1 Deɣya ɣar ṣṣbeḥ zic mcawaren imeqqranen n ikehhanen ak-d imɣaren n řgens d imseřmaden n idlisen d marra Jmaɛet Tameqqrant. Nitni carfen Yasuɛ, iwyen t uca sellmen t i Pilaṭus. [a] 2 Isseqsa i-t Pilaṭus: “Ma Cek d Ajeǧid n Wudayen?” Yarra-dd xas, inna as: “Cek tennid t.” [b] 3 Tuɣa imeqqranen n ikehhanen ttcetcan zzayes zeg waṭṭas n tmesřayin. 4 Isseqsa t Pilaṭus ɛawed, inna as: “Ma war dd-tᵉttarid s ca? Xzar, aṭṭas n yinni xak ittcetcan!” [c] 5 War dd-yarri Yasuɛ s walu, ařami itebhet Pilaṭus. [d]

6 Innum iḍeǧeq i ijj n umeḥbus di kuř řɛid, wenni ixsen nitni. [e] 7 Tuɣa din ijjen umi qqaren Bar-Abbas, ḥebbsen t ak-d imɣewwɣen, inni inɣin ijjen deg uɣewweɣ. [f]  [g] 8 Isɣuyy řɣaci uca nitni bdan ttᵉttarren zzayes ḥima ad igg am mammec tuɣa innum ittegg i nitni. 9 Yarra-dd Pilaṭus, inna: “Ma texsem ad awem dd-arxuɣ i Ujeǧid n Wudayen?” 10 Minzi tuɣa issen belli imeqqranen n ikehhanen aqa sellmen t zi řeḥsed. 11 Maca imeqqranen n ikehhanen ɛarnen řɣaci, maḥend ad ttaren ad asen dd-iḍřeq i Bar-Abbas. [h] 12 Pilaṭus inna asen: “Min texsem ad ggeɣ s wenni umi tᵉttřaɣam Ajeǧid n Wudayen?” 13 Sɣuyyen ɛawed: “Ṣellb i-t!” 14 Inna asen Pilaṭus: “Man tuɛeffna i igga?” Xenni arnin di tɣuyyit ɛad ktar: “Ṣellb i-t!” 15 Am tuɣa ixs Pilaṭus ad issarḍa řɣaci, iḍřeq i Bar-Abbas, maca isellem asen Yasuɛ, awarni řami t hettken s urekkuḍ, ḥima ad t ṣellben. [i]

16 Gewwden t iɛeskariyyen ɣar daxeř n řemraḥ n Taddart n Ccraɛ, umi qqaren ‘Prituriyum’, uca ssmunen marra řkumpaniyyet n řɛeskar. [j] 17 Ssyarḍen as ijj n werruḍ d azeggʷaɣ, muden as ijj n ttaj s isennanen uca qqnen as-t, 18 bdan ttseǧamen xas, qqaren as: “Azul xak, a Ajeǧid n Wudayen!” 19 Tuɣa ccaten t ɣar uzeǧif s yijj n weɛmud n uɣanim, ssusufen xas uca uḍaren x ifadden nsen, ɛebden t. 20 Awarni řami t sseḥqaren, kksen as aseřham azeggʷaɣ uca ssyarḍen as arruḍ nnes, xenni ssuffɣen t ḥima ad t ṣellben.

21 Ḥṣaren ijjen wenni dd-ikkin ssenni am dd-yusa zeg iyyar, Cimɛun zi Qayrawan, babas n Aliksandir d Rufus, ḥima ad as yarbu ṣṣalib. [k]  [l] 22 Iwyen Yeccu ɣar wemcan umi qqaren ‘Juljuta’, min ixs ad yini ‘Taceqquft’. [m] 23 Wcin as binu ixeǧḍen s mirru d amarzag, ḥima ad t isuw, maca Netta war ixs ad t isuw. 24 Umi t ṣellben, bḍan arruḍ nnes, ggin xas akeccuḍ x min ɣa iksi kuř ijj zzaysen. [n] 25 Tuɣa tasaɛɛet d třata, aqa-tt d tesɛa n ṣṣbeḥ, umi t ṣellben. 26 Ssibbet n řmewt nnes aqa-tt di tira-ya sennej nnes: ‘Wa d Ajeǧid n Wudayen’. [o] 27 Ṣellben akides tnayen n ixewwanen, ijjen x ufusi nnes, wenneɣni x uzeřmaḍ nnes. 28 Ammu i ttwakemmřent Tira Iqeddsen i iqqaren: “Ittwaḥseb ak-d inni war iseggden.” [p]

29 Inni ssenni dd-ittekken, tuɣa ttceqqafen dayes, tthezzan izeǧifen nsen, nnan: “A Cek wenni i ɣa ihedmen Zzawect Tameqqrant uca ad tt tebnid ɛawed di třata n wussan, [q] 30 senjem Ixef nnec, hwa-dd zi ṣṣalib!” 31 Ammu i t sseḥqaren ɛawed imeqqranen n ikehhanen ak-d imseřmaden n idlisen, nnan: “Tuɣa issenjem inneɣni, maca war izemmar ad issenjem Ixef nnes. 32 Ejj Lmasiḥ, Ajeǧid n Israil, ad dd-ihwa řexxu zi ṣṣalib, ḥima ad nẓar uca ad dayes namen.” Uřa d yinni ittwaṣellben akides, kkwaren t.

33 Umi dd-tiweḍ tsaɛɛet setta, aqa-tt d ḍḍhur, tewḍa-dd taǧest x temmurt marra ař tesɛa, aqa-tt d třata n uɛecci. [r] 34 Di tsaɛɛet tesɛa isɣuy Yasuɛ s tmijja tejhed, inna: “Il, Il, lmana cabaqtani?”, min ixs ad yini: “A AREBBI inu, a AREBBI inu, mayemmi dayi tsemḥed?” [s]  [t]

35 Ca zeg inni din ibedden, umi sřin aya, nnan: “Aqa Netta iřaɣa i Iliya!” 36 Yuzzeř-dd ɣares ijjen, issuff ict n spunxa s řxeǧ, igga i-tt x uɣanim, iwca as ḥima ad isuw. Maca nitni nnan: “Raja! Ejj aneɣ ad nẓar ma ad dd-yas Iliya ḥima ad t-i-dd-issehwa.” [u] 37 Xenni isɣuy Yasuɛ s ict n tmijja tejhed uca isellem arruḥ nnes. 38 Ařeḥḥaf n wadaf ɣar Zzawect Tameqqrant ittwacarreg x tnayen zi sennej ɣar swadday. [v] 39 Umi iẓra řqebṭan n mya i din ibedden zzates, isɣuyyu ammu s jjehd uca xenni ibedd usuffeɣ n nnefs, inna: “S tidett tuɣa Bnadem-a d Mmis n AREBBI!” [w] 40 Tuɣa din ɛawed timɣarin xezzarent i-dd zi řaggʷaj, jar asent ɛawed Maryam n Majdala d Maryam, yemmas n Yaɛqub, amaẓuẓ, u n Yusis, d Salumi. [x] 41 tinni t-i-dd-iḍfaren, sexxarent xas umi t tuɣa di Ljalil. Tuɣa din uřa d aṭṭas n timɣarin nneɣnit tinni tuɣa akides i dd-igeɛɛden ɣar Urcalim. [y]

42 Řami dd-tiweḍ tmeddit n Usewjed, tameddit nni iǧan qbeř i ssebt, [z] 43 yusa-dd Yusuf zi Ramta, ijj n umcawar icennɛen n Jmaɛet Tameqqrant, wenni tuɣa ittrajan Tageldit n AREBBI. Uca netta izɛem ad yadef ɣar Pilaṭus maḥend ad as ittar arrimet n Yasuɛ. 44 Itebhet Pilaṭus umi immut ammu deɣya. Iřaɣa-dd i řqebṭan n mya, isseqsa t, ma immut qbeř řweqt. [aa] 45 Umi ifhem man aya zi řqebṭan n mya, iwca arrimet i Yusuf. 46 Isɣa Yusuf řecfen n řeqṭen azdad, iksi t zi ṣṣalib, icfen i-t di řecfen nni, issars i-t deg wenḍeř i xebcen di sseǧaḥ uca isseqnunni ict n teṣḍart x tewwart n wenḍeř. [bb] 47 Tuɣa Maryam n Majdala d Maryam, yemmas n Yusi, ẓrint mani t ssarsen.