1 Ikkar, yuyur ssenni uca yiweḍ ɣar temmurt n Yahudiyya, ɣar wemcan n uẓekkwi n L’Urdun. Munen-dd xas řɣaci aṭṭas u ɛawed tuɣa isseřmad i-ten am mammec tuɣa innum. [a] 2 Usin-dd ɣares Ifarisiyyen, sseqsan t ḥima ad t jarrben: “Ma iḥeǧeř i weryaz ad iǧef i temɣart nnes?” 3 Yarra-dd, inna asen: “Min xef tuɣa kenniw yumur Musa?” 4 Nnan: “Musa iwca ttesriḥ ad tᵉttwari tebrat n waǧaf maḥend aryaz ad as iǧef.” [b] 5 Yarra-dd Yasuɛ, inna asen: “X ssibbet n řeqsaḥet n wuřawen nwem aqa yura awem tawṣeyyet-a, 6 maca zi beddu zi mani tᵉttwagg ddunect, ixřeq i-ten-dd AREBBI d awtem d tewtemt. [c] 7 S uyenni ad ismeḥ weryaz di babas d yemmas, ad iqqen ɣar temɣart nnes, [d] 8 uca tnayen idsen xenni ad iřin d ict n ddat, uca ammu war ttiřin ɛad d tnayen, maca ad iřin d ict n arrimet. [e] 9 S uya min issmun AREBBI, war t ibeṭṭi bnadem.” [f]

10 Di taddart sseqsan t imeḥḍaren nnes ɛawed x man aya. 11 Inna asen: “Wi ɣa iǧfen i temɣart nnes uca ad yawi tenneɣnit, aqa netta izna. [g] 12 U mařa tamɣart teǧef i weryaz nnes, uca xenni ad tiři i weryaz nneɣni, aqa nettat tezna.”

13 Iwyen as-dd iḥenjiren ḥima ad ten iḥada, maca imeḥḍaren webbxen inni ten dd-yiwyen. [h] 14 Umi iẓra Yasuɛ man aya, ixeyyeq, inna asen: “Jjem iḥenjiren ad ɣari dd-asen, war ten mennɛem, minzi Tageldit n AREBBI n yinni iǧan am nitni. [i] 15 S tidett, Necc ad awem iniɣ: “Wi war iqebbřen Tageldit n AREBBI am yijj n uḥenjir, aqa ɛemmarṣ war ɣares ittidef.” 16 Idarreɛ asen, uca am xasen issars ifassen nnes, ibark i-ten. [j]

17 Umi iffeɣ maḥend ad yuyur deg webrid, yuzzeř-dd ɣares ijjen, iwḍa as ɣar ifadden uca isseqsa t, inna: “A Amseɣɣar Aṣebḥan, min ɣa ggeɣ ḥima ad warteɣ Tudart ittduman?” [k] 18 Inna as Yasuɛ: “Mayemmi d ayi tᵉttřaɣid: ‘Aṣebḥan’? Uřa d ijj war iǧi d aṣebḥan, mɣir Ijjen waha: AREBBI! 19 Cek tessned tiweṣṣa: ‘War zenni, war neqq, war tticar, war cehhed s ẓur, war ttɣecca, weqqar babac d yemmac.’ ” [l] 20 Yarra-dd, inna as: “Wah, a Amseɣɣar, aqa marra tina tuɣa ḍeffareɣ tent zi temẓi inu.” 21 Ixzar dayes Yasuɛ uca issɛizz i-t, inna as: “Teqqim icten ɛad: Uyur, zenz marra min ɣarek, ewc i-t i imezřaḍ uca ad ɣarek yiři ijj n řkenz deg ujenna. Xenni ksi ṣṣalib nnec, ḍfar ayi-dd!” [m] 22 Maca netta tuɣa iḥzen s wawař nni, uca iruḥ icḍen, minzi tuɣa ɣares aṭṭas n wagřa.

23 Ixzar Yasuɛ ɣar imeḥḍaren nnes, inna asen: “Mecḥař iwɛar x yinni ɣar iǧa agřa ḥima ad adfen ɣar Tgeldit n AREBBI!” [n] 24 Tbehten imeḥḍaren zeg wawařen nnes. Maca Yasuɛ iɛawed iṭṭef deg wawař, inna asen: “A tarwa inu, mecḥař iwɛar x yinni ittcařan x wagřa nsen maḥend ad dd-adfen ɣar Tgeldit n AREBBI! 25 Ihwen ad yadef weřɣem zi tiṭṭ n tsineft zeg wadaf n bu-wagřa ɣar Tgeldit n AREBBI.” 26 Immarni daysen ɛad unexřiɛ, nnan i wayawya: “Wi izemmaren xenni ad ittwassenjem?” 27 Ixzar daysen Yasuɛ, inna: “Ɣar iwdan war izemmar, maca ɣar AREBBI war iǧi amenni, minzi aqa ɣar AREBBI kuřci di tzemmar nnes.” [o]

28 Ibda Buṭrus ad yini: “Xzar, aqa neccin nejja kuřci, neḍfar i Cek-dd.” [p] 29 Yarra-dd xas Yasuɛ, inna: “S tidett, Necc ad awem iniɣ: War din iǧi uřa d ijjen wenni isemḥen di taddart niɣ deg aytmas niɣ di yessmas niɣ di babas niɣ di yemmas niɣ di temɣart niɣ di tarrawt uřa deg iyyaren di ṭṭweɛ inu u di ṭṭweɛ n Řexbar Aṣebḥan, 30 i war ikessin mya n tseqqar. Řexxu di řweqt-a ad iksi tudrin d aytmas d yessmas d tyemmatin d tarrawt d yeyyaren ak-d umarret, uca di zzman i dd ɣa yasen ad iksi Tudart ittduman. 31 Maca aṭṭas n yinni iǧan d imezwura ad iřin d ineggura, uca inni iǧan d ineggura ad iřin d imezwura.” [q]

32 Tuɣa-ten deg webrid maḥend ad geɛɛden ɣar Urcalim u Yasuɛ tuɣa izwar asen. Nitni tuɣa ttbehten uca ggʷeden umi t-i-dd-ḍeffaren. Iksi tenɛac ɣar uɣezdis uca ibda iqqar asen x min d as ɣa imsaren, inna: [r] 33 “Xzar, neccin ad ngeɛɛed ɣar Urcalim u Mmis n bnadem ad immewc deg ifassen n imeqqranen n ikehhanen d imseřmaden n idlisen, u nitni ad xas ḥekmen s řmewt, ad t sellmen i řegnus. 34 Ad t sseḥqaren, ad t hettken s urekkuḍ, ad xas ssusfen, ad t nɣen, uca deg wass wiss třata ad ikkar.”

35 Yusa-dd ɣares Yaɛqub d Yuḥanna, tarwa n Zabdi, nnan as: “A Amseɣɣar, nexs ad aneɣ tegged marra min zzayek ɣa nettar.” [s] 36 Inna asen: “Min texsem ad awem ggeɣ?” 37 Nnan as: “Ewc aneɣ ad neqqim, ijjen ɣar ufusi nnec u wenneɣni ɣar uzeřmaḍ nnec, deg uɛuǧi nnec.” 38 Maca Netta inna asen: “Aqa war tessinem ca min tᵉttarem. Ma tzemmarem ad teswem řkas i zi ɣa sweɣ Necc niɣ ad tᵉttwassɣeḍṣem s useɣḍeṣ i zi ɣa ttwassɣeḍṣeɣ Necc?” [t] 39 Nnan as: “Nzemmar!” Inna asen Yasuɛ: “Řkas i ɣa sweɣ Necc, ad t teswem, u aseɣḍeṣ i zi ttwassɣeḍṣeɣ Necc, ad zzayes ttwassɣeḍṣem, ◼10:39 afessar - řkas i tuɣa iswa Lmasiḥ aqa-t d řeɛdab i iksi x ṣṣalib umi aɣḍab n SIDI ihwa xas di ṭṭweɛ n marra imednab i din iǧan u ad din iřin x řeḥsab ṣṣifet n Adam wenni ixḍan x SIDI AREBBI (xzar Ica. 53:4-7).  [v] 40 maca aɣimi x yefus inu niɣ x uzeřmaḍ inu, war ɣari iǧi deg ufus inu maḥend ad t wceɣ, maca ad immewc i yinni umi ittwassewjed.” [w]

41 Řami sřin ɛecra n imeḥḍaren man aya, xeyyqen x Yaɛqub d Yuḥanna. [x] 42 Xenni iřaɣa asen-dd Yasuɛ ɣares, inna asen: “Kenniw tessnem belli inni ittwaḥesben d řḥukkam n řegnus, aqa ḥekkmen xasen, u imeqqranen nsen, aqa ttṣeǧaḍen xasen. [y] 43 War ittiři ammu jar awem, maca wenni ixsen ad idweř d ameqqran jar awem, aqa netta ad yiři d amsexxar nwem, [z] 44 u wenni ixsen ad yiři d amezwaru jar awem, aqa netta ad yiři d amsexxar i marra. 45 Minzi ɛawed Mmis n bnadem war dd-yusi, ḥima ad xas sexxaren, maca ḥima ad ixdem, ad iwc tudart nnes d aṣřaḥ i waṭṭas n iwdan.” [aa]

46 Iwḍen-dd ɣar Ariḥa. Řami dd-iffeɣ Yasuɛ zi Ariḥa ak-d imeḥḍaren nnes d waṭṭas n řɣaci, tuɣa Timawus, mmis n Timawus, ijj n weryaz d adarɣař, iqqim deg webrid, ittettar. [bb] 47 Umi isřa belli Yasuɛ Nnaṣiri aqa-t din, ibda isɣuyyu, iqqar: “A, Mmis n Dawud, arḥem ayi!” 48 Webbxen t aṭṭas ḥima ad isqar, maca netta iqqim isɣuyyu ktar: “A Mmis n Dawud, arḥem ayi!” 49 Ibedd Yasuɛ uca yumur ad xas dd-řaɣan. Řaɣan-dd i udarɣař, nnan as: “Egg uř! Kkar, aqa ittřaɣa-dd xak!” 50 Inḍar udarɣař ajeǧab nnes, ikkar uca yusa-dd ɣar Yasuɛ. 51 Yarra-dd Yasuɛ, inna as: “Min texsed ad ac t ggeɣ?” Inna as udarɣař: “A Amseřmad inu, ḥima ad twařiɣ.” 52 Inna as Yasuɛ: “Xzar, l’iman nnec iwca ac Tudart!” Řexdenni idweř ittwařa, uca iḍfar i-t deg webrid. [cc]