1 Axemmi n Asaf.

A řgens inu, ewc amezzuɣ

i Ccariɛa inu!

Meyyřem amezzuɣ nwem

ɣar wawařen n uqemmum inu.

2 Necc ad arzmeɣ aqemmun inu

s wawař iweznen,

ad barrḥeɣ řemɛani innuffaren

zeg wecḥař uya, [a]

3 timesřayin nni nesřa u nessen,

nni d aneɣ ḥajan řejdud nneɣ.

4 War ten nᵉtteffar zeg iḥenjiren nsen,

zi jjiř i dd ɣa yasen.

Ad nbarreḥ s tmegga iṣebbḥen n SIDI,

s tmegga nnes ijehden

d lmuɛjizat nnes nni tuɣa igga.

5 Maɣar Netta igga ict n cchadet

di Yaɛqub,

issars ict n Ccariɛa di Israil,

nni tuɣa yumur i řejdud nneɣ,

maḥend ad tt ssɣaren i iḥenjiren nsen, [b]

6 maḥend jjiř i dd ɣa yasen ad issen,

iḥenjiren nni dd ɣa ittwaxeřqen

awarni asen,

u xenni uřa d nitni ad kkaren

ad tt sseɛdun i iḥenjiren nsen,

7 maḥend nitni ad ssarsen

řaman nsen x AREBBI,

war ttᵉttun ca timegga n Arebbi,

maca ad ḥḍan tiweṣṣa nnes,

8 war ttiřin am řejdud nsen,

ijj n jjiř aɣennan d iɣewwɣen,

ijj n jjiř s wuř war imten

u s arruḥ iɣdaren Arebbi. [c]

9 Ayt n Ifrayim, imjebbaden n řqews,

ɛeqben deg wass n umenɣi.

10 War ḥḍan Řɛahd ak-d AREBBI,

ugin ad uyuren di Ccariɛa nnes.

11 Ttun timegga nnes d lmuɛjizat,

tinni i d asen isscen.

12 Zzat i tiṭṭawin n řejdud nsen

igga Netta ict n lmuɛjiza,

di temmurt n Miṣra,

deg iyyar n Ṣuɛan.

13 Netta ibḍa řebḥar

uca isseẓwa ten zzayes,

ijja aman ad bedden am weɣbar. [d]

14 Netta issqebbeḍ i-ten s wass

s useynu,

s ǧiřet marra s tfawt n tmessi. [e]

15 Netta ibḍa řejruf di řexřa,

iwca i řgens ad isu s ufeyyeḍ

amecnaw zeg waman ihewřen. [f]

16 Netta ijja řɛunṣarat

ad feyyḍent zi sseǧaḥ,

Netta ijja aman

ad hwan am yiɣezran.

17 Maca nitni arnin

di ddnub nsen xas,

ɣewwɣen x Umɛuǧi x kuřci

umi tuɣa aten di tnezruft yuẓɣen.

18 Nitni jarrben Arebbi

deg wuř nsen

umi ttaren macca

ɣar meẓri n řeɛmar nsen.

19 Ssiwřen ḍidd i AREBBI, nnan:

“Ma izemmar Arebbi

ad issewjed ṭṭabřa di řexřa? [g]

20 Xzar, Netta iwta di teṣḍart,

ařami dd-uzzřen zzayes

waman d iɣezran.

Ma izemmar Netta ad iwc aɣrum

niɣ issewjed aysum i řgens nnes?” [h]

21 S uya isřa SIDI uca iffugem.

Timessi tarɣa ḍidd i Yaɛqub,

ikkar-dd weɣḍab nnes ḍidd i Israil, [i]

22 maɣar war uminem ca di AREBBI,

war ttciřin deg usenjem nnes.

23 Netta yumur iseynuten sennej

u yarzem tiwwura n ujenna.

24 Ifarreɣ-dd xasen ‘manna’

maḥend ad ccen,

iwca asen imendi zeg ujenna. [j]

25 Marra ccin aɣrum

n yinni daysen řɛezz.

Issekk asen macca nsen ɣar webrid

ařami jjiwnen. [k]  [l]

26 Netta igga asemmiḍ

n manis dd-tneqqar tfuct

ad ikkar deg ujenna,

s tzemmar nnes issekk-dd

asemmiḍ n ljanub. [m]

27 Ijja aysum ad xasen dd-iwḍa

am wenẓar n tɛejjajt,

ijḍaḍ s wafriwen am yijdi n řebḥur.

28 Netta ijja i-ten ad wḍan

di řwest n řmargeḥ n řɛeskar,

ɣar marra iɣezdisen n tzeddiɣin nsen.

29 Nitni ccin u jjiwnen qaɛ,

ksin min di tuɣa ḍemɛen.

30 Nitni tuɣa ɛad war ttwafekken

zeg weḍmaɛ nsen,

macca tuɣa ɛad deg uqemmum nsen,

31 umi xasen ikkar weɣḍab n AREBBI.

Netta inɣa inni iǧan

d iqebbuzen qaɛ jar asen,

yarra-dd iḥudriyyen n Israil

ad aḍaren ɣar tɛejjajt n temmurt. [n]

32 Maca qaɛ amenni arnin ggin ddnub,

war uminen di lmuɛjizat nnes.

33 Netta ijja ussan nsen

ad ɛdun am yijj n řefwar,

iseggʷusa nsen am yict n řɛurret.

34 Xmi ten i ɣa ineɣ, arzun x Arebbi,

dewřen-dd ɣares, arzun xas s cḍaret.

35 Nitni ɛeqřen

aqa AREBBI d Taṣḍart nsen,

Arebbi, Amɛuǧi x kuřci,

d Amefdi nsen. ◼78:35 ’Amefdi‘ - ijj n bnadem nni ifdin niɣ ifekken ijj n ismeɣ niɣ ict n tesmeɣt, niɣ ijj n bnadem dayes amarwas, niɣ ict n temmurt ɛlaḥsab řqanun, aqa netta ad ixeǧes ttaman i ɣa iřiqqen ismeɣ nni, niɣ ad ixeǧeṣ amarwas i ittxeṣṣa niɣ ttaman n temmurt nni niɣ ṣṣadaq i temɣart am mammec i d as icuwwar. S uyenni amefdi war ittfekki amenni waha maca netta d ijj wenni ifekken x řeḥsab řqanun, war ifekk břa ma ad ixeǧeṣ ttaman niɣ tamesřact i d as ittxeṣṣa ad tt iwc. D man aya i icuwwar ad t nessen x wawař ‘amefdi’ u x wawařen i ɣares dd-iqqnen am: ‘ifdi’, ‘ad ifdi’, niɣ ‘ad ifdi kur aseggʷas ijj n wezyen n yeyyar nnes’, u mammec nneɣni. S uyenni Yasuɛ Lmasiḥ d Amefdi i iǧa i marra iwdan minzi Netta iwca Tudart nnes di ṭṭweɛ nneɣ ammu i xaneɣ ifdi s idammen nnes izdigen iqeddsen, u ammu i ɣa ifdi Israil (‘marra Udayen inni i ɣa yamnen deg Yisem nnes’) d temmurt akides xmi dd ɣa yas i twařa wiss tnayen deg uneggar n wussan. Maca cciṭan war iǧi amenni. Netta ittegg am uceffar am uxcin u am uɣeṣṣab. War d as itthimmi řxar n bnadem maca mɣir ccan n yixef nnes, ḥima marra iwdan ad t ɛebden umi ten issiggʷej x Arebbi Iddaren s ixarriqen nnes d tseḥḥart nnes (xẓar Yḥ. 10).

36 Maca nitni ssniɛmiřen zzates

s uqemmum nsen,

s yiřes nsen ssxarriqen xas.

37 War tuɣi uř nsen imten akides,

war uyuren s řmanet

ak-d Řɛahd nnes.

38 Netta maca tuɣa yareḥḥem daysen

u isseṣřeḥ x řmuɛṣiyyet nneɣ,

war yareddeǧ, maca aṭṭas n twařawin

ijja zeg weɣḍab nnes

u war iggi marra asɛar nnes ad ikkar.

39 Netta iɛqeř aqa nitni

mɣir d aysum waha,

d ijj n usemmiḍ iɛeddu

war dd-ittɛiqqib.

40 Mecḥař n twařawin

sɛaren t di řexřa,

ggin as řeḥriq di tnezruft!

41 Twařa awarni tenneɣnit

qeǧben Arebbi,

ggin řeḥriq i Umqeddas n Israil.

42 War xarrṣen ca ɛad deg ufus nnes,

deg wass nni řami ten ifda

zeg ufus n wenni i-ten iḥṣaren, [p]

43 ařami igga řeɛřamat di Miṣra,

uřa d lmuɛjizat nnes deg iyyar n Ṣuɛan,

44 ařami igga iɣezran nsen

ad dewřen d idammen,

uřa d marra řɛunṣarat nsen,

ḥima nitni war zemmaren

ad zzaysen swen ɛad. [q]

45 Issekk jar asen

ijj n weyřaf n ibeɛɛac i ten iccen,

uřa d iqarqriwen nni ten iteḥḥan. [r]

46 Netta iwca řɣiǧet nsen

i tmuɣri iṣarrḍen,

uřa d ṣṣabet nsen i tmuɣri. [s]

47 Inɣa tazayart nsen s tebrurri,

uřa d izemmuren nsen s tkeḍfin. [t]

48 Netta ijja řmař nsen i ubruri,

tiḥimriwin nsen i wassamen.

49 Netta issekk řḥaduq n weɣḍab nnes

jar asen,

amuzzar d tefqeḥt d řḥeṣran,

umi dd-issekk lmalakat s jjrayeḥ.

50 Netta iseggem ijj n umesraq

i weɣḍab nnes,

war issɛizz x řeɛmar nsen zi řmewt,

isseɛdu řmař nsen i ṭṭaɛun. [u]

51 Netta inɣa marra imenza di Miṣra,

imenza n yeryazen daysen teryast

deg iqiḍan n Ḥam. [v]

52 Igga řgens nnes ad issgeɛɛed am wuǧi,

issqebbeḍ i-ten

am yict n tḥimart di řexřa.

53 Indeh i-ten di řaman,

war ggʷiden walu,

maɣar řebḥar idřa řɛedyan nsen. [w]

54 Iwyi ten ɣar temmurt nnes iqeddsen,

ɣar wedrar-a nni d ikseb ufus afusi nnes.

55 Issuffeɣ řegnus zzat i wudem nsen,

igga ad asen dd-tekkar tesɣart nsen

s ufiřu n řeɛbar,

uca issezdeɣ tiqebbař n Israil

deg iqiḍan nsen. [x]

56 Maca nitni qeǧben t, sɛaren AREBBI,

Amɛuǧi x kuřci,

war hḍin cchadat nnes.

57 Nitni dewřen ɣar ḍeffar,

ggin s řeɣdar am řejdud nsen.

Nitni weddaren

am yict n fřitca n řqews

i iteffɣen s řexdeɛ.

58 Sɛaren t s řegɛudi nsen

i x wehhben tiɣarṣa,

arrin t ad yasem

s řexyařat nsen ineqcen [y]

59 AREBBI isřa man aya

uca ittwassarɣ weɣḍab nnes,

idweř iɛiff aṭṭas zi Israil.

60 Netta ijja Tazeddiɣt nnes di Cilu,

Aqiḍun mani tuɣa izeddeɣ jar iwdan. [z]

61 Netta yarra jjehd nnes

ɣar tmeḥbast,

uřa d talwizt nnes

ɣar ufus n wenni t iḥeṣṣaren. [aa]

62 Netta isellem řgens nnes i ssif,

yarɣa weɣḍab nnes x tesɣart nnes.

63 Timessi tecca iḥudriyyen nsen,

tiɛzariyyin nsen

war xasent dd-iwyen iɣennijen.

64 Ikehhanen nsen wḍan s ssif

u tijjař nsen war runt ca. [bb]

65 Xenni ifaq-dd Sidi inu

am ca n ijj i tuɣa iṭṭṣen,

am yijj n bu-teɣruḍt

nni isɣuyyu zi binu.

66 Netta iwta inni t iḥeṣṣaren

ɣar ḍeffar,

igga daysen řefḍiḥet i řebda. [cc]

67 Aqiḍun n Yusuf inḍar i-t,

taqbič n Ifrayim war tt ifarz.

68 Ifarz taqbič n Yahuda,

adrar n Ṣihyun wenni tuɣa ittexs.

69 Ibna Zzawect nnes Iqeddsen

am ijenwan yuɛřan,

am temmurt nni issemten i řebda.

70 Ifarz amsexxar nnes Dawud,

iksi t zi řkurit n wuǧi. [dd]

71 Ijja i-t ad dd-yas

zi ɣar ḍeffar n wuǧi,

maḥend ad yarwes Yaɛqub,

řgens nnes,

uřa d Israil, řwart nnes. [ee]

72 Netta yarwes i-ten

ɛlaḥsab řeṣfayet n wuř nnes,

igewwed i-ten s ufus izemmaren.