ⵃⵓⵛⵉⵄⴰ
1
1 ⴰⵡⴰⵍ ⵏ ⵙⵉⴷⵉ ⵉ ⴷⴷ-ⵢⵓⵙⵉⵏ ⵖⴰⵔ ⵃⵓⵛⵉⵄⴰ, ⵎⵎⵉⵙ ⵏ ⴱⵉⵔⵉ, ⴷⴻⴳ ⵡⵓⵙⵙⴰⵏ ⵏ ⵄⵓⵣⵣⵉⵢⴰ, ⵢⵓⵜⴰⵎ, ⴰⵃⴰⵣ ⴷ ⵃⵉⵣⵇⵉⵢⴰ, ⵉⵊⴻⴵⵉⴷⴻⵏ ⵏ ⵢⴰⵀⵓⴷⴰ, ⵓ ⴷⴻⴳ ⵡⵓⵙⵙⴰⵏ ⵏ ⵢⴰⵔⵓⴱⵄⴰⵎ, ⵎⵎⵉⵙ ⵏ ⵢⵓⵡⴰⵛ, ⴰⵊⴻⴵⵉⴷ ⵏ ⵉⵙⵔⴰⵉⵍ. [a]
ⵃⵓⵛⵉⵄⴰ ⵢⴻⵊⵊ-ⴷⴷ ⵜⵍⴰⵜⴰ ⵏ ⵉⵃⴻⵏⵊⵉⵔⴻⵏ ⵖⴰⵔ ⵅⵓⵎⴰⵔ
2 ⴰⴱⴻⴷⴷⵓ ⵏ ⵡⴰⵡⴰⵍ ⵏ ⵙⵉⴷⵉ ⵙ ⵀⵓⵛⵉⵄⴰ. ⵙⵉⴷⵉ ⵉⵏⵏⴰ ⵉ ⵀⵓⵛⵉⵄⴰ: “ⵔⵓⵃ, ⴰⵡⵉ ⵉⵛⵜ ⵏ ⵜⴻⵎⵖⴰⵔⵜ ⵏ ⴼⴰⵔⵇ-ⵛⵛⵖⴻⵍ ⵓⵍⴰ ⴷ ⵜⴰⵔⵡⴰ ⵏ ⴼⴰⵔⵇ-ⵛⵛⵖⴻⵍ, ⵎⴰⵖⴰⵔ ⵙ ⴼⴰⵔⵇ-ⵛⵛⵖⴻⵍ ⵏⵏⴻⵙ ⵜⴻⵣⵏⴰ ⵜⴻⵎⵎⵓⵔⵜ ⵜⴻⴼⴼⴻⵖ ⵣⴻⴳ ⴰⵡⴰⵔⵏⵉ ⵉ ⵙⵉⴷⵉ.” 3 ⵓⵛⴰ ⵢⵓⵢⵓⵔ ⵏⴻⵜⵜⴰ, ⵢⵉⵡⵉ ⵊⵓⵎⴰⵔ, ⵢⴻⴵⵉⵙ ⵏ ⴷⵉⴱⵍⴰⵢⵉⵎ, ⵓ ⵏⴻⵜⵜⴰⵜ ⵜⴻⴽⵙⵉ ⵙ ⴷⴷⴻⵢⵙⴻⵜ, ⵜⵓⵔⵓⵡ ⴰⵙ-ⴷⴷ ⵉⵊⵊ ⵏ ⵎⵎⵉⵙ. [b] 4 ⵅⴻⵏⵏⵉ ⵉⵏⵏⴰ ⴰⵙ ⵙⵉⴷⵉ: “ⵍⴰⵖⴰ ⴰⵙ ⵙ ⵢⵉⵙⴻⵎ ⵏ ‘ⵢⴰⵣⵔⴰⵄⵉⵍ’, ⵎⴰⵖⴰⵔ ⵛⵡⴰⵢⵜ ⵏ ⵍⵡⴻⵇⵜ ⵡⴰⵀⴰ ⵓ ⵅⴻⵏⵏⵉ ⵏⴻⵛⵛ ⴰⴷ ⵅⴻⴵⵚⴻⵖ ⵉⴷⴰⵎⵎⴻⵏ ⵏ ⵢⴰⵣⵔⴰⵄⵉⵍ ⵅ ⵜⴰⴷⴷⴰⵔⵜ ⵏ ⵢⴰⵀⵓ ⵓ ⵏⴻⵛⵛ ⴰⴷ ⵇⴹⵉⵖ ⵅ ⵜⴳⴻⵍⴷⴰ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ. [c] 5 ⴷⴻⴳ ⵡⴰⵙⵙ ⵏⵏⵉ ⴰⴷ ⵢⵉⵍⵉ, ⴰⵇⴰ ⵏⴻⵛⵛ ⴰⴷ ⴰⵔⵥⴻⵖ ⵍⵇⴻⵡⵙ ⵏ ⵉⵙⵔⴰⵉⵍ ⴷⵉ ⵍⴻⵡⴹⴰ ⵏ ⵜⴻⵖⵣⵓⵔⵜ ⵏ ⵢⴰⵣⵔⴰⵄⵉⵍ.” [d]
6 ⵓⵛⴰ ⵜⴻⴽⵙⵉ ⵏⴻⵜⵜⴰⵜ ⵄⴰⵡⴻⴷ ⵙ ⴷⴷⴻⵢⵙⴻⵜ, ⵜⵓⵔⵓⵡ-ⴷⴷ ⵢⴻⴵⵉⵙ ⵓⵛⴰ ⵉⵏⵏⴰ ⴰⵙ ⵙⵉⴷⵉ: “ⵍⴰⵖⴰ ⴰⵙ ⵙ ⵢⵉⵙⴻⵎ ⵏ ⵍⵓ-ⵔⵓⵃⴰⵎⴰ, ⵎⴰⵖⴰⵔ ⵡⴰⵔ ⴰⵔⵔⴻⵃⵃⵎⴻⵖ ⵄⴰⴷ ⵅ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⵡⴰⵔ ⵜⵜⵖⵉⵎⵉⵖ ⵙⴻⵎⵎⵃⴻⵖ ⴰⵙⴻⵏ. [e] 7 ⵎⴰⵛⴰ ⴰⴷ ⴰⵔⵔⴻⵃⵎⴻⵖ ⵅ ⵜⴰⴷⴷⴰⵔⵜ ⵏ ⵢⴰⵀⵓⴷⴰ ⵓ ⵏⴻⵛⵛ ⴰⴷ ⵜⴻⵏ ⵙⵙⵏⴻⵊⵎⴻⵖ ⵙ ⵓⴼⵓⵙ ⵏ ⵙⵉⴷⵉ, ⴰⵔⴻⴱⴱⵉ ⵏⵙⴻⵏ! ⵏⴻⵛⵛ ⵡⴰⵔ ⵜⴻⵏ ⵙⵙⴻⵏⵊⵎⴻⵖ ⵙ ⵍⵇⴻⵡⵙ ⵏⵉⵖ ⵙ ⵙⵙⵉⴼ ⵏⵉⵖ ⵙ ⵉⵢⵙⴰⵏ ⵓⵍⴰ ⵙ ⵉⵎⵏⴰⵢⴻⵏ.” [f]
8 ⴰⵍⴰⵎⵉ ⵜⴻⴽⴽⴻⵙ ⵓⵟⵟⵓⴹ ⵉ ⵍⵓ-ⵔⵓⵃⴰⵎⴰ, ⵜⴻⴽⵙⵉ ⵄⴰⵡⴻⴷ ⵙ ⴷⴷⴻⵢⵙⴻⵜ ⵓⵛⴰ ⵜⵓⵔⵓⵡ-ⴷⴷ ⵉⵊⵊ ⵏ ⵎⵎⵉⵙ. 9 ⵓⵛⴰ ⵉⵏⵏⴰ ⵙⵉⴷⵉ: “ⵍⴰⵖⴰ ⴰⵙ ⵙ ⵢⵉⵙⴻⵎ ⵏ ⵍⵓ-ⵄⴰⵎⵎⵉ, ⵎⴰⵖⴰⵔ ⴽⴻⵏⵏⵉⵡ ⵡⴰⵔ ⵜⴻⴵⵉⵎ ⵄⴰⴷ ⴷ ⵍⴳⴻⵏⵙ ⵉⵏⵓ ⵓ ⵏⴻⵛⵛ ⵡⴰⵔ ⴵⵉⵖ ⵄⴰⴷ ⴷⴰ ⵉ ⴽⴻⵏⵏⵉⵡ.” [g]
- a 1:1 ⵃⵓⵛⵉⵄⴰ-ⵉⵙⴻⵎ-ⴰ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⴰⵙⴻⵏⵊⴻⵎ’ ⵏⵉⵖ ‘ⴰⴼⵍⴰⵃ’. ⴱⵉⵔⵉ-ⵉⵙⴻⵎ-ⴰ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⴰⵏⵓ ⵉⵏⵓ’. ⵃⵉⵥⵇⵉⵢⴰ-ⵉⵙⴻⵎ ⵏⵏⴻⵙ ⵉⴽⴻⵎⵎⵍⴻⵏ ‘ⵢⴰⵃⵉⵥⵇⵉⵢⴰ’.
- b 1:3 ⴷⵉⴱⵍⴰⵢⵉⵎ-ⵉⵙⴻⵎ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⵜⵏⴰⵢⴻⵏ ⵏ ⵜⵖⴰⵢⵉⵟⴰⵜ ⵏ ⵜⴰⵥⴰⵔⵜ’.
- c 1:4 ⵢⴰⵥⵔⴰⵄⵉⵍ-ⵉⵙⴻⵎ-ⴰ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⴰⵔⴻⴱⴱⵉ ⴰⴷ ⵉⵥⴻⴵⴻⵄ’ ⵏⵉⵖ ‘ⴰⵔⴻⴱⴱⵉ ⴰⴷ ⵉⵥⴰⵔⵄ’ ⵏⵉⵖ ‘ⴰⵖⵉⵍ ⵏ ⴰⵔⴻⴱⴱⵉ’.
- d 1:5 ⵍⵇⴻⵡⵙ ⵏ ⵉⵙⵔⴰⵉⵍ-ⵜⵓⵖⴰ ⵍⴳⴻⵏⵙ ⵏ ⵉⵙⵔⴰⵉⵍ ⵉⵜⵜⵡⴰⵙⵙⴻⵏ ⴰⵇⴰ ⵖⴰⵔⵙⴻⵏ ⴰⵟⵟⴰⵙ ⵏ ⵉⵎⴻⵊⵊⴰⴱⴻⵏ ⵏ ⵍⵇⴻⵡⵙ.
- e 1:6 ⵍⵓ-ⵔⵓⵃⴰⵎⴰ-ⵉⵙⴻⵎ ⵡⴰⵏⵉⵜⴰ-ⴰ ⵉⵅⵙ ⴰⴷ ⵢⵉⵏⵉ ‘ⵡⴰⵔ ⴰⵔⵔⴻⵃⵎⴻⵖ’.
- f 1:7 ⵣⴰⴽ. 4:6
- g 1:9 ⵍⵓ-ⵄⴰⵎⵎⵉ-ⵉⵙⴻⵎ ⵡⴰⵏⵉⵜⴰ-ⴰ ⵉⵅⵙ ⴰⴷ ⵢⵉⵏⵉ ‘ⵡⴰⵔ ⵉⴵⵉ ⵍⴳⴻⵏⵙ ⵉⵏⵓ’.