1 Min ɣa nini xenni? Ma ad neqqim di ddenb ḥima ad immarni arḍa? 2 Ɛemmarṣ! Neccin inni immuten i ddenb, mammec ɛad dayes i ɣa neddar? 3 Ma war tessinem ca belli inni zzayneɣ ittwassɣeḍṣen di Yasuɛ Lmasiḥ, ttwassɣeḍṣen di řmewt nnes? [a] 4 Aqa nettwanḍeř akides s useɣḍeṣ di řmewt, ḥima, am mammec dd-ittwassnekkar Lmasiḥ zi taddart n imettinen ɣar uɛuǧi n Babas, ammu i ɣa nuyur uřa d neccin di Tudart n jdid. [b] 5 Minzi mařa nettwaẓẓu di temmurt d ijjen akides s tefras n řmewt nnes, xenni ammu i ɣa niři ɛawed d ijjen akides s tefras n tnukra nnes. [c] 6 Aqa nessen belli bnadem nneɣ aqdim ittwaṣelleb akides, ḥima ad tebḍeř arrimet n ddenb, war ndikkwiř ɛawed d imsexxaren i ddenb. [d] 7 Minzi wenni immuten, aqa ittwafekk zi ddnub. [e]

8 Mařa xenni nemmut ak-d Lmasiḥ, aqa numen belli neddar ɛawed akides, ak-d Lmasiḥ. [f] 9 Minzi nessen belli Lmasiḥ ittwassnekkar-dd zi taddart n imettinen, war ittmetti ɛawed. Aqa řmewt war xas tḥekkem ca. [g] 10 Minzi zeg uɣezdis n řmewt i immut, aqa immut i ddnub ijj n umur, maca zeg uɣezdis n Tudart nnes, Netta iddar i AREBBI. [h] 11 Ammu kenniw ɛawed: ḥesbem ixef nwem d imettinen i ddenb, maca d imuddaren i AREBBI di Siditneɣ Yasuɛ Lmasiḥ.

12 Xenni war ttejjim ddenb ad iḥkem di arrimet nwem ifennan, ařami ad as tᵉṭṭaɛem di nnecwat nnes, 13 uca war ttewcim iɣezdisen n arrimet nwem am dduzan i řmuɛṣiyyet, maca wcem ixef nwem i AREBBI, am iwdan inni idewřen ɣar Tudart zeg imettinen, uca wcem iɣezdisen n arrimet nwem am dduzan i tsegda n AREBBI. [i] 14 Ddenb war xawem iḥekkem ca, minzi war teǧim sadu Ccariɛa maca sadu arḍa.

15 Mammec xenni? Ma ad nexḍa minzi war neǧi ca sadu Ccariɛa, maca sadu arḍa? Ɛemmarṣ! 16 Ma war tessinem ca aqa kenniw d imsexxaren n wenni umi tewcim ixef nwem maḥend ad as tsexxarem s ṭṭaɛet, n wenni umi tᵉttᵉṭṭaɛem, ma i ddenb i tᵉttᵉṭṭaɛem niɣ i tsegda? [j]

17 Tqad as i AREBBI, aqa kenniw inni tuɣa d imsexxaren i ddenb, aqa tdewřem tᵉttᵉṭṭaɛem s wuř i ddab iṣfan n useřmed i d awem ittwasellmen. 18 Řami tᵉttwafekkem zi ddenb, tdewřem d imsexxaren n tsegda. [k] 19 Ssawařeɣ x řeḥsab řeɛqeř n bnadem x ssibbet n tuḍɛeft n weysum nwem, minzi am mammec tewcim iɣezdisen nwem d imsexxaren i řexmej d min war iseggden, amenni řexxu wcem iɣezdisen nwem d imsexxaren i tsegda d tqeddast. 20 Minzi řami tuɣa kenniw d imsexxaren n ddenb, tuɣa kenniw d iḥurriyyen zi jjihet n tsegda. [l] 21 Man řɣiǧet i tuɣa ɣarwem řexdenni? Timesřayin i zi tᵉttseḍḥam řexxu? S minzi aneggar nsent d řmewt. 22 Maca řexxu, umi tᵉttwafekkem zi ddenb uca tdewřem d imsexxaren n AREBBI, aqa řɣiǧet nwem tᵉttwaqeddes uca uneggar nnes d Tudart ittduman. 23 Minzi řexřaṣ n ddenb d řmewt, maca tawhibt n AREBBI d Tudart ittduman s Siditneɣ Yasuɛ Lmasiḥ. [m]