1 Mařa xenni ɣarwem ca n ufewwej di Lmasiḥ, awařen s tayri i wuř, niɣ tamunt n Arruḥ, niɣ řeḥnunect di daxeř d arreḥmet, 2 kemmřem řefraḥet inu umi ɣa imun array nwem, ad ɣarwem tiři tayri d icten, d řeɛmar d ijjen uřa d uxarraṣ d ijjen. [a] 3 War tteggem ca uřa d ict n řḥajjet s umɛaned niɣ zi tuffet ixwan, maca ejj kuř ijj ad iweqqar wenneɣni ktar zeg ixef nnes s uwaḍeɛ. [b] 4 War ixezzar uřa d ijj ɣar ixef nnes waha, maca ejj kuř ijj ad ixzar ɛawed ɣar wenni d as yudsen. [c] 5 Ejj ad daywem tiři nneyyet i tuɣa ɛawed di Yasuɛ Lmasiḥ, [d] 6 wenni, am iǧa deg warwas n AREBBI, war iḥsib ca d takeccaḍt umi imqudda ak-d AREBBI, [e] 7 maca issexwa Ixef nnes, iksi ṣṣifet n umsexxar. Netta idweř deg warwas n bnadem, uca ittwaf di furma n bnadem. [f] 8 Netta isswaḍeɛ Ixef nnes uca idweř iṭṭaɛ ař řmewt, wah, ař řmewt n ṣṣalib. [g] 9 S uya issuɛřa i-t AREBBI qaɛ sennej uca iwca as Isem sennej i kuř isem, [h] 10 ḥima deg Yisem n Yasuɛ ad aḍaren marra ifadden nni iǧan deg ujenna u x temmurt u sadu temmurt, [i] 11 u ḥima ad iched kuř iřes belli Yasuɛ Lmasiḥ d SIDI i uɛuǧi n AREBBI, Babas. [j]

12 S uyenni, a imɛizzen inu, am mammec tuɣa tᵉṭṭaɛem řebda, war iǧi xmi akidwem ǧiɣ waha, řexxu ɛad ktar xmi xawem i ɣa aggʷjeɣ, xedmem s ufeyyeḍ i Tudart nwem s tiggʷudi d tarjijat, 13 minzi AREBBI d wenni daywem ixeddmen ař ɣa texsem u ad teggem min di tᵉmmeẓřem kenniw. [k] 14 Ggem marra břa řeɛkaset u břa amcubbec, [l] 15 ḥima ad tiřim břa řɛib, am tarwa imezdagen n AREBBI inni izeddɣen di řwesṭ n jjiř iɛewwjen d ifarɣen, u ḥima ad tbanem jar asen am tfawin di ddunect, [m] 16 maḥend ad tiřim di ṭṭweɛ nsen deg wemcan n Tudart, ḥima ad ɣari yiři usemɣar deg wass n Lmasiḥ, war uyureɣ baṭeř niɣ xedmeɣ s walu. [n] 17 Maca mařa ttᵉttwarucceɣ am yict n tewhibt n useyyeb x tɣarṣt u x tsexxart di ṭṭweɛ n l’iman nwem, ad farḥeɣ ɛawed uca ad arecqeɣ akidwem marra. [o] 18 Xenni uřa d kenniw, farḥem uca farḥem ɛawed akidi.

19 Maca necc ssitimeɣ di Siditneɣ Yasuɛ ad awem dd-ssekkeɣ Timutiyu deɣya, ḥima ad iřiɣ x řxaḍar inu xmi ɣa ssneɣ ameddur nwem. [p] 20 Minzi war ɣari danita uřa d ijjen am necc, wenni ikessin s wemnus x mammec iffeɣ umeddur nwem s cḍaret. 21 Minzi marra yarezzun di min nsen, war iǧi di min iǧan n Yasuɛ Lmasiḥ. [q] 22 Maca kenniw tessnem taqeǧebt nnes, belli tuɣa ixeddem akidi di tbarreḥt n Řexbar Aṣebḥan am yijj n mmis ɣar babas. 23 Necc ssitimeɣ ad ɣarwem t-i-dd-ssekkeɣ deɣya, xmi ɣa ẓareɣ mammec ɣa iffeɣ umeddur inu. 24 Maca ttiqqeɣ di Sidi inu, belli ɛawed necc ad ɣarwem dd-aseɣ deɣya.

25 Maca ittɣiř ayi belli tuɣa ittxeṣṣa ad dd-awem ssekkeɣ uma Ipafruditus, wenni d amɛawen inu d amsexxar akidi, maca netta ɛawed d rrasul nwem d amsexxar nwem di min ḥdajeɣ. [r] 26 Minzi tuɣa iweḥḥec aṭṭas ad kenniw iẓar marra, uca tuɣa iksi s wemnus minzi kenniw tesřim belli tuɣa ihřec. 27 S tidett, tuɣa ihřec ař řmewt, maca AREBBI tuɣa yarḥem i-t, war iǧi netta waha, aḥeqqa uřa d necc, ḥima war ɣari ittiři ufeqquṣ x ufeqquṣ. 28 S uyenni ssekkeɣ t s tazřa aṭṭas, ḥima, xmi t ɣa tẓarem ɛawed, ad tfarḥem uca ad dayi yiři drus n wemnus. 29 S uyenni qebřem t di SIDI, s marra řefraḥet, weqqarem inni iǧan am wanita, [s] 30 minzi x ssibbet n řxedmet n Lmasiḥ, tuɣa iqarreb ɣar řmewt am isebbeř tudart n yixef nnes, maḥend ad ikemmeř min ineqṣen di tsexxart nwem i necc.