1 Isem aṣebḥan iḥřa

x waṭṭas n wagřa,

aḥinni iḥřa x nnuqart d wureɣ.[a]

2 Bu-wagřa d umezřuḍ ttemsagaren,

SIDI i-ten iggin marra. [b]

3 Bnadem ifettnen ittwařa řɣar

uca ittnuffar,

maca iḥafiyyen arennin gguren

uca ad ttwaɛaqaben. [c]

4 Řmunet i uwaḍeɛ d tiggʷudi n SIDI,

d agřa d ccan d tudart.

5 Isennanen d řefxux aqa aten

x webrid n wenni ifarɣen,

wenni iḥeṭṭan řeɛmar nnes,

ittɣima ɣar řaggʷaj nsen.

6 Darreb aḥudri

ɛlaḥsab řeqyas n webrid nnes,

waxxa netta iwsar, war xas ittḥeyyid ca.

7 Bu-wagřa ittṣeǧaḍ x imezřaḍ,

bu-umarwas d ismeɣ

n wenni d as yareṭṭřen.

8 Wenni izarrɛen řɣecc, ad imjar řeɣben,

aɛmud n uduqqez nnes n ufugem ad ifna. [d]

9 Wenni ɣar iǧa řxezrat ṣebḥent,

ad ittwabarek,

minzi netta ittic i imezřaḍ

zeg weɣrum nnes. [e]

10 Aẓẓeř x umestehziy, ad iffeɣ řhemm,

aqa ibedd umḥarwaḍ d řefḍiḥet.

11 Wenni ittexsen řeṣfayet n wuř,

wenni ɣar iǧa iyencicen iccuren s arḍa,

ajeǧid ad yiři d ameddukkeř nnes. [f]

12 Tiṭṭawin n SIDI ḥeṭṭant x tussna,

maca awařen n uɣeddar ad ten ibḍeř.

13 Ameɛguz iqqar:

“Aqa din ijj n wayrad di barra!

Ad taɣ balak ad ttwanɣeɣ

di řwesṭ n wazzayen!” [g]

14 Aqemmum n temɣarin tibarraniyyin

d ict n tesraft yuǧɣen,

wenni x iffugem SIDI, ad dayes iwḍa. [h]

15 Tubbuheřya tᵉttɣima třesseq

deg wuř n uḥudri,

aɛmud n uwebbex ad tt issuffeɣ zzayes. [i]

16 Wenni iḥeṣṣaren amarxu,

ad yarni di řemɣaret nnes,

wenni itticen i bu-wagřa,

ad iḥwaj waha. [j]

17 Ewc amezzuɣ nnec,

uca seř ɣar wawařen n imiɣisen,

arr uř nnec ɣar tussna inu.

18 Maɣar aqa mliḥ

mařa txemmřed ten di daxeř nnec,

mařa ad ten tesswejded jmiɛ

x iyencicen nnec.

19 Maḥend ad yiři utecři nnec x SIDI,

ad ac ten ssecneɣ řexxu, wah i cek.

20 Ma zeɛma war d ac uriɣ

awařen ifarzen aṭṭas,

ccuren s ccwar d tussna,

21 ḥima ad ac ssecneɣ řemten

n wawařen n tidett,

maḥend tzemmared ad dd-tarred s řaman

x wenni cek dd-issekken.

22 War ttkeccaḍ amarxu

maɣar netta d amarxu,

war řebbez řmeskin ɣar tewwart, [k]

23 maɣar SIDI ad asen yaɣ tasɣart nsen,

Netta ad ikecceḍ řeɛmar

n yinni i-ten ittkeccaḍen. [l]

24 War ttemddukkuř

ak-d aryaz ittarrujduden,

war ttidef ɣar bab n wesɛar,

25 maḥend cek war tᵉttnimid ca

ak-d imesraq nnes,

ad tegged řfex i řeɛmar nnec.

26 War ttadef jar inni itticen awař

s tmewciwt n ifassen,

jar inni iǧan d aḍman i imarwusa. [m]

27 Mařa war ɣarek min zi ɣa txeǧṣed,

mayemmi ijebbed qama nnec

zi sadu nnec? [n]

28 War smuṭṭuy aymir n wecḥař uya,

wenni ggin řejdud nnec. [o]

29 Ma teẓrid ijj n weryaz imeḥḍen

di řḥirfa nnes?

Ad t ssbedden zzat i wudem n ijeǧiden,

war iǧi ad ibedd zzat i wudem

n midden war di iǧi řaman.