1 ⵉⴱⴷⴰ ⵉⵙⵙⴰⵡⴰⵍ ⴰⴽⵉⴷⵙⴻⵏ ⵙ ⵉⵎⴻⴷⵢⴰ: “ⵉⵊⵊ ⵏ ⴱⵏⴰⴷⴻⵎ ⵉⴳⴳⴰ ⵉⵊⵊ ⵏ ⵓⵎⴰⵔⵊⴻⵄ ⵏ ⵓⴹⵉⵍ, ⵉⵥⵥⵓ ⴷⴰⵢⴻⵙ ⵜⵉⵣⴰⵢⴰⵔⵉⵏ, ⵉⵇⴻⵡⵡⴰⵔ ⴰⵙ-ⴷⴷ ⵙ ⵉⵊⵊ ⵏ ⵡⴻⴼⵔⴰⵢ, ⵉⵖⵣⴰ ⵜⴰⵙⵉⵔⵜ ⵏ ⵓⴹⵉⵍ, ⵉⴱⵏⴰ ⴷⴰⵢⴻⵙ ⵚⵚⵓⵎⵄⴻⵜ ⵓⵛⴰ ⵉⵡⴻⴽⴽⴻⵍ ⴰⵎⴰⵔⵊⵓⵄ ⵏⵏⵉ ⵉ ⵉⵅⴻⵎⵎⴰⵙⴻⵏ ⵓⵛⴰ ⵉⵙⴰⴼⴰⵔ. [a] 2 ⵍⴰⵎⵉ ⴷⴷ-ⵢⵉⵡⴻⴹ ⵍⵃⴰⵍ, ⵉⵙⵙⴻⴽⴽ ⴰⵎⵙⴻⵅⵅⴰⵔ ⵏⵏⴻⵙ ⵖⴰⵔ ⵉⵅⴻⵎⵎⴰⵙⴻⵏ, ⵃⵉⵎⴰ ⴰⴷ ⵉⴽⵙⵉ ⵜⴰⵙⵖⴰⵔⵜ ⵏⵏⴻⵙ ⵣⴻⴳ ⵡⴻⵍⵇⴰⴹ ⵏ ⵓⵎⴰⵔⵊⴻⵄ ⵏ ⵓⴹⵉⵍ. 3 ⵎⴰⵛⴰ ⵏⵉⵜⵏⵉ ⵡⵜⵉⵏ ⵜ ⵓⵛⴰ ⵙⵙⴻⴽⴽⴻⵏ ⵜ ⵉⵅⵡⴰ. 4 ⵄⴰⵡⴻⴷ ⵉⵙⵙⴻⴽⴽ ⵖⴰⵔⵙⴻⵏ ⵉⵊⵊ ⵏ ⵓⵎⵙⴻⵅⵅⴰⵔ ⵏⵏⴻⵖⵏⵉ, ⴰⵔⴻⵊⵎⴻⵏ ⵜ, ⵎⴰⵔⵥⴻⵏ ⴰⵙ, ⵓⵛⴰ ⵍⴰⵎⵉ ⵜ ⵙⵙⴱⴻⵃⵜⵍⴻⵏ, ⵓⵥⵥⵍⴻⵏ ⵅⴰⵙ. 5 ⵄⴰⵡⴻⴷ ⵉⵙⵙⴻⴽⴽ-ⴷⴷ ⵖⴰⵔⵙⴻⵏ ⵡⴻⵏⵏⴻⵖⵏⵉ ⵓⵛⴰ ⵏⵖⵉⵏ ⵜ ⵓⵍⴰ ⴷ ⵏⴻⵜⵜⴰ. ⴰⵎⵎⵓ ⵉ ⵉⵙⵙⴻⴽⴽ ⵄⴰⴷ ⴰⵟⵟⴰⵙ ⵏ ⵉⵏⵏⴻⵖⵏⵉ, ⵀⴻⵜⵜⴽⴻⵏ ⵛⴰ ⵣⵣⴰⵢⵙⴻⵏ ⵙ ⵓⵔⴻⴽⴽⵓⴹ ⴷ ⵛⴰ ⵏⵏⴻⵖⵏⵉ ⵣⵣⴰⵢⵙⴻⵏ ⵏⵖⵉⵏ ⵜⴻⵏ. 6 ⵖⴰⵔ ⵓⵏⴻⴳⴳⴰⵔ ⵉⵙⵙⴻⴽⴽ ⵖⴰⵔⵙⴻⵏ ⴰⵢⴻⵏⵏⵉ ⵏ ⵎⵎⵉⵙ ⵉ ⵖⴰⵔⴻⵙ ⵉ ⵅⴰⵙ ⵉⵄⵉⵣⵣⴻⵏ, ⵎⴰⵖⴰⵔ ⵉⵏⵏⴰ: ‘ⵏⵉⵛⴰⵏ ⴰⴷ ⵡⴻⵇⵇⴰⵔⴻⵏ ⵎⵎⵉ!’ 7 ⵎⴰⵛⴰ ⵉⵅⴻⵎⵎⴰⵙⴻⵏ, ⵏⵏⵉ ⵏⵏⴰⵏ ⵊⴰⵔ ⴰⵙⴻⵏ: ‘ⴰⵇⴰ ⴷ ⵡⴰ ⴷ ⴰⵡⵔⵉⵜ. ⵣⵉⴷⴻⵎ, ⴰⴷ ⵜ ⵏⴻⵏⴻⵖ ⵓⵛⴰ ⴰⴷ ⵖⴰⵔⵏⴻⵖ ⵢⵉⵍⵉ ⵍⵡⴰⵔⵜ.’ [b] 8 ⵟⵟⴼⴻⵏ ⵜ, ⵏⵖⵉⵏ ⵜ ⵓⵛⴰ ⵏⴹⴰⵔⴻⵏ ⵜ ⴱⴰⵔⵔⴰ ⵉ ⵓⵎⴰⵔⵊⴻⵄ ⵏ ⵓⴹⵉⵍ. 9 ⵎⵉⵏ ⵖⴰ ⵢⴻⴳⴳ ⴱⴰⴱ ⵏ ⵓⵎⴰⵔⵊⴻⵄ ⵏ ⵓⴹⵉⵍ? ⴰⴷ ⴷⴷ-ⵢⴰⵙ, ⴰⴷ ⵉⵏⴻⵖ ⵉⵅⴻⵎⵎⴰⵙⴻⵏ ⵓⵛⴰ ⴰⴷ ⵉⵡⵛ ⴰⵎⴰⵔⵊⴻⵄ ⵏ ⵓⴹⵉⵍ ⵉ ⵉⵏⵏⴻⵖⵏⵉ. 10 ⵎⴰ ⵡⴰⵔ ⵜⴻⵖⵔⵉⵎ ⴰⵡⴰⵍ-ⴰ ⵏ ⵜⵉⵔⴰ ⵉⵇⴻⴷⴷⵙⴻⵏ? ...

‘ⴰⵥⵔⵓ ⵉ ⵜⵓⵖⴰ ⵉⵎⵎⴻⵏⴹⴰⵔⴻⵏ ⵉⴱⴻⵏⵏⴰⵢⴻⵏ,

ⴰⵇⴰ ⵉⴷⵡⴻⵍ ⴷ ⴰⵥⵔⵓ ⴷ ⴰⵣⴻⴵⵉⴼ ⵏ ⵜⴻⵖⵎⴰⵔⵜ. [c]

11 ⵡⴰ ⵢⵓⵙⴰ-ⴷⴷ ⵣⵉ ⵙⵉⴷⵉ

ⵓ ⵎⴰⵏ ⴰⵢⴰ ⴷ ⵍⴻⵄⵊⴻⴱ ⴷⵉ ⵜⵉⵟⵟⴰⵡⵉⵏ ⵏⵏⴻⵖ.’ ” [d]

12 ⵅⵙⴻⵏ ⴰⴷ ⵜ ⵟⵟⴼⴻⵏ ⵎⴰⵛⴰ ⵏⵉⵜⵏⵉ ⴳⴳⵯⴻⴷⴻⵏ ⵣⵉ ⵍⵖⴰⵛⵉ, ⵎⵉⵏⵣⵉ ⴼⴻⵀⵎⴻⵏ ⴱⴻⵍⵍⵉ ⵜⵓⵖⴰ ⵉⵙⵙⴰⵡⴰⵍ ⵅⴰⵙⴻⵏ ⵙ ⵓⵎⴻⴷⵢⴰ ⵏⵏⵉ. ⵏⵉⵜⵏⵉ ⵊⵊⵉⵏ ⵜ ⵓⵛⴰ ⵓⵢⵓⵔⴻⵏ.

13 ⵅⴻⵏⵏⵉ ⵙⵙⴻⴽⴽⴻⵏ ⵖⴰⵔⴻⵙ ⵛⴰ ⵏ ⵢⴻⵔⵢⴰⵣⴻⵏ ⵣⴻⴳ ⵉⴼⴰⵔⵉⵙⵉⵢⵢⴻⵏ ⵓ ⵛⴰ ⵣⵉ ⵜⴰⴷⴷⴰⵔⵜ ⵏ ⵀⵉⵔⵓⴷⵓⵙ, ⵃⵉⵎⴰ ⴰⴷ ⴰⵙ ⵟⵟⴼⴻⵏ ⵙ ⵡⴰⵡⴰⵍⴻⵏ ⵏⵏⴻⵙ. [e] 14 ⵓⵎⵉ ⴷⴷ-ⵓⵙⵉⵏ, ⵏⵏⴰⵏ ⴰⵙ: “ⴰ ⴰⵎⵙⴻⵖⵖⴰⵔ, ⵏⴻⵛⵛⵉⵏ ⵏⴻⵙⵙⴻⵏ ⴰⵇⴰ ⵛⴻⴽ ⴷ ⵜⵉⴷⴻⵜⵜ, ⵡⴰⵔ ⵜⴻⴳⴳⵯⵉⴷⴻⴷ ⵣⴻⴳ ⵉⵡⴷⴰⵏ ⵓ ⵡⴰⵔ ⵜⵅⴻⵣⵣⴰⵔⴻⴷ ⵛⴰ ⵖⴰⵔ ⵡⵓⴷⴻⵎ ⵏ ⵉⵡⴷⴰⵏ, ⵎⴰⵛⴰ ⵜⴻⵙⵙⴻⵍⵎⴰⴷⴻⴷ ⴰⴱⵔⵉⴷ ⵏ ⴰⵔⴻⴱⴱⵉ ⵙ ⵜⵉⴷⴻⵜⵜ. ⵎⴰ ⵉⵃⴻⴵⴻⵍ ⴰⴷ ⵏⴻⵡⵛ ⴷⴷⴰⵔⵉⴱⴰ ⵉ ⴽⵓⵍ ⵉⵊⵊⴻⵏ ⵣⵣⴰⵢⵏⴻⵖ ⵉ ⵇⴰⵢⵚⴰⵔ ⵏⵉⵖ ⵍⵍⴰ? ⵎⴰ ⵉⵜⵜⵅⴻⵚⵚⴰ ⴰⵏⴻⵖ ⴰⴷ ⵏⵅⴻⴵⴻⵚ ⴹⴹⴰⵔⵉⴱⴰ ⵏⵉⵖ ⵍⵍⴰ?” 15 ⵍⴰⵎⵉ ⵏⴻⵜⵜⴰ ⵢⴰⵔⴳⴻⴱ ⵅ ⵏⵏⵉⴼⴰⵇ ⵏⵙⴻⵏ, ⵉⵏⵏⴰ ⴰⵙⴻⵏ: “ⵎⴰⵢⴻⵎⵎⵉ ⴷ ⴰⵢⵉ ⵜᵉⵜⵜⵊⴰⵔⵔⴰⴱⴻⵎ? ⴰⵡⵢⴻⵎ ⴰⵢⵉ-ⴷⴷ ⵉⵊⵊ ⵏ ⴷⵉⵏⴰⵔ ⵃⵉⵎⴰ ⴰⴷ ⵜ ⵥⴰⵔⴻⵖ!” 16 ⵉⵡⵢⴻⵏ ⴰⵙ-ⴷⴷ ⵉⵊⵊ ⵏ ⴷⵉⵏⴰⵔ. ⵅⴻⵏⵏⵉ ⵉⵏⵏⴰ ⴰⵙⴻⵏ: “ⵡⵉ ⵢⵉⵍⴰⵏ ⵜⴰⵚⵡⵉⵔⵜ-ⴰ ⴷ ⵜⵉⵔⴰ-ⵢⴰ?” ⵏⵏⴰⵏ ⴰⵙ: “ⵏ ⵇⴰⵢⵚⴰⵔ!” 17 ⵢⴰⵔⵔⴰ-ⴷⴷ ⵢⴰⵙⵓⵄ, ⵉⵏⵏⴰ ⴰⵙⴻⵏ: “ⵡⵛⴻⵎ ⵅⴻⵏⵏⵉ ⵉ ⵇⴰⵢⵚⴰⵔ ⵎⵉⵏ ⵉⴵⴰⵏ ⵉ ⵇⴰⵢⵚⴰⵔ, ⵓ ⵎⵉⵏ ⵉⴵⴰⵏ ⵉ ⴰⵔⴻⴱⴱⵉ ⵉ ⴰⵔⴻⴱⴱⵉ.” ⵓⵛⴰ ⵜⵜⵄⴻⵊⴱⴻⵏ ⴷⴰⵢⴻⵙ. [f]

18 ⵓⵙⵉⵏ-ⴷⴷ ⵖⴰⵔⴻⵙ ⵄⴰⵡⴻⴷ ⵉⵚⴰⴷⵓⵇⵉⵢⵢⴻⵏ ⵏⵏⵉ ⵉⵇⵇⴰⵔⴻⵏ ⴱⴻⵍⵍⵉ ⵡⴰⵔ ⴷⵉⵏ ⴱⵓ ⵜⵏⵓⴽⵔⴰ. ⵙⵙⴻⵇⵙⴰⵏ ⵜ, ⵏⵏⴰⵏ: [g] 19 “ⴰ ⴰⵎⵙⴻⵖⵖⴰⵔ, ⴰⵇⴰ ⵢⵓⵔⴰ ⴰⵏⴻⵖ ⵎⵓⵙⴰ, ⵎⴰⵍⴰ ⵉⵎⵎⵓⵜ ⵉ ⵃⴻⴷ ⵓⵎⴰⵙ ⵓⵛⴰ ⵉⵊⵊⴰ ⵜⴰⵎⵖⴰⵔⵜ, ⵎⴰⵛⴰ ⵡⴰⵔ ⴷⴷ-ⵉⵊⵊⵉ ⴱⵓ ⵜⴰⵔⵔⴰⵡⵜ, ⴰⴷ ⵢⴰⵡⵉ ⵓⵎⴰⵙ ⵜⴰⵎⵖⴰⵔⵜ ⵏⵏⵉ ⵓⵛⴰ ⴰⴷ ⴷⴷ-ⵢⴻⵊⵊ ⴰⵃⴻⵏⵊⵉⵔ ⵉ ⵓⵎⴰⵙ. [h] 20 ⵜⵓⵖⴰ ⴷⵉⵏ ⵙⴻⴱⵄⴰ ⵏ ⵡⴰⵡⵎⴰⵜⴻⵏ. ⴰⵎⴻⵣⵡⴰⵔⵓ ⵢⵉⵡⵉ ⵉⵛⵜ ⵏ ⵜⴻⵎⵖⴰⵔⵜ ⵓⵛⴰ ⴰⵡⴰⵔⵏⵉ ⵍⴰⵎⵉ ⵉⵎⵎⵓⵜ, ⵡⴰⵔ ⴷⴷ-ⵉⵊⵊⵉ ⴱⵓ ⴷⴷⵓⵔⵉⵢⴻⵜ. 21 ⵅⴻⵏⵏⵉ ⵢⵉⵡⵢⵉ ⵉ-ⵜⵜ ⵡⴻⵏⵏⵉ ⵡⵉⵙⵙ ⵜⵏⴰⵢⴻⵏ ⵓⵛⴰ ⵉⵎⵎⵓⵜ, ⵡⴰⵔ ⴷⴷ-ⵉⵊⵊⵉ ⴱⵓ ⴷⴷⵓⵔⵉⵢⴻⵜ ⵓⵍⴰ ⴷ ⵏⴻⵜⵜⴰ, ⵓⵛⴰ ⴰⵎⵎⵓ ⵓⵍⴰ ⴷ ⵡⴻⵏⵏⵉ ⵡⵉⵙⵙ ⵜⵍⴰⵜⴰ. 22 ⵎⴰⵔⵔⴰ ⵙⴻⴱⵄⴰ ⵏⵏⵉ ⵉⵡⵢⴻⵏ ⵜⵜ, ⵡⴰⵔ ⴷⴷ-ⵊⵊⵉⵏ ⴱⵓ ⴷⴷⵓⵔⵉⵢⴻⵜ. ⴰⵏⴻⴳⴳⴰⵔ ⵏⵙⴻⵏ ⵎⴰⵔⵔⴰ ⵜⴻⵎⵎⵓⵜ ⵜⴻⵎⵖⴰⵔⵜ ⵏⵏⵉ ⵄⴰⵡⴻⴷ. 23 ⵉⵡⴰ ⴷⵉ ⵜⵏⵓⴽⵔⴰ, ⵅⵎⵉ ⴷⴷ ⵖⴰ ⴽⴽⴰⵔⴻⵏ, ⵓⵎⵉ ⵖⴰ ⵜⵉⵍⵉ ⵜⴻⵎⵖⴰⵔⵜ ⵏⵏⵉ? ⵎⵉⵏⵣⵉ ⵙⴻⴱⵄⴰ ⵏⵏⵉ ⵎⴰⵔⵔⴰ ⵉⵡⵢⴻⵏ ⵜⵜ ⴷ ⵜⴰⵎⵖⴰⵔⵜ.” 24 ⵢⴰⵔⵔⴰ-ⴷⴷ ⵢⴰⵙⵓⵄ, ⵉⵏⵏⴰ ⴰⵙⴻⵏ: “ⵎⴰ ⵡⴰⵔ ⵜⵅⴻⵟⵟⵉⵎ ⵛⴰ ⵎⵉⵏⵣⵉ ⵡⴰⵔ ⵜⴻⵙⵙⵉⵏⴻⵎ ⵛⴰ ⵜⵉⵔⴰ ⵉⵇⴻⴷⴷⵙⴻⵏ ⴷ ⵊⵊⴻⵀⴷ ⵏ ⴰⵔⴻⴱⴱⵉ? 25 ⵎⴰⵖⴰⵔ ⵅⵎⵉ ⴷⴷ ⵖⴰ ⴽⴽⴰⵔⴻⵏ ⵊⴰⵔ ⵉⵎⴻⵜⵜⵉⵏⴻⵏ, ⵡⴰⵔ ⵜⴻⵏⵜ ⵜⵜⵉⵡⵢⴻⵏ ⴷ ⵜⴰⵎⵖⴰⵔⵜ ⵓ ⵡⴰⵔ ⵙⵙⵎⵉⴵⵉⵛⴻⵏ ⵜⵉⵎⵖⴰⵔⵉⵏ ⵉ ⵢⴻⵔⵢⴰⵣⴻⵏ, ⵎⴰⵛⴰ ⴰⴷ ⵉⵍⵉⵏ ⴰⵎ ⵍⵎⴰⵍⴰⴽⴰⵜ ⵉ ⵉⴵⴰⵏ ⴷⴻⴳ ⵓⵊⴻⵏⵏⴰ. [i] 26 ⵎⴰⵛⴰ ⵣⵉ ⵊⵊⵉⵀⴻⵜ ⵏ ⵉⵎⴻⵜⵜⵉⵏⴻⵏ ⴰⵇⴰ ⵜⵜⵡⴰⵙⵙⵏⴻⴽⴽⴰⵔⴻⵏ: ⵎⴰ ⵡⴰⵔ ⵜⴻⵖⵔⵉⵎ ⴷⴻⴳ ⵡⴻⴷⵍⵉⵙ ⵏ ⵎⵓⵙⴰ, ⵎⴰⵎⵎⴻⵛ ⴰⴽⵉⴷⴻⵙ ⵉⵙⵙⵉⵡⴻⵍ ⴰⵔⴻⴱⴱⵉ ⵣⵉ ⵛⴱⴰⵔⵇ ⴰⴽ-ⴷ ⵉⵙⴻⵏⵏⴰⵏⴻⵏ, ⵉⵏⵏⴰ: ‘ⴷ ⵏⴻⵛⵛ ⴷ ⴰⵔⴻⴱⴱⵉ ⵏ ⵉⴱⵔⴰⵀⵉⵎ ⴷ ⴰⵔⴻⴱⴱⵉ ⵏ ⵉⵙⵃⴰⵇ ⴷ ⴰⵔⴻⴱⴱⵉ ⵏ ⵢⴰⵄⵇⵓⴱ’? [j] 27 ⵏⴻⵜⵜⴰ ⵡⴰⵔ ⵉⴵⵉ ⴷ ⴰⵔⴻⴱⴱⵉ ⵏ ⵉⵎⴻⵜⵜⵉⵏⴻⵏ, ⵎⴰⵛⴰ ⴷ ⴰⵔⴻⴱⴱⵉ ⵏ ⵢⵉⵏⵏⵉ ⵉⴷⴷⴰⵔⴻⵏ. ⵙ ⵓⵢⴻⵏⵏⵉ ⴰⵇⴰ ⴽⴻⵏⵏⵉⵡ ⵜⵅⴻⵟⵟⴰⵎ ⴰⵟⵟⴰⵙ.”

28 ⵉⵊⵊⴻⵏ ⵣⴻⴳ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⵉⵇⴰⵔⵔⴻⴱ-ⴷⴷ ⵖⴰⵔⴻⵙ, ⵉⵙⵍⴰ ⴰⵙⴻⵏ ⵜⵜⴻⵎⵀⴰⵔⵡⴰⴹⴻⵏ ⵊⴰⵔ ⴰⵙⴻⵏ ⵓⵛⴰ ⵉⵙⵙⴻⵏ ⴱⴻⵍⵍⵉ ⵏⴻⵜⵜⴰ ⴰⵇⴰ ⵢⴰⵔⵔⴰ-ⴷⴷ ⵅⴰⵙⴻⵏ ⵎⵍⵉⵃ. ⵅⴻⵏⵏⵉ ⵉⵙⵙⴻⵇⵙⴰ ⵜ: “ⵎⴰⵏ ⵜⴻⵏⵜ ⵉⴵⴰⵏ ⴷ ⵜⴰⵡⵚⴻⵢⵢⴻⵜ ⵜⴰⵎⴻⵣⵡⴰⵔⵓⵜ ⵅ ⴽⵓⵍⵛⵉ?” [k] 29 ⵢⴰⵔⵔⴰ-ⴷⴷ ⵅⴰⵙ ⵢⴰⵙⵓⵄ: “ⴰⵇⴰ ⵜⴰⵎⴻⵣⵡⴰⵔⵓⵜ ⵅ ⵎⴰⵔⵔⴰ ⵜⵉⵡⴻⵚⵚⴰ: ⵙⴻⵍ ⴰ ⵉⵙⵔⴰⵉⵍ! ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵙⵉⴷⵉ ⴷ ⵉⵊⵊ. [l] 30 ⴰⴷ ⵜⴻⵅⵙⴻⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ ⵙ ⵎⴰⵔⵔⴰ ⵡⵓⵍ ⵏⵏⴻⵛ ⵙ ⵎⴰⵔⵔⴰ ⵍⴻⵄⵎⴰⵔ ⵏⵏⴻⵛ ⵙ ⵎⴰⵔⵔⴰ ⵍⴻⵄⵇⴻⵍ ⵏⵏⴻⵛ ⵙ ⵎⴰⵔⵔⴰ ⵊⵊⴻⵀⴷ ⵏⵏⴻⵛ. ⵜⴰ ⴷ ⵜⴰⵡⵚⴻⵢⵢⴻⵜ ⵜⴰⵎⴻⵣⵡⴰⵔⵓⵜ. [m] 31 ⵓ ⵜⴰⵡⵚⴻⵢⵢⴻⵜ ⵡⵉⵙⵙ ⵜⵏⴰⵢⴻⵏ, ⴰⵎⴻⵛⵏⴰⵡ ⵜⴰⵏⵉⵜⴰ, ⴰⵇⴰ ⴷ ⵜⴰ: ⴰⴷ ⵜⴻⵅⵙⴻⴷ ⵊⵊⴰⵔ ⵏⵏⴻⵛ ⴰⵎⴻⵛⵏⴰⵡ ⵉⵅⴻⴼ ⵏⵏⴻⵛ. ⵡⴰⵔ ⴷⵉⵏ ⴱⵓ ⵜⴻⵡⵚⴻⵢⵢⴻⵜ ⵏⵏⴻⵖⵏⵉⵜ ⴷ ⵜⴰⵎⴻⵇⵇⵔⴰⵏⵜ ⵅ ⵜⵉⵏⴰ ⵙ ⵜⵏⴰⵢⴻⵏ.” [n] 32 ⵉⵏⵏⴰ ⴰⵙ ⵓⵎⵙⴻⵍⵎⴰⴷ ⵏ ⵉⴷⵍⵉⵙⴻⵏ: “ⵏⵉⵛⴰⵏ, ⴰ ⴰⵎⵙⴻⵍⵎⴰⴷ ⵉⵏⵓ, ⵙ ⵜⵉⴷⴻⵜⵜ ⵜⴻⵏⵏⵉⴷ ⴱⴻⵍⵍⵉ ⵏⴻⵜⵜⴰ ⴷ ⵉⵊⵊⴻⵏ, ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵏⵏⴻⵖⵏⵉ ⵎⵖⵉⵔ ⵏⴻⵜⵜⴰ, 33 ⵓ ⴱⴻⵍⵍⵉ ⵎⴰⵍⴰ ⵉⵊⵊ ⵏ ⴱⵏⴰⴷⴻⵎ ⴰⴷ ⵜ ⵉⵅⵙ ⵙ ⵡⵓⵍ ⵎⴰⵔⵔⴰ, ⵙ ⵍⴻⵄⵇⴻⵍ ⵎⴰⵔⵔⴰ, ⵙ ⵍⴻⵄⵎⴰⵔ ⵎⴰⵔⵔⴰ ⵓ ⵙ ⵊⵊⴻⵀⴷ ⵎⴰⵔⵔⴰ, ⵓⵛⴰ ⴰⴷ ⵉⵅⵙ ⵊⵊⴰⵔ ⵏⵏⴻⵙ ⴰⵎⴻⵛⵏⴰⵡ ⵉⵅⴻⴼ ⵏⵏⴻⵙ, ⴰⵇⴰ ⴷ ⵎⴰⵏ ⴰⵢⴰ ⵃⵙⴻⵏ ⵣⵉ ⵎⴰⵔⵔⴰ ⵜⵉⵖⴰⵔⵚⵉⵏ ⵏ ⵡⴻⵛⵎⴰⴹ ⴷ ⵎⴰⵔⵔⴰ ⵜⵉⵖⴰⵔⵚⵉⵏ ⵏⵏⴻⵖⵏⵉⵜ.” 34 ⵓⵎⵉ ⵉⵥⵔⴰ ⵢⴰⵙⵓⵄ ⴱⴻⵍⵍⵉ ⵢⴰⵔⵔⴰ-ⴷⴷ ⵙ ⵍⴻⵄⵇⴻⵍ, ⵉⵏⵏⴰ ⴰⵙ: “ⴰⵇⴰ ⵛⴻⴽ ⵡⴰⵔ ⵜⵉⴳⴳⵯⵉⵊⴻⴷ ⵛⴰ ⵅ ⵜⴳⴻⵍⴷⵉⵜ ⵏ ⴰⵔⴻⴱⴱⵉ.” ⵅⴻⵏⵏⵉ ⵡⴰⵔ ⵉⵄⴻⵡⵡⴻⵍ ⵃⴻⴷ ⴰⴷ ⵜ ⵉⵙⵙⴻⵇⵙⴰ ⵓⵍⴰ ⴷⴻⴳ ⵉⵛⵜ ⵏ ⵜⵎⴻⵙⵍⴰⵛⵜ. [o]

35 ⵍⴰⵎⵉ ⵜⵓⵖⴰ ⵉⵙⵙⴻⵍⵎⴰⴷ ⴷⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵉⵟⵟⴻⴼ ⵢⴰⵙⵓⵄ ⴷⴻⴳ ⵡⴰⵡⴰⵍ, ⵉⵏⵏⴰ: “ⵎⴰⵎⵎⴻⵛ ⵇⵇⴰⵔⴻⵏ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⴱⴻⵍⵍⵉ ⵍⵎⴰⵙⵉⵃ ⴷ ⵎⵎⵉⵙ ⵏ ⴷⴰⵡⵓⴷ? [p] 36 ⵎⵉⵏⵣⵉ ⴷⴰⵡⵓⴷ ⵙ ⵢⵉⵅⴻⴼ ⵏⵏⴻⵙ ⵉⵏⵏⴰ ⵙ ⴰⵔⵔⵓⵃ ⵉⵇⴻⴷⴷⵙⴻⵏ:

‘ⵉⵏⵏⴰ ⵙⵉⴷⵉ ⵉ ⵙⵉⴷⵉ ⵉⵏⵓ:

ⵇⵇⵉⵎ-ⴷⴷ ⵅ ⵓⴼⵓⵙⵉ ⵉⵏⵓ

ⴰⵍ ⴷⴷ ⵖⴰ ⴳⴳⴻⵖ ⵍⵄⴻⴷⵢⴰⵏ ⵏⵏⴻⵛ

ⴷ ⵜⴰⵏⴻⴱⴷⴰⵜ ⵙⴰⴷⵓ ⵉⴹⴰⵔⴻⵏ ⵏⵏⴻⵛ.’ [q]

37 ⵙ ⵓⵢⴰ ⵉⵜⵜⵍⴰⵖⴰ ⴰⵙ-ⴷⴷ ⴷⴰⵡⵓⴷ: ‘ⵙⵉⴷⵉ ⵉⵏⵓ!’ ⵎⴰⵏⵉⵙ ⴷⴷ-ⵉⴽⴽⴰ ⴷ ⵎⵎⵉⵙ?” ⵎⴰⵔⵔⴰ ⵍⵖⴰⵛⵉ ⵜⵓⵖⴰ ⵉⵙⵍⴰ ⴰⵙ ⵙ ⵍⴻⴼⵔⴰⵃⴻⵜ.

38 ⵉⵏⵏⴰ ⴰⵙⴻⵏ ⴷⴻⴳ ⵓⵙⴻⵍⵎⴰⴷ ⵏⵏⴻⵙ: “ⵃⴹⴰⵎ ⵉⵅⴻⴼ ⵏⵡⴻⵎ ⵣⴻⴳ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⵉⵏⵏⵉ ⵓⵎⵉ ⵉⵜⵜⴻⵄⵊⵉⴱ ⴰⵙⴻⵏ ⵍⵃⴰⵍ ⵅⵎⵉ ⵖⴰ ⵓⵢⵓⵔⴻⵏ ⵙ ⵍⴻⵄⴱⴰⵢⴰⵜ ⵜⵉⵣⵉⵔⴰⵔⵉⵏ ⵓ ⵅⵎⵉ ⵅⴰⵙⴻⵏ ⵉ ⵖⴰ ⵙⴻⴵⵎⴻⵏ ⵉⵡⴷⴰⵏ ⴷⵉ ⵍⴻⵙⵡⴰⵇ, [r] 39 ⵉⵏⵏⵉ ⵓⵎⵉ ⵉⵜⵜⴻⵄⵊⵉⴱ ⴰⵙⴻⵏ ⵍⴻⴽⵔⴰⵙⵉ ⵏ ⵣⵣⴰⵜ ⴷⵉ ⵜⴻⵎⵣⵉⴷⴰⵡⵉⵏ, ⵓⵍⴰ ⴷ ⵉⵎⵓⵛⴰⵏ ⵉⵎⴻⵣⵡⵓⵔⴰ ⵖⴰⵔ ⵉⵎⴻⵏⵙⵉⵡⴻⵏ ⵏ ⵡⵓⵔⴰⵔⴻⵏ. 40 ⵏⵉⵜⵏⵉ ⵜⵜⴻⵜⵜⴻⵏ ⵜⵓⴷⵔⵉⵏ ⵏ ⵜⵉⵊⵊⴰⵍ ⴰⵎ ⵜⵜᵉⵜⵜⴰⵔⴻⵏ ⵜⵉⵡⵀⵉⴱⵉⵏ ⴷⵉ ⵟⵟⵡⴻⵄ ⵏ ⵜⵥⴰⴵⴰⵜⵉⵏ ⵏⵙⴻⵏ ⵜⵉⵣⵉⵔⴰⵔⵉⵏ. ⴰⵇⴰ ⵉⵏⴰ ⴰⴷ ⴽⵙⵉⵏ ⵍⵃⵓⴽⵎ ⴷ ⴰⵎⴻⵇⵇⵔⴰⵏ.” [s]

41 ⴰⵎ ⵉⵇⵇⵉⵎ ⵢⴰⵙⵓⵄ ⵇⵉⴱⴰⵍⵜ ⵉ ⵙⵙⴻⵏⴷⵓⵇ ⵏ ⵚⵚⴻⴷⵇⴻⵜ, ⵉⵥⵔⴰ ⵎⴰⵎⵎⴻⵛ ⵉⵏⴻⵟⵟⴰⵔ ⵍⵖⴰⵛⵉ ⵜⵉⵏⵄⴰⵛⵉⵏ ⴷⵉ ⵙⵙⴻⵏⴷⵓⵇ. ⴰⵟⵟⴰⵙ ⵏ ⴰⵢⵜⴱⴰⴱ ⵏ ⵡⴰⴳⵍⴰ ⵜⵓⵖⴰ ⵏⴻⵟⵟⴰⵔⴻⵏ ⴷⴰⵢⴻⵙ ⴰⵟⵟⴰⵙ. [t] 42 ⵜⵓⵙⴰ-ⴷⴷ ⵉⵛⵜ ⵏ ⵜⴰⵊⵊⴰⵍⵜ ⴷ ⵍⵎⴻⵙⴽⵉⵏⴰ ⵜⴻⵏⴹⴰⵔ ⴷⴰⵢⴻⵙ ⵜⵏⴰⵢⴻⵏ ⵏ ⵓⵇⵉⵢⵢⴰⵜ, ⵙⴻⵎⵎⴰⵏ ⵜⴻⵏⵜ ‘ⵛⴰⵎⵓⵏⴰⵜ’. [u] 43 ⵅⴻⵏⵏⵉ ⵉⵍⴰⵖⴰ ⵢⴰⵙⵓⵄ ⵉ ⵉⵎⴻⵃⴹⴰⵔⴻⵏ ⵏⵏⴻⵙ, ⵉⵏⵏⴰ ⴰⵙⴻⵏ: “ⵙ ⵜⵉⴷⴻⵜⵜ, ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ, ⵜⴰⵊⵊⴰⵍⵜ-ⴰ ⵍⵎⴻⵙⴽⵉⵏⴰ ⴰⵇⴰ ⵜⴻⵏⴹⴰⵔ ⴷⴰⵢⴻⵙ ⴽⵜⴰⵔ ⵅ ⵎⴰⵔⵔⴰ ⵉⵡⴷⴰⵏ ⵏⵏⵉ ⵉⵏⴹⴰⵔⴻⵏ ⴷⵉ ⵙⵙⴻⵏⴷⵓⵇ ⵏ ⵚⵚⴻⴷⵇⴻⵜ. [v] 44 ⵎⵉⵏⵣⵉ ⵎⴰⵔⵔⴰ ⵏⴹⴰⵔⴻⵏ ⴷⴰⵢⴻⵙ ⵣⵉ ⵎⵉⵏ ⵖⴰⵔⵙⴻⵏ ⴰⵟⵟⴰⵙ, ⵎⴰⵛⴰ ⵜⴰ ⵣⵉ ⴷⵔⵓⵙ ⵏⵏⴻⵙ ⵜⴻⵏⴹⴰⵔ ⴷⴰⵢⴻⵙ ⴽⵓⵍⵛⵉ ⵎⵉⵏ ⵖⴰⵔⴻⵙ, ⴰⵇⴰ ⵜⴻⵏⴹⴰⵔ ⵎⴰⵔⵔⴰ ⵎⵉⵏ ⵖⴰⵔⴻⵙ ⴷ ⴰⴳⵍⴰ.”