1 ⴰⵣⴻⵀⵀⴻⴷ ⵏ ⴷⴰⵡⵓⴷ.

ⵙⵉⴷⵉ ⵉⵙⵙⴰⵡⴰⵍ ⴰⴽ-ⴷ ⵙⵉⴷⵉ ⵉⵏⵓ:

ⵇⵉⵎ ⵖⴰⵔ ⵓⴼⵓⵙ ⴰⴼⵓⵙⵉ ⵉⵏⵓ,

ⴰⵍ ⴷⴷ-ⵙⵙⴰⵔⵙⴻⵖ ⵍⵄⴻⴷⵢⴰⵏ ⵏⵏⴻⵛ

ⴷ ⵜⴰⵏⴻⴱⴷⴰⵜ ⵙⴰⴷⵓ ⵉⴹⴰⵔⴻⵏ ⵏⵏⴻⵛ. [a]

2 ⵙⵉⴷⵉ ⴰⴷ ⵉⵙⵙⴻⴽⴽ ⴰⵣⴻⴵⴰⴹ ⵏ ⵚⵚⵓⵍⵟⴰ ⵏⵏⴻⵛ

ⵣⵉ ⵚⵉⵀⵢⵓⵏ,

ⵛⴻⴽ ⴰⴷ ⵜⵚⴻⵍⵍⵟⴻⴷ ⴷⵉ ⵍⵡⴻⵙⵟ ⵏ ⵍⵄⴻⴷⵢⴰⵏ ⵏⵏⴻⵛ.

3 ⵍⴳⴻⵏⵙ ⵏⵏⴻⵛ ⴰⴷ ⵢⵉⵍⵉ ⴷ ⴰⵎⵙⴻⵄⵄⴰⴼ

ⴷⴻⴳ ⵡⴰⵙⵙ ⵏ ⵚⵚⵓⵍⵟⴰ ⵏⵏⴻⵛ,

ⴰⴷ ⴷⴷ-ⵢⴰⵙ ⴷⵉ ⵜⵉⵙⵙⵉⵇⵜ ⵉⵇⴻⴷⴷⵙⴻⵏ

ⵣⵉ ⵍⴻⵎⵍⴰⵡⵍⴻⵜ ⵏ ⵜⵓⴼⴼⵓⵜ,

ⴰⵎⵎⵓ ⵉ ⵖⴰ ⵢⵉⵍⵉ ⵉ ⵛⴻⴽ ⵏⵏⴷⴰ

ⵏ ⵢⵉⵏⵏⵉ ⵄⴰⴷ ⵎⴰⵎⵎⴻⵛ

ⴷ ⴰⵛ ⴷⴷ-ⵉⵜⵜⵡⴰⵅⴻⵍⵇⴻⵏ.

4 ⵙⵉⴷⵉ ⵉⵊⵊⵓⴵ, ⵄⴻⵎⵎⴰⵔⵚ ⴰⴷ ⵅⴰⵙ ⵉⵏⴷⴻⵎ:

“ⵛⴻⴽ ⴷ ⴰⴽⴻⵀⵀⴰⵏ ⵉ ⵍⴻⴱⴷⴰ,

ⵄⵍⴰⵃⵙⴰⴱ ⵚⵚⵉⴼⴻⵜ ⵏ ⵎⴰⵍⴽⵉⵚⴰⴷⵉⵇ!”,

ⵉⵅⵙ ⴰⴷ ⵢⵉⵏⵉ ‘ⴰⵊⴻⴵⵉⴷ ⴷ ⴰⵎⵙⴻⴳⴳⴻⴷ’. [b]

5 ⵙⵉⴷⵉ ⴰⵇⴰ-ⵜ ⵖⴰⵔ ⵓⴼⵓⵙ ⴰⴼⵓⵙⵉ ⵏⵏⴻⵛ.

ⵏⴻⵜⵜⴰ ⴰⴷ ⵉⵍⴱⴻⵣ ⵉⵊⴻⴵⵉⴷⴻⵏ

ⴷⴻⴳ ⵡⴰⵙⵙ ⵏ ⵡⴻⵖⴹⴰⴱ ⵏⵏⴻⵙ.

6 ⵏⴻⵜⵜⴰ ⴰⴷ ⵉⵃⴰⴽⴻⵎ ⵅ ⵍⴻⴳⵏⵓⵙ,

ⴰⵇⴰ ⴷⴰ ⵜⴰⵎⵎⵓⵔⵜ ⵜⴻⵛⵛⵓⵔ ⵙ ⵍⵅⴻⵛⴱⴰⵜ,

ⴰⴷ ⵉⵍⴱⴻⵣ ⴰⵣⴻⴵⵉⴼ

ⵅ ⵉⵛⵜ ⵏ ⵜⴻⵎⵎⵓⵔⵜ ⵜⴰⵎⴻⵇⵇⵔⴰⵏⵜ. [c]

7 ⴰⴽ-ⴷ ⵡⴻⴱⵔⵉⴷ ⴰⴷ ⵉⵙⵓ ⵣⵉ ⵜⴻⵖⵣⴰⵔⵜ,

ⵅ ⵓⵢⴰ ⴰⴷ ⵉⵙⵙⴳⴻⵄⵄⴻⴷ ⴰⵣⴻⴵⵉⴼ ⵏⵏⴻⵙ.