴼⴰⵔⵖ.
10 ⵙⵉⴷⵉ ⴰⴷ ⵉⵃⴽⴻⵎ ⵉ ⵍⴻⴱⴷⴰ,
ⴰⵔⴻⴱⴱⵉ ⵏⵏⴻⵛ, ⴰ ⵚⵉⵀⵢⵓⵏ,
ⵉⵃⴻⴽⴽⴻⵎ ⵣⵉ ⵊⵊⵉⵍ ⴰⵍ ⵊⵊⵉⵍ.
ⵀⴰⵍⵍⵉⵍⵓ-ⵢⴰⵀ. [e]
- ⵉⵥⴻⵀⵀⵉⴷⴻⵏ
- a
-
146:2 ⵎⵉⵏ ... ⵖⴰ ⴽⴽⴻⵖ ⴷⴷⴰⵔⴻⵖ-ⵙ ⵜⵄⵉⴱⵔⴰⵏⵉⵜ ‘ⴷⵉ ⵜⵓⴷⴰⵔⵜ ⵉⵏⵓ’.
- b 146:3 ⵉⵥⵀⴷ. 118:8, 9
- c 146:6 ⵡⴻⵏⵏⵉ ⴷⴰⵢⴻⵙ ⵍⴰⵎⴰⵏ-ⵙ ⵜⵄⵉⴱⵔⴰⵏⵉⵜ ‘ⵡⴻⵏⵏⵉ ⵉⵃⴻⵟⵟⴰⵏ ⵍⴰⵎⴰⵏ’.
- d 146:8 ⵉⵥⵀⴷ. 145:14; 147:3; ⵎⵜ. 9:30; ⵍⴽ. 13:13; ⵢⵃ. 9:7, 32
- e 146:10 ⵓⴼ. 15:18; ⵉⵥⵀⴷ. 145:13
Languages