1 Uca ẓriɣ ɣar ufus afusi n wenni iqqimen x řɛarc ijj n Wedlis ittwanḍen, tuɣa xas tira ɣar daxeř d barra, uca Adlis tuɣa ittwacemmeɛ s sebɛa n icemmiɛen. [a] 2 Uca ẓriɣ ijj n lmalak ijhed nneɣni, ittřaɣa s jjehd:

“Man wen isdaheǧen ad yarzem

Adlis-a ittwannḍen,

uca ad ikkes icemmiɛen nnes?”

3 Uca uřa d ijj deg ujenna niɣ di temmurt niɣ sadu temmurt izemmar ad yarzem Adlis-a ittwannḍen u ad ikkes icemmiɛen nnes, ad dayes ixzar. [b] 4 Necc ruɣ aṭṭas umi war ufin wi isdaheǧen ad yarzem Adlis-a ittwannḍen u ad yarzem icemmiɛen nnes. 5 Ijjen zeg imɣaren inna ayi: “War ttru ca! Xzar, Ayrad zi teqbič n Yahuda, Aẓwar n Dawud, aqa iɣelleb, ḥima ad yarzem Adlis-a ittwannḍen d icemmiɛen nnes.” [c]

6 Uca ẓriɣ di řwesṭ n řɛarc d arebɛa n imuddaren uca di řwesṭ n imɣaren, ijj n Izmar ibedd, igga axmi d taɣarṣt. Netta ɣares sebɛa n waccawen d sebɛa n tiṭṭawin, nitni d sebɛa n Arruḥat n AREBBI inni dd-ittwassekken ɣar ddunect tmun. [d]  [e] 7 Aqa Netta yusa-dd uca iksi Adlis ittwannḍen zeg ufus n wenni iqqimen x řɛarc.

8 Ařami iṭṭef Adlis ittwannḍen, wḍan-dd arebɛa n imuddaren d arebɛa u-ɛicrin n imɣaren ɣar temmurt zzat i Yezmar. Nitni marra idsen ɣarsen ict n lharpa d ijj n ṭṭebṣi n wureɣ iccur s řebxur: man aya d tiẓaǧitin n imqeddasen. [f] 9 Uca ttɣennajen ijj n izři n jdid, qqaren:

“Cek tesdaheǧed

ad teksid Adlis ittwannḍen,

ad tekksed icemmiɛen nnes,

minzi Cek tᵉttwaɣarṣed

uca s Idammen nnec

tesɣid aneɣ i AREBBI,

zi kuř taqbič d řgens d cceɛb.” [g]

10 ”Cek tarrid ten d ict n tgelda

n ikehhanen d ijeǧiden

i AREBBI nneɣ,

u nitni ad ḥekmen

am ijeǧiden x temmurt.” [h]

11 Xenni ẓriɣ, uca sřiɣ tmijja n waṭṭas n lmalakat nnḍent i řɛarc uřa n imuddaren d imɣaren, uca tuɣa atent ɛecra-ařaf di ɛecra n řuřuf u ařaf di řuřuf, [i] 12 qqaren s tmijja ijehden:

“Izmar nni ittwaɣarṣen

isdaheǧ ad iṭṭef

ṣṣulṭa d wagřa d tiɣit,

d jjehd d ccan d uɛuǧi,

d lbaraka!” [j]

13 Uca kuř ijj i dd-ixeřqen deg ujenna u x temmurt d sadu temmurt u x řebḥar, wah, qaɛ min iǧan daysen, sřiɣ asen, qqaren:

“Lbaraka d ccan d uɛuǧi d ṣṣulṭa

ad iřin i wenni iqqimen x řɛarc

u i Yezmar i řebda qaɛ!”

14 Uca umi arebɛa n imuddaren nnan: “Amin!”, wḍan imɣaren ɣar temmurt, sejden.