1 Ari i lmalak di tmesmunt n Sardis!

“Ammu i iqqar wenni ɣar iǧa sebɛa n Arruḥat n AREBBI d sebɛa n yetran:

‘Necc ssneɣ řexdayem nnec, aqa ɣarek isem, belli aqa teddared, maca cek aqa tᵉttmettid. [a] 2 Ḥḍa, sejhed min iqqimen, inni tenwid cek ad ten tᵉttejjid ad tᵉmmtem, maɣar ufiɣ aqa řexdayem nnec war kemmřent ca ɣar AREBBI. 3 Ɛqeř mliḥ, mammec xas tesřid u mammec tᵉṭṭfed, ḥḍa uca tub! Maca mařa war tᵉttfiqed, ad ɣarek dd-aseɣ am uceffar, war tessined ca di man tasaɛɛet i xak dd ɣa beddeɣ. [b] 4 Maca ɣari ca n ismawen di Sardis, inni war issxemjen ca arruḍ nsen uca nitni gguren zzati s warruḍ d acemřař, minzi nitni sdaheǧen t.

5 Wenni i ɣa iɣellben ammu, ad as yarḍen arruḍ d acemřař. Ɛemmarṣ ad kkseɣ isem nnes zeg Wedlis ittwanḍen n Tudart, maca ad cehdeɣ x yisem nnes zzat i Baba d lmalakat nnes. [c]

6 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.’ ”

7 Ari i lmalak n tmesmunt n Filadilfiya!

“Ammu i iqqar Umqeddas wenni d Tidett d wenni ɣar iǧa tsarut n Dawud d wenni i ɣa yarezmen, xenni uřa d ijjen ad ibelleɛ, d wenni i ɣa ibellɛen, xenni uřa d ijjen ad yarzem: [d]

8 ‘Necc ssneɣ řexdayem nnec. Xzar, Necc ggiɣ zzatec ict n tewwart tarzem, tenni uřa d ijj war izemmar ad tt ibelleɛ, minzi waxxa jjehd nnec d ameẓyan, qaɛ amenni teḥḍid Awař inu uca war tenkared ca Isem inu. 9 Xzar, ad wceɣ ca zi temzida n cciṭan, inni iqqaren aqa nitni d Udayen, maca nitni war ǧin ca amenni, maca nitni ssxarriqen. Xzar, ad ten arreɣ ad ac wḍan ɣar iḍaren nnec. Nitni ad neɛmen belli Necc ssɛizzeɣ cek. [e]

10 Minzi aqa cek teḥḍid Awař inu n ṣṣbar, ad xak ḥḍiɣ ɛawed zi tsaɛɛet n ujarreb tenni i d ɣa yasen x temmurt marra i ujarreb n yinni izeddɣen x temmurt. 11 Necc ad dd-aseɣ deɣya. Ṭṭef di min ɣarek, ḥima uřa d ijj war d ac ittekkes ca ttaj nnec. [f]

12 Wenni i ɣa iɣellben ad t ggeɣ d apilar di Zzawect Tameqqrant n AREBBI uca war zzayes ittwammeksi ɛemmarṣ. Necc ad xas ariɣ Isem n AREBBI inu d yisem n tendint n jdid, Urcalim i dd ɣa ihwan zeg ujenna zi AREBBI inu, uřa d Isem inu n jdid. [g]

13 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.’ ”

14 Ari i lmalak n tmesmunt n Layudikiya

“Ammu i iqqar wenni d Amin, Acehhad amtiqqi d tidett, wenni d beddu n marra min dd-ixřeq AREBBI: [h]

15 ‘Necc ssneɣ řexdayem nnec, aqa cek war tesmiḍed war teḥmid. Meɛlik beɛda tsemḍed niɣ teḥmid! 16 S uyenni, umi cek temřuded, war teḥmid, war tesmiḍed, ad cek ɛuqqeɣ zeg uqemmum inu. 17 Minzi cek teqqared: Necc ɣari agřa uca immarni-dd ɣari wagřa, war d ayi ittxeṣṣi walu, am war tessined ca belli aqa cek tḥeřced u dayek řeɣben d zzeřḍ u aqa cek d adarɣař d aɛaryan, 18 ad cek neṣḥeɣ maḥend ad xafi tesɣed wureɣ iqquren, ikkin timessi, ḥima ad tdewřed d bu-wagřa, uřa d arruḍ d acemřař, ḥima ad t tyarḍed u war teqqim tḍehhar ɛad řefḍiḥet n tuɛɛaryent nnec. U dhen ɛawed ddhen x tiṭṭawin nnec maḥend ad taf tettwařid. [i] 19 Marra wenni ssɛizzeɣ, ttwebbxeɣ t u arebbiɣ t. Xenni cḍar, tub! [j] 20 Aqa da, Necc beddeɣ ɣar tewwart, ssqarqubeɣ-dd. Mařa isřa ḥed i tmijja inu, ad yarzem tawwart, Necc ad ɣares adfeɣ uca ad kis mmunesweɣ d netta akidi.

21 Wenni i ɣa iɣellben ad as wceɣ, ḥima ad iqqim akidi x řɛarc inu, am Necc ɣellbeɣ uca qqimeɣ ak-d Baba x řɛarc nnes. [k]

22 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.’ ” *