1 Mmi inu, war ttᵉttu

taɣuri inu n Ccariɛa,

ejj uř nnec ad iḥḍa tiweṣṣa inu,

2 maɣar nitenti ad ac dd-iwyent

aṭṭas n wussan,

uřa d iseggʷusa n tudart d řehna. [a]

3 Tamexsiwt icewwaren d řaman

war ten tejjid ad zzayek ffɣen,

qqen i-ten ɣar yiri nnec,

ari ten x teřwiḥt n wuř nnec, [b]

4 xenni ad tafed arḍa

d řefhamet iṣebḥen

di tiṭṭawin n AREBBI u n bnadem.

5 Tiqq di SIDI s wuř nnec kuřci,

war ttcařa x řefhamet n yixef nnec.

6 Ssen i-t di marra ibriden nnec,

xenni Netta ad iseggem imesraq nnec. [c]

7 War ttegg ixef nnec d amiɣis.

Ggʷed SIDI u beɛɛed

x min iǧan d aɛeffan. [d]

8 Aya ad yiři d agenfu

i iẓewran n tudart nnec,

d wenɛac i iɣsan nnec.

9 Weqqar SIDI s wagřa nnec,

s tmezwarut n marra ṣṣabet nnec. [e]

10 Xenni ad ttwaccuren

řehrit nnec s ufeyyeḍ,

u tisirin nnec n uḍiř

ad dduqqzen s binu n jdid. [f]

11 Mmi inu, war neṭṭar ttarbiyyet n SIDI,

war ttarra aɛrur x uwebbex nnes, [g]

12 maɣar wenni issɛizza SIDI,

ad t iɛaqeb ɛawed,

am ittegg babas ak-d mmis

wenni x yarḍa. [h]

13 Sseɛd n bnadem nni ittafen tiɣit,

uřa d bnadem nni ittkessaben řefhamet,

14 maɣar min tᵉttawi nettat,

teḥřa x tsebbabt di nnuqart,

u řɣiǧet nnes teḥřa x wureɣ ittissiqen. [i]

15 Nettat tiɣřa x řmarjan,

u marra min di tzemmared

ad temmeẓred,

war izemmar akides ittemqudda. [j]

16 Tuzzeggart n wussan ɣares

deg ufus nnes,

agřa d ccan aqa aten x uzeřmaḍ nnes.

17 Ibriden nnes d ibriden n řeḍrafet,

u marra imesraq nnes aqa aten d řehna.

18 Nettat d tacejjart n tudart

i yinni ɣares iřesqen,

kuř ijjen wenni dayes itteṭṭfen,

ad yiři d amesɛud. [k]

19 SIDI igga dsas n temmurt s tiɣit nnes,

s řefhamet nnes igga ijenwan.

20 Zi tussna nnes dduqqzen-dd

waman ihewřen,

ttnecnicen-dd iseynuten nnda. [l]

21 Mmi inu, war tent tejjid

ad ffɣent zi tiṭṭawin nnec,

ḥḍa aftan d uḥaḍur, ◼3:21 ’tent‘ - awař-a iceyyar ɣar tiɣit d řefhamet i x issawař umseřmad n tiɣit di ayet 13 n wudem-a.

22 maɣar ad iřin d tudart i řeɛmar nnec

uřa d arḍa i yiri nnec.

23 Xenni ad tuyured abrid nnec di řaman,

war tᵉttneqriḍed deg uḍar nnec. [n]

24 Mařa truḥed ad tezzřed,

war tennxeřɛid,

u xmi i ɣa tezzřed, ad yiẓid yiḍeṣ nnec. [o]

25 War tteggʷed zeg unexřiɛ n deɣya

uřa zeg wareyyeb s ufus n iɛeffanen

xmi dd ɣa yas. [p]

26 Maɣar SIDI ad ac yiři d asenned nnec,

Netta ad iḥḍa afus nnec zi tsarrift.

27 War qeṭṭeɛ řxar x bab nnes,

mařa aqa-t deg ufus nnec

maḥend ad tegged řxar.

28 War qqar i jjar nnec:

‘Ruḥ uca ɛqeb-dd,

tiwecca ad ac tt wceɣ!’,

mařa tamesřact aqa-tt akidek.

29 War nekkwi řɣar ak-d jjar nnec,

umi akidek izeddeɣ di řaman.

30 War temcubbuc

ak-d ijj n bnadem břa ssibbet,

mařa netta war d ac iggi řɣar.

31 War ttasem zeg ijj n bu-řexcunet,

ḥḍa maḥend war tᵉttixḍared

uřa d ijj zi marra ibriden nnes. [q]

32 maɣar wenni itteffɣen zeg webrid,

aqa-t d nnɛi i SIDI,

maca Netta ittegg řaman nnes

deg inni igguren nican. [r]

33 Nneɛřet n SIDI

aqa-tt x taddart n uɛeffan,

maca tazeddiɣt n imseggaden

ad tt ibarek. [s]

34 Mařa d imestehzayen,

ad zzaysen isstehza Netta,

maca mařa d inni ittwaḥṣaren,

ad asen iscen arḍa nnes. [t]

35 Imiɣisen ad warten ccan,

maca ibuhařiyyen

ad ssarbun řefḍiḥet x yixef nsen.