ⵢⴰⵄⵇⵓⴱ 4

ⴰⵡⴰⴹⴻⵄ ⵣⵣⴰⵜ ⵉ ⴰⵔⴻⴱⴱⵉ

1 ⵎⴰⵏⵉⵙ ⴷⴷ-ⵉⴽⴽⴰ ⵓⵎⴻⵏⵖⵉ ⴷ ⵉⵎⵛⵓⴱⴱⴻⵛⴻⵏ ⵊⴰⵔ ⴰⵡⴻⵎ? ⵎⴰ ⵣⴻⵄⵎⴰ ⵣⴻⴳ ⵛⵛⴻⵀⵡⴰⵜ ⵉ ⵉⵎⵎⴻⵏⵖⴻⵏ ⴷⴻⴳ ⵉⵖⴻⵣⴷⵉⵙⴻⵏ ⵏⵡⴻⵎ? [a] 2 ⴽⴻⵏⵏⵉⵡ ⵜⴻⵎⵎⴻⵥⵔⴻⵎ ⵎⴰⵛⴰ ⴽⴻⵏⵏⵉⵡ ⵡⴰⵔ ⵖⴰⵔⵡⴻⵎ ⵡⴰⵍⵓ. ⴽⴻⵏⵏⵉⵡ ⵜⵏⴻⵇⵇⴻⵎ ⵓ ⵜᵉⵜⵜⴰⵙⵎⴻⵎ ⵓⵛⴰ ⵇⴰⵄ ⴰⵎⴻⵏⵏⵉ ⵡⴰⵔ ⴷⴷ ⴰⵡⴻⵎ ⵉⵜⵜⵉⴽⴽⵡⵉⴹ ⵡⴰⵍⵓ. ⴽⴻⵏⵏⵉⵡ ⵜᵉⵜⵜⴻⵎⵛⵓⴱⴱⵓⵛⴻⵎ ⵓ ⵜᵉⵜⵜⵎⴻⵏⵖⴰⵎ, ⵎⴰⵛⴰ ⵡⴰⵔ ⵖⴰⵔⵡⴻⵎ ⵡⴰⵍⵓ, ⵎⵉⵏⵣⵉ ⴽⴻⵏⵏⵉⵡ ⵡⴰⵔ ⵜᵉⵜⵜᵉⵜⵜⴰⵔⴰⵎ. 3 ⵏⵉⵖ ⴽⴻⵏⵏⵉⵡ ⵜᵉⵜⵜᵉⵜⵜⴰⵔⴰⵎ, ⵎⴰⵛⴰ ⵡⴰⵔ ⵜⴻⴽⵙⵉⵎ ⵛⴰ, ⵎⵉⵏⵣⵉ ⵜᵉⵜⵜᵉⵜⵜⴰⵔⴻⵎ ⵎⵉⵏ ⵡⴰⵔ ⵉⵃⵍⵉⵏ, ⵃⵉⵎⴰ ⴰⴷ ⵜⴻⴳⴳⴻⵎ ⵖⴰⵔ ⵛⵛⴻⵀⵡⴰⵜ ⵏⵡⴻⵎ. [b] 4 ⴰ ⴽⴻⵏⵏⵉⵡ ⵉⵏⵏⵉ ⵉⵣⴻⵏⵏⴰⵏ! ⵎⴰ ⵡⴰⵔ ⵜⴻⵙⵙⵉⵏⴻⵎ ⵛⴰ ⴱⴻⵍⵍⵉ ⵜⴰⵎⴻⵅⵙⵉⵡⵜ ⵏ ⴷⴷⵓⵏⴻⵛⵜ ⴰⵇⴰ-ⵜⵜ ⴷ ⵍⴻⵄⴷⴰⵡⴻⵜ ⵅ ⴰⵔⴻⴱⴱⵉ? ⴰⵃⴻⵇⵇⴰ ⵡⴻⵏⵏⵉ ⵉⵜⵜⴻⵅⵙⴻⵏ ⴰⴷ ⵢⵉⵍⵉ ⴷ ⴰⵎⴻⴷⴷⵓⴽⴽⴻⵍ ⵏ ⴷⴷⵓⵏⴻⵛⵜ, ⴰⴷ ⵢⵉⵍⵉ ⴷ ⵍⴻⵄⴷⵓ ⵏ ⴰⵔⴻⴱⴱⵉ. [c] 5 ⵏⵉⵖ ⵉⵜⵜⵖⵉⵍ ⴰⵡⴻⵎ ⴱⴻⵍⵍⵉ ⵜⵉⵔⴰ ⵉⵇⴻⴷⴷⵙⴻⵏ ⵡⴰⵔ ⵖⴰⵔⵙⴻⵏⵜ ⵍⵎⴻⵄⵏⴰ:

“ⴰⵔⵔⵓⵃ ⵉ ⴷⴰⵢⵏⴻⵖ ⵉⵣⴻⴷⴷⵖⴻⵏ

ⵉⵜⵜⴰⵙⴻⵎ ⵙ ⵜⵓⵙⵎⵉ!”? [d]

6 ⵎⴰⵛⴰ ⵙⵉⴷⵉⵜⵏⴻⵖ ⵉⵜⵜⵉⵛ ⴰⵏⴻⵖ ⴰⵔⴹⴰ ⴽⵜⴰⵔ, ⵎⴰⵖⴰⵔ ⵉⵏⵏⴰ:

“ⴰⵔⴻⴱⴱⵉ ⵉⵙⵙⵡⴰⴹⴹⴻⵄ ⵉⵎⵄⴻⴼⴼⴰⵔⴻⵏ,

ⵎⴰⵛⴰ ⵉ ⵉⵎⵡⴰⴹⵄⴻⵏ ⵉⵜⵜⵉⵛ ⴰⵙⴻⵏ ⴰⵔⴹⴰ.” [e]

7 ⵙ ⵓⵢⴰ ⵎⴰⵔⵙⴻⵎ ⵉⵅⴻⴼ ⵏⵡⴻⵎ ⵣⵣⴰⵜ ⵉ ⴰⵔⴻⴱⴱⵉ, ⵎⵄⴰⵍⴰⵎ ⴰⴽ-ⴷ ⵛⵛⵉⵟⴰⵏ ⵓⵛⴰ ⵏⴻⵜⵜⴰ ⴰⴷ ⵣⵣⴰⵢⵡⴻⵎ ⵢⴰⵔⵡⴻⵍ. [f] 8 ⴰⴷⵙⴻⵎ ⴰⵔⴻⴱⴱⵉ ⵓⵛⴰ ⵏⴻⵜⵜⴰ ⴰⴷ ⴽⴻⵏⵏⵉⵡ ⴷⴷ-ⵢⴰⴷⴻⵙ. ⵙⵉⵔⴷⴻⵎ ⵉⴼⴰⵙⵙⴻⵏ ⵏⵡⴻⵎ, ⴰ ⵉⵎⴻⴷⵏⴰⴱ, ⵇⴻⴷⴷⵙⴻⵎ ⵓⵍⴰⵡⴻⵏ ⵏⵡⴻⵎ, ⴰ ⴽⴻⵏⵏⵉⵡ, ⵉⵏⵏⵉ ⵖⴰⵔ ⵉⴵⴰ ⵜⵏⴰⵢⴻⵏ ⵏ ⵉⵣⴻⴵⵉⴼⴻⵏ. 9 ⵎⴰⵔⵙⴻⵎ ⵉⵅⴻⴼ ⵏⵡⴻⵎ, ⵛⴻⴹⵏⴻⵎ! ⵊⵊⴻⵎ ⵜⴰⴹⴻⵃⵃⴰⵛⵜ ⵏⵡⴻⵎ ⴰⴷ ⵜⴻⴷⵡⴻⵍ ⴷ ⴰⵛⴹⴰⵏ ⵓ ⵍⴻⴼⵔⴰⵃⴻⵜ ⵏⵡⴻⵎ ⴰⴷ ⵜⴻⴷⵡⴻⵍ ⴷ ⵍⴻⵃⵣⴻⵏ. [g] 10 ⵎⴰⵔⵙⴻⵎ ⵉⵅⴻⴼ ⵏⵡⴻⵎ ⵣⵣⴰⵜ ⵉ ⵙⵉⴷⵉ ⵓⵛⴰ ⵏⴻⵜⵜⴰ ⴰⴷ ⴽⴻⵏⵏⵉⵡ ⵉⵙⵙⵄⵓⴵ. [h]

11 ⴰ ⴰⵢⵜⵎⴰ, ⵡⴰⵔ ⵜⵜⵛⴻⵇⵇⴰⴼⴻⵎ ⵛⴰ ⴷⴻⴳ ⵡⴰⵢⴰⵡⵢⴰ! ⵡⴻⵏⵏⵉ ⵉⵛⴻⵇⵇⴰⴼⴻⵏ ⴷⴻⴳ ⵓⵎⴰⵙ ⵏⵉⵖ ⵉⵃⴻⴽⴽⴻⵎ ⵅ ⵓⵎⴰⵙ, ⴰⵇⴰ ⵡⴰ ⵉⵜⵜⵛⴻⵇⵇⴰⴼ ⴷⵉ ⵛⵛⴰⵔⵉⵄⴰ ⵓⵛⴰ ⵉⵃⴻⴽⴽⴻⵎ ⵅ ⵛⵛⴰⵔⵉⵄⴰ. ⵓⵛⴰ ⵎⴰⵍⴰ ⵜⵃⴻⴽⵎⴻⴷ ⵅ ⵛⵛⴰⵔⵉⵄⴰ, ⴰⵇⴰ ⵡⴰⵔ ⵜⴻⴵⵉⴷ ⵛⴰ ⴷ ⵡⴻⵏⵏⵉ ⵉⵜⵜⴻⴳⴳⴻⵏ ⵛⵛⴰⵔⵉⵄⴰ, ⵎⴰⵛⴰ ⵜⴰⵔⵔⵉⴷ ⵉⵅⴻⴼ ⵏⵏⴻⵛ ⴷ ⵍⵇⴰⴹⵉ ⵏ ⵛⵛⴰⵔⵉⵄⴰ. 12 ⵉⵊⵊⴻⵏ ⵡⴰⵀⴰ ⵉ ⵉⴵⴰⵏ ⴷ ⴱⴰⴱ ⵏ ⵛⵛⴰⵔⵉⵄⴰ, ⵏⴻⵜⵜⴰ ⴷ ⵡⴻⵏⵏⵉ ⵖⴰⵔ ⵜⴻⴵⴰ ⵜⵣⴻⵎⵎⴰⵔ, ⵃⵉⵎⴰ ⴰⴷ ⵉⵡⵛ ⵜⵓⴷⴰⵔⵜ ⵏⵉⵖ ⴰⴷ ⵜⵜ ⵢⴰⵔⴻⵢⵢⴻⴱ. ⵎⴰⵛⴰ ⵎⵉⵏ ⵜⴻⵄⵏⵉⴷ ⵛⴻⴽ ⵓⵎⵉ ⵜⵃⴻⴽⴽⵎⴻⴷ ⵅ ⵊⵊⴰⵔ ⵏⵡⴻⵎ?

13 ⵎⴰ ⵅⴻⵏⵏⵉ ⵉ ⵖⴰ ⵏⵉⵏⵉ ⵅ ⵢⵉⵏⵏⵉ ⵉⵇⵇⴰⵔⴻⵏ: “ⴰⵙⵙ-ⴰ ⵏⵉⵖ ⵜⵉⵡⴻⵛⵛⴰ ⴰⴷ ⵏⵔⴰⵃ ⵖⴰⵔ ⵜⴻⵏⴷⵉⵏⵜ-ⴰ ⵖⴰⵔ ⵜⴻⵏⴷⵉⵏⵜ-ⵉⵏ, ⴰⴷ ⴷⵉⵏ ⵏⴻⴳⴳ ⵜⴰⵙⴻⴱⴱⴰⴱⵜ ⵍⵎⵉⵊⴰⵍ ⵏ ⵉⵊⵊ ⵏ ⵓⵙⴻⴳⴳⵯⴰⵙ, ⴰⴷ ⵏⵙⴻⵖ ⴰⴷ ⵏⴻⵣⵣⴻⵏⵣ ⴰⴷ ⵏⴰⵔⴱⴻⵃ!”? [i] 14 ⵏⵉⵜⵏⵉ ⵡⴰⵔ ⵙⵙⵉⵏⴻⵏ ⵎⴰⵎⵎⴻⵛ ⵖⴰ ⵜⵉⵍⵉ ⵜⵉⵡⴻⵛⵛⴰ. ⵎⵉⵏ ⵜⴻⵄⵏⴰ ⵜⵓⴷⴰⵔⵜ ⵏⵏⴻⵖ? ⴰⵇⴰ-ⵜⵜ ⵎⵖⵉⵔ ⴷ ⵉⵊⵊ ⵏ ⵍⴻⴼⵡⴰⵔ ⵉ ⵖⴰ ⴷⴷ-ⵉⴹⵀⴰⵔ, ⴰⴷ ⵉⴷⵓⵔⵔⴻⵇ, ⴰⴷ ⵜⴻⴼⵙⵉ ⵍⴻⵅⴷⴻⵏⵏⵉ. [j] 15 ⵙ ⵓⵢⴰ ⵉⵜⵜⵅⴻⵚⵚⴰ ⴰⴷ ⵉⵏⵉⵏ: “ⵎⴰⵍⴰ ⵉⵅⵙ ⵙⵉⴷⵉ, ⴰⴷ ⵏⴻⴷⴷⴰⵔ, ⴰⴷ ⵏⴻⴳⴳ ⵜⴰ ⴷ ⵜⵉⵏ.” [k] 16 ⵉⵡⴰ ⵏⵉⵜⵏⵉ ⵜⵜⴼⴻⵢⵢⵛⴻⵏ ⴷⴻⴳ ⵓⵄⴻⴼⴼⴰⵔ ⵏⵙⴻⵏ, ⵎⴰⵛⴰ ⵇⴰⵄ ⴰⴼⴻⵢⵢⴻⵛ-ⴰ ⴷ ⴰⵄⴻⴼⴼⴰⵏ. 17 ⵡⴻⵏⵏⵉ ⵉⵙⵙⵏⴻⵏ ⵎⴰⵎⵎⴻⵛ ⵉ ⵖⴰ ⵉⴳⴳ ⵍⵅⴰⵔ ⵓⵛⴰ ⵡⴰⵔ ⵜ ⵉⵜⵜⴻⴳⴳ, ⴰⴷ ⴰⵙ ⴷⴷ-ⵉⵜⵜⵡⴰⵃⵙⴻⴱ ⴷ ⴷⴷⴻⵏⴱ. [l]

ⵢⴰⵄⵇⵓⴱ
a
- b 4:3 ⵎⵜ. 20:22; ⵔⵓⵎ. 8:26.
- c 4:4 ⵢⵃ. 15:9; ⴳⴰⵍ. 1:10; 1 ⵢⵃ. 2:15.
- d 4:5 ⵍⵅⵍ. 11:29.
- e 4:6 ⴰⵡⵍⵏ. 3:34; 1 ⴱⵟ. 5:5.
- f 4:7 ⴰⴼⴰ. 4:27; 1 ⴱⵟ. 5:9.
- g 4:9 ⵎⵜ. 5:4.
- h 4:10 ⴰⵢⵓⴱ 22:29; ⴰⵡⵍⵏ. 29:23; ⵎⵜ. 23:12; ⵍⴽ. 14:11; 18:14; 1 ⴱⵟ. 5:6.
- i 4:13 ⵍⴽ. 12:18.
- j 4:14 ⵉⵛⴰ. 40:6; 1 ⴽⵓⵔ. 7:31; ⵢⴰⵄ. 1:10; 1 ⴱⵟ. 1:24; 1 ⵢⵃ. 2:17.
- k 4:15 ⵍⴻⵅ. 18:21; 1 ⴽⵓⵔ. 4:19; ⵄⴱⵔ. 6:3.
- l 4:17 ⵍⴽ. 12:47.