1 Qqareɣ tidett di Lmasiḥ, war ssxarriqeɣ ca, uca tanefsect inu tcehhed dayi s Arruḥ Iqeddsen, [a] 2 belli ɣari acḍan imɣar d řeḥriq war ittbeddi deg wuř inu. 3 Tuɣa ttẓaǧiɣ meɛlik ufiɣ ttwaḥarrmeɣ di mummu inu x Lmasiḥ s ict nneɛřet di ṭṭweɛ n wawmaten inu, řaǧ inu zi jjihet n weysum n arrimet. [b] 4 arrawen n Israil, inni ittwaqebřen d mmis. Ɣarsen i yeǧa uɛuǧi, řɛuhud, Ccariɛa, tasexxart i iǧan di Zzawect Iqeddsen i ɣares dd-iqqnen, lwuɛud d řejdud. [c] 5 Zzaysen i dd-iban Lmasiḥ x webrid n weysum n arrimet wenni d AREBBI x marra. I Netta i ɣa yiři marra asemɣar d marra lbaraka i řebda qaɛ. Amin! [d]

6 Maca war iǧi ařami awař n AREBBI war yiwiḍ, minzi marra inni zi Israil war ǧin ca d Israil. [e] 7 Uca uřa d marra nitni war ǧin ca d tarwa n Ibrahim, minzi nitni zi zzariɛet n Ibrahim, minzi ittwanna: “Di Isḥaq ad ac řaɣan zzariɛet.” [f] 8 Man aya war ixs ad yini aqa tarwa ɛlaḥṣab jjadira n arrimet aqa-ten d tarwa n AREBBI, maca tarwa n lwaɛd ad ttwaḥesben d zzariɛet. [g] 9 Minzi awař n lwaɛd d wa:

“Ɣar řweqt-a ad dd-aseɣ

uca ad ɣares yiři ɣar Sara mmis!” [h]

10 Man aya war iǧi waha di tmesřact n Sara, maca uřa di tmesřact n Rifqa, umi tmun ak-d uyenni n bnadem nni, jedditeɣ Isḥaq, [i] 11 tuɣa tizzar tettwassen řixḍaret n AREBBI umi tuɣa ɛad war dd-xřiqen iḥenjiren nnes, war zemmaren ad ggen ɛad řxar niɣ řɣar, ḥima war tᵉttiři tmesřact deg webrid n řexdayem, maca deg webrid n wenni ittřaɣan. 12 Maɣar ittwanna i Rifqa:

“Aqa ameqqran ad isexxar i umeẓyan!”, [j]

13 am mammec tura:

“Yaɛqub i xseɣ, maca carheɣ Isu.” [k]

14 Min ɣa nini xenni? Ma iqedd ad yiři ɣar AREBBI min war iseggden? Ɛemmarṣ! [l] 15 Xzar, Netta inna ɛawed i Musa:

“Ad areḥmeɣ wi xseɣ ad areḥmeɣ,

uca ad ḥinneɣ x wi xseɣ ad ḥinneɣ.” [m]

16 Xenni tamesřact war teqqim ca ɣar wi ittexsen uřa ɣar wi ittazzřen, maca ɣar AREBBI wenni yareḥḥmen. 17 Minzi ɛlaḥsab Tira Iqeddsen inna Netta i firɛun:

“Aqa i man aya ssnekkareɣ-dd cek,

ḥima ad zzayek ssecneɣ jjehd inu,

uca ad ittwabarreḥ Isem inu

di marra ddunect.” [n]

18 Xenni Netta ad yarḥem wi ixs, uca ad isseqseḥ wi ixs.

19 Iwa, ad taɣ ad tinid: Mayemmi ittcetca ɛad, minzi wi ɣa immɛařan ak-d min ixs Netta? 20 Maca min teɛnid cek, a bnadem, wenni ittqacaḥen AREBBI? Ma min ittwaggen izemmar ad ini i wenni t iggin: “Mayemmi d ayi teggid ammu?” [o] 21 Ma war iǧi ɣar bu-třaxt ṣṣulṭa x třaxt ḥima ad igg zeg ict n řɛejnet ict n řqecɛet i lkarama u wenneɣni i ubehdeř? [p] 22 Maɣar AREBBI, wenni tuɣa ixs ad isscen aɣḍab nnes d jjehd nnes, issiweḍ lɣaḍab nnes s waṭṭas n ttasiɛ n řxaḍar x řeqcuɛ n weɣḍab inni ittwasswejden marra i uhellek, 23 uca ifarɣ tayri nnes x řeqcuɛ n arreḥmet inni izwar issewjed i-ten i uɛuǧi i AREBBI! 24 Maɣar neccin d inni ittwařaɣan, war iǧi zeg Wudayen waha, maca ɛawed zi řegnus. 25 Am mammec ittwanna ɛawed di Ḥuciɛa:

“Ad semmiɣ i yinni war iǧin d řgens inu

‘Řgens inu!’,

uca i yinni war iǧin d amɛizz d ‘Amɛizz!’ ” [q]

26 Ad yiři deg wemcan mani d asen ittwařaɣa:

‘War iǧi d řgens inu!’,

belli dinni ad asen řaɣan:

‘Arrawen n AREBBI iddaren!’ [r]

27 Maca Icaɛya ibarreḥ zi jjihet n ayt n Israil:

“Mařa tuɣa řqedd n ayt n Israil

anect n ijdi n řebḥar,

mɣir min i ɣa iqqimen ad injem.” [s]

28 “Tamesřact tbedd nican u ad tᵉttwaqfeř,

SIDI ad tt igg x temmurt.” [t]

29 Am mammec izwar Icaɛya inna:

“Maɛlik SIDI n řɛeskarat war d aneɣ ijji

inni iqqimen ddaren,

iři nedweř am Sadum u narwes di Ɛamurra.” [u]

30 Min ɣa nini xenni? Ma xenni řegnus inni war yarezzun tasegda, aqa ksin tasegda? Iwa, maca tasegda tenni s l’iman. 31 Maca Israil nni iḍeffaren Ccariɛa n tsegda, war yiwiḍ ca ɣar Ccariɛa n tsegda. [v] 32 Mayemmi? Minzi tasegda nni war teǧi ca zi l’iman maca zi řexdayem n Ccariɛa, minzi nitni nderfen deg Weẓru n unedref, [w] 33 am mammec tura:

“Aqa ad ggeɣ di Ṣihyun Aẓru i unedref

d Weẓru i uneqrad.

Marra wi zzayes i ɣa yamnen,

war ittseḍḥa.” [x]