1 ⵅⴰⵙ ⵓⵛⴰ ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ:

2 ⵎⴰⵏⴰⵡⵢⴰ ⵙⵍⵉⵖ ⴰⵙ ⴰⵟⵟⴰⵙ,

ⴽⴻⵏⵏⵉⵡ ⵎⴰⵔⵔⴰ ⵉⴷⵡⴻⵎ

ⵜⴻⵙⵙⴱⴻⵟⵟⵍⴻⵎ ⴰⵢⵉ ⴰⴼⴻⵡⵡⴻⵊ. [a]

3 ⵎⴰ ⴰⴷ ⵇⴹⴰⵏ ⵡⴰⵡⴰⵍⴻⵏ ⵉⵅⵡⴰⵏ?

ⵏⵉⵖ ⵎⵉⵏ ⵛⴻⴽ ⵉⵄⴰⵔⵔⵏⴻⵏ ⵄⴰⴷ

ⴰⴷ ⴷⴷ-ⵜⴰⵔⵔⴻⴷ ⴰⵡⴰⵍ?

4 ⵓⵍⴰ ⴷ ⵏⴻⵛⵛ ⵣⴻⵎⵎⴰⵔⴻⵖ

ⴰⴷ ⵙⵙⵉⵡⵍⴻⵖ ⴰⵎ ⴽⴻⵏⵏⵉⵡ,

ⵎⴰⵍⴰ ⴰⵇⴰ ⴽⴻⵏⵏⵉⵡ ⴷⴻⴳ ⵡⴻⵎⵛⴰⵏ ⵉⵏⵓ.

ⵉⵍⵉ ⴰⴷ ⵎⵓⴷⴻⵖ ⴰⵡⴰⵍⴻⵏ ⵅⴰⵡⴻⵎ

ⵓ ⴰⴷ ⵅⴰⵡⴻⵎ ⵀⴻⵣⵣⴻⵖ ⴰⵣⴻⴵⵉⴼ ⵉⵏⵓ.

5 ⴰⴷ ⴽⴻⵏⵏⵉⵡ ⵙⵙⵎⴻⵃⴹⴻⵖ ⵙ ⵓⵇⴻⵎⵎⵓⵎ ⵉⵏⵓ

ⵓ ⴰⴼⴻⵡⵡⴻⵊ ⵏ ⵉⵢⴻⵏⵛⵉⵛⴻⵏ ⵉⵏⵓ

ⴰⴷ ⴰⵡⴻⵎ ⵢⴰⵡⵉ ⵍⴻⴼⵙⴰⵙⴻⵜ.

6 ⵎⴰⵍⴰ ⵙⵙⵉⵡⵍⴻⵖ, ⵡⴰⵔ ⵅⴰⴼⵉ ⵉⵜⵜⴻⵊⵊⵉ ⵍⴻⵃⵍⵉⵇ ⵉⵏⵓ

ⵓ ⵎⴰⵍⴰ ⵙⵙⴻⵖⴷⴻⵖ, ⵎⴰ ⴰⴷ ⵅⴰⴼⵉ ⵉⵃⴻⵢⵢⴻⴷ?

7 ⵍⴻⵅⵅⵓ ⵉⵙⵙⵉⵃⴻⵍ ⴰⵢⵉ ⵏⴻⵜⵜⴰ,

ⵜⴻⵙⵙⴰⵔⵊⴼⴻⴷ ⵛⴻⴽ ⵎⴰⵔⵔⴰ ⵜⴰⵡⴰⵛⵓⵏⵜ ⵉⵏⵓ.

8 ⵛⴻⴽ ⵜⴻⵙⵙⴷⵓⵔⵓⵢⴻⴷ ⴰⵢⵉ ⵙ ⵜⴻⵇⵛⵓⵔⵜ ⵏ ⵜⴻⵍⵎⴻⵛⵜ,

ⵜⴻⵏⵏⵉ ⴷ ⵜⴰⵛⴻⵀⵀⴰⴷⵜ ⵅⴰⴼⵉ,

ⵓⵛⴰ ⵜⴻⴽⴽⴰⵔ ⵅⴰⴼⵉ ⴰⵔⵔⵉⵎⴻⵜ ⵉⵏⵓ ⵜⴰⵎⵓⵙⵔⵉⵡⵜ,

ⵜᵉⵜⵜⵛⴻⵜⵛⴰ ⵣⵣⴰⵢⵉ ⴷⴻⴳ ⵓⵖⴻⵎⴱⵓⴱ ⵉⵏⵓ.

9 ⴰⵖⴹⴰⴱ ⵏⵏⴻⵙ ⵉⵎⴻⵣⵣⴻⵇ, ⵉⴹⴻⴼⴼⴰⵔ ⴰⵢⵉ-ⴷⴷ.

ⵏⴻⵜⵜⴰ ⵉⵜⵜⵖⴻⵣⵣⴰ ⵖⴰⵔⵉ ⵜⵉⵖⵎⴰⵙ.

ⴰⵖⵔⵉⵎ ⵉⵏⵓ ⵉⵙⵙⵇⴻⵟⵟⴰⵄ-ⴷⴷ ⵖⴰⵔⵉ ⵜⵉⵟⵟⴰⵡⵉⵏ. [b]

10 ⵏⵉⵜⵏⵉ ⵜⵜⵛⴰⵔⵔⴰⴳⴻⵏ ⴰⵇⴻⵎⵎⵓⵎ ⵏⵙⴻⵏ ⵅⴰⴼⵉ,

ⵛⵛⴰⵜⴻⵏ ⴰⵢⵉ ⵙ ⵍⵃⴻⴳⵔⴰ ⵖⴰⵔ ⵓⵇⴰⴱⵙⵉ,

ⵜⵜⴻⴽⴽⴰⵔⴻⵏ ⵅⴰⴼⵉ ⵜⵜⵎⵓⵏⴻⵏ.

11 ⵉⵙⴻⵍⵍⴻⵎ ⴰⵢⵉ ⴰⵔⴻⴱⴱⵉ

ⵉ ⵢⵉⵊⵊ ⵏ ⵎⵎⵉⵙ ⵏ ⵍⵎⵓⵄⵚⵉⵢⵢⴻⵜ,

ⵉⵄⴰⵔⵔⴻⵏ ⴰⵢⵉ ⴷⴻⴳ ⵓⴼⵓⵙ ⵏ ⵉⵄⴻⴼⴼⴰⵏⴻⵏ.

12 ⵜⵓⵖⴰ ⴰⵢⵉ ⴷⵉ ⵍⵀⵓⴷⵏⴻⵜ,

ⵎⴰⵛⴰ ⵏⴻⵜⵜⴰ ⵢⴰⵔⵥⴰ ⴰⵢⵉ,

ⵉⵛⴻⴱⴱⴰⵔ ⴰⵢⵉ ⴷⴻⴳ ⵉⵊⵉⵎⴰⵏ, ⵉⵍⴱⴻⵣ ⴰⵢⵉ.

ⵉⵙⵙⴱⴻⴷⴷ ⴰⵢⵉ ⴷ ⵜⴰⵃⵊⵓⵔⵜ ⵉ ⵢⵉⵅⴻⴼ ⵏⵏⴻⵙ. [c]

13 ⵉⵎⵊⴻⴱⴱⴰⴷⴻⵏ ⵏⵏⴻⵙ ⵏ ⵍⵇⴻⵡⵙ ⵏⵏⴹⴻⵏ ⴰⵢⵉ-ⴷⴷ,

ⵏⴻⵜⵜⴰ ⵉⵙⵙⵏⵓⵇⵇⵓⴱ ⴰⵢⵉ ⵜⵉⵥⵥⴰⵍ ⴱⵍⴰ ⴰⵀⴰⵡⴻⵍ,

ⵉⵜⵜⵣⴻⴵⴰⵄ ⵖⴰⵔ ⵜⴻⵎⵎⵓⵔⵜ ⵉⵥⵉ ⵉⵏⵓ, [d]

14 ⵢⴰⵔⴻⵥⵥⴰ ⴰⵢⵉ ⵜⴰⵔⴻⵥⵥⵉⵜ

ⴰⵡⴰⵔⵏⵉ ⵉ ⵜⵔⴻⵥⵥⵉⵜ ⵏⵏⴻⵖⵏⵉ,

ⵉⵄⵔⴻⴼ-ⴷⴷ ⵅⴰⴼⵉ ⴰⵎ ⴱⵓ-ⵜⴻⵖⵔⵓⴹⵜ.

15 ⵅⴻⵢⵢⴹⴻⵖ ⵜⴰⵅⴰⵏⵛⴻⵜ ⵏ ⵡⴻⵛⴹⴰⵏ

ⵉ ⵜⴻⵍⵎⴻⵛⵜ ⵉⵏⵓ,

ⵉⵛⵛ ⵉⵏⵓ ⵙⵙⵡⴻⵙⵙⵅⴻⵖ ⴷⵉ ⵜⵄⴻⵊⵊⴰⵛⵜ. [e]

16 ⴰⵖⴻⵎⴱⵓⴱ ⵉⵏⵓ ⵉⵣⵡⴻⵖ ⵣⴻⴳ ⵉⵎⴻⵟⵟⴰⵡⴻⵏ,

ⵜⵉⵍⵉ ⵏ ⵍⵎⴻⵡⵜ ⴰⵇⴰ-ⵜⵜ ⵅ ⵡⴰⴱⵍⵉⵡⴻⵏ ⵉⵏⵓ,

17 ⵡⴰⵅⵅⴰ ⵡⴰⵔ ⵢⴰⵔⵙⵉ ⵍⵄⵓⵏⴼ ⵅ ⵉⴼⴰⵙⵙⴻⵏ ⵉⵏⵓ

ⵓ ⵜⴰⵥⴰⴵⵉⵜ ⵉⵏⵓ ⵜⴻⵚⴼⴰ.

18 ⵓⵀ ⵜⴰⵎⵎⵓⵔⵜ, ⵡⴰⵔ ⴷⴷⴰⵍ ⵉⴷⴰⵎⵎⴻⵏ ⵉⵏⵓ,

ⵡⴰⵔ ⵜⵜⴻⵊⵊⵉ ⵉⵖⵓⵢⵢⴰⵏ ⵉⵏⵓ

ⴰⴷ ⴰⴼⴻⵏ ⴰⵎⵛⴰⵏ ⵉ ⴰⵔⵔⴰⵃⴻⵜ!

19 ⵅⵣⴰⵔ, ⵓⵍⴰ ⴷ ⵍⴻⵅⵅⵓ,

ⴰⵛⴻⵀⵀⴰⴷ ⵉⵏⵓ ⴷⴻⴳ ⵓⵊⴻⵏⵏⴰ,

ⴰⵎⵛⴰⴼⴻⵄ ⵉⵏⵓ ⵅ ⵍⴻⴳⵄⵓⴷⵉ.

20 ⵉⵎⴻⴷⴷⵓⴽⴽⴰⵍ ⵉⵏⵓ ⴷ ⵢⵉⵏⵏⵉ ⵣⵣⴰⵢⵉ ⵉⵙⵜⵀⴻⵣⵣⴰⵏ,

ⵎⴰⵛⴰ ⵜᵉⵜⵜⵔⵓ ⵜⵉⵟⵟ ⵉⵏⵓ ⵖⴰⵔ ⴰⵔⴻⴱⴱⵉ.

21 ⴻⵊⵊ-ⵉ-ⵜ ⴰⴷ ⵉⵡⵡⴻⵜ ⴷⴷⴻⵄⵡⴻⵜ

ⵅ ⵡⴻⵔⵢⴰⵣ ⵖⴰⵔ ⴰⵔⴻⴱⴱⵉ,

ⴰⵎ ⵉⵊⵊ ⵏ ⵎⵎⵉⵙ ⵏ ⴱⵏⴰⴷⴻⵎ

ⵅ ⵓⵎⴻⴷⴷⵓⴽⴽⴻⵍ ⵏⵏⴻⵙ. [f]

22 ⵎⴰⵖⴰⵔ ⴷⵔⵓⵙ ⵏ ⵉⵙⴻⴳⴳⵯⵓⵙⴰ

ⵉ-ⴷⴷ ⵖⴰ ⵢⴰⵙⴻⵏ ⵄⴰⴷ,

ⵇⴱⴻⵍ ⵉ ⵖⴰ ⵓⵢⵓⵔⴻⵖ ⴰⴱⵔⵉⴷ

ⵡⴰⵔ ⵣⵣⴰⵢⴻⵙ ⵜⵜⵄⵉⵇⵇⵉⴱⴻⵖ.