1 I umeqqran n imeɣnajen. ‘War t ttareddeǧ!’ N Dawud. Tira ineqcen. Umi yarweř zi Cawul deg ifri.[a]

2 Ḥinn xafi, a AREBBI, ḥinn xafi,

maɣar řeɛmar inu yarekkwař-dd ɣarek.

Necc ufiɣ adurri

di tiři n wafriwen nnec,

ař ɣa ɛdunt řmuṣibat.

3 Necc ad řaɣiɣ ɣar AREBBI,

Amɛuǧi x kuřci,

ɣar Arebbi wenni d ayi ɣa inedhen

ɣar uneggar iṣebḥen.

4 Netta ad dd-issekk asenjem inu

zeg ujenna,

ad issbehdeř wenni ixsen

ad ayi isarḍ. Silah.

AREBBI ad issekk

tamexsiwt nnes icewwaren

d řaman nnes.

5 Řeɛmar inu aqa-t jar iyraden,

zzřeɣ jar iṣefḍawen yareqqen,

tarwa n bnadem, inni tiɣmas nsen

am lansat d fřitcat n řqews,

iřes nsen am yijj n ssif iqḍeɛ.

6 A AREBBI, sgeɛɛed Ixef nnec

tiwa i ijenwan,

arr aɛuǧi nnec

sennej i marra tammurt. [b]

7 Nitni ggin tracca i iṣuraf inu,

řeɛmar inu tuɣa iɣnes.

Nitni ɣzin ayi aḥfur,

maca wḍan dayes simant nsen.

Silah. [c]

8 A AREBBI, uř inu yarekken,

uř inu yarekken.

Aqa necc ad ɣennjeɣ ad zehhdeɣ. [d]

9 Faq, aɛuǧi inu! Faq,

lharpa d řgambri!

Necc ttexseɣ ad ssfaqeɣ

tafawt n řefjar.

10 Necc ad Cek qadiɣ jar řegnus,

a Sidi inu,

ad zehhdeɣ jar ccuɛub i Cek. [e]

11 Maɣar tamexsiwt nnec icewwaren

tᵉttakkwaḍ ař ijenwan,

řaman nnec ař iseynuten. [f]

12 A AREBBI, sgeɛɛed Ixef nnec

tiwa i ijenwan,

arr aɛuǧi nnec

sennej i marra tammurt.