1 ⵉⴼⵙⵉ ⵉⵙⵔⴰⵉⵍ ⵉⵇⵉⴹⴰⵏ ⵏⵏⴻⵙ ⵙⵙⴻⵏⵏⵉ, ⵢⵓⵢⵓⵔ ⵙ ⵎⴰⵔⵔⴰ ⵎⵉⵏ ⵖⴰⵔⴻⵙ ⵓⵛⴰ ⵢⵉⵡⴻⴹ ⵖⴰⵔ ⴱⵉ’ⵔ-ⵙⴻⴱⵄⴰ. ⵉⵇⴻⴷⴷⴻⵎ ⴷⵉⵏ ⵜⵉⵖⴰⵔⵚⴰ ⵉ ⴰⵔⴻⴱⴱⵉ ⵏ ⴱⴰⴱⴰⵙ ⵉⵙⵃⴰⵇ. 2 ⵓⵛⴰ ⵉⵙⵙⵉⵡⴻⵍ ⴰⵔⴻⴱⴱⵉ ⴰⴽ-ⴷ ⵉⵙⵔⴰⵉⵍ ⴷⵉ ⵉⵡⴻⵃⵃⴰⵏ ⴷⵉ ⴵⵉⵍⴻⵜ, ⵉⵏⵏⴰ: “ⵢⴰⵄⵇⵓⴱ, ⵢⴰⵄⵇⵓⴱ!” ⵓⵛⴰ ⵉⵏⵏⴰ ⵏⴻⵜⵜⴰ: “ⴰⵇⴰ ⴰⵢⵉ ⴷⴰ!” 3 ⵅⴻⵏⵏⵉ ⵉⵏⵏⴰ: “ⵏⴻⵛⵛ ⴷ ⴰⵔⴻⴱⴱⵉ, ⴰⵔⴻⴱⴱⵉ ⵏ ⴱⴰⴱⴰⵛ. ⵡⴰⵔ ⵜⵜⴻⴳⴳⵯⴻⴷ, ⵎⴰⵃⴻⵏⴷ ⴰⴷ ⵜⴻⵀⵡⵉⴷ ⵖⴰⵔ ⵎⵉⵚⵔⴰ, ⵎⵉⵏⵣⵉ ⵏⴻⵛⵛ ⴰⴷ ⵛⴻⴽ ⴳⴳⴻⵖ ⴷⵉⵏ ⴷ ⵉⵊⵊ ⵏ ⵍⴳⴻⵏⵙ ⵉⵎⵖⴰⵔ. [a] 4 ⴰⴷ ⴽⵉⴷⴻⴽ ⵀⵡⵉⵖ ⵖⴰⵔ ⵎⵉⵚⵔⴰ ⵓⵛⴰ ⵏⴻⵛⵛ ⴰⴷ ⵛⴻⴽ ⵙⵙⴳⴻⵄⵄⴷⴻⵖ ⵄⴰⵡⴻⴷ ⵓ ⵢⵓⵙⵓⴼ ⴰⴷ ⵅⴰⴽ ⵉⵙⵙⴰⵔⵙ ⵉⴼⴰⵙⵙⴻⵏ ⵏⵏⴻⵙ ⵅ ⵜⵉⵟⵟⴰⵡⵉⵏ ⵏⵏⴻⵛ.” [b]

5 ⵉⴽⴽⴰⵔ ⵢⴰⵄⵇⵓⴱ, ⵉⴼⴼⴻⵖ ⵣⵉ ⴱⵉ’ⵔ-ⵙⴻⴱⵄⴰ. ⴽⵙⵉⵏ ⴰⵢⵜ ⵏ ⵉⵙⵔⴰⵉⵍ ⴱⴰⴱⴰⵜⵙⴻⵏ ⵢⴰⵄⵇⵓⴱ ⴷ ⵉⵃⴻⵏⵊⵉⵔⴻⵏ ⵏⵙⴻⵏ ⴷ ⵜⴻⵎⵖⴰⵔⵉⵏ ⵏⵙⴻⵏ ⴷⴻⴳ ⵉⴽⴰⵔⵔⵓⵜⴻⵏ ⵏⵏⵉ ⴷⴷ-ⵉⵙⵙⴻⴽⴽ ⴼⵉⵔⵄⵓⵏ ⵎⴰⵃⴻⵏⴷ ⴰⴷ ⵜ ⵢⴰⵡⵉ. [c] 6 ⴽⵙⵉⵏ ⵍⴻⴱⵀⴰⵢⴻⵎ ⵏⵙⴻⵏ ⴷ ⵡⴰⴳⵍⴰ ⵉ ⵢⴰⵔⴻⴱⵃⴻⵏ ⴷⵉ ⵜⴻⵎⵎⵓⵔⵜ ⵏ ⴽⴻⵏⵄⴰⵏ ⵓⵛⴰ ⵉⵡⴹⴻⵏ ⵖⴰⵔ ⵎⵉⵚⵔⴰ, ⵢⴰⵄⵇⵓⴱ ⴷ ⵎⴰⵔⵔⴰ ⵉⵃⴻⵏⵊⵉⵔⴻⵏ ⵏⵏⴻⵙ ⴰⴽⵉⴷⴻⵙ: 7 ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵉⵃⴻⵏⵊⵉⵔⴻⵏ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵊⵎⵉⵄ ⴰⴽⵉⴷⴻⵙ, ⵓⵍⴰ ⴷ ⵢⴻⵙⵙⵉⵙ ⴷ ⵢⴻⵙⵙⵉⵜⵙⴻⵏ ⵏ ⵉⵃⴻⵏⵊⵉⵔⴻⵏ ⵏⵏⴻⵙ, ⴰⵇⴰ ⵢⵉⵡⵉ ⴰⴽⵉⴷⴻⵙ ⵎⴰⵔⵔⴰ ⵜⴰⵔⵡⴰ ⵏⵏⴻⵙ ⵖⴰⵔ ⵎⵉⵚⵔⴰ. [d]

8 ⵉⵏⴰ ⴷ ⵉⵙⵎⴰⵡⴻⵏ ⵏ ⴰⵢⵜ ⵏ ⵉⵙⵔⴰⵉⵍ, ⵉⵏⵏⵉ ⵢⵓⴷⴼⴻⵏ ⵖⴰⵔ ⵎⵉⵚⵔⴰ:

ⵢⴰⵄⵇⵓⴱ ⴷ ⵉⵃⴻⵏⵊⵉⵔⴻⵏ ⵏⵏⴻⵙ.

ⴰⵎⴻⵏⵣⵓ ⵏ ⵢⴰⵄⵇⵓⴱ: ⵔⵓⴱⵉⵏ. [e]

9 ⵜⴰⵔⵡⴰ ⵏ ⵔⵓⴱⵉⵏ: ⵃⴰⵏⵓⴽ ⴷ ⴼⴰⵍⵍⵓ ⴷ ⵃⴰⵚⵔⵓⵏ ⴷ ⴽⴰⵔⵎⵉ. [f]

10 ⵜⴰⵔⵡⴰ ⵏ ⵛⵉⵎⵄⵓⵏ: ⵢⴰⵎⵓⵢⵉⵍ ⴷ ⵢⴰⵎⵉⵏ ⴷ ⵓⵀⴰⴷ ⴷ ⵢⴰⴽⵉⵏ ⴷ ⵚⵓⵃⴰⵔ ⴷ ⵛⴰⵡⵓⵍ, ⵎⵎⵉⵙ ⵏ ⵜⴻⵎⵖⴰⵔⵜ ⵜⴰⴽⴻⵏⵄⴰⵏⵉⵜ. [g]

11 ⵜⴰⵔⵡⴰ ⵏ ⵍⴰⵡⵉ: ⵊⴰⵔⵛⵓⵏ ⴷ ⵇⴰⵀⴰⵜ ⴷ ⵎⴰⵔⴰⵔⵉ. [h]

12 ⵜⴰⵔⵡⴰ ⵏ ⵢⴰⵀⵓⴷⴰ: ⵄⵉⵔ ⴷ ⵓⵏⴰⵏ ⴷ ⵛⴰⵢⵍⴰ ⴷ ⴼⴰⵔⵉⵚ ⴷ ⵣⴰⵔⴰⵃ. ⵎⴰⵛⴰ ⵄⵉⵔ ⴷ ⵓⵏⴰⵏ ⵎⵎⵓⵜⴻⵏ ⴷⵉ ⵜⴻⵎⵎⵓⵔⵜ ⵏ ⴽⴻⵏⵄⴰⵏ. ⵜⴰⵔⵡⴰ ⵏ ⴼⴰⵔⵉⵚ ⵜⵓⵖⴰ ⴰⵜⴻⵏ ⵃⴰⵚⵔⵓⵏ ⴷ ⵃⴰⵎⵓⵍ. [i]

13 ⵜⴰⵔⵡⴰ ⵏ ⵉⵙⵙⴰⴽⴰⵔ: ⵜⵓⵍⴰⵄ ⴷ ⴼⴰⵡⵡⴰ ⴷ ⵢⵓⴱ ⴷ ⵛⵉⵎⵔⵓⵏ.

14 ⵜⴰⵔⵡⴰ ⵏ ⵣⴰⴱⵓⵍⵓⵏ: ⵙⴰⵔⴰⴷ ⴷ ⵉⵍⵓⵏ ⴷ ⵢⴰⵃⵍⵉⵢⵉⵍ.

15 ⵉⵏⴰ ⵜⵓⵖⴰ ⴰⵜⴻⵏ ⴷ ⵉⵃⴻⵏⵊⵉⵔⴻⵏ ⵏ ⵍⵉⵢⴰ ⵉⵏⵏⵉ ⴷ ⴰⵙ ⴷⴷ-ⵜⵓⵔⵓⵡ ⵉ ⵢⴰⵄⵇⵓⴱ ⴷⵉ ⴼⴰⴷⴰⵏ-ⴰⵔⴰⵎ, ⵓⵛⴰ ⵄⴰⵡⴻⴷ ⵢⴻⴵⵉⵙ ⴷⵉⵏⴰ. ⵎⴰⵔⵔⴰ ⵍⴻⵄⵎⵓⵔ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵜⵃⴻⵏⵊⵉⵔⵉⵏ ⵜⵓⵖⴰ ⴰⵜⴻⵏ ⴷⵉ ⵜⵍⴰⵜⴰ ⵓ-ⵜⵍⴰⵜⵉⵏ.

16 ⵜⴰⵔⵡⴰ ⵏ ⵊⴰⴷ: ⵚⵉⴼⵢⵓⵏ ⴷ ⵃⴰⵊⵊⵉ ⴷ ⵛⵓⵏⵉ ⴷ ⴰⵚⴱⵓⵏ ⴷ ⵄⵉⵔⵉ ⴷ ⴰⵔⵓⴷⵉ ⴷ ⴰⵔⵡⵉⵍⵉ. [j]

17 ⵉⵃⴻⵏⵊⵉⵔⴻⵏ ⵏ ⴰⵛⵉⵔ: ⵢⵉⵎⵏⴰ ⴷ ⵢⵉⵙⵡⵉ ⴷ ⴱⴰⵔⵉⵄⴰ ⴷ ⵓⵍⵜⵎⴰⵜⵙⴻⵏ ⵛⴰⵔⴰⵃ. ⴷ ⵉⵃⴻⵏⵊⵉⵔⴻⵏ ⵏ ⴱⴰⵔⵉⵄⴰ: ⵃⴰⴱⵉⵔ ⴷ ⵎⴰⵍⴽⵉⵢⵉⵍ. [k]

18 ⵉⵏⴰ ⵜⵓⵖⴰ ⴰⵜⴻⵏ ⴷ ⵉⵃⴻⵏⵊⵉⵔⴻⵏ ⵏ ⵣⵉⵍⴱⴰ ⵜⴻⵏⵏⵉ ⵉⵡⵛⴰ ⵍⴰⴱⴰⵏ ⵉ ⵢⴻⴵⵉⵙ ⵍⵉⵢⴰ. ⵏⴻⵜⵜⴰⵜ ⵜⵓⵔⵓⵡ-ⴷⴷ ⵉⵏⴰ ⵉ ⵢⴰⵄⵇⵓⴱ, ⵉⵏⴰ ⵙⴻⵟⵟⴰⵛ ⴷ ⴰⵔⵔⵓⵃ. [l]

19 ⵜⴰⵔⵡⴰ ⵏ ⵔⴰⵃⵉⵍ, ⵜⴰⵎⵖⴰⵔⵜ ⵏ ⵢⴰⵄⵇⵓⴱ: ⵢⵓⵙⵓⴼ ⴷ ⴱⵉⵏⵢⴰⵎⵉⵏ.

20 ⵜⵜⵡⴰⵅⴻⵍⵇⴻⵏ-ⴷⴷ ⵉ ⵢⵓⵙⵓⴼ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ ⵎⴰⵏⴰⵙⵙⴰ ⴷ ⵉⴼⵔⴰⵢⵉⵎ, ⵉⵏⵏⵉ ⴷ ⴰⵙ ⴷⴷ-ⵜⵓⵔⵓⵡ ⴰⵙⵏⴰⵜ, ⵢⴻⴵⵉⵙ ⵏ ⴼⵓⵟⵉ-ⴼⴰⵔⴰⵄ, ⴰⴽⴻⵀⵀⴰⵏ ⵏ ⵓⵏ. [m]

21 ⵜⴰⵔⵡⴰ ⵏ ⴱⵉⵏⵢⴰⵎⵉⵏ: ⴱⵉⵍⴰⵄ ⴷ ⴱⴰⴽⵉⵔ ⴷ ⴰⵛⴱⵉⵍ ⴷ ⵊⵉⵔⴰ ⴷ ⵏⴰⵄⵎⴰⵏ ⴷ ⵉⵃⵉ ⴷ ⵔⵓⵛ ⴷ ⵎⵓⴼⴼⵉⵎ ⴷ ⵃⵓⴼⴼⵉⵎ ⴷ ⴰⵔⴷ. [n]

22 ⵉⵏⴰ ⵜⵓⵖⴰ ⴰⵜⴻⵏ ⴷ ⵉⵃⴻⵏⵊⵉⵔⴻⵏ ⵏ ⵔⴰⵃⵉⵍ, ⵉⵏⵏⵉ ⴷⴷ-ⵉⵜⵜⵡⴰⵡⴰⵔⵡⴻⵏ ⵉ ⵢⴰⵄⵇⵓⴱ, ⵎⴰⵔⵔⴰ ⴰⵔⴱⴻⵄⵟⴰⵛ ⴷ ⴰⵔⵔⵓⵃ.

23 ⵜⴰⵔⵡⴰ ⵏ ⴷⴰⵏ: ⵎⵖⵉⵔ ⵃⵓⵛⵉⵎ.

24 ⵜⴰⵔⵡⴰ ⵏ ⵏⴰⴼⵜⴰⵍⵉ: ⵢⴰⵃⴰⵚⵡⵉⵍ ⴷ ⵊⵓⵏⵉ ⴷ ⵢⵉⵚⵔⵓ ⴷ ⵛⵉⵍⵍⵉⵎ. [o]

25 ⵉⵏⴰ ⵜⵓⵖⴰ ⴰⵜⴻⵏ ⴷ ⵉⵃⴻⵏⵊⵉⵔⴻⵏ ⵏ ⴱⵉⵍⵀⴰ, ⵜⴻⵏⵏⵉ ⵉ ⴷ ⴰⵙ ⵉⵡⵛⴰ ⵍⴰⴱⴰⵏ ⵉ ⵔⴰⵃⵉⵍ ⵢⴻⴵⵉⵙ. ⵜⵓⵔⵓⵡ ⴰⵙ-ⴷⴷ ⵉⵏⴰ ⵉ ⵢⴰⵄⵇⵓⴱ, ⵉⵏⴰ ⵎⴰⵔⵔⴰ ⵜⵓⵖⴰ ⴰⵜⴻⵏ ⵙⴻⴱⵄⴰ ⴷ ⴰⵔⵔⵓⵃ. [p]

26 ⵎⴰⵔⵔⴰ ⵍⴻⵄⵎⵓⵔ ⵏⵏⵉ ⴷⴷ-ⵢⵓⵙⵉⵏ ⵖⴰⵔ ⵎⵉⵚⵔⴰ ⴰⴽ-ⴷ ⵢⴰⵄⵇⵓⴱ, ⵉⵏⵏⵉ ⴷⴷ-ⵉⴼⴼⵖⴻⵏ ⵣⴻⴳ ⵓⵖⴻⵣⴷⵉⵙ ⵏⵏⴻⵙ, ⴱⵍⴰ ⵜⵉⵎⵖⴰⵔⵉⵏ ⵏ ⵉⵃⴻⵏⵊⵉⵔⴻⵏ ⵏ ⵢⴰⵄⵇⵓⴱ, ⵉⵏⴰ ⵎⴰⵔⵔⴰ ⵜⵓⵖⴰ ⴰⵜⴻⵏ ⴷⵉ ⵙⴻⵜⵜⴰ ⵓ-ⵙⴻⵜⵜⵉⵏ ⵍⴻⵄⵎⵓⵔ. 27 ⵜⴰⵔⵡⴰ ⵏ ⵢⵓⵙⵓⴼ ⵉⵏⵏⵉ ⴷ ⴰⵙ ⴷⴷ-ⵉⵜⵜⵡⴰⵅⴻⵍⵇⴻⵏ ⴷⵉ ⵎⵉⵚⵔⴰ, ⴰⵇⴰ ⵜⵏⴰⵢⴻⵏ ⵏ ⵍⴻⵄⵎⵓⵔ. ⵎⴰⵔⵔⴰ ⵍⴻⵄⵎⵓⵔ ⵏ ⵜⴰⴷⴷⴰⵔⵜ ⵏ ⵢⴰⵄⵇⵓⴱ ⵏⵏⵉ ⴷⴷ-ⵢⵓⵙⵉⵏ ⵖⴰⵔ ⵎⵉⵚⵔⴰ, ⵜⵓⵖⴰ ⴰⵜⴻⵏ ⴷⵉ ⵙⴻⴱⵄⵉⵏ. [q]

28 ⵓⵛⴰ ⵏⴻⵜⵜⴰ ⵉⵙⵙⴻⴽⴽ ⵢⴰⵀⵓⴷⴰ ⵣⵣⴰⵜⴻⵙ ⵖⴰⵔ ⵢⵓⵙⵓⴼ, ⵃⵉⵎⴰ ⴰⴷ ⵉⵙⵙⵛⴻⵏ ⴰⴱⵔⵉⴷ ⵣⵣⴰⵜⴻⵙ ⵖⴰⵔ ⵊⵓⵛⴰⵏ ⵓⵛⴰ ⵉⵡⴹⴻⵏ ⵖⴰⵔ ⵜⴻⵎⵎⵓⵔⵜ ⵏ ⵊⵓⵛⴰⵏ. 29 ⵉⵏⴷⴻⵀ ⵢⵓⵙⵓⴼ ⵄⴰⵡⴻⴷ ⴰⴽⴰⵔⵔⵓ ⵏⵏⴻⵙ ⵓⵛⴰ ⵉⴳⴻⵄⵄⴻⴷ ⵖⴰⵔ ⵊⵓⵛⴰⵏ, ⵎⴰⵃⴻⵏⴷ ⴰⴷ ⵉⵍⵇⴰ ⵉⵙⵔⴰⵉⵍ, ⴱⴰⴱⴰⵙ. ⵓⵎⵉ ⴷ ⴰⵙ ⵉⵎⵎⴻⵍ ⵉⵅⴻⴼ ⵏⵏⴻⵙ, ⵉⵏⴳⴻⵣ ⴰⵙ ⵅ ⵢⵉⵔⵉ, ⵉⵇⵇⵉⵎ ⵉⵜⵜⵔⵓ ⵅ ⵢⵉⵔⵉ ⵏⵏⴻⵙ ⴰⵟⵟⴰⵙ. 30 ⵉⵏⵏⴰ ⵉⵙⵔⴰⵉⵍ ⵉ ⵢⵓⵙⵓⴼ: “ⵍⴻⵅⵅⵓ ⵣⴻⵎⵎⴰⵔⴻⵖ ⵏⴻⵛⵛ ⴰⴷ ⵎⵎⵜⴻⵖ, ⵍⴻⵅⵅⵓ ⵓⵎⵉ ⵥⵔⵉⵖ ⴰⵖⴻⵎⴱⵓⴱ ⵏⵏⴻⵛ, ⵣⴻⵄⵎⴰ ⴰⵇⴰ ⵄⴰⴷ ⵜⴻⴷⴷⴰⵔⴻⴷ!” 31 ⵅⴻⵏⵏⵉ ⵉⵏⵏⴰ ⵢⵓⵙⵓⴼ ⵉ ⵢⴰⵢⵜⵎⴰⵙ ⵓ ⵉ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏ ⴱⴰⴱⴰⵙ: “ⴰⴷ ⴳⴻⵄⵄⴷⴻⵖ ⴰⴷ ⵅⴻⴱⴱⴰⵔⴻⵖ ⴼⵉⵔⵄⵓⵏ, ⴰⴷ ⵉⵏⵉⵖ: ‘ⴰⵢⵜⵎⴰ ⴷ ⵜⴰⴷⴷⴰⵔⵜ ⵏ ⴱⴰⴱⴰ, ⵉⵏⵏⵉ ⵉⴵⴰⵏ ⴷⵉ ⵜⴻⵎⵎⵓⵔⵜ ⵏ ⴽⴻⵏⵄⴰⵏ, ⴰⵇⴰ ⵓⵙⵉⵏ-ⴷⴷ ⵖⴰⵔⵉ. 32 ⵉⵔⵢⴰⵣⴻⵏ ⴷ ⵉⵎⴻⴽⵙⴰⵡⴻⵏ ⵏ ⵡⵓⴵⵉ, ⵜⵓⵖⴰ ⵛⴻⵖⵍⴻⵏ ⵉⵅⴻⴼ ⵏⵙⴻⵏ ⴰⴽ ⴷ ⵍⴻⴱⵀⴰⵢⴻⵎ. ⴰⵇⴰ ⵉⵡⵢⴻⵏ-ⴷⴷ ⵓⴵⵉ ⵏⵙⴻⵏ ⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⵏⵙⴻⵏ ⴷ ⵎⴰⵔⵔⴰ ⵎⵉⵏ ⵖⴰⵔⵙⴻⵏ.’ 33 ⵎⴰⵍⴰ ⵉⵎⵙⴰⵔ ⴰⴷ ⴰⵡⴻⵎ ⴷⴷ-ⵉⵍⴰⵖⴰ ⴼⵉⵔⵄⵓⵏ ⵓⵛⴰ ⴰⴷ ⴰⵡⴻⵎ ⵢⵉⵏⵉ: ‘ⵎⵉⵏ ⵜⴻⵄⵏⴰ ⵍⵅⴻⴷⵎⴻⵜ ⵉ ⵜᵉⵜⵜⴻⴳⴳⴻⵎ?’, 34 ⴰⴷ ⵜⵉⵏⵉⵎ: ‘ⵉⵎⵙⴻⵅⵅⴰⵔⴻⵏ ⵏⵏⴻⵛ ⴷ ⵉⵔⵢⴰⵣⴻⵏ ⵉⵏⵏⵉ ⵉⵛⴻⵖⵍⴻⵏ ⴰⴽ-ⴷ ⵍⴻⴱⵀⴰⵢⴻⵎ ⵣⵉ ⵜⴻⵎⵥⵉ ⵏⵙⴻⵏ ⴰⵍ ⵉ ⵍⴻⵅⵅⵓ, ⵏⴻⵛⵛⵉⵏ ⵓⵍⴰ ⴷ ⵍⴻⵊⴷⵓⴷ ⵏⵏⴻⵖ!’, ⵃⵉⵎⴰ ⴰⴷ ⵖⴰⵔⵡⴻⵎ ⵢⵉⵍⵉ ⵜⵜⴻⵙⵔⵉⵃ ⵎⴰⵃⴻⵏⴷ ⴰⴷ ⵜⵣⴻⴷⵖⴻⵎ ⴷⵉ ⵜⴻⵎⵎⵓⵔⵜ ⵏ ⵊⵓⵛⴰⵏ, ⵎⵉⵏⵣⵉ ⴽⵓⵍ ⴰⵎⴻⴽⵙⴰⵡ ⵏ ⵡⵓⴵⵉ, ⴰⵇⴰ-ⵜ ⴷ ⵊⵊⵄⵉⴼⴻⵛⵜ ⵉ ⵉⵎⵉⵚⵔⵉⵢⵢⴻⵏ.” [r]