1 ⵍⴻⵅⴷⴻⵏⵏⵉ ⵉⵙⵙⵉⵡⴻⵍ ⵢⴰⵙⵓⵄ ⴰⴽ-ⴷ ⵍⵖⴰⵛⵉ ⵓ ⴰⴽ-ⴷ ⵉⵎⴻⵃⴹⴰⵔⴻⵏ ⵏⵏⴻⵙ, [a] 2 ⵉⵏⵏⴰ: “ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⴷ ⵉⴼⴰⵔⵉⵙⵉⵢⵢⴻⵏ ⵙⵙⵖⵉⵎⴻⵏ ⵙⵉⵎⴰⵏⵜ ⵏⵙⴻⵏ ⵅ ⵍⴽⵓⵔⵙⵉ ⵏ ⵎⵓⵙⴰ. [b] 3 ⵙ ⵓⵢⴰ ⵎⴰⵔⵔⴰ ⵎⵉⵏ ⴷ ⴰⵡⴻⵎ ⵇⵇⴰⵔⴻⵏ ⵎⴰⵃⴻⵏⴷ ⴰⴷ ⴷⴰⵢⴻⵙ ⵜⵛⴻⴱⴱⴰⵔⴻⵎ, ⴳⴳⴻⵎ ⵜ, ⵎⴰⵛⴰ ⵡⴰⵔ ⵜⵜⴻⴳⴳⴻⵎ ⵄⵍⴰⵃⵙⴰⴱ ⵍⴻⵅⴷⴰⵢⴻⵎ ⵏⵙⴻⵏ, ⵎⵉⵏⵣⵉ ⵏⵉⵜⵏⵉ ⵡⴰⵅⵅⴰ ⵇⵇⴰⵔⴻⵏ ⵜ, ⵡⴰⵔ ⵜ ⵜⵜⴻⴳⴳⴻⵏ. [c] 4 ⵜⵜⵛⴻⴷⴷⴰⵏ ⵍⴻⵃⵎⴻⵍ ⵉⴹⴻⵇⵍⴻⵏ, ⵙⵙⵔⵓⵙⴰⵏ ⵜⴻⵏ ⵅ ⵜⵖⴰⵔⴷⵉⵏ ⵏ ⵉⵡⴷⴰⵏ, ⵎⴰⵛⴰ ⵏⵉⵜⵏⵉ ⵙ ⵢⵉⵅⴻⴼ ⵏⵙⴻⵏ ⵡⴰⵔ ⵅⵙⴻⵏ ⴰⴷ ⵜⴻⵏ ⵙⵙⴻⵏⵀⴻⵣⵣⴻⵏ ⵓⵍⴰ ⵙ ⵢⵉⵊⵊ ⵏ ⵓⴹⴰⴹ. [d] 5 ⵎⴰⵔⵔⴰ ⵍⴻⵅⴷⴰⵢⴻⵎ ⵏⵙⴻⵏ ⵉ ⵉⵜⵜⴻⴳⴳⴻⵏ, ⵜⵜⴻⴳⴳⴻⵏ ⵜⴻⵏⵜ ⵃⵉⵎⴰ ⴰⴷ ⵜⴻⵏ ⵥⴰⵔⴻⵏ ⵉⵡⴷⴰⵏ ⵎⵉⵏⵣⵉ ⵏⵉⵜⵏⵉ ⵜⵜⴻⴳⴳⴻⵏ ⵜⵉⵃⴻⵣⵣⴰⵏⵉⵏ ⵏⵙⴻⵏ ⵏ ⵜⵥⴰⴵⵉⵜ ⴷ ⵉⵎⵉⵔⵉⵡⴻⵏ ⵓⵛⴰ ⵜⵉⵛⵔⵓⵔⵉⵏ ⵉ ⵉⴵⴰⵏ ⵖⴰⵔ ⵓⴱⴻⵃⵍⵓⵍ ⵏ ⵍⴽⴰⵛⵏⵉ ⵏ ⵜⵥⴰⴵⵉⵜ ⵏⵙⴻⵏ, ⴳⴳⵉⵏ ⵜⴻⵏⵜ ⴷ ⵜⵉⵎⴻⵇⵇⵔⴰⵏⵉⵏ. [e] 6 ⵏⵉⵜⵏⵉ ⵜⵜⴻⵅⵙⴻⵏ ⵉⵎⵓⵛⴰⵏ ⵉⵚⴻⴱⵃⴻⵏ ⵖⴰⵔ ⵍⴻⴼⵔⵓⵃ ⵓ ⵍⴻⴽⵔⴰⵙⵉ ⵉⵚⴻⴱⵃⴻⵏ ⴷⵉ ⵜⴻⵎⵣⵉⴷⴰⵡⵉⵏ, [f] 7 ⵓⵍⴰ ⴷ ⵙⵙⵍⴰⵎ ⴷⵉ ⵍⴻⵙⵡⴰⵇ, ⵓⵛⴰ ⵉⵄⵊⴻⴱ ⴰⵙⴻⵏ ⴰⴷ ⴰⵙⴻⵏ ⵍⴰⵖⴰⵏ ⵉⵡⴷⴰⵏ ‘ⴰ ⴰⵎⵙⴻⵍⵎⴰⴷ ⵉⵏⵓ!’ [g] 8 ⵎⴰⵛⴰ ⴽⴻⵏⵏⵉⵡ ⵡⴰⵔ ⵜⵜⴻⵊⵊⵉⵎ ⴰⴷ ⴰⵡⴻⵎ ⵍⴰⵖⴰⵏ ‘ⴰ ⴰⵎⵙⴻⵍⵎⴰⴷ ⵉⵏⵓ!’, ⵎⵉⵏⵣⵉ ⴰⵎⵙⴻⵍⵎⴰⴷ ⵏⵡⴻⵎ ⴷ ⵉⵊⵊⴻⵏ, ⵎⴰⵛⴰ ⴽⴻⵏⵏⵉⵡ ⵎⴰⵔⵔⴰ ⴷ ⴰⵡⵎⴰⵜⴻⵏ. 9 ⵡⴰⵔ ⵜⵜⴻⵊⵊⵉⵎ ⴰⴷ ⴰⵡⴻⵎ ⵍⴰⵖⴰⵏ ⴷⵉ ⵜⴻⵎⵎⵓⵔⵜ ‘ⴰ ⴱⴰⴱⴰ!’, ⵎⵉⵏⵣⵉ ⴱⴰⴱⴰⵜⵡⴻⵎ ⵉ ⵉⴵⴰⵏ ⴷⴻⴳ ⵉⵊⴻⵏⵡⴰⵏ ⴷ ⵉⵊⵊⴻⵏ. [h] 10 ⵡⴰⵔ ⵜⵜⴻⵊⵊⵉⵎ ⴰⴷ ⴰⵡⴻⵎ ⵍⴰⵖⴰⵏ ‘ⵉⵎⴳⴻⵡⵡⴰⴷⴻⵏ’, ⵎⵉⵏⵣⵉ ⵉⵊⵊⴻⵏ ⴷ ⵡⴻⵏⵏⵉ ⴷ ⴰⵎⴳⴻⵡⵡⴰⴷ ⵏⵡⴻⵎ, ⴰⵇⴰ-ⵜ ⴷ ⵍⵎⴰⵙⵉⵃ. 11 ⵎⴰⵛⴰ ⴰⵎⴻⵇⵇⵔⴰⵏ ⵏⵡⴻⵎ ⴰⴷ ⵢⵉⵍⵉ ⴷ ⴰⵎⵙⴻⵅⵅⴰⵔ ⵏⵡⴻⵎ. [i] 12 ⵡⴻⵏⵏⵉ ⵉ ⵖⴰ ⵉⵙⵙⵓⵄⵍⴰⵏ ⵉⵅⴻⴼ ⵏⵏⴻⵙ, ⴰⴷ ⵉⵜⵜⵡⴰⵙⵙⴻⵎⵥⵉ, ⵓ ⵡⴻⵏⵏⵉ ⵉ ⵖⴰ ⵉⵙⵙⵎⴻⵥⵢⴻⵏ ⵉⵅⴻⴼ ⵏⵏⴻⵙ, ⴰⴷ ⵉⵜⵜⵡⴰⵙⵙⵓⵄⵍⴰ.” [j]

13 “ⵓⵛⵜ ⵅⴰⵡⴻⵎ, ⴰ ⴽⴻⵏⵏⵉⵡ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⴷ ⵉⴼⴰⵔⵉⵙⵉⵢⵢⴻⵏ, ⴽⴻⵏⵏⵉⵡ, ⴰ ⵉⵎⵏⴰⴼⵇⴻⵏ, ⴽⴻⵏⵏⵉⵡ ⵜᵉⵜⵜⴻⵜⵜⴻⵎ ⵜⵓⴷⵔⵉⵏ ⵏ ⵜⵉⵊⵊⴰⵍ ⴰⵎ ⵜᵉⵜⵜⴰⵔⴻⵎ ⵜⵉⵡⵀⵉⴱⵉⵏ ⴷⵉ ⵟⵟⵡⴻⵄ ⵏ ⵜⵥⴰⴵⴰⵜⵉⵏ ⵏⵡⴻⵎ ⵜⵉⵣⵉⵔⴰⵔⵉⵏ. ⵙ ⵓⵢⴻⵏⵏⵉ ⴰⴷ ⵜⴻⴽⵙⵉⵎ ⵍⵃⵓⴽⵎ ⴷ ⴰⵎⴻⵇⵇⵔⴰⵏ. [k]

14 ⵓⵛⵜ ⵅⴰⵡⴻⵎ, ⴰ ⴽⴻⵏⵏⵉⵡ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⴷ ⵉⴼⴰⵔⵉⵙⵉⵢⵢⴻⵏ, ⴽⴻⵏⵏⵉⵡ, ⴰ ⵉⵎⵏⴰⴼⵇⴻⵏ, ⴽⴻⵏⵏⵉⵡ ⵜᵉⵜⵜⴱⴻⵍⵍⵄⴻⵎ ⵜⴰⴳⴻⵍⴷⵉⵜ ⵏ ⵉⵊⴻⵏⵡⴰⵏ ⵉ ⵉⵡⴷⴰⵏ, ⵎⵉⵏⵣⵉ ⴽⴻⵏⵏⵉⵡ ⵙⵉⵎⴰⵏⵜ ⵏⵡⴻⵎ ⵡⴰⵔ ⵜⵜ ⵜᵉⵜⵜⵉⴷⴼⴻⵎ, ⵓⵛⴰ ⵉⵏⵏⵉ ⵢⴰⵔⴻⵣⵣⵓⵏ ⴰⴷ ⴷⴷ-ⴰⴷⴼⴻⵏ, ⵡⴰⵔ ⵜⴻⵏ ⵜᵉⵜⵜⴻⵊⵊⵉⵎ ⴰⴷ ⴷⴷ-ⴰⴷⴼⴻⵏ. [l]

15 ⵓⵛⵜ ⵅⴰⵡⴻⵎ, ⴰ ⴽⴻⵏⵏⵉⵡ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⴷ ⵉⴼⴰⵔⵉⵙⵉⵢⵢⴻⵏ, ⴽⴻⵏⵏⵉⵡ, ⴰ ⵉⵎⵏⴰⴼⵇⴻⵏ, ⴽⴻⵏⵏⵉⵡ ⵜⴻⴽⴽⴻⵎ ⵅ ⵍⴱⴰⵔⵔ ⵓ ⵅ ⵍⴻⴱⵃⴰⵔ, ⵃⵉⵎⴰ ⴰⴷ ⴷⴷ-ⵜⴰⵔⵔⴻⵎ ⵉⵊⵊⴻⵏ ⴷ ⴰⵎⵄⴰⵛⴰⵔ ⵏ ⴷⴷⵉⵏ ⵏ ⵡⵓⴷⴰⵢⴻⵏ, ⵓ ⵅⵎⵉ ⵉ ⴽⵉⴷⵡⴻⵎ ⵖⴰ ⵢⵉⵍⵉ, ⵜᵉⵜⵜⴰⵔⵔⴰⵎ ⵜ ⴷ ⵎⵎⵉⵙ ⵏ ⵊᵉⵀⴻⵏⵏⴰⵎⴰ ⴷ ⴰⵄⴻⴼⴼⴰⵏ ⵎⴰⵀⵓ ⵅ ⴽⴻⵏⵏⵉⵡ ⵜⵏⴰⵢⴻⵏ ⵏ ⵜⵙⴻⵇⵇⴰⵔ.

16 ⵓⵛⵜ ⵅⴰⵡⴻⵎ, ⴰ ⴽⴻⵏⵏⵉⵡ ⵉⵎⴳⴻⵡⵡⴰⴷⴻⵏ ⵉⴷⴰⵔⵖⴰⵍⴻⵏ, ⵉⵏⵏⵉ ⵉⵇⵇⴰⵔⴻⵏ: ‘ⵡⴻⵏⵏⵉ ⵉⵊⵊⵓⴵⴻⵏ ⵖⴰⵔ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⴰⵇⴰ ⵜⴰⵊⴰⴵⵉⵜ ⵏⵏⴻⵙ ⵡⴰⵔ ⵜⴻⵙⵙⴻⴽⴽⵡⵉ ⵡⴰⵍⵓ, ⵎⴰⵛⴰ ⵡⴻⵏⵏⵉ ⵉ ⵖⴰ ⵉⵊⵊⵓⴵⴻⵏ ⵙ ⵡⵓⵔⴻⵖ ⵉ ⵉⴵⴰⵏ ⴷⵉ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⴰⵇⴰ ⵏⴻⵜⵜⴰ ⵉⵇⵇⴻⵏ ⵖⴰⵔ ⵉⵍⴻⵙ ⵏⵏⴻⵙ.’ 17 ⴰ ⵉⴼⵖⴰⵍ, ⴰ ⵉⴷⴰⵔⵖⴰⵍⴻⵏ, ⵎⵉⵏ ⵉⵙⴻⴽⴽⵡⴰⵏ ⴽⵜⴰⵔ, ⵓⵔⴻⵖ ⵏⵉⵖ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵜⴻⵏⵏⵉ ⵜⴻⵙⵙⵇⴻⴷⴷⴻⵙ ⵓⵔⴻⵖ? 18 ⵓⵛⴰ ⴰⵎⵎⵓ ⵉ ⵜⴻⵇⵇⴰⵔⴻⵎ ⵄⴰⵡⴻⴷ: ‘ⵡⴻⵏⵏⵉ ⵉⵊⵊⵓⴵⴻⵏ ⵖⴰⵔ ⵓⵄⴰⵍⵟⴰⵔ, ⴰⵇⴰ ⵜⴰⵊⴰⴵⵉⵜ ⵏⵏⴻⵙ ⵡⴰⵔ ⵜⵙⴻⴽⴽⵡⵉ ⵡⴰⵍⵓ, ⵎⴰⵛⴰ ⵡⴻⵏⵏⵉ ⵉ ⵖⴰ ⵉⵊⵊⵓⴵⴻⵏ ⵙ ⵜⵎⴻⵡⵛⵉ ⵉ ⵅⴰⵙ ⵉⵎⵎⴰⵔⵙⴻⵏ, ⴰⵇⴰ ⵏⴻⵜⵜⴰ ⵉⵇⵇⴻⵏ ⵖⴰⵔ ⵉⵍⴻⵙ ⵏⵏⴻⵙ.’ 19 ⴰ ⵉⴼⵖⴰⵍ, ⴰ ⵉⴷⴰⵔⵖⴰⵍⴻⵏ, ⵎⵉⵏ ⵉⵙⴻⴽⴽⵡⴰⵏ ⴽⵜⴰⵔ, ⵜⴰⵎⴻⵡⵛⵉ ⵏⵉⵖ ⴰⵄⴰⵍⵟⴰⵔ ⵡⴻⵏⵏⵉ ⵉⵙⵙⵇⴻⴷⴷⴻⵙ ⵜⴰⵎⴻⵡⵛⵉ? 20 ⵙ ⵓⵢⴰ ⵡⵉ ⵖⴰ ⵉⵊⵊⴰⴵⴻⵏ ⵅⴻⵏⵏⵉ ⵖⴰⵔ ⵓⵄⴰⵍⵟⴰⵔ, ⴰⵇⴰ ⵉⵊⵊⵓⴵ ⵖⴰⵔ ⵓⵄⴰⵍⵟⴰⵔ ⵓ ⵖⴰⵔ ⵎⴰⵔⵔⴰ ⵎⵉⵏ ⵅⴰⵙ ⵉⴵⴰⵏ. 21 ⵓ ⵡⵉ ⵖⴰ ⵉⵊⵊⴰⴵⴻⵏ ⵖⴰⵔ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵉⵊⵊⵓⴵ ⵖⴰⵔⴻⵙ ⵓ ⵖⴰⵔ ⵡⴻⵏⵏⵉ ⴷⴰⵢⴻⵙ ⵉⵣⴻⴷⴷⵖⴻⵏ. [m] 22 ⵓ ⵡⵉ ⵖⴰ ⵉⵊⵊⴰⴵⴻⵏ ⵖⴰⵔ ⵓⵊⴻⵏⵏⴰ, ⴰⵇⴰ ⵉⵊⵊⵓⴵ ⵖⴰⵔ ⵍⵄⴰⵔⵛ ⵏ ⴰⵔⴻⴱⴱⵉ ⴷ ⵡⴻⵏⵏⵉ ⵅⴰⵙ ⵉⵇⵇⵉⵎⴻⵏ. [n]

23 ⵓⵛⵜ ⵅⴰⵡⴻⵎ, ⴰ ⴽⴻⵏⵏⵉⵡ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⴷ ⵉⴼⴰⵔⵉⵙⵉⵢⵢⴻⵏ, ⴽⴻⵏⵏⵉⵡ, ⴰ ⵉⵎⵏⴰⴼⵇⴻⵏ, ⵎⵉⵏⵣⵉ ⴽⴻⵏⵏⵉⵡ ⵜᵉⵜⵜⵉⵛⴻⵎ ⵜⴰⵄⵛⴰⵔⵜ ⵏ ⵏⵏⴻⵄⵏⴰⵄ ⴷ ⵙⵙⴰⵏⵓⴵ ⴷ ⵍⵛⴻⵎⵎⵓⵎ, ⵎⴰⵛⴰ ⵡⴰⵔ ⴷ ⴰⵡⴻⵎ ⵉⵛⵇⵉ ⵎⵉⵏ ⵉⴵⴰⵏ ⴷ ⴰⵎⴻⵇⵇⵔⴰⵏ ⴷⵉ ⵛⵛⴰⵔⵉⵄⴰ, ⴰⵇⴰ ⵍⵃⵓⴽⵎ ⴷ ⴰⵔⵔⴻⵃⵎⴻⵜ ⴷ ⵍ’ⵉⵎⴰⵏ. ⵉⵏⴰ ⵉ ⵉⵜⵜⵅⴻⵚⵚⴰ ⴰⴷ ⵜⴻⴳⴳⴻⵎ, ⵡⴰⵔ ⴷⴰⵢⵙⴻⵏ ⵜⵙⴻⵎⵎⵃⴻⵎ. [o] 24 ⴰ ⵉⵎⴳⴻⵡⵡⴰⴷⴻⵏ ⵉⴷⴰⵔⵖⴰⵍⴻⵏ ⵉⵏⵏⵉ ⵉⴼⴰⵔⵔⵏⴻⵏ ⵜⵉⵣⵉⵜ, ⵎⴰⵛⴰ ⵜⴻⵙⵙⵖⴻⴵⴰⵢⴻⵎ ⴰⵍⵖⴻⵎ.

25 ⵓⵛⵜ ⵅⴰⵡⴻⵎ, ⴰ ⴽⴻⵏⵏⵉⵡ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⴷ ⵉⴼⴰⵔⵉⵙⵉⵢⵢⴻⵏ, ⴽⴻⵏⵏⵉⵡ, ⴰ ⵉⵎⵏⴰⴼⵇⴻⵏ, ⵎⵉⵏⵣⵉ ⵜⴻⵙⵙⵉⵣⴷⴰⴳⴻⵎ ⴱⴰⵔⵔⴰ ⵏ ⵍⴽⴰⵙ ⴷ ⵟⵟⴻⴱⵚⵉ, ⵎⴰⵛⴰ ⵖⴰⵔ ⴷⴰⵅⴻⵍ ⴰⵇⴰ ⵛⵛⵓⵔⴻⵏ ⵙ ⵜⴽⴻⵛⵛⴰⴹⵜ ⴷ ⵎⵉⵏ ⵡⴰⵔ ⵉⵙⴻⴳⴳⴷⴻⵏ. [p] 26 ⴰ ⵉⴼⴰⵔⵉⵙⵉⵢⵢⴻⵏ ⵉⴷⴰⵔⵖⴰⵍⴻⵏ, ⵙⵉⵣⴷⴻⴳⴻⵎ ⴰⵎⴻⵣⵡⴰⵔ ⴷⴰⵅⴻⵍ ⵏ ⵍⴽⴰⵙ ⴷ ⵟⵟⴻⴱⵚⵉ, ⵎⴰⵃⴻⵏⴷ ⴰⴷ ⵢⵉⵍⵉ ⵉⵣⴷⵉⴳ ⵓⵍⴰ ⵎⵉⵏ ⵉⴵⴰⵏ ⵖⴰⵔ ⴱⴰⵔⵔⴰ ⵏⵙⴻⵏ. [q]

27 ⵓⵛⵜ ⵅⴰⵡⴻⵎ, ⴰ ⴽⴻⵏⵏⵉⵡ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⴷ ⵉⴼⴰⵔⵉⵙⵉⵢⵢⴻⵏ, ⴽⴻⵏⵏⵉⵡ, ⴰ ⵉⵎⵏⴰⴼⵇⴻⵏ, ⵎⵉⵏⵣⵉ ⵜⴻⴳⴳⵉⵎ ⴰⵎ ⵢⵉⵎⴻⴹⵍⴰⵏ ⵉⵏⵏⵉ ⵉⵜⵜⵡⴰⵊⵉⵢⵢⴰⵔⴻⵏ, ⵜⵜⴱⴰⵏⴻⵏ ⴷ ⵉⵚⴻⴱⵃⴰⵏⴻⵏ ⵖⴰⵔ ⴱⴰⵔⵔⴰ, ⵎⴰⵛⴰ ⵖⴰⵔ ⴷⴰⵅⴻⵍ ⴰⵇⴰ ⵛⵛⵓⵔⴻⵏ ⵙ ⵉⵖⵙⴰⵏ ⵏ ⵍⵅⴻⵛⴱⴰⵜ ⵓ ⵙ ⵎⴰⵔⵔⴰ ⵍⴻⵅⵎⴻⵊ. [r] 28 ⴰⵎⴻⵏⵏⵉ ⴽⴻⵏⵏⵉⵡ ⵄⴰⵡⴻⴷ, ⴰⵇⴰ ⵜⴻⴹⵀⴰⵔⴻⵎ ⴷ ⵉⵎⵙⴻⴳⴳⴰⴷⴻⵏ ⵇⵉⴱⴰⵍⵜ ⵉ ⵉⵡⴷⴰⵏ, ⵎⴰⵛⴰ ⵖⴰⵔ ⴷⴰⵅⴻⵍ ⴰⵇⴰ ⵜⴻⵛⵛⵓⵔⴻⵎ ⵙ ⵍⵎⵓⵄⵚⵉⵢⵢⴻⵜ ⵓ ⵙ ⵏⵏⵉⴼⴰⵇ.

29 ⵓⵛⵜ ⵅⴰⵡⴻⵎ, ⴰ ⴽⴻⵏⵏⵉⵡ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⴷ ⵉⴼⴰⵔⵉⵙⵉⵢⵢⴻⵏ, ⴽⴻⵏⵏⵉⵡ, ⴰ ⵉⵎⵏⴰⴼⵇⴻⵏ, ⵎⵉⵏⵣⵉ ⵜⴱⴻⵏⵏⴰⵎ ⵉⵎⴻⴹⵍⴰⵏ ⵏ ⵉⵏⴰⴱⵉⵢⵢⴻⵏ ⵓ ⵜⵣⴻⵡⵡⵇⴻⵎ ⵍⵇⵓⴱⴱⴰⵜ ⵏ ⵉⵎⴻⴹⵍⴰⵏ ⵏ ⵉⵎⵙⴻⴳⴳⴰⴷⴻⵏ, [s] 30 ⵜⴻⵇⵇⴰⵔⴻⵎ: ‘ⵎⵍⵉ ⵜⵓⵖⴰ ⵏⴻⴵⴰ ⴷⴻⴳ ⵡⵓⵙⵙⴰⵏ ⵏ ⵍⴻⵊⴷⵓⴷ ⵏⵏⴻⵖ, ⴰⴷ ⵢⵉⵍⵉ ⵡⴰⵔ ⵏⵛⴰⵔⵔⴻⵛ ⴷⴻⴳ ⵓⵙⵉⵣⵣⴻⵍ ⵏ ⵉⴷⴰⵎⵎⴻⵏ ⵏ ⵉⵏⴰⴱⵉⵢⵢⴻⵏ.’ 31 ⵙ ⵓⵢⴰ ⵜⵛⴻⵀⵀⴷⴻⵎ ⵅ ⵢⵉⵅⴻⴼ ⵏⵡⴻⵎ ⴱⴻⵍⵍⵉ ⴽⴻⵏⵏⵉⵡ ⴷ ⵜⴰⵔⵡⴰ ⵏ ⵢⵉⵏⵏⵉ ⵉⵏⵖⵉⵏ ⵉⵏⴰⴱⵉⵢⵢⴻⵏ. [t] 32 ⵉⵡⴰ ⴽⴻⵎⵎⵍⴻⵎ ⴽⴻⵏⵏⵉⵡ ⵅⴻⵏⵏⵉ ⵓⵍⴰ ⵍⴻⵇⵢⴰⵙ ⵏ ⵎⵉⵏ ⴳⴳⵉⵏ ⵍⴻⵊⴷⵓⴷ ⵏⵡⴻⵎ! 33 ⴰ ⵉⵍⴻⴼⵙⴰⵡⴻⵏ, ⵜⴰⵔⵡⴰ ⵏ ⵉⴼⵉⵖⵔⴰⵏ, ⵎⴰⵎⵎⴻⵛ ⵖⴰ ⵜⴻⴳⴳⴻⵎ ⴰⴷ ⵜᵉⵜⵜⵡⴰⵙⵙⵏⴻⵊⵎⴻⵎ ⵣⵉ ⵍⵃⵓⴽⵎ ⵏ ⵜⵎⴻⵙⵙⵉ ⵏ ⵊᵉⵀⴻⵏⵏⴰⵎⴰ? [u] 34 ⵙ ⵓⵢⴻⵏⵏⵉ ⵅⵣⴰⵔⴻⵎ, ⵏⴻⵛⵛ ⴰⴷ ⵖⴰⵔⵡⴻⵎ ⴷⴷ-ⵙⵙⴻⴽⴽⴻⵖ ⵉⵏⴰⴱⵉⵢⵢⴻⵏ ⴷ ⵉⵎⵉⵖⵉⵙⴻⵏ ⴷ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ. ⵛⴰ ⵣⵣⴰⵢⵙⴻⵏ ⴰⴷ ⵜⴻⵏ ⵜⴻⵏⵖⴻⵎ, ⵛⴰ ⵣⵣⴰⵢⵙⴻⵏ ⴰⴷ ⵜⴻⵏ ⵜⵚⴻⵍⵍⴱⴻⵎ ⵓ ⵛⴰ ⵣⵣⴰⵢⵙⴻⵏ ⴰⴷ ⵜⴻⵏ ⵜⵀⴻⵜⵜⴽⴻⵎ ⵙ ⵓⵔⴻⴽⴽⵓⴹ ⴷⵉ ⵜⴻⵎⵣⵉⴷⴰⵡⵉⵏ ⵏⵡⴻⵎ ⵓⵛⴰ ⴰⴷ ⵅⴰⵙⴻⵏ ⵜⴰⵥⵥⵍⴻⵎ ⵣⵉ ⵜⴻⵏⴷⵉⵏⵜ ⵖⴰⵔ ⵜⴻⵏⴷⵉⵏⵜ ⵏⵏⴻⵖⵏⵉ, [v] 35 ⴰⵍⴰⵎⵉ ⴰⴷ ⵅⴰⵡⴻⵎ ⵉⵍⵉⵏ ⵎⴰⵔⵔⴰ ⵉⴷⴰⵎⵎⴻⵏ ⵉⵙⴻⴳⴳⴷⴻⵏ ⵉ ⵉⵙⵙⵉⵣⵣⵍⴻⵏ ⵅ ⵜⴻⵎⵎⵓⵔⵜ, ⵣⴻⴳ ⵉⴷⴰⵎⵎⴻⵏ ⵏ ⵀⴰⴱⵉⵍ ⴰⵎⵙⴻⴳⴳⴰⴷ ⴰⵍ ⵉⴷⴰⵎⵎⴻⵏ ⵏ ⵣⴰⴽⴰⵔⵉⵢⵢⴰ, ⵎⵎⵉⵙ ⵏ ⴱⵉⵔⵉⵅⵢⴰ, ⵉ ⵜⴻⵏⵖⵉⵎ ⵊⴰⵔ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⴷ ⵓⵄⴰⵍⵟⴰⵔ. [w] 36 ⵙ ⵜⵉⴷⴻⵜⵜ, ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ: ⵎⴰⵔⵔⴰ ⵜⵉⵎⴻⵙⵍⴰⵢⵉⵏ-ⴰ ⴰⴷ ⴷⴷ-ⴰⵙⴻⵏⵜ ⵅ ⵊⵊⵉⵍ-ⴰ.”

37 “ⴰ ⵓⵔⵛⴰⵍⵉⵎ, ⴰ ⵓⵔⵛⴰⵍⵉⵎ, ⵛⴻⵎ ⵉ ⵉⵏⴻⵇⵇⴻⵏ ⵉⵏⴰⴱⵉⵢⵢⴻⵏ ⵓ ⵢⴰⵔⴻⵊⵊⵎⴻⵏ ⵉⵏⵏⵉ ⴷ ⴰⵎ ⴷⴷ-ⵉⵜⵜⵡⴰⵙⵙⴻⴽⴽⴻⵏ, ⵎⴻⵛⵃⴰⵍ ⵜⵓⵖⴰ ⵅⵙⴻⵖ ⴰⴷ ⵙⵙⵎⵓⵏⴻⵖ ⵜⴰⵔⵡⴰ ⵏⵏⴻⵎ ⴰⵎ ⵢⵉⵛⵜ ⵏ ⵜⵢⴰⵥⵉⴹⵜ ⵜⴻⴳⴳⴰ ⵉⴼⵉⴵⵓⵙⴻⵏ ⵏⵏⴻⵙ ⵙⴰⴷⵓ ⴰⴼⵔⵉⵡⴻⵏ ⵏⵏⴻⵙ, ⵎⴰⵛⴰ ⴽⴻⵏⵏⵉⵡ ⵜⵓⵖⴰ ⵡⴰⵔ ⵜᵉⵜⵜⴻⵅⵙⴻⵎ. [x] 38 ⵅⵣⴰⵔ, ⵜⴰⴷⴷⴰⵔⵜ ⵏⵡⴻⵎ ⴰⴷ ⵜᵉⵜⵜⵡⴰⵊⵊ ⵉ ⵛⴻⵎ ⴷ ⵍⵅⴰⵔⴱⴻⵜ, [y] 39 ⵎⵉⵏⵣⵉ ⵏⴻⵛⵛ ⴰⴷ ⴰⵡⴻⵎ ⵉⵏⵉⵖ: ⴽⴻⵏⵏⵉⵡ ⵡⴰⵔ ⴷ ⴰⵢⵉ ⵜⵥⴰⵔⵔⴻⵎ ⴰⵍ ⵖⴰ ⵜⵉⵏⵉⵎ: ‘ⵍⴱⴰⵔⴰⴽⴰ ⵉ ⵡⴻⵏⵏⵉ ⴷⴷ-ⵢⵓⵙⵉⵏ ⵙ ⵢⵉⵙⴻⵎ ⵏ ⵙⵉⴷⵉ.’ ” [z]  *