1 ⵉⵄⴻⴼⴼⴰⵏⴻⵏ ⵜⵜⵔⴰⴽⴽⵡⴰⵍⴻⵏ

ⵡⴰⵅⵅⴰ ⵡⴰⵔ ⴷⵉⵏⵏⵉ

ⵡⵉ ⵉ-ⵜⴻⵏ ⵉⴹⴰⴼⴼⴰⵔⴻⵏ,

ⵎⴰⵛⴰ ⵉⵎⵙⴻⴳⴳⴰⴷⴻⵏ ⴷⴰⵢⵙⴻⵏ ⵜⴰⵔⵢⴰⵙⵜ

ⴰⵎ ⵏ ⵉⵊⵊ ⵏ ⵡⴰⵢⵔⴰⴷ. [a]

2 ⵣⵉ ⵙⵙⵉⴱⴱⴻⵜ ⵏ ⵓⵄⴻⴷⴷⵉ ⵏ ⵜⴻⵎⵎⵓⵔⵜ

ⴰⵇⴰ ⴷⵉⵏ ⴰⵟⵟⴰⵙ ⵏ ⵍⵃⵓⴽⴽⴰⵎ ⵏⵏⴻⵙ,

ⵎⴰⵛⴰ ⵙ ⵉⵊⵊ ⵏ ⴱⵏⴰⴷⴻⵎ ⵙ ⵍⴻⵄⵇⴻⵍ ⴷ ⵜⵓⵙⵙⵏⴰ,

ⴰⴷ ⵜⴻⵇⵇⵉⵎ ⵚⵚⵓⵍⵟⴰ ⵜⴱⴻⴷⴷ

ⵉ ⵢⵉⵊⵊ ⵏ ⵍⵡⴻⵇⵜ ⴷ ⴰⵣⵉⵔⴰⵔ.

3 ⴰⵔⵢⴰⵣ ⴰⵎⴻⵣⵍⵓⴹ ⵏⵏⵉ ⵉⵜⵜⵣⴻⵢⵢⴰⵔⴻⵏ ⵅ ⵉⵎⴰⵔⵅⴰ,

ⴰⵎ ⵡⴻⵏⵥⴰⵔ ⵉⵜⵜⴰⵡⵢⴻⵏ ⵎⴰⵔⵔⴰ,

ⴰⵍ ⵡⴰⵔ ⵉⵜⵜⵖⵉⵎⵉ ⵄⴰⴷ ⵡⴻⵖⵔⵓⵎ.

4 ⵉⵏⵏⵉ ⵉⵜⵜⴻⵊⵊⴰⵏ ⵛⵛⴰⵔⵉⵄⴰ

ⵙⵙⴻⵎⵖⴰⵔⴰⵏ ⴰⵄⴻⴼⴼⴰⵏ,

ⵎⴰⵛⴰ ⵉⵏⵏⵉ ⵉⵃⴻⵟⵟⴰⵏ ⵛⵛⴰⵔⵉⵄⴰ

ⵜⵜⵎⴻⵏⵖⴰⵏ ⴰⴽⵉⴷⵙⴻⵏ.

5 ⵉⵔⵢⴰⵣⴻⵏ ⵉⵄⴻⴼⴼⴰⵏⴻⵏ ⵡⴰⵔ ⴼⴻⵀⵀⵎⴻⵏ ⵍⵃⴻⵇⵇ,

ⵎⴰⵛⴰ ⵉⵏⵏⵉ ⵢⴰⵔⴻⵣⵣⵓⵏ ⵙⵉⴷⵉ,

ⴼⴻⵀⵀⵎⴻⵏ ⵉ ⴽⵓⵍⵛⵉ.

6 ⵉⵃⵍⴰ ⵓⵎⴻⵣⵍⵓⴹ ⵏⵏⵉ ⵉⴳⴳⵓⵔⴻⵏ ⵉⵚⴼⴰ,

ⵅ ⵡⴻⵏⵏⵉ ⵉⴳⴳⵓⵔⴻⵏ ⵉⴼⴰⵔⵖ ⴷⵉ ⵜⵏⴰⵢⴻⵏ ⵏ ⵉⴱⵔⵉⴷⴻⵏ,

ⵡⴰⵅⵅⴰ ⵏⴻⵜⵜⴰ ⵖⴰⵔⴻⵙ ⴰⴳⵍⴰ. [b]

7 ⵡⴻⵏⵏⵉ ⵉⵃⴻⵟⵟⴰⵏ ⵛⵛⴰⵔⵉⵄⴰ,

ⴷ ⵉⵊⵊ ⵏ ⵎⵎⵉⵙ ⵉⴼⴻⵀⵀⴻⵎ,

ⵎⴰⵛⴰ ⵡⴻⵏⵏⵉ ⴷ ⴰⵎⴻⴷⴷⵓⴽⴽⴻⵍ ⵏ ⵉⵎⴻⵍⵀⴰⴼ,

ⵢⴰⵔⵔⴰ ⴱⴰⴱⴰⵙ ⴰⴷ ⵉⵙⴻⴹⵃⴰ. [c]

8 ⵡⴻⵏⵏⵉ ⵉⵙⵙⴻⵎⵖⴰⵔⴰⵏ ⴰⴳⵍⴰ ⵏⵏⴻⵙ

ⵙ ⴰⵔⵔⵉⴱⴰ ⴷ ⵡⴰⵔⴱⴻⵃ,

ⵉⵙⵙⵎⵓⵏⴰ ⴰⵢⴰ ⵉ ⵡⴻⵏⵏⵉ ⵉⵜⵜⵃⵉⵏⵏⴰⵏ

ⵅ ⵉⵎⴻⵣⵍⴰⴹ. [d]

9 ⵡⴻⵏⵏⵉ ⵉⵙⵙⵃⴻⵢⵢⴰⴷⴻⵏ ⴰⵎⴻⵣⵣⵓⵖ ⵏⵏⴻⵙ

ⵣⴻⴳ ⵓⵙⴻⴵⵉ ⵏ ⵛⵛⴰⵔⵉⵄⴰ,

ⵄⴰⴷ ⵜⴰⵥⴰⴵⵉⵜ ⵏⵏⴻⵙ ⴷ ⵏⵏⵄⵉ.

10 ⵡⴻⵏⵏⵉ ⵉⵜⵜⴰⵔⵔⴰⵏ ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ

ⴰⴷ ⵡⴻⴷⴷⴰⵔⴻⵏ ⵅ ⵉⵊⵊ ⵏ ⵡⴻⴱⵔⵉⴷ ⴰⵄⴻⴼⴼⴰⵏ,

ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ

ⴰⴷ ⵉⵡⴹⴰ ⴷⵉ ⵜⴻⵙⵔⴰⴼⵜ ⵏⵏⴻⵙ,

ⵎⴰⵛⴰ ⵉⵏⵏⵉ ⵉ ⴷⵉ ⵜⴻⴵⴰ ⵍⴻⴽⵎⴰⵔⴻⵜ

ⴰⴷ ⵡⴰⵔⵜⴻⵏ ⵎⵉⵏ ⵉⵚⴻⴱⵃⴻⵏ. [e]

11 ⴱⵓ-ⵡⴰⴳⵍⴰ ⵉⵜⵜⴻⴳⴳ ⵉⵅⴻⴼ ⵏⵏⴻⵙ ⴷ ⴰⵎⵉⵖⵉⵙ

ⴷⵉ ⵜⵉⵟⵟⴰⵡⵉⵏ ⵏⵏⴻⵙ,

ⵎⴰⵛⴰ ⵉⵊⵊ ⵏ ⵓⵎⴻⵣⵍⵓⴹ

ⵏⵏⵉ ⴷⵉ ⵜⴻⴵⴰ ⵍⴻⴼⵀⴰⵎⴻⵜ,

ⵢⴰⵔⴳⴻⴱ ⵅⴰⵙ.

12 ⵎⴰⵍⴰ ⴰⴷ ⵙⵍⵉⵡⵍⵉⵡⴻⵏ ⵉⵎⵙⴻⴳⴳⴰⴷⴻⵏ

ⵙ ⵍⴻⴼⵔⴰⵃⴻⵜ,

ⴰⵇⴰ ⴷⵉⵏ ⴰⵄⵓⴵⵉ ⴰⵎⴻⵇⵇⵔⴰⵏ,

ⵎⴰⵛⴰ ⵎⴰⵍⴰ ⴽⴽⴰⵔⴻⵏ-ⴷⴷ ⵉⵄⴻⴼⴼⴰⵏⴻⵏ,

ⴰⴷ ⵉⵙⵙⵏⵓⴼⴼⴰⵔ ⴱⵏⴰⴷⴻⵎ ⵉⵅⴻⴼ ⵏⵏⴻⵙ. [f]

13 ⵡⴻⵏⵏⵉ ⵉⴷⴷⴰⵍⴻⵏ ⵉⵅⴻⵟⵟⴰⵏ ⵏⵏⴻⵙ,

ⵡⴰⵔ ⵉⵜⵜⴻⴼⵍⵉⵃ,

ⵎⴰⵛⴰ ⵡⴻⵏⵏⵉ ⵣⵣⴰⵢⵙⴻⵏ ⵉⵏⴻⵄⵄⵎⴻⵏ

ⵓ ⵉⵜⵜⵃⴻⵢⵢⴰⴷ ⵅⴰⵙⴻⵏ, ⴰⴷ ⵢⴰⴼ ⴰⵔⵔⴻⵃⵎⴻⵜ. [g]

14 ⵙⵙⴻⵄⴷ ⵏ ⴱⵏⴰⴷⴻⵎ

ⵏⵏⵉ ⵉⵜⵜⵡⴻⵇⵇⴰⵔⴻⵏ ⴱⵍⴰ ⴰⴱⴻⴷⴷⵉ,

ⵎⴰⵛⴰ ⵡⴻⵏⵏⵉ ⵉⵙⵙⴻⵇⵙⴰⵃⴻⵏ ⵓⵍ ⵏⵏⴻⵙ,

ⴰⴷ ⵉⵡⴹⴰ ⴷⵉ ⵍⵖⴰⵔ.

15 ⴰⵎ ⵉⵊⵊ ⵏ ⵡⴻⵢⵔⴰⴷ ⵉⵜⵜⴰⵔⵔⵓⵊⴷⵓⴷⴻⵏ,

ⴰⵎ ⵉⵊⵊ ⵏ ⴷⴷⵓⴱ ⵉⵜⵜⵍⴰⵥⴰⵏ

ⵉⵜⵜⴰⵣⵣⵍⴻⵏ ⵣⵉ ⵙⵙⴰ ⵖⴰⵔ ⴷⵉⵀⴰ,

ⴰⵎⵎⵓ ⵉ ⵉⴵⴰ ⵉⵊⵊ ⵏ ⵍⵃⴰⴽⴻⵎ ⴰⵄⴻⴼⴼⴰⵏ

ⵅ ⵉⵊⵊ ⵏ ⵍⴳⴻⵏⵙ ⴰⵎⴻⵣⵍⵓⴹ.

16 ⵍⵃⴰⴽⴻⵎ ⵏⵏⵉ ⴱⵍⴰ ⵍⴻⴼⵀⴰⵎⴻⵜ,

ⴰⵇⴰ-ⵜ ⴷ ⵍⵃⴰⴽⴻⵎ ⵅ ⵡⴰⵟⵟⴰⵙ ⵏ ⵡⴻⵔⴱⴰⵃ

ⵙ ⵓⴱⴻⵄⵄⴻⵊ,

ⵎⴰⵛⴰ ⵡⴻⵏⵏⵉ ⵉⵛⴰⵔⵔⵀⴻⵏ ⴰⵔⴱⴻⵃ,

ⴰⴷ ⵉⵣⵣⵓⴳⴳⴰⵔⵜ ⵓⵙⵙⴰⵏ ⵏⵏⴻⵙ.

17 ⵉⵊⵊ ⵏ ⴱⵏⴰⴷⴻⵎ ⵉⵜⵜⵡⴰⵃⵚⴰⵔⴻⵏ

ⵓⵎⵉ ⵉⵙⵙⵉⵣⵣⴻⵍ ⵉⴷⴰⵎⵎⴻⵏ ⵏ ⵛⴰ ⵏ ⵢⵉⵊⵊⴻⵏ,

ⴰⴷ ⵢⴰⵔⵡⴻⵍ ⵖⴰⵔ ⵡⴻⵃⴼⵓⵔ ⵏ ⵡⴻⵏⴹⴻⵍ

ⵏ ⵢⵉⵅⴻⴼ ⵏⵏⴻⵙ.

ⵡⴰⵔ ⵜⵜⴻⵊⵊⵉ ⵃⴻⴷ ⴰⴷ ⵜ ⵉⵙⵙⴱⴻⴷⴷ!

18 ⵡⴻⵏⵏⵉ ⵉⴳⴳⵓⵔⴻⵏ ⴰⴱⵔⵉⴷ ⵏⵏⴻⵙ ⴷⵉ ⵍⴻⵚⴼⴰⵢⴻⵜ,

ⴰⴷ ⵉⵏⵊⴻⵎ,

ⵎⴰⵛⴰ ⵡⴻⵏⵏⵉ ⵉⴳⴳⵓⵔⴻⵏ

ⵉⴼⴰⵔⵖ ⴷⵉ ⵜⵏⴰⵢⴻⵏ ⵏ ⵉⴱⵔⵉⴷⴻⵏ,

ⵡⴰⵔ ⵉⵜⵜⵄⴻⵟⵟⴰⵔ ⴰⴷ ⵉⵡⴹⴰ.

19 ⵡⴻⵏⵏⵉ ⵉⵛⴰⵔⵔⵣⴻⵏ ⵜⴰⵎⵎⵓⵔⵜ ⵏⵏⴻⵙ,

ⴰⴷ ⵉⵊⵊⴰⵡⴻⵏ ⵙ ⵡⴻⵖⵔⵓⵎ,

ⵎⴰⵛⴰ ⵡⴻⵏⵏⵉ ⵉⴹⴻⴼⴼⴰⵔⴻⵏ ⴰⵔⵢⴰⵣ ⵉⵅⵡⴰⵏ,

ⴰⴷ ⵉⵊⵊⴰⵡⴻⵏ ⵣⵣⴻⵍⴹ.

20 ⴰⵔⵢⴰⵣ ⵉ ⴷⵉ ⵉⴵⴰ ⵍⴰⵎⴰⵏ ⴰⵟⵟⴰⵙ

ⴰⴷ ⵉⴽⵙⵉ ⴰⵟⵟⴰⵙ ⵏ ⵍⴱⴰⵔⴰⴽⴰⵜ,

ⵎⴰⵛⴰ ⵡⴻⵏⵏⵉ ⵉⵜⵜⵇⴻⴵⵉⵇⴻⵏ ⵃⵉⵎⴰ ⴰⴷ ⵉⴳⴳ ⴰⴳⵍⴰ,

ⵡⴰⵔ ⵉⵜⵜⵡⵉⵃⵙⵉⴱ ⴷ ⴰⵎⴻⵣⴷⴰⴳ. [h]

21 ⴰⵙⴼⴰⵔⵣ ⵏ ⵡⵓⴷⵎⴰⵡⴻⵏ ⵡⴰⵔ ⵉⵛⵏⵉ ⵛⴰ,

ⵎⴰⵖⴰⵔ ⵉ ⵢⵉⵊⵊ ⵏ ⵓⵍⴻⵇⵇⵓⵣ ⵏ ⵡⴻⵖⵔⵓⵎ

ⵉⵣⴻⵎⵎⴰⵔ ⵛⴰ ⵏ ⵡⴻⵔⵢⴰⵣ ⴰⴷ ⵉⵅⴹⴰ. [i]

22 ⴰⵔⵢⴰⵣ ⵙ ⵜⵉⵟⵟ ⵜⴰⵄⴻⴼⴼⴰⵏⵜ

ⵉⵜⵜⵇⴻⴵⵉⵇ ⵖⴰⵔ ⵡⴰⴳⵍⴰ,

ⵎⴰⵛⴰ ⵏⴻⵜⵜⴰ ⵡⴰⵔ ⵉⵙⵙⵉⵏ

ⴰⵇⴰ ⵍⴻⵅⵙⴻⵙ ⴰⴷ ⵖⴰⵔⴻⵙ ⴷⴷ-ⵢⴰⵙ.

23 ⵡⴻⵏⵏⵉ ⵉⵜⵜⵄⴰⵇⴰⴱⴻⵏ ⵉⵊⵊ ⵏ ⴱⵏⴰⴷⴻⵎ,

ⴰⵇⴰ ⵖⴰⵔ ⵓⵏⴻⴳⴳⴰⵔ ⴰⴷ ⵢⴰⴼ ⴰⵔⴹⴰ ⴽⵜⴰⵔ

ⵅ ⵡⴻⵏⵏⵉ ⵉⵙⵙⵛⴰⵏⴰⵏ ⵜⴰⵥⵢⵓⴹⵉ ⵙ ⵢⵉⵍⴻⵙ ⵏⵏⴻⵙ.

24 ⵡⴻⵏⵏⵉ ⵉⵜⵜⴽⴻⵛⵛⴰⴹⴻⵏ ⴱⴰⴱⴰⵙ ⵏⵉⵖ ⵢⴻⵎⵎⴰⵙ

ⵓⵛⴰ ⵉⵇⵇⴰⵔ: “ⵡⴰⵔ ⵉⴵⵉ ⴷ ⴷⴷⴻⵏⴱ!”,

ⴰⵇⴰ-ⵜ ⴷ ⴰⵛⵔⵉⵛ ⵏ ⵉⵊⵊ ⵏ ⴱⵓ-ⵍⴰⵅⴰⵔⵜ.

25 ⵡⴻⵏⵏⵉ ⴷⵉ ⵉⴵⴰ ⵏⵏⴼⴰⵅⴻⵜ,

ⵉⵙⵙⴻⴽⴽⴰⵔⴰ-ⴷⴷ ⴰⵎⵛⵓⴱⴱⴻⵛ,

ⵎⴰⵛⴰ ⵡⴻⵏⵏⵉ ⵉⵜⵜⵛⴰⵍⴰⵏ ⵅ ⵙⵉⴷⵉ,

ⴰⴷ ⵉⴷⵡⴻⵍ ⵍⴰⴱⴰⵙ ⵅⴰⵙ. [j]

26 ⵡⴻⵏⵏⵉ ⵉⵜⵜⵛⴰⵍⴰⵏ ⵅ ⵡⵓⵍ ⵏⵏⴻⵙ,

ⴰⵇⴰ ⴷ ⴰⴱⵓⵀⴰⵍⵉ,

ⵎⴰⵛⴰ ⵡⴻⵏⵏⵉ ⵉⴳⴳⵓⵔⴻⵏ

ⴰⴱⵔⵉⴷ ⵏⵏⴻⵙ ⴷⵉ ⵜⵉⵖⵉⵜ,

ⴰⴷ ⵉⵏⵊⴻⵎ.

27 ⵡⴻⵏⵏⵉ ⵉⵜⵜⵉⵛⴻⵏ ⵉ ⵉⵎⴻⵣⵍⴰⴹ,

ⵡⴰⵔ ⴷⴰⵢⴻⵙ ⵉⵜⵜⵉⵍⵉ ⴱⵓ ⵍⴻⵖⴱⴻⵏ,

ⵎⴰⵛⴰ ⵡⴻⵏⵏⵉ ⵉⵜⵜⴻⵇⵇⵏⴻⵏ ⵜⵉⵟⵟⴰⵡⵉⵏ ⵏⵏⴻⵙ,

ⴰⴷ ⵉⵜⵜⵡⴰⵏⵄⴻⵍ ⴰⵟⵟⴰⵙ. [k]

28 ⵎⴰⵍⴰ ⴽⴽⴰⵔⴻⵏ-ⴷⴷ ⵉⵄⴻⴼⴼⴰⵏⴻⵏ,

ⵅⴻⵏⵏⵉ ⵉⵜⵜⵏⵓⴼⴼⴰⵔ ⴱⵏⴰⴷⴻⵎ,

ⵎⴰⵛⴰ ⵎⴰⵍⴰ ⵜⵜⵡⴰⵀⴻⵍⵍⴽⴻⵏ ⵏⵉⵜⵏⵉ,

ⴰⴷ ⵎⵎⴰⵔⴻⵏⵢⴻⵏ ⵉⵎⵙⴻⴳⴳⴰⴷⴻⵏ.[l]