1 War ttasem.

zeg iryazen iɛeffanen,

war arezzu ca tmunet akidsen. [a]

2 Maɣar uř nsen itteqqer ɣar ureddeǧ,

awařen n iyencicen nsen

i dd-ittwayen ɣar arẓiyyet. [b]

3 Taddart tᵉttwabna s tiɣit,

tᵉttwassemten s řefhamet,

4 s tussna ttwaɛemmaren

ixxamen n daxeř,

s marra agřa iɣřan d wagřa iřiqqen.

5 Aryaz amiɣis ijhed,

aryaz n tussna yarenni di jjehd nnes, [c]

6 maɣar ittxeṣṣa

ad ittwandeh umenɣi s udebbar,

u s řemɣaret n umcawar ad yiři usenjem. [d]

7 Tiɣit tuɛřa x ubuhaři,

netta war yarezzem aqemmun nnes

di tewwart n tendint. [e]

8 Wenni ittxarriṣen di řɣar,

ad as řaɣan arrays n bu-teḥřaymect.

9 Řemwayař n uxarreṣ n ubuhaři d ddenb,

u amestehziy d nnɛi i bnadem.

10 Mařa tarxud zeg ixef nnec

deg wass n řeḥṣaret,

ammu uřa d jjhed nnec ad tᵉttwaḥṣar.

11 Senjem inni ittwaṭṭfen

maḥend ad ttwanɣen,

inni ten ittawyen

ɣar mani ten i ɣa nɣen,

sbedd i-ten! [f]

12 Mařa cek ad tinid:

“Xzar, aqa war nessin walu x man aya!”,

ma wenni iwezznen uřawen,

war t issargib?

Wenni iḥeṭṭan řeɛmar nnec, issen i-t!

Netta ad ixeǧeṣ bnadem

ɛlaḥsab řxedmet nnes. [g]

13 Ecc tamment, a mmi,

maɣar nettat teṣbeḥ,

tamment n teɣrast

aqa d tmiẓidt i waneɣ nnec.

14 Ammu i teǧa tussna n tiɣit

i řeɛmar nnec.

Mařa tufid tt, xenni teǧa tiwecca,

řayas nnec war ittwaqeṭṭeɛ ca. [h]

15 A aɛeffan, war tᵉttḥama

x tzeddiɣt n umsegged,

war heddem amcan n wareyyeḥ nnes!

16 Maɣar amsegged

ad iwḍa sebɛa n twařawin,

ad dd-ikkar ɛawed,

maca iɛeffanen ad nnqarḍen s řɣar. [i]

17 War farreḥ i uweṭṭu n řeɛdu nnec,

mařa netta inqarḍ,

ejj uř nnec war ifarreḥ, [j]

18 maḥend SIDI war t iẓarr

u man aya ad yiři d řɛib di tiṭṭawin nnes,

ařami Netta ad xas issḥeyyed aɣḍab nnes.

19 War ttxeyyiq aṭṭas

x wenni itteggen řɣar,

war ttasem zeg iɛeffanen, [k]

20 maɣar aqa wenni itteggen řɣar

war ɣares tiwecca,

řefnar n iɛeffanen ad ittwassexsi. [l]

21 A mmi, ggʷed SIDI d ujeǧid,

war ttxeǧeḍ ca ixef nnec

ak-d yinni ixsen ad nqeřben kuřci,

22 maɣar ad dd-yas uḍeyyeɛ nsen

deg ijj n umur,

wi issnen aneggaru aɛeffan

n iseggʷusa nsen?

23 Uřa d yina d awařen iweznen n imiɣisen.

Asfarz n wudmawen di ddeɛwet

war iǧi ca mliḥ. [m]

24 Wenni iqqaren i uɛeffan: “Cek d amsegged!”,

wanita ad t neɛřen řegnus,

ad t carhen ccuɛub. [n]

25 Maca inni ten i ɣa iḥakmen,

ad iřin mliḥ,

lbaraka s marra řxar ad ɣarsen dd-tas.

26 Am ijjen wenni issudumen iyencicen,

ammu i yeǧa wenni dd-ittarran

s wawařen iseggmen.

27 Sewjed řxedmet nnec barra,

kemmeř i-tt i yixef nnec deg iyyar,

uca bna taddart nnec awarni man aya!

28 War ttiři d acehhad břa ssibbet

x jjar nnec.

Ma iɛeddeř ad tɣarred s iyencicen nnec?

29 War qqar: “Am mammec i d ayi igga,

ammu i dd-as ɣa ggeɣ uřa d necc!”,

maɣar Necc ad dd-xeřfeɣ zi kuř ijjen

ɛlaḥsab řxedmet nnes. [o]

30 Necc kkeɣ x yeyyar n ijj n umeɛguz,

x umarjeɛ n uḍiř n ijj n bnadem

s wuř nnes war imtinen.

31 Xzar, tgeɛɛed-dd xas marra teyzit,

tedřa tzeggʷart udem n temmurt nnes,

aqa řḥiḍ nnes n weẓru ittwahdem.

32 Řami tt ẓriɣ, ksiɣ tt ɣar wuř inu,

ẓriɣ tt uca ksiɣ tt am yijj n uwebbex.

33 “Ejj ayi ad ṭṭṣeɣ cwayt drust,

cwayt drust n unudem,

cwayt drust n ubuzzeř s ifassen ḍefṣen, [p]

34 dinni dd ɣa yas zzeřḍ nnec,

uřa d řeɣben nnec

am yijj n weryaz s řesnaḥ.” [q]