1 ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ:

2 ⴷ ⵜⵉⴷⴻⵜⵜ, ⴽⴻⵏⵏⵉⵡ ⴷ ⵉⵊⵊ ⵏ ⴷⴷⴰⵔⴱ ⵏ ⵍⴳⴻⵏⵙ,

ⴰⵇⴰ ⵜⵉⵖⵉⵜ ⴰⴷ ⵜⴻⵎⵎⴻⵜ ⴰⴽⵉⴷⵡⴻⵎ!

3 ⵏⴻⵛⵛ ⵖⴰⵔⵉ ⵍⴻⵄⵇⴻⵍ ⴰⵎ ⴽⴻⵏⵏⵉⵡ,

ⵏⴻⵛⵛ ⵡⴰⵔ ⵡⴻⵟⵟⵉⵖ ⴷⴻⴳ ⵓⵎⵇⵓⴷⴷⵉ ⴰⴽⵉⴷⵡⴻⵎ.

ⵡⵉ ⵡⴰⵔ ⵉⵙⵙⵉⵏⴻⵏ ⵎⴰⵔⵔⴰ ⴰⵢⴰ?

4 ⵏⴻⵛⵛ ⴰⵎ ⵡⴻⵏⵏⵉ ⵉⴵⴰⵏ ⵉ ⵜⵙⴻⴹⵃⴰⵛ

ⵉ ⵓⵎⴻⴷⴷⵓⴽⴽⴻⵍ ⵏⵏⴻⵙ,

ⵏⴻⵛⵛ ⴷ ⵡⴻⵏⵏⵉ ⵜⵓⵖⴰ ⵉⵜⵜⵍⴰⵖⴰⵏ ⵖⴰⵔ ⴰⵔⴻⴱⴱⵉ

ⵓⵛⴰ ⵅⴻⵏⵏⵉ ⵏⴻⵜⵜⴰ ⵉⵙⵍⴰ ⵖⴰⵔⵉ,

ⵏⴻⵛⵛ ⴷ ⴰⵎⵙⴻⴳⴳⴻⴷ ⴷ ⵏⵉⵛⴰⵏ,

ⴰⵇⴰ ⴷⴻⵡⵍⴻⵖ ⴷ ⵍⵇⴻⵛⵄⴻⵜ ⵏ ⵜⵙⴻⴹⵃⴰⵛⵜ. [a]

5 ‘ⵍⵃⴻⴳⵔⴰ ⴷ ⵜⴰⵙⵖⴰⵔⵜ ⵏ ⵡⴻⵏⵏⵉ ⵉⵜⵜⵡⴰⵔⵥⴰⵏ!’,

ⴰⵎⵎⵓ ⵉ ⵉⵜⵜⵅⴰⵔⵔⴰⵚⴻⵏ ⵢⵉⵏⵏⵉ

ⵓⵎⵉ ⵉⵜⵜⵖⵉⵍ ⴰⵇⴰ ⴰⵜⴻⵏ ⴷⵉ ⵍⴰⵎⴰⵏ,

ⵉⵜⵜⵖⵉⵍ ⴰⵙⴻⵏ ⴰⵢⴰ ⵉⵜⵜⵔⴰⵊⴰ

ⵉⵏⵏⵉ ⵉⵜⵜⵏⴻⵇⵔⴰⴹⴻⵏ ⴷⴻⴳ ⵉⴹⴰⵔⴻⵏ ⵏⵙⴻⵏ.

6 ⵉⵇⵉⴹⴰⵏ ⵏ ⵉⵎⵜⴻⵃⵃⴰⵢⵢⴻⵏ ⴰⵔⵙⴰⵏ,

ⵓ ⵉⵏⵏⵉ ⵉⵙⴻⵄⵄⴰⵔⴻⵏ ⴰⵔⴻⴱⴱⵉ

ⵖⴰⵔⵙⴻⵏ ⴰⵟⵟⴰⵙ ⵏ ⵍⴰⵎⴰⵏ.

ⵎⴰⵛⴰ ⵡⵉ ⵉⵣⴻⵎⵎⴰⵔⴻⵏ

ⴰⴷ ⵢⴰⵡⵉ ⴰⵔⴻⴱⴱⵉ ⵙ ⵓⴼⵓⵙ ⵏⵏⴻⵙ? [b]

7 ⵙⴻⵇⵙⴰ ⵅⴻⵏⵏⵉ ⵍⵎⴰⵍ,

ⴰⴷ ⴰⵛ ⵜ ⵙⵙⵍⴻⵎⴷⴻⵏ,

ⵉⵊⴹⴰⴹ ⵏ ⵓⵊⴻⵏⵏⴰ ⴰⴷ ⵛⴻⴽ ⵜ ⵃⴰⵊⴰⵏ.

8 ⵏⵉⵖ ⵅⴻⵣⵣⴰⵔⴻⵖ ⵎⵍⵉⵃ ⵖⴰⵔ ⵜⴻⵎⵎⵓⵔⵜ,

ⵏⴻⵜⵜⴰⵜ ⴰⴷ ⵛⴻⴽ ⵜⴻⵙⵙⵖⴰⵔ,

ⵓⵍⴰ ⴷ ⵉⵙⴻⵍⵎⴰⵏ ⵏ ⵍⴻⴱⵃⴰⵔ

ⴰⴷ ⴰⵛ ⵜ ⵄⴰⵡⴷⴻⵏ.

9 ⵎⴰⵏ ⵡⴻⵏ ⵡⴰⵔ ⵉⵙⵙⵉⵏⴻⵏ ⵎⴰⵔⵔⴰ ⴰⵢⴰ,

ⴰⵇⴰ ⴰⴼⵓⵙ ⵏ ⵙⵉⴷⵉ ⵉ ⵜ ⵉⴳⴳⵉⵏ?

10 ⵏⴻⵜⵜⴰ ⴷ ⵡⴻⵏⵏⵉ ⴷⴻⴳ ⵓⴼⵓⵙ ⵏⵏⴻⵙ ⵉⴵⴰ

ⵍⴻⵄⵎⴰⵔ ⵏ ⵎⴰⵔⵔⴰ ⵎⵉⵏ ⵉⴷⴷⴰⵔⴻⵏ,

ⵓⵍⴰ ⴷ ⴱⵓⵃⴱⴻⵍ ⵏ ⴽⵓⵍ ⴰⵔⵔⵉⵎⴻⵜ ⵏ ⴱⵏⴰⴷⴻⵎ.

11 ⵎⴰ ⵡⴰⵔ ⵉⵜⵜⵇⴻⴵⵉⴱ ⵓⵎⴻⵣⵣⵓⵖ ⴰⵡⴰⵍⴻⵏ,

ⴰⵎ ⵉⵜⵜⵇⴰⵙⴰ ⵡⴰⵏⴻⵖ ⵎⴰⵛⵛⴰ? [c]

12 ⵖⴰⵔ ⵉⵡⴻⵙⵙⵓⵔⴰ ⵉ ⵜⴻⴵⴰ ⵜⵉⵖⵉⵜ

ⵓ ⴷⵉ ⵜⵓⴷⴰⵔⵜ ⵜⴰⵣⵉⵔⴰⵔⵜ ⵜⴻⴵⴰ ⵍⴻⴼⵀⴰⵎⴻⵜ?

13 ⵏⴻⵜⵜⴰ ⵖⴰⵔⴻⵙ ⵉ ⵜⴻⴵⴰ ⵜⵉⵖⵉⵜ ⴷ ⵊⵊⴻⵀⴷ ⵙ ⵜⵉⴷⴻⵜⵜ,

ⵏⴻⵜⵜⴰ ⵖⴰⵔⴻⵙ ⵉ ⵢⴻⴵⴰ

ⵛⵛⵡⴰⵔ ⴷ ⵍⴻⴼⵀⴰⵎⴻⵜ ⵏⵉⵛⴰⵏ.

14 ⵅⵣⴰⵔ, ⵎⴰⵍⴰ ⵏⴻⵜⵜⴰ ⵉⵀⴻⴷⴷⴻⵎ,

ⵡⴰⵔ ⵉⴱⴻⵏⵏⵉ ⵓⵍⴰ ⴷ ⵉⵊⵊ ⵄⴰⵡⴻⴷ,

ⵎⴰⵍⴰ ⵏⴻⵜⵜⴰ ⵉⴱⴻⵍⵍⴻⵄ ⵅ ⵛⴰ ⵏ ⵢⵉⵊⵊⴻⵏ,

ⵡⴰⵔ ⴷ ⴰⵙ ⵢⴰⵔⴻⵣⵣⴻⵎ ⵄⴰⴷ. [d]

15 ⵅⵣⴰⵔ, ⵎⴰⵍⴰ ⵏⴻⵜⵜⴰ ⵉⵙⵙⴱⴻⴷⴷ ⴰⵎⴰⵏ,

ⴰⴷ ⴰⵥⵖⴻⵏ ⵏⵉⵜⵏⵉ,

ⵎⴰⵍⴰ ⵢⴰⵔⵅⵓ ⴰⵙⴻⵏ,

ⴰⴷ ⵙⵙⴻⵏⵇⴻⵍⴱⴻⵏ ⵜⴰⵎⵎⵓⵔⵜ.

16 ⵏⴻⵜⵜⴰ ⵖⴰⵔⴻⵙ ⵊⵊⴻⵀⴷ ⴷ ⵓⴼⴻⴽⴽⵉ,

ⵏⵏⴻⵙ ⴷ ⵡⴻⵏⵏⵉ ⵉⵡⴻⴷⴷⴰⵔⴻⵏ

ⵓⵍⴰ ⴷ ⵡⴻⵏⵏⵉ ⵉⵙⵙⵡⴻⴷⴷⴰⵔⴻⵏ.

17 ⵏⴻⵜⵜⴰ ⵉⵜⵜⴻⵊⵊⴰ ⵉⵔⵢⴰⵣⴻⵏ ⵏ ⵛⵛⵡⴰⵔ

ⴳⴳⵓⵔⴻⵏ ⵙ ⵍⴻⵃⴼⴰ,

ⵍⵇⵓⴹⴰⵜ ⵉⵜⵜⴰⵔⵔⴰ ⵉ-ⵜⴻⵏ ⴷ ⵉⴱⵓⵀⴰⵍⵉⵢⵢⴻⵏ. [e]

18 ⴰⵣⵉⵢⵢⴰⵔ ⵏ ⵉⵊⴻⴵⵉⴷⴻⵏ ⵉⵙⵙⴱⴻⵟⵟⴻⵍ ⵉ-ⵜ

ⵓ ⵅⴻⵏⵏⵉ ⵏⴻⵜⵜⴰ ⵉⵜⵜⵛⴻⴷⴷⴰ ⵉ-ⵜⴻⵏ

ⵙ ⵉⵊⵊ ⵏ ⵡⴻⴱⵢⴰⵙ ⵣⵉ ⵜⴻⵊⵄⵉⵏⵏⴰ ⵏⵙⴻⵏ.

19 ⵏⴻⵜⵜⴰ ⵉⵏⴻⴷⴷⴻⵀ ⵉⴽⴻⵀⵀⴰⵏⴻⵏ ⵙ ⵍⴻⵃⴼⴰ,

ⴰⵢⵜ ⵏ ⵊⵊⴻⵀⴷ ⵉⵖⴻⵟⵟⴻⵔ ⵉ-ⵜⴻⵏ.

20 ⵉⵜⵜⴻⴽⴽⴻⵙ ⴰⵡⴰⵍ ⵉ ⵉⵔⵢⴰⵣⴻⵏ ⵉⵜⵜⵡⴰⵇⴻⴵⴱⴻⵏ,

ⵉ ⵉⵡⴻⵙⵙⵓⵔⴰ ⵉⵜⵜⴻⴽⴽⴻⵙ ⴰⵙⴻⵏ ⵍⴻⴼⵀⴰⵎⴻⵜ. [f]

21 ⴰⵙⴻⵃⵇⴰⵔ ⵉⵜⵜⵣⴻⴵⴰⵄ ⵉ-ⵜ ⵅ ⵜⴰⵔⵡⴰ ⵏ ⵜⴰⵚⵉⵍⴻⵜ,

ⵉ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ ⵉⵙⵙⴰⵔⴻⵅⵅⵓ ⴰⵙⴻⵏ ⴰⴱⵢⴰⵙ. [g]

22 ⵉⵎⵓⵛⴰⵏ ⵢⵓⴵⵖⴻⵏ ⵏ ⵜⴰⴵⴻⵙⵜ ⵉⵜⵜⵄⴰⵔⵔⴰ ⵅⴰⵙⴻⵏ,

ⴷ ⵜⵉⵍⵉ ⵏ ⵍⵎⴻⵡⵜ ⵉⵙⵙⵓⴼⴼⵓⵖ ⵉ-ⵜⵜ ⵖⴰⵔ ⵜⴼⴰⵡⵜ. [h]

23 ⵍⴻⴳⵏⵓⵙ ⵉⵙⵙⴻⵎⵖⴰⵔ ⵉ-ⵜⴻⵏ ⵓⵛⴰ ⵉⵖⴻⵟⵟⴻⵔ ⵉ-ⵜⴻⵏ,

ⵏⴻⵜⵜⴰ ⵉⵜⵜⴱⴻⵣⵣⴰⵄ ⵍⴻⴳⵏⵓⵙ ⵓⵛⴰ ⵉⵏⴻⴷⴷⴻⵃ ⵉ-ⵜⴻⵏ.[i]

24 ⵉⵜⵜⴻⴽⴽⴻⵙ ⵍⴻⴼⵀⴰⵎⴻⵜ

ⵉ ⵉⵣⴻⴵⵉⴼⴻⵏ ⵏ ⵍⴳⴻⵏⵙ ⵅ ⵜⴻⵎⵎⵓⵔⵜ,

ⵉⵊⵊⴰ ⵉ-ⵜⴻⵏ ⵜⵜᵉⵜⵍⵉⵄⴻⵏ ⴷⵉ ⵍⴻⵅⵍⴰ

ⵎⴰⵏⵉ ⵡⴰⵔ ⴵⵉⵏ ⵉⴱⵔⵉⴷⴻⵏ. [j]

25 ⵏⵉⵜⵏⵉ ⵜⵜⴻⵎⵀⴰⴼⴰⵏ ⴷⴰ ⴷ ⴷⵉⵀⴰ ⴷⵉ ⵜⴰⴵⴻⵙⵜ,

ⵎⴰⵏⵉ ⵡⴰⵔ ⵜⴻⴵⵉ ⵜⴼⴰⵡⵜ,

ⵏⴻⵜⵜⴰ ⵉⵜⵜⴻⵊⵊⴰ ⵉ-ⵜⴻⵏ

ⴰⴷ ⵎⵎⵀⴰⴼⴰⵏ ⴰⵎ ⵢⵉⵎⴻⵙⵛⴰⵔⴻⵏ.