1 ⴰⵡⴰⵔⵏⵉ ⵎⴰⵏ ⴰⵢⴰ ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⴰⴱⵔⴰⵎ ⴷⴻⴳ ⵉⵊⵊ ⵏ ⵍⴻⵡⵃⵉⵢ. ⵉⵏⵏⴰ ⴰⵙ “ⵡⴰⵔ ⵜⵜⴻⴳⴳⵯⴻⴷ ⵛⴰ, ⴰⴱⵔⴰⵎ, ⵏⴻⵛⵛ ⴷ ⴰⵙⴻⵍⵇⵉ ⵉ ⵛⴻⴽ, ⵍⵎⵓⵏⴻⵜ ⵏⵏⴻⵛ ⵜⴻⵎⵖⴰⵔ ⴰⵟⵟⴰⵙ ⴷ ⵏⴻⵛⵛ.” [a] 2 ⵓⵛⴰ ⵉⵏⵏⴰ ⴰⴱⵔⴰⵎ: “ⵙⵉⴷⵉ ⵉⵏⵓ, ⵙⵉⴷⵉ, ⵎⵉⵏ ⴷ ⴰⵢⵉ ⵖⴰ ⵜⴻⵡⵛⴻⴷ, ⵎⴰⵖⴰⵔ ⵏⴻⵛⵛ ⴰⴷ ⵔⴰⵃⴻⵖ ⴰⵎⵎⵓ ⴱⵍⴰ ⵎⵎⵉ ⵓ ⴰⵍⵉⵄⴰⵣⵉⵔ ⵣⵉ ⴷⵉⵎⴰⵛⵇ ⴰⴷ ⵢⵉⵍⵉ ⴰⵎⴻⵛⵏⴰⵡ ⵎⵎⵉ ⵅ ⵡⴰⴳⵍⴰ ⵏ ⵜⴰⴷⴷⴰⵔⵜ ⵉⵏⵓ?” [b] 3 ⵉⵏⵏⴰ ⴰⴱⵔⴰⵎ ⵄⴰⵡⴻⴷ: “ⵅⵣⴰⵔ, ⵡⴰⵔ ⴷ ⴰⵢⵉ ⵜⴻⵡⵛⵉⴷ ⵣⵣⴰⵔⵉⵄⴻⵜ, ⵙ ⵓⵢⴻⵏⵏⵉ, ⵡⴻⵏⵏⵉ ⵉⴵⴰⵏ ⴰⵎ ⵎⵎⵉ ⵏ ⵜⴰⴷⴷⴰⵔⵜ ⵉⵏⵓ, ⴰⴷ ⵢⵉⵍⵉ ⴷ ⴰⵡⵔⵉⵜ ⵉⵏⵓ!” [c] 4 ⵓⵛⴰ ⵅⵣⴰⵔ, ⴰⵡⴰⵍ ⵏ ⵙⵉⴷⵉ ⵢⵓⵙⴰ-ⴷⴷ ⵖⴰⵔⴻⵙ, ⵉⵏⵏⴰ: “ⵡⴰⵔ ⵛⴻⴽ ⵉⵡⴰⵔⵔⴻⵜ ⵛⴰ ⵡⴰ, ⵎⴰⵛⴰ ⵡⴻⵏⵏⵉ ⵉ ⵖⴰ ⵉⴼⴼⵖⴻⵏ ⵣⵣⴰⵢⴻⴽ ⴰⴷ ⵢⵉⵍⵉ ⴷ ⴰⵡⵔⵉⵜ ⵏⵏⴻⵛ.” 5 ⵉⵙⵙⵓⴼⴼⴻⵖ ⵉ-ⵜ ⵖⴰⵔ ⴱⴰⵔⵔⴰ, ⵉⵏⵏⴰ: “ⵅⵣⴰⵔ ⵖⴰⵔ ⵓⵊⴻⵏⵏⴰ, ⵜⵃⴻⵙⴱⴻⴷ ⵉⵜⵔⴰⵏ, ⵎⴰⵍⴰ ⵜⵣⴻⵎⵎⴰⵔⴻⴷ ⴰⴷ ⵜⴻⵏ ⵜⵃⴻⵙⴱⴻⴷ!” ⵓⵛⴰ ⵉⵏⵏⴰ ⴰⵙ: “ⴰⵎⵎⵓ ⵉ ⵖⴰ ⵜⵉⵍⵉ ⵣⵣⴰⵔⵉⵄⴻⵜ ⵏⵏⴻⵛ!” [d] 6 ⵓⵛⴰ ⵏⴻⵜⵜⴰ ⵢⵓⵎⴻⵏ ⴷⵉ ⵙⵉⴷⵉ ⵓⵛⴰ ⵉⵃⵙⴻⴱ ⴰⵙ ⵜ-ⵉ-ⴷⴷ ⴷ ⵜⴰⵙⴻⴳⴷⴰ. [e]  [f]

7 ⵉⵏⵏⴰ ⴰⵙ ⵄⴰⵡⴻⴷ: “ⵏⴻⵛⵛ ⴷ ⵙⵉⴷⵉ, ⵡⴻⵏⵏⵉ ⵛⴻⴽ ⴷⴷ-ⵢⵉⵡⵢⴻⵏ ⵣⵉ ⵓⵔ ⵏ ⵉⴽⴰⵍⴷⴰⵏⵉⵢⵢⴻⵏ, ⵃⵉⵎⴰ ⴰⴷ ⴰⵛ ⵡⵛⴻⵖ ⵜⴰⵎⵎⵓⵔⵜ-ⴰ ⴷ ⵍⵡⴰⵔⵜ.” [g] 8 ⵅⴻⵏⵏⵉ ⵏⴻⵜⵜⴰ ⵉⵏⵏⴰ: “ⴰ ⵙⵉⴷⵉ ⵉⵏⵓ, ⵙⵉⴷⵉ, ⵙ ⵎⵉⵏⵣⵉ ⵉ ⵖⴰ ⵙⵙⵏⴻⵖ, ⴱⴻⵍⵍⵉ ⴰⴷ ⵜⵜ ⵡⴰⵔⵜⴻⵖ?” 9 ⵉⵏⵏⴰ ⴰⵙ ⵏⴻⵜⵜⴰ: “ⴰⵡⵉ ⴰⵢⵉ-ⴷⴷ ⵉⵛⵜ ⵏ ⵜⵄⴻⵊⵎⵉⵜ ⵏ ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ ⴷ ⵉⵊⵊ ⵏ ⵉⵖⴰⵢⴹ ⵏ ⵜⵍⴰⵜⴰ ⵉⵙⴻⴳⴳⵯⵓⵙⴰ ⴷ ⵉⵊⵊ ⵏ ⵉⵛⴰⵔⵔⵉ ⵏ ⵜⵍⴰⵜⴰ ⵉⵙⴻⴳⴳⵯⵓⵙⴰ ⴷ ⵉⵛⵜ ⵏ ⵜⴻⵊⵍⵉⵍⵍⴻⵃⵜ ⴷ ⵉⵊⵊ ⵏ ⵡⴻⴷⴱⵉⵔ ⴷ ⴰⵎⴻⵥⵢⴰⵏ.” 10 ⵏⴻⵜⵜⴰ ⵢⵉⵡⵉ-ⴷⴷ ⵖⴰⵔⴻⵙ ⵎⴰⵔⵔⴰ ⵎⴰⵏ ⴰⵢⴰ, ⵉⴱⴹⴰ ⵜⴻⵏ ⵅ ⵡⴻⵣⵢⴻⵏ ⵓ ⵉⴳⴳⴰ ⴽⵓⵍ ⴰⵣⵢⴻⵏ ⵇⵉⴱⴰⵍⵜ ⵉ ⵡⴻⵏⵏⴻⵖⵏⵉ, ⵎⴰⵛⴰ ⵡⴰⵔ ⵉⴱⴹⵉ ⵛⴰ ⵉⵊⴹⴰⴹ. [h] 11 ⵀⵡⴰⵏ-ⴷⴷ ⵉⵊⴹⴰⴹ ⵉⵜⵜⴽⴻⵛⵛⴰⴹⴻⵏ ⵅ ⵉⵎⵓⵔⴹⴰⵙ, ⵎⴰⵛⴰ ⴰⴱⵔⴰⵎ ⵢⵓⵥⵥⴻⵍ ⵅⴰⵙⴻⵏ. 12 ⵖⴰⵔ ⵓⵖⴻⴵⴰⵢ ⵏ ⵜⴼⵓⵛⵜ, ⵉⵎⵙⴰⵔ ⴰⵇⴰ ⵢⵓⵙⴰ ⴰⵙ-ⴷⴷ ⵉ ⴰⴱⵔⴰⵎ ⵉⵊⵊ ⵏ ⵢⵉⴹⴻⵚ ⵢⵓⴵⴻⵖ, ⵓⵛⴰ ⵅⵣⴰⵔ, ⵜⵉⴳⴳⵯⵓⴷⵉ ⴷ ⵜⴰⴵⴻⵙⵜ ⵉⵃⴻⴷⵇⴻⵏ ⵡⴹⴰⵏ-ⴷⴷ ⵅⴰⵙ. 13 ⵅⴻⵏⵏⵉ ⵉⵏⵏⴰ ⵉ ⴰⴱⵔⴰⵎ: “ⵙⵙⴻⵏ ⵙ ⵜⵉⴷⴻⵜⵜ ⴰⵇⴰ ⵣⵣⴰⵔⵉⵄⴻⵜ ⵏⵏⴻⵛ ⴰⴷ ⵜⵉⵍⵉ ⴷ ⵜⴰⴱⴰⵔⵔⴰⵏⴻⵛⵜ ⴷⴻⴳ ⵉⵛⵜ ⵏ ⵜⴻⵎⵎⵓⵔⵜ ⵉ ⵡⴰⵔ ⵉⴵⵉⵏ ⵏⵏⴻⵙ ⵓⵛⴰ ⴰⴷ ⴰⵙⴻⵏ ⵅⴻⴷⵎⴻⵏ ⴰⵎ ⵉⵙⴻⵎⵖⴰⵏ ⵓ ⵏⵉⵜⵏⵉ ⴰⴷ ⵅⴰⵙⴻⵏ ⴳⴳⴻⵏ ⴰⵖⵉⵍ ⴰⵔⴻⴱⵄⴰ-ⵎⵢⴰ ⵏ ⵉⵙⴻⴳⴳⵯⵓⵙⴰ. [i] 14 ⵎⴰⵛⴰ ⵍⴳⴻⵏⵙ ⵓⵎⵉ ⵖⴰ ⵅⴻⴷⵎⴻⵏ ⴰⵎ ⵉⵙⴻⵎⵖⴰⵏ, ⴰⴷ ⵅⴰⵙⴻⵏ ⵃⴻⴽⵎⴻⵖ ⵄⴰⵡⴻⴷ, ⵓⵛⴰ ⴰⵡⴰⵔⵏⵉ ⵎⴰⵏ ⴰⵢⴰ ⴰⴷ ⴼⴼⵖⴻⵏ ⵙ ⵡⴰⴳⵍⴰ ⵉⵎⵖⴰⵔ. [j] 15 ⴰⴷ ⵜᵉⵜⵜⵡⴰⵙⵙⵎⵓⵏⴻⴷ ⵖⴰⵔ ⵍⴻⵊⴷⵓⴷ ⵏⵏⴻⵛ ⵙ ⵍⴻⵀⵏⴰ ⵓⵛⴰ ⴰⴷ ⵛⴻⴽ ⵏⴻⴹⵍⴻⵏ ⴰⵎ ⵓⵎⴻⵛⵛⴰⵢⴱⵓ ⵉⵡⴻⵇⵇⴰⵔ. [k] 16 ⵊⵊⵉⵍ ⵡⵉⵙⵙ ⴰⵔⴻⴱⵄⴰ ⴰⴷ ⴷⴷ-ⵉⵄⵇⴻⴱ ⴷⴰⵏⵉⵜⴰ, ⵎⵉⵏⵣⵉ ⵍⵇⴻⴷⴷ ⵏ ⵍⵎⵓⵄⵚⵉⵢⵢⴻⵜ ⵏ ⵉⵎⵓⵔⵉⵢⵢⴻⵏ ⵄⴰⴷ ⵡⴰⵔ ⵉⴽⴻⵎⵎⴻⵍ.” [l] 17 ⵍⴰⵎⵉ ⵜⴻⵖⵍⵉ ⵜⴼⵓⵛⵜ ⵓⵛⴰ ⵜⴻⴷⵡⴻⵍ ⴷ ⵜⴰⴵⴻⵙⵜ, ⵜⵓⵖⴰ ⴷⵉⵏ ⴰⴼⴰⵔⵔⴰⵏ ⵉⴷⴷⴻⵅⵅⵏⴻⵏ ⵓ ⵉⵄⴷⵓ ⵉⵊⵊ ⵏ ⵡⴻⵚⴼⴻⴹ ⵏ ⵜⵎⴻⵙⵙⵉ ⵊⴰⵔ ⵉⵣⴻⵢⵏⴰⵏ ⵏⵏⵉ. ◼15:17 ⴰⴼⴻⵙⵙⴰⵔ-ⵍⴰⵎⵉ ⴳⴳⵉⵏ ⵜⵏⴰⵢⴻⵏ ⵏ ⵉⵊⴻⴵⵉⴷⴻⵏ ⵥⵉⵛ ⵉⵊⵊ ⵏ ⵍⵄⴰⵀⴷ ⴷⵉ ⵛⵛⴰⵔⵇ-ⴰⵎⴻⵍⵡⴰⵙⵓ ⴽⵙⵉⵏ ⵏⵉⵜⵏⵉ ⵉⵊⵊ ⵏ ⵓⵎⴻⴷⴷⴰⵔ ⵉ ⵜⵖⴰⵔⵚⵜ, ⴱⴹⴰⵏ ⵜ ⴷ ⵉⵥⴻⵢⵏⴰⵏ ⵓⵛⴰ ⵙⵙⴰⵔⵙⴻⵏ ⴰⵥⵢⴻⵏ ⵖⴰⵔ ⵉⵊⵊ ⵏ ⵓⵖⴻⵥⴷⵉⵙ ⵓ ⴰⵥⵢⴻⵏ ⵖⴰⵔ ⵉⵊⵊ ⵏ ⵓⵖⴻⵥⴷⵉⵙ ⵏⵏⴻⵖⵏⵉ. ⵅⴻⵏⵏⵉ ⵜⵓⵖⴰ ⵅ ⵓⵊⴻⴵⵉⴷ ⵏⵏⵉ ⵜⵓⵖⴰ ⴷ ⴰⵎⵓⵇⵍⵉⵍ ⵥⵥⴰⵢⵙⴻⵏ ⴰⴷ ⵢⵓⵢⵓⵔ ⴷⵉ ⵍⵡⴻⵙⵜ ⵏ ⵜⵏⴰⵢⴻⵏ ⵏ ⵉⵥⵉⵢⵏⴰⵏ ⴰⵎ ⵉⵇⵇⴰⵔ ⴰⵇⴰ ⴰⵊⴻⴵⵉⴷ ⵡⴻⵏⵏⵉ ⴷ ⴰⵎⴻⵇⵇⵔⴰⵏ ⵥⵥⴰⵢⵙⴻⵏ ⵖⴰⵔⴻⵙ ⵍⵃⴻⵇⵇ ⵃⵉⵎⴰ ⴰⴷ ⴽⵉⴷⴻⵙ ⵉⴳⴳ ⴰⵎⴻⵛⵏⴰⵡ ⵎⵉⵏ ⵉⴳⴳⴰ ⴰⴽ-ⴷ ⵓⵎⵓⴷⴷⴰⵔ ⵉ ⵓⵎⵉ ⵖⴰⵔⵚⴻⵏ, ⵎⴰⵍⴰ ⵏⴻⵜⵜⴰ ⵡⴰⵔ ⵉⴽⴻⵎⵎⴻⵍ ⵍⵄⴰⵀⴷ ⵉ ⵉⴳⴳⴰ ⴰⴽⵉⴷⴻⵙ (ⵅⵥⴰⵔ ⵉⵔⵎ. 34:18-20). ⴷⴻⴳ ⵡⴰⵡⴰⵍⴻⵏ-ⴰ ⵏⴻⵜⵜⵡⴰⵍⴰ ⴰⵇⴰ ⴰⵔⴻⴱⴱⵉ ⵡⴻⵏⵏⵉ ⴷ ⴰⵎⴻⵇⵇⵔⴰⵏ ⵅ ⵉⴱⵔⴰⵀⵉⵎ, ⵜⵓⵖⴰ ⵉⴳⴳⵓⵔ ⴷⵉ ⵍⵡⴻⵙⵜ ⵏ ⵉⵥⴻⵢⵏⴰⵏ ⵏ ⵓⵎⴻⴷⴷⴰⵔ ⴷⵉ ⵚⵚⵉⴼⴻⵜ ⵏ ⵡⴻⵙⴼⴻⴹ ⴰⵎ ⵜⵓⵖⴰ ⵉⴱⵔⴰⵀⵉⵎ ⵉⵜⵜⴱⴻⴷⴷⴰ ⵖⴰⵔ ⵓⵖⴻⵥⴷⵉⵙ. ⵎⴰⵏ ⴰⵢⴰ ⵉⵅⵙ ⴰⴷ ⵢⵉⵏⵉ ⴰⵇⴰ ⴰⵔⴻⴱⴱⵉ ⵙ ⵢⵉⵅⴻⴼ ⵏⵏⴻⵙ ⴷ ⵏⴻⵜⵜⴰ ⵉ ⵉⵇⴻⴹⵄⴻⵏ ⵍⵄⴰⵀⴷ ⴰⴽ-ⴷ ⵉⴱⵔⴰⵀⵉⵎ ⵎⵉⵏⵥⵉ ⴰⵔⴻⴱⴱⵉ ⵉⵜⵜⵃⵉⵏⵏⴰ ⵅ ⴱⵏⴰⴷⴻⵎ, ⵉⵙⵙⴻⵏ ⴱⵏⴰⴷⴻⵎ ⵡⴰⵔ ⵉⵥⴻⵎⵎⴰⵔ ⴰⴷ ⵉⴽⴻⵎⵎⴻⵍ ⵓⵍⴰ ⴷ ⵉⵊⵊ ⵏ ⵍⵄⴰⵀⴷ ⴰⴽⵉⴷⴻⵙ. ⴱⵏⴰⴷⴻⵎ ⵉⵥⴻⵎⵎⴰⵔ ⵎⵖⵉⵔ ⴰⴷ ⵉⵜⵜⵡⴰⵙⵙⴻⵏⵊⴻⵎ ⵅⵎⵉ ⵉ ⵖⴰ ⵢⴰⵎⴻⵏ ⴷⵉ ⵍⵄⴰⵀⴷ ⵉ ⵉⴳⴳⴰ ⴰⵔⴻⴱⴱⵉ ⴷⵉ ⵎⵎⵉⵙ, ⵉⵅⵙ ⴰⴷ ⵢⵉⵏⵉ ⴷⵉ ⵍⵎⴰⵙⵉⵃ ⵡⴻⵏⵏⵉ ⵉⵡⵛⵉⵏ ⵉⵅⴻⴼ ⵏⵏⴻⵙ ⴷ ⵜⵖⴰⵔⵚⵜ ⵉ ⴷⴷⵏⵓⴱ ⵏ ⵉⵡⴷⴰⵏ. 18 ⴷⴻⴳ ⵡⴰⵙⵙ ⵏⵏⵉ ⵏⵏⵉⵜ ⵉⴳⴳⴰ ⵙⵉⴷⵉ ⵉⵊⵊ ⵏ ⵍⵄⴰⵀⴷ ⴰⴽ-ⴷ ⴰⴱⵔⴰⵎ, ⵉⵏⵏⴰ: “ⵉ ⵣⵣⴰⵔⵉⵄⴻⵜ ⵏⵏⴻⵛ ⵓⵎⵉ ⵡⵛⵉⵖ ⵜⴰⵎⵎⵓⵔⵜ-ⴰ ⵣⴻⴳ ⵉⵖⵣⴰⵔ ⵏ ⵎⵉⵚⵔⴰ ⴰⵍ ⵉⵖⵣⴰⵔ ⴰⵎⴻⵇⵇⵔⴰⵏ, ⵉⵖⵣⴰⵔ ⵏ ⵍⴼⵓⵔⴰⵟ: [n] 19 ⵜⴰⵎⵎⵓⵔⵜ ⵏ ⵉⵇⵉⵏⵉⵢⵢⴻⵏ, ⵉⵇⴻⵏⵉⵣⵉⵢⵢⴻⵏ, ⵉⵇⴰⴷⵎⵉⵢⵢⴻⵏ, 20 ⵉⵃⵉⵜⵜⵉⵢⵢⴻⵏ, ⵉⴼⵉⵔⵣⵉⵢⵢⴻⵏ, ⵉⵔⴰⴼⴰⵡⵉⵢⵢⴻⵏ, 21 ⵉⵎⵓⵔⵉⵢⵢⴻⵏ, ⴰⵢⵜ ⵏ ⴽⴻⵏⵄⴰⵏ, ⵉⴳⵉⵔⴳⴰⵛⵉⵢⵢⴻⵏ ⴷ ⵉⵢⵉⴱⵓⵙⵉⵢⵢⴻⵏ.”