1 X uyenni ttřaɣiɣ kenniw, a aytma, s arreḥmet tameqqrant n AREBBI, ad tqeddmem arrimat nwem d taɣarṣt iddaren, iqeddsen, yarḍan i AREBBI, wa d aɛbad nwem icuwwaren. [a] 2 War temquddam ak-d ddunect-a, maca beddřem s uřeqqem n řeɛqeř nwem zi jdid, ḥima ad tqeǧbem min ixs AREBBI: min icnan d min yarḍan d min ikemmřen. [b]

3 Aqa s arḍa tenni d ayi immewcen, qqareɣ awem marra: war ttxarriṣem sennej i min ittřiq uxarraṣ nnes, maca xarrṣem nican ɛlaḥsab řqedd n l’iman i iwca AREBBI i kuř ijjen zzaywem. [c] 4 Am mammec ɣarneɣ aṭṭas n iɣezdisen deg ict n arrimet uca marra iɣezdisen n arrimet war ɣarsen bu řxedmet d icten, [d] 5 ammu neccin, waxxa d aṭṭas, aqa aneɣ d ict n Arrimet di Lmasiḥ d iɣezdisen ijjen i wenneɣni. [e] 6 Maca ɣarneɣ tiwhibin immsebḍan ɛlaḥsab arḍa i d aneɣ immewcen: ijjen ɣares tawhibt maḥend ad inebb ɛlaḥsab řqedd n l’iman, [f] 7 wenneɣni ɣares nneyyet n tsexxart maḥend ad isexxar, niɣ tawhibt n umseɣɣar maḥend ad issɣar, [g] 8 niɣ tawhibt n usfewwej maḥend ad issfewwej, niɣ tawhibt maḥend ad iwc s tecrimet, niɣ tawhibt n uḍebbar s wemḥaḍ, niɣ tawhibt n arreḥmet s řefraḥet. [h]

9 Ad tiři tayri nwem břa nnifaq. Carhem řɣar, tcebbarem di min icnan. 10 Iřim mliḥ ijjen ak-d tawmat nwem, xsem ijj i wenneɣni, izzarem ad tcennɛem ijjen wenneɣni. [i] 11 Iřim d imḥaḍen, war ttiřim d ifinyanen. Iřim d timessi di arruḥ, ɛebdem Siditwem, 12 Farḥem di min iǧan asitem nwem, di řmeḥnet nwem ṣbarem uca ṭṭfem řebda di tẓaǧit. [j] 13 Wcem afus di min iḥdajen imqeddasen. Ggem s řeḍrafet ak-d ibarraniyyen. [k] 14 Barkem inni kenniw imarrten, barkem war neɛɛřem ca. [l] 15 Farḥem ak-d inni ifarḥen, rum ak-d yinni ittrun. 16 Ḥesbem aytmatwem am mammec tḥessbem ixef nwem, War ttiřim d imɛeffaren, maca ruḥem ak-d imwaḍɛen. War ttiřim ca d imiɣisen ak-d yixef nwem. [m] 17 War ttarrim ca ḥed x řɣar s řɣar, maca ggem min icnan i marra iwdan. [n] 18 Mařa tzemmarem, mecḥař ma i dd-ittasen zzaywem, ṣeřḥem ak-d marra iwdan. [o] 19 War ttentiqimem ca i yixef nwem, a imɛizzen, maca wcem amcan i weɣḍab, minzi tura: “Mařa kenniw war tarrim tasɣart s yixef nwem, Necc ad arreɣ tasɣart newem, iqqar AREBBI.” [p]

20 Mařa iǧuẓ řeɛdu nwem, seccem t, mařa ifud, wcem as ad isu, minzi mařa teggid aya, ad tyarwed řefḥem itteḥduduqen x uzeǧif nnes. [q] 21 War ttejjim ca řɣar ad kenniw iɣřeb, maca ɣeřbem x řɣar s řxar.