1 ⵜⵡⴰⵔⵔⵉⵜ ⵉⴼⵙⵓⵙⴻⵏ

ⵜⴻⵙⵙⴻⵙⵎⴰⴹ ⴰⵅⴻⵢⵢⴻⵇ,

ⵎⴰⵛⴰ ⴰⵡⴰⵍ ⵉⵜⵜⴻⵇⵇⵙⴻⵏ

ⵉⵙⵙⴻⴽⴽⴰⵔⴰ-ⴷⴷ ⴰⵅⴻⵢⵢⴻⵇ. [a]

2 ⵉⵍⴻⵙ ⵏ ⵉⵎⵉⵖⵉⵙⴻⵏ ⵉⵊⴻⴱⴱⴻⴷ ⵜⵓⵙⵙⵏⴰ

ⵖⴰⵔ ⵣⵣⴰⵜ,

ⵎⴰⵛⴰ ⴰⵇⴻⵎⵎⵓⵎ ⵏ ⵉⴱⵓⵀⴰⵍⵉⵢⵢⴻⵏ

ⵉⵜⵜⴰⵣⵣⴻⵍ ⵙ ⵜⵓⴱⴱⵓⵀⴻⵍⵢⴰ. [b]

3 ⵜⵉⵟⵟⴰⵡⵉⵏ ⵏ ⵙⵉⴷⵉ ⴷⵉ ⴽⵓⵍ ⴰⵎⵛⴰⵏ,

ⵜⵜⵃⴻⴽⴽⴰⵔⴻⵏⵜ ⵉ ⵉⵚⴻⴱⵃⴰⵏⴻⵏ ⴷ ⵉⵄⴻⴼⴼⴰⵏⴻⵏ. [c]

4 ⵉⵍⴻⵙ ⵏⵏⵉ ⵉⵙⵙⴳⴻⵏⴼⴰⵏ ⴷ ⵜⴰⵛⴻⵊⵊⴰⵔⵜ ⵏ ⵜⵓⴷⴰⵔⵜ,

ⵎⴰⵛⴰ ⴰⵔⵔⵀⴰⵊ ⵏⵏⴻⵙ ⵉⵜⵜⴰⵔⴻⵥⵥⴰ ⴱⵓⵃⴱⴻⵍ. [d]  [e]

5 ⴰⴱⵓⵀⴰⵍⵉ ⵉⵏⴻⵟⵟⴰⵔ ⵜⵜⴰⵔⴱⵉⵢⵢⴻⵜ ⵏ ⴱⴰⴱⴰⵙ,

ⵎⴰⵛⴰ ⵡⴻⵏⵏⵉ ⵉⵜⵜⵃⴻⴽⴽⴰⵔⴰⵏ

ⵉ ⵓⵡⴻⴱⴱⴻⵅ, ⴰⵇⴰ ⵉⴼⵜⴻⵏ.

6 ⴷⵉ ⵜⴰⴷⴷⴰⵔⵜ ⵏ ⵓⵎⵙⴻⴳⴳⴰⴷ

ⴷⴰⵢⴻⵙ ⵍⴽⴻⵏⵣ ⵉⵎⵖⴰⵔ,

ⵎⴰⵛⴰ ⴷⵉ ⵎⵉⵏ ⴷⴷ-ⵉⵜⵜⴰⵡⵉ ⵓⵄⴻⴼⴼⴰⵏ

ⴷⴰⵢⴻⵙ ⵜⴰⵎⴰⵔⴰ.

7 ⵉⵢⴻⵏⵛⵉⵛⴻⵏ ⵏ ⵉⵎⵉⵖⵉⵙⴻⵏ ⵜⵜⴱⴻⵣⵣⴰⵄⴻⵏ ⵜⵓⵙⵙⵏⴰ,

ⵎⴰⵛⴰ ⵓⵍ ⵏ ⵉⴱⵓⵀⴰⵍⵉⵢⵢⴻⵏ ⵡⴰⵔ ⵉⴵⵉ ⵏⵉⵛⴰⵏ.

8 ⵜⴰⵖⴰⵔⵚⵜ ⵉ ⵉⵜⵜⵇⴻⴷⴷⴰⵎⴻⵏ ⵉⵄⴻⴼⴼⴰⵏⴻⵏ

ⴷ ⵏⵏⵄⵉ ⵉ ⵙⵉⴷⵉ,

ⵎⴰⵛⴰ ⵜⴰⵥⴰⴵⵉⵜ ⵏ ⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ

ⴰⵇⴰ-ⵜⵜ ⵉ ⵏⴻⵜⵜⴰ ⴷ ⴰⵔⴹⴰ. [f]

9 ⴰⴱⵔⵉⴷ ⵏ ⵓⵄⴻⴼⴼⴰⵏ ⴷ ⵏⵏⵄⵉ ⵉ ⵙⵉⴷⵉ,

ⵎⴰⵛⴰ ⵡⴻⵏⵏⵉ ⵉⴹⴻⴼⴼⴰⵔⴰⵏ ⵜⴰⵙⴻⴳⴷⴰ,

ⵉⵜⵜⴻⵅⵙ ⵉ-ⵜ ⵏⴻⵜⵜⴰ.

10 ⵜⵜⴰⵔⴱⵉⵢⵢⴻⵜ ⵉⵇⴻⵙⵃⴻⵏ ⵜⵍⴻⵇⵇⴻⴼ

ⵡⴻⵏⵏⵉ ⵉⵙⴻⵎⵃⴻⵏ ⴷⴻⴳ ⵡⴻⴱⵔⵉⴷ,

ⵓ ⵡⴻⵏⵏⵉ ⵉⵛⴰⵔⵔⵀⴻⵏ ⴰⵡⴻⴱⴱⴻⵅ,

ⴰⴷ ⵉⵎⵎⴻⵜ.

11 ⵍⴰⵅⴰⵔⵜ ⴷ ⵜⴻⵙⵔⴰⴼⵜ ⵏ ⵓⵀⴻⵍⵍⴻⴽ

ⴰⵇⴰ ⴷⵉⵏ ⴰⵔⴻⵣⵎⴻⵏ ⵣⵣⴰⵜ ⵉ ⵙⵉⴷⵉ,

ⵎⴻⵛⵃⴰⵍ ⵄⴰⴷ ⵡⵓⵍⴰⵡⴻⵏ ⵏ ⵜⴰⵔⵡⴰ ⵏ ⴱⵏⴰⴷⴻⵎ? [g]

12 ⴰⵎⴻⵙⵜⴻⵀⵣⵉⵢ ⵡⴰⵔ ⵉⵜⵜⴻⵅⵙ

ⵡⴻⵏⵏⵉ ⵜ ⵉ ⵖⴰ ⵉⵡⴻⴱⴱⵅⴻⵏ,

ⵡⴰⵔ ⵉⵜⵜⵔⵉⵃ ⵛⴰ ⵖⴰⵔ ⵉⵎⵉⵖⵉⵙⴻⵏ.

13 ⵓⵍ ⵉⴼⴰⵔⵃⴻⵏ ⵉⵜⵜⴻⴳⴳ ⵓⴷⴻⵎ ⵉⵛⵏⴰⵏ,

ⵎⴰⵛⴰ ⴰⵎⵏⵓⵙ ⴷⴻⴳ ⵡⵓⵍ ⵉⵙⴻⴽⴽⴻⴼ ⴱⵓⵃⴱⴻⵍ. [h]

14 ⵓⵍ ⵉⴼⴻⵀⵀⵎⴻⵏ ⵢⴰⵔⴻⵣⵣⵓ ⵜⵓⵙⵙⵏⴰ,

ⵎⴰⵛⴰ ⴰⵇⴻⵎⵎⵓⵎ ⵏ ⵉⴱⵓⵀⴰⵍⵉⵢⵢⴻⵏ

ⵉⵙⵙⴻⵛⵛⴰ ⵉⵅⴻⴼ ⵏⵏⴻⵙ ⵙ ⵜⵓⴱⴱⵓⵀⴻⵍⵢⴰ.

15 ⵉ ⵢⵉⵏⵏⵉ ⵉⵜⵜⵡⴰⵃⵚⴰⵔⴻⵏ ⵎⴰⵔⵔⴰ ⵓⵙⵙⴰⵏ ⵏⵙⴻⵏ

ⴰⵇⴰ ⵉⵄⴻⴼⴼⵏⴻⵏ,

ⵎⴰⵛⴰ ⵓⵍ ⵉⴼⴰⵔⵃⴻⵏ

ⴰⵎ ⵉⵛⵜ ⵏ ⵣⵣⴰⵔⴷⴻⵜ ⵡⴰⵔ ⵉⵇⴻⵟⵟⵉⵏ.

16 ⵉⵃⵍⴰ ⴷⵔⵓⵙ ⴰⴽ-ⴷ ⵜⴻⴳⴳⵯⵓⴷⵉ ⵏ ⵙⵉⴷⵉ,

ⵅ ⵉⵊⵊ ⵏ ⵍⴽⴻⵏⵣ ⴷ ⴰⵎⴻⵇⵇⵔⴰⵏ ⵙ ⵍⴻⵃⵡⴻⵍ. [i]

17 ⵉⵃⵍⴰ ⵉⵊⵊ ⵏ ⵟⵟⴻⴱⵚⵉ ⵏ ⵍⵅⵓⴹⴰⵔⵜ

ⵎⴰⵏⵉ ⵜⵃⴻⴽⴽⴻⵎ ⵜⴰⵢⵔⵉ,

ⵅ ⵉⵊⵊ ⵏ ⵓⵢⴻⵏⴷⵓⵣ ⵉⵚⴻⵃⵃⴻⵏ ⴰⴽ-ⴷ ⵡⴻⵛⵔⴰⵀ. [j]

18 ⴰⵔⵢⴰⵣ ⵉⵜⵜⴰⵔⵔⵓⵊⴷⵓⴷⴻⵏ

ⵉⵙⵙⴻⴽⴽⴰⵔⴰ ⵉⵎⴻⵏⵖⵉⵢⵢⴻⵏ,

ⵎⴰⵛⴰ ⵡⴻⵏⵏⵉ ⵖⴰⵔ ⵉⴵⴰ ⵜⵜⴰⵙⵉⵄ ⵏ ⵍⵅⴰⴹⴰⵔ

ⵉⵙⵙⴻⵅⵙⴰⵢ ⴰⵎⴻⵏⵖⵉ. [k]

19 ⴰⴱⵔⵉⴷ ⵏ ⵓⵎⴻⵄⴳⵓⵣ

ⴰⵎ ⵛⴱⴰⵔⵇ ⴰⴽ-ⴷ ⵉⵙⴻⵏⵏⴰⵏⴻⵏ,

ⵎⴰⵛⴰ ⴰⵎⴻⵙⵔⵓⵇ ⵏ ⵢⵉⵏⵏⵉ ⵉⴳⴳⵓⵔⴻⵏ ⵏⵉⵛⴰⵏ

ⴰⵇⴰ ⵉⵜⵜⵡⴰⵙⵙⴳⴻⵄⵄⴻⴷ.

20 ⵎⵎⵉⵙ ⴰⵎⵉⵖⵉⵙ ⵉⵙⵙⴼⴰⵔⵔⴻⵃ ⴱⴰⴱⴰⵙ,

ⵎⴰⵛⴰ ⴱⵏⴰⴷⴻⵎ ⴰⴱⵓⵀⴰⵍⵉ

ⵉⵙⵙⴻⵃⵇⴰⵔⴰ ⵢⴻⵎⵎⴰⵙ. [l]

21 ⵜⵓⴱⴱⵓⵀⴻⵍⵢⴰ ⴰⵇⴰ-ⵜⵜ ⴷ ⵍⴻⴼⵔⴰⵃⴻⵜ

ⵉ ⵡⴻⵏⵏⵉ ⵡⴰⵔ ⵖⴰⵔ ⵉⴵⵉ ⴱⵓ ⵡⵓⵍ ⵉⵎⵜⴻⵏ,

ⵎⴰⵛⴰ ⵉⵊⵊ ⵏ ⵡⴻⵔⵢⴰⵣ ⵏ ⵍⴻⴼⵀⴰⵎⴻⵜ

ⵉⴳⴳⵓⵔ ⵏⵉⵛⴰⵏ. [m]

22 ⵉⵏⵡⴰⵢⴻⵏ ⴼⴻⵛⵛⵍⴻⵏ

ⵎⴰⵍⴰ ⵡⴰⵔ ⴷⵉⵏ ⵉⴵⵉ ⵛⵛⵡⴰⵔ,

ⵎⴰⵛⴰ ⵙ ⵡⴰⵟⵟⴰⵙ ⵏ ⵉⵎⵛⴰⵡⴰⵔⴻⵏ

ⴰⴷ ⵢⵉⵍⵉ ⵡⴻⵏⵡⴰⵢ. [n]  [o]

23 ⴰⵔⵢⴰⵣ ⵖⴰⵔⴻⵙ ⵍⴻⴼⵔⴰⵃⴻⵜ

ⴷⵉ ⵜⴻⵎⵡⴰⵔⵔⵉⵜ ⵉⵚⴻⴱⵃⴻⵏ

ⵣⴻⴳ ⵓⵇⴻⵎⵎⵓⵎ ⵏⵏⴻⵙ.

ⵎⴻⵛⵃⴰⵍ ⵉⵚⴱⴻⵃ ⵡⴰⵡⴰⵍ ⴷⵉ ⵍⵡⴻⵇⵜ ⵏⵏⴻⵙ!

24 ⴰⴱⵔⵉⴷ ⵏ ⵜⵓⴷⴰⵔⵜ ⵉⵏⴻⴷⴷⴻⵀ

ⵖⴰⵔ ⵙⴻⵏⵏⴻⵊ ⵉ ⵓⴼⴻⵀⵀⴰⵎ,

ⵎⴰⵃⴻⵏⴷ ⵏⴻⵜⵜⴰ ⴰⴷ ⵉⵃⴻⵢⵢⴻⴷ

ⵅ ⵍⴰⵅⴰⵔⵜ ⵙⵡⴰⴷⴷⴰⵢ.

25 ⵜⴰⴷⴷⴰⵔⵜ ⵏ ⴱⵓ-ⵏⵏⴼⴰⵅⴻⵜ

ⴰⴷ ⵜⵜ ⵉⵇⵍⴻⵄ ⵙⵉⴷⵉ,

ⵎⴰⵛⴰ ⴰⵢⵎⵉⵔ ⵏ ⵢⴻⵢⵢⴰⵔ ⵏ ⵜⴰⵊⵊⴰⵍⵜ

ⵉⵙⵙⴻⵎⵜⴰⵏ ⵉ-ⵜ ⵏⴻⵜⵜⴰ. [p]

26 ⵉⵅⴻⵎⵎⵉⵎⴻⵏ ⵏ ⵓⵄⴻⴼⴼⴰⵏ ⴷ ⵏⵏⵄⵉ ⵉ ⵙⵉⴷⵉ,

ⵎⴰⵛⴰ ⴰⵡⴰⵍⴻⵏ ⵉⵛⴻⵡⵡⴰⵔⴻⵏ ⴷ ⵉⵎⴻⵣⴷⴰⴳⴻⵏ. [q]

27 ⵡⴻⵏⵏⵉ ⵢⴰⵔⴻⵣⵣⵓⵏ ⵅ ⴰⵔⴱⴻⵃ

ⵉⵖⴻⵟⵟⴻⵍ ⵜⴰⴷⴷⴰⵔⵜ ⵏⵏⴻⵙ ⴷⵉ ⴰⵔⵔⵥⵉⵢⵢⴻⵜ,

ⵎⴰⵛⴰ ⵡⴻⵏⵏⵉ ⵉⵛⴰⵔⵔⵀⴻⵏ ⵜⴰⵔⵣⵉⴼⵉⵏ, ⴰⴷ ⵉⴷⴷⴰⵔ. [r]

28 ⵓⵍ ⵏ ⵉⵎⵙⴻⴳⴳⴰⴷⴻⵏ ⵉⵜⵜⵅⴰⵔⵔⴰⵚ

ⵎⴰⵃⴻⵏⴷ ⴰⴷ ⴷⴷ-ⵢⴰⵔⵔ,

ⵎⴰⵛⴰ ⴰⵇⴻⵎⵎⵓⵎ ⵏ ⵉⵄⴻⴼⴼⴰⵏⴻⵏ

ⵉⵜⵜⴼⴻⵢⵢⴻⴹ ⵙ ⵍⵖⴰⵔ.

29 ⵉⴳⴳⵯⴻⵊ ⵙⵉⴷⵉ ⵅ ⵉⵄⴻⴼⴼⴰⵏⴻⵏ,

ⵎⴰⵛⴰ ⵜⴰⵥⴰⴵⵉⵜ ⵏ ⵉⵎⵙⴻⴳⴳⴰⴷⴻⵏ ⵉⵜⵜⴻⵙⵍⴰ ⴰⵙ. [s]

30 ⵜⴰⴼⴰⵡⵜ ⴷⵉ ⵜⵉⵟⵟⴰⵡⵉⵏ ⵜⴻⵙⵙⴼⴰⵔⵔⴻⵃ ⵓⵍ,

ⵍⴻⵅⴱⴰⵔ ⴰⵚⴻⴱⵃⴰⵏ ⵉⵙⵙⵢⵓⵎⴰ ⵉⵖⵙⴰⵏ. [t]

31 ⴰⵎⴻⵣⵣⵓⵖ ⵉⵜⵜⴻⵙⵍⴰⵏ

ⵖⴰⵔ ⵓⵡⴻⴱⴱⴻⵅ ⵉ ⵜⵓⴷⴰⵔⵜ,

ⴰⴷ ⵉⵙⵙⴻⵏⵙ ⴷⵉ ⵍⵡⴻⵙⵟ ⵏ ⵉⵎⵉⵖⵉⵙⴻⵏ.

32 ⵡⴻⵏⵏⵉ ⵉⵏⴻⵟⵟⴰⵔⴻⵏ ⵜⵜⴰⵔⴱⵉⵢⵢⴻⵜ,

ⵉⵙⵙⴻⵃⵇⴰⵔⴰ ⵉⵅⴻⴼ ⵏⵏⴻⵙ,

ⵎⴰⵛⴰ ⵡⴻⵏⵏⵉ ⵉⵜⵜⴻⵙⵍⴰⵏ ⵖⴰⵔ ⵓⵡⴻⴱⴱⴻⵅ,

ⵉⵙⵙⵢⴰⵡⴰⵏ ⵓⵍ ⵏⵏⴻⵙ. [u]

33 ⵜⵉⴳⴳⵯⵓⴷⵉ ⵏ ⵙⵉⴷⵉ ⴷ ⵜⵜⴰⵔⴱⵉⵢⵢⴻⵜ ⵖⴰⵔ ⵜⵉⵖⵉⵜ,

ⵓ ⴰⵡⴰⴹⴻⵄ ⵉⵜⵜⵉⵣⵡⴰⵔ ⵉ ⵛⵛⴰⵏ. [v]