1 ⴰ ⵉⵎⵄⵉⵣⵣⴻⵏ ⵉⵏⵓ, ⵜⴰ ⴷ ⵜⴰⴱⵔⴰⵜ ⵡⵉⵙⵙ ⵜⵏⴰⵢⴻⵏ ⵉ ⴷ ⴰⵡⴻⵎ ⴷⴷ-ⵓⵔⵉⵖ ⵍⴻⵅⵅⵓ, ⵓ ⴷⵉ ⵜⵏⴰⵢⴻⵏ ⵏ ⵜⴻⴱⵔⴰⵜⵉⵏ-ⴰ ⴰⵔⴻⵣⵣⵓⵖ ⴰⴷ ⵙⵙⴼⴰⵇⴻⵖ ⵏⵏⴻⵢⵢⴻⵜ ⵏⵡⴻⵎ ⵉⵚⴼⴰⵏ ⴰⵎ ⴽⴻⵏⵏⵉⵡ ⵙⵙⵄⴻⵇⵍⴻⵖ, [a] 2 ⵃⵉⵎⴰ ⴰⴷ ⵜⴻⵇⵇⵉⵎⴻⵏ ⵜᵉⵜⵜⴼⴻⴽⴽⴰⵔⴻⵎ ⴷⴻⴳ ⵡⴰⵡⴰⵍⴻⵏ ⵏⵏⵉ ⵜⵓⵖⴰ ⵉⵏⵏⴰⵏ ⵉⵏⴰⴱⵉⵢⵢⴻⵏ ⵉⵇⴻⴷⴷⵙⴻⵏ ⵣⵉⵛ, ⵓⵍⴰ ⴷⵉ ⵜⴻⵡⵚⴻⵢⵢⴰⵜ ⵏ ⵙⵉⴷⵉⵜⵏⴻⵖ ⴷ ⴰⵎⵙⴻⵏⵊⴻⵎ ⵏⵏⴻⵖ, ⵜⵉⵏⵏⵉ ⵖⴰⵔⵏⴻⵖ ⴷⴷ-ⵢⵉⵡⴹⴻⵏ ⵙ ⵔⵔⵓⵙⵓⵍ. 3 ⵎⴰⵏ ⴰⵢⴰ ⵉⵜⵜⵅⴻⵚⵚⴰ ⴰⴷ ⵜⴻⵙⵙⵏⴻⵎ ⴷ ⴰⵎⴻⵣⵡⴰⵔⵓ, ⴰⵇⴰ ⴷⴻⴳ ⵡⵓⵙⵙⴰⵏ ⵉⵏⴻⴳⴳⵓⵔⴰ ⴰⴷ ⴷⴷ-ⴰⵙⴻⵏ ⵉⵎⴻⵙⵜⴻⵀⵣⴰⵢⴻⵏ ⵉⵏⵏⵉ ⵉⵙⵜⴻⵀⵣⴰⵏ ⴰⵎ ⵓⵢⵓⵔⴻⵏ ⵖⴰⵔ ⵏⵏⴻⵛⵡⴰⵜ ⵏⵙⴻⵏ, [b] 4 ⴰⴷ ⵉⵏⵉⵏ: “ⵎⴰⵏⵉ ⵉⴵⴰ ⵍⵡⴰⵄⴷ ⵏ ⵜⵡⴰⵙⵉⵜ ⵏⵏⴻⵙ? ⵣⴻⴳ ⵡⴰⵎⵉ ⵟⵟⵚⴻⵏ ⵍⴻⵊⴷⵓⴷ ⵏⵏⴻⵖ, ⴰⵎⵎⵓ ⵉ ⵢⴻⵇⵇⵉⵎ ⴽⵓⵍⵛⵉ ⴰⵎ ⵜⵓⵖⴰ ⵉⴵⴰ ⵣⴻⴳ ⵓⵎⴻⵣⵡⴰⵔ ⵍⴰⵎⵉ ⵜᵉⵜⵜⵡⴰⴳⴳ ⴷⴷⵓⵏⴻⵛⵜ.” [c] 5 ⵎⴻⵄⵍⵉⴽ ⵓⴼⵉⵏ ⴰⴷ ⵜⵜⵓⵏ ⴱⴻⵍⵍⵉ ⵙ ⵡⴰⵡⴰⵍ ⵏ ⴰⵔⴻⴱⴱⵉ ⴰⵇⴰ ⵉⵊⴻⵏⵡⴰⵏ ⵉⵣⵡⴰⵔⴻⵏ ⴰⴷ ⵉⵍⵉⵏ, ⵓ ⴰⵇⴰ ⵍⴱⴰⵔⵔ ⵉⴳⴻⵄⵄⴻⴷ ⵣⴻⴳ ⵡⴰⵎⴰⵏ ⵓ ⵙ ⵓⴼⵓⵙ ⵏ ⵡⴰⵎⴰⵏ ⵙ ⵡⴰⵡⴰⵍ ⵏ ⴰⵔⴻⴱⴱⵉ, [d] 6 ⴰⵎⴰⵏ ⵉ ⵣⵉ ⵜᵉⵜⵜⵡⴰⵀⴻⵍⵍⴻⴽ ⴷⴷⵓⵏⴻⵛⵜ ⵏ ⵍⵡⴻⵇⵜ ⵏⵏⵉ ⵓⵎⵉ ⴷⴷ ⵅⴰⵙ ⵙⵙⴻⴼⵢⴻⵏ ⵡⴰⵎⴰⵏ ⵏ ⵍⵃⴻⵎⵍⴻⵜ ⴷⴻⴳ ⵡⵓⵙⵙⴰⵏ ⵏ ⵏⵓⵃ, ⵓⵛⴰ ⵜᵉⵜⵜⵡⴰⵎⵃⴰ. [e] 7 ⵎⴰⵛⴰ ⵉⵊⴻⵏⵡⴰⵏ ⴷ ⵜⴻⵎⵎⵓⵔⵜ ⵏ ⵢⵉⴹⴰ ⴰⵇⴰ ⵜⵜⵡⴰⵃⴻⴼⴹⴻⵏ ⵙ ⵡⴰⵡⴰⵍ ⵏⵏⴻⵙ, ⵅⴻⵎⵎⵍⴻⵏ ⵉ ⵜⵎⴻⵙⵙⵉ ⴰⵍ ⴰⵙⵙ ⵏ ⵍⵃⵉⵙⴰⴱ ⴷ ⵓⵡⴻⴷⴷⴰⵔ ⵏ ⵍⴽⵓⴼⴼⴰⵔ. [f]

8 ⵎⴰⵛⴰ ⵉⵜⵜⵅⴻⵚⵚⴰ ⴽⴻⵏⵏⵉⵡ ⵡⴰⵔ ⵜᵉⵜⵜᵉⵜⵜⵓⵎ ⵉⵛⵜ ⵏ ⵍⵃⴰⵊⵊⴻⵜ, ⴰ ⵉⵎⵄⵉⵣⵣⴻⵏ, ⴰⵇⴰ-ⵜⵜ ⴷ ⵜⴰ: ⵖⴰⵔ ⵙⵉⴷⵉ ⵉⵊⵊ ⵏ ⵡⴰⵙⵙ ⴰⵎ ⴰⵍⴻⴼ ⵏ ⵉⵙⴻⴳⴳⵯⵓⵙⴰ ⵓⵛⴰ ⴰⵍⴻⴼ ⵏ ⵉⵙⴻⴳⴳⵯⵓⵙⴰ ⴰⵎ ⵢⵉⵊⵊ ⵏ ⵡⴰⵙⵙ. [g] 9 ⴰⵇⴰ ⵙⵉⴷⵉ ⵡⴰⵔ ⵉⵙⵙⵄⵉⵣⵣⵉ ⴷⴻⴳ ⵓⵙⵓⴼⴼⴻⵖ ⵏ ⵍⵡⵓⵄⵓⴷ ⵏⵏⴻⵙ ⴰⵎ ⵎⴰⵎⵎⴻⵛ ⴷ ⴰⵙⴻⵏ ⵉⵜⵜⵖⵉⵍ ⵉ ⵛⴰ ⵏ ⵉⵡⴷⴰⵏ, ⵎⴰⵛⴰ ⵏⴻⵜⵜⴰ ⵉⴳⴳⵓⵔ ⴰⴽⵉⴷⵡⴻⵎ ⵙ ⵜⵜⴰⵙⵉⵄ ⵏ ⵍⵅⴰⴹⴰⵔ, ⵎⵉⵏⵣⵉ ⵏⴻⵜⵜⴰ ⵡⴰⵔ ⵉⵜⵜⴻⵅⵙ ⵛⴰ ⴰⴷ ⵢⴰⵔⴻⵢⵢⴻⴱ ⵓⵍⴰ ⴷ ⵉⵊⵊ, ⵎⴰⵛⴰ ⵎⴰⵃⴻⵏⴷ ⴰⴷ ⵜⵓⴱⴻⵏ ⵎⴰⵔⵔⴰ. [h]

10 ⵎⴰⵛⴰ ⴰⵙⵙ ⵏ ⵙⵉⴷⵉ ⴰⴷ ⴷⴷ-ⵢⴰⵙ ⴰⵎ ⵓⵅⴻⵡⵡⴰⵏ ⵙ ⴵⵉⵍⴻⵜ. ⴷⴻⴳ ⵡⴰⵙⵙ ⵏⵏⵉ ⴰⴷ ⵡⴻⴷⴷⴰⵔⴻⵏ ⵉⵊⴻⵏⵡⴰⵏ ⵙ ⵍⵖⴻⴼⵍⴻⵜ ⵓ ⵜⵉⵎⴻⵙⵍⴰⵢⵉⵏ ⵜⵉⵎⴻⵣⵡⵓⵔⴰ ⵏ ⴷⴷⵓⵏⴻⵛⵜ ⴰⴷ ⴼⴻⵙⵢⴻⵏⵜ ⴷⵉ ⵜⵎⴻⵙⵙⵉ ⵓⵛⴰ ⵜⴰⵎⵎⵓⵔⵜ ⴷ ⵍⴻⵅⴷⴰⵢⴻⵎ ⵉ ⵅⴰⵙ ⵉⴵⴰⵏ ⴰⴷ ⵜⵜⵡⴰⴼⴻⵏⵜ. [i]

11 ⴰⵎ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ-ⴰ ⴰⴷ ⴼⴻⵙⵢⴻⵏⵜ ⴰⵎⵎⵓ, ⵎⴰⵎⵎⴻⵛ ⵉⵜⵜⵛⵓⵡⵡⴰⵔ ⴰⴷ ⵜⵓⵢⵓⵔⴻⵎ ⴽⴻⵏⵏⵉⵡ ⵙ ⵜⵇⴻⴷⴷⴰⵙⵜ ⴷ ⵜⵉⴳⴳⵯⵓⴷⵉ ⵣⵉ ⴰⵔⴻⴱⴱⵉ, 12 ⴰⵎ ⵜᵉⵜⵜⵔⴰⵊⴰⵎ ⵜⴰⵡⴰⵙⵉⵜ ⵏ ⵡⴰⵙⵙ ⵏ ⴰⵔⴻⴱⴱⵉ, ⴰⵎ ⵜᵉⵜⵜⵎⴻⵥⵔⴻⵎ ⴷⴰⵢⴻⵙ, ⵅⵎⵉ ⵖⴰ ⴼⵏⴰⵏ ⵉⵊⴻⵏⵡⴰⵏ ⴰⵎ ⵜⵜⵡⴰⵇⴻⴵⴱⴻⵏ ⵙ ⵜⵎⴻⵙⵙⵉ ⵓⵛⴰ ⴰⴷ ⴼⴻⵙⵢⴻⵏⵜ ⵜⵉⵎⴻⵙⵍⴰⵢⵉⵏ ⵜⵉⵎⴻⵣⵡⵓⵔⴰ ⵏ ⴷⴷⵓⵏⴻⵛⵜ ⵙ ⵍⵄⴰⴱⵓⵇ ⵏⵏⴻⵙ. [j] 13 ⵎⴰⵛⴰ ⵏⴻⵛⵛⵉⵏ ⴰⵇⴰ ⵏⴻⵜⵜⵔⴰⵊⴰ ⵉⵊⴻⵏⵡⴰⵏ ⵏ ⵊⴷⵉⴷ ⴷ ⵜⴻⵎⵎⵓⵔⵜ ⵏ ⵊⴷⵉⴷ ⵎⴰⵏⵉ ⵖⴰ ⵜⴻⵣⴷⴻⵖ ⵜⵙⴻⴳⴷⴰ ⵄⵍⴰⵃⵙⴰⴱ ⵍⵡⴰⵄⴷ ⵏⵏⴻⵙ. [k]

14 ⵙ ⵓⵢⴻⵏⵏⵉ, ⴰ ⵉⵎⵄⵉⵣⵣⴻⵏ ⵉⵏⵓ, ⵓⵎⵉ ⴽⴻⵏⵏⵉⵡ ⵜᵉⵜⵜⵔⴰⵊⴰⵎ ⵎⴰⵏ ⴰⵢⴰ, ⵛⴹⴰⵔⴻⵎ ⵎⴰⵃⴻⵏⴷ ⴰⴷ ⵜᵉⵜⵜⵡⴰⴼⴻⵎ ⴱⵍⴰ ⵍⴻⵅⵎⴻⵊ ⵓ ⴱⵍⴰ ⵍⵄⵉⴱ ⵣⵣⴰⵜⴻⵙ ⴷⵉ ⵍⴻⵀⵏⴰ. 15 ⵃⴻⵙⴱⴻⵎ ⵜⵜⴰⵙⵉⵄ ⵏ ⵍⵅⴰⴹⴰⵔ ⵏ ⵙⵉⴷⵉ ⴷ ⵜⴰⵡⵡⴰⵔⵜ ⵉ ⵡⴻⵚⵍⴰⵃ, ⴰⵎ ⵎⴰⵎⵎⴻⵛ ⵓⵍⴰ ⴷ ⵓⵎⴰⵜⵏⴻⵖ ⵉⵄⵉⵣⵣⴻⵏ ⴱⵓⵍⵓⵙ ⴷ ⴰⵡⴻⵎ ⴷⴷ-ⵢⵓⵔⴰ ⵄⵍⴰⵃⵙⴰⴱ ⵜⵉⵖⵉⵜ ⵉ ⴷ ⴰⵙ ⵉⵎⵎⴻⵡⵛⴻⵏ, [l] 16 ⴰⵎ ⵎⴰⵎⵎⴻⵛ ⵅⴰⵙ ⵉⵙⵙⵉⵡⴻⵍ ⵏⴻⵜⵜⴰ ⴷⵉ ⵎⴰⵔⵔⴰ ⵜⵉⴱⵔⴰⵜⵉⵏ ⵏⵏⴻⵙ. ⴰⵇⴰ ⴷⵉⵏ ⵛⴰ ⵏ ⵜⵎⴻⵙⵍⴰⵢⵉⵏ ⵉⵡⵄⴰⵔⴻⵏ ⵉ ⵍⴻⴼⵀⴰⵎⴻⵜ, ⵜⵉⵏⵏⵉ ⵉ ⵙⵙⴼⴰⵔⵔⴰⵖⴻⵏ ⵍⵊⵓⵀⵀⴰⵍ ⴷ ⵢⴻⵡⴷⴰⵏ ⵡⴰⵔ ⵉⵎⵜⵉⵏⴻⵏ ⴷⴻⴳ ⵡⵓⵍ ⵏⵙⴻⵏ, ⴰⵎ ⵎⴰⵎⵎⴻⵛ ⴳⴳⵉⵏ ⵓⵍⴰ ⵉ ⵜⵉⵔⴰ ⵉⵇⴻⴷⴷⵙⴻⵏ ⵏⵏⴻⵖⵏⵉ ⵉ ⵡⴰⵔⴻⵢⵢⴻⴱ ⵏ ⵢⵉⵅⴻⴼ ⵏⵙⴻⵏ. [m]

17 ⵙ ⵓⵢⴻⵏⵏⵉ ⴽⴻⵏⵏⵉⵡ ⴰ ⵉⵎⵄⵉⵣⵣⴻⵏ ⵉⵏⵓ, ⴰⵎ ⵜⴻⵙⵙⵏⴻⵎ ⵎⴰⵏ ⴰⵢⴰ ⵇⴱⴻⵍ, ⵃⴹⴰⵎ ⵉⵅⴻⴼ ⵏⵡⴻⵎ, ⵃⵉⵎⴰ ⵡⴰⵔ ⵜⴹⴻⴼⴼⴰⵔⴰⵎ ⴰⵡⴰⵔⵏⵉ ⵉ ⵓⵡⴻⴷⴷⴰⵔ ⵏ ⵢⵉⵏⵏⵉ ⵉⴵⴰⵏ ⴱⵍⴰ ⵛⵛⴰⵔⵉⵄⴰ ⵓⵛⴰ ⴰⴷ ⵜⴻⵡⴹⴰⵎ ⵡⴰⵅⵅⴰ ⵜⵓⵖⴰ ⵜᵉⵜⵜⴱⴻⴷⴷⴰⵎ ⵏⵉⵛⴰⵏ, 18 ⵎⴰⵛⴰ ⵙ ⵍⵄⴻⴽⵙ ⵃⴹⴰⵎ ⴰⴷ ⵜⴻⵢⵎⴻⵎ ⴷⴻⴳ ⴰⵔⴹⴰ ⴷ ⵜⵓⵙⵙⵏⴰ ⵏ ⵙⵉⴷⵉⵜⵏⴻⵖ ⴷ ⴰⵎⵙⴻⵏⵊⴻⵎ ⵏⵏⴻⵖ, ⵢⴰⵙⵓⵄ ⵍⵎⴰⵙⵉⵃ, ⵓ ⵏ ⴰⵔⴻⴱⴱⵉ, ⴱⴰⴱⴰⵙ, ⵉ ⵡⴻⵏⵏⵉ ⵓⵎⵉ ⵖⴰ ⵢⵉⵍⵉ ⵓⵄⵓⴵⵉ, ⴰⵎ ⵍⴻⵅⵅⵓ ⴰⵎ ⵍⴻⴱⴷⴰ, ⴰⵍ ⴷⴻⴳ ⵡⵓⵙⵙⴰⵏ ⵏ ⵍⴻⴱⴷⴰ! ⴰⵎⵉⵏ.

<- 2 ⴱⵓⵟⵔⵓⵙ 2