1 Aryaz, wenni isseqsḥen yiri nnes

awarni řami t ɛaqben

aṭṭas n twařawin,

ad yarẓ deg ijj n umur,

xenni war din iǧi ɛad ugenfu.

2 Mařa dewřen imseggaden s ṣṣulṭa,

xenni ifarreḥ řgens,

maca mařa iḥekkem uɛeffan,

iweɛɛeḍ řgens. [a]

3 Bnadem ittexsen tiɣit, issfarraḥ babas,

maca wenni ittmunan

ak-d temɣarin n farq-ccɣeř,

yareddeǧ agřa nnes. [b]

4 Ajeǧid issbedda tammurt s řḥeqq,

maca aryaz nni issgeɛɛaden

ḍḍariba aṭṭas n twařawin,

iheddem i-tt.

5 Aryaz nni isswaṭan jjar nnes,

ittbezzaɛ ict n tracca i iḍaren nnes.

6 Deg uɛeddi n ijj n weryaz aɛeffan

innuffar dayes ijj n řfex,

maca amsegged ittesřiwřew u ifarreḥ.

7 Amsegged issen ddeɛwet n imarxa,

aɛeffan war ifehhem walu di tussna. [c]

8 Imestehzayyen ssekkaran

aɣewweɣ di tendint,

maca imiɣisen ssneqřaben aɣḍab.

9 Mařa amiɣis iksi-dd tanfuč

i yijj n ubuhaři,

xenni netta ggur ad ixeyyeq wanita

u ad iḍḥec, maca war din řhudnet.

10 Iryazen umi itteɛjib idammen

carrhen wenni ikemmřen,

maca inni igguren nican

xezzaren ɣar řeɛmar nnes.

11 Abuhaři iḍeǧeq i marra buḥbeř nnes,

maca amiɣis ittqemmeɛ i-t. [d]

12 Řḥakem nni itticen taynit

i řhard n ixarriqqen,

zzayes ad iřin

marra imsexxaren nnes d iɛeffanen.

13 Amezřuḍ d weryaz ittwaḥsaren řebda,

msagaren,

SIDI issnewwar tiṭṭawin nsen

s tnayen idsen. [e]

14 Ajeǧid nni itticen s tidett tasɣart

i imarxa di ccreɛ,

řkursi nnes ad iqqim ibedd i řebda. [f]

15 Aɛmud d uwebbex tticen tiɣit,

maca aḥenjir jjin t i yixef nnes,

yarra yemmas ad tseḍḥa. [g]

16 Mařa dewřen iɛeffanen jehden,

xenni yarenni uxeṭṭu,

maca imseggaden

ad ẓaren weṭṭu nsen. [h]

17 Arebba mmic u netta ad cek issareyyeḥ,

netta ad iwc lbarakat timiẓidin

i řeɛmar nnec. [i]

18 Mařa war din řewḥiy, ittfuccuḥ řgens,

sseɛd n wenni iḥeṭṭan Ccariɛa.

19 Ijj n ismeɣ war ittejji

ad t arrebban s wawařen,

maɣar waxxa netta ifehhem xak,

war xak dd-ittarri ca.

20 Ma cek ɛemmarṣ war teẓrid ijj n weryaz

ittqeǧiq s wawařen nnes?

Aqa din řayas ktar i ubuhaři uřa xas. [j]

21 Mařa ijjen issubeḍ ismeɣ nnes zi temẓi,

ad idweř ɣar uneggar war t ittqidi.

22 Aryaz ittarrujduden

issekkara-dd amcubbec,

u bab n wesɛar ittegg aṭṭas n ixeṭṭan. [k]

23 Nnfaxet n bnadem ad t isswaḍeɛ,

maca amwaḍeɛ n buḥbeř

ad as ittwagg ccan. [l]

24 Wenni ibeṭṭan ak-d uxewwan,

icarreh ixef nnes,

maɣar netta ittesřa i nneɛřet,

maca war t iqqar ca. [m]

25 Tiggʷudi zeg iwdan tneddeh ɣar řfex,

maca wenni ittcařan x SIDI,

ad ittwassgeɛɛed di řaman.

26 Aṭṭas arezzun udem n řḥakem,

waxxa tasɣart n kuř ijj tᵉttas-dd zi SIDI. [n]

27 Aryaz aɣeccac d nnɛi i imseggaden,

maca wenni igguren nican

deg webrid nnes,

aqa-t d nnɛi i uɛeffan.